Ahap Lé Myìqhtoi Mihkai-a Taî Htuqhtîng É Hkyô
22
Aram byu pé eq Isira-elaq byu pê é gyoro má sum zân majan a htoq nghut ri. 2 Nghut kôlhang, sum zân nghû râ zàn má, Yudaq hkóhkâm Yehoshahpat gi, Isira-elaq hkóhkam chyáng ê jé ri. 3 Haû Isira-elaq hkóhkâm gi, yhâng é zaugun wuì lé, “Ramot Gile-at wà gi, ngá-nhúng eq sêng é wà nghut kôlhang, ngá-nhúng gi, zim za nyì mù, Aram hkóhkam é lòq mai a lú yu é hkyô lé, núngmòq a sé kó lhú?” ga taî ri.4 Haû mù, Ahap gi, Yehoshahpat lé, “Ramot Gile-at wà lé majan ê zan râ matú, nàng, ngò eq rahá cháng râ lhú?” ga myî ri.
Haû jáng, Yehoshahpat gi, Isira-elaq hkóhkâm lé, “Ngò gi, nàng su, ngá byu pé gi, náng é byu pé su, ngá myang pé gi, náng é myang pé su, nghut nyi lhê.” ga tû taî ri. 5 Nghut kôlhang, Yehoshahpat gi, Isira-elaq hkóhkâm lé, “Haû Yhûmsîng Garai lé hí myî wú sháng.” ga le taî ri.
6 Haû mù, Isira-elaq hkóhkâm gi, myìqhtoi myi shô kô lé rahá ji tsîng to luî, yhángmòq lé, “Ngò gi, Ramot Gile-at wà lé majan ê zan râ matú, e le, gè râ lhú, a gè râ lhú?” ga myî ri.
Yhángmòq gi, “Ê aq, hkâsu mù gâ le, haû Yhûmsîng Garai gi, wà haú lé, hkóhkâm náng é lòq má àp byi râ nghut lhê.” ga tû taî akô nghut ri.
7 Nghut kôlhang, Yehoshahpat gi, “Shí má, ngá-nhúng wó myî wú râ nghut é, haû Yhûmsîng Garaî é myìqhtoi rayùq yùq a nyì lo kó lhú?” ga myî ri.
8 Isira-elaq hkóhkâm gi, Yehoshahpat lé, “Haû Yhûmsîng Garai lé wó myî wú râ matú, Imla é yhang zo Mihkai-a gâ é myìqhtoi rayùq nyi ashî nghut ri. Nghut kôlhang, Ngò gi, haú yùq lé a nguì; hkâsu mù gâ le, yhang gi, ngò eq séng luî, hkâ-nhám le ge é hkyô rajung lháng myìqhtoi a htoi byî wú é za, a ge é baú htoi byî ri.” ga tû taî ri.
Yehoshahpat gi, “Haû su nghû hkóhkâm taî jung a nghut.” ga tû taî ri.
9 Haû mù, Isira-elaq hkóhkâm hpó gi, yhâng é zaugun wuì mâ é rayùq lé wùt yù mù, “Imla é yhang zo Mihkai-a lé, radá dâm ê shuî lò àq.” ga taî ri.
10 Isira-elaq hkóhkâm eq Yudaq hkóhkâm Yehoshahpat gi, yhángnhik é hkóhkâm hking lé wùt chûng mù, Samariq wà wàng hkum nâm mâ é chyârâng, yhûmsing é hkóhkâm tángmyhâng má zung tô é nghut luî, myìqhtoî pé bànshoq gi, yhángnhik é hí má myìqhtoi htoî nyi bum akô nghut ri. 11 Ahkuî, Hkenana é yhang zo Zedeki-a gi, jòqtoq hkyuî pé saî yù mù, “Haû Yhûmsîng Garai taî le, ‘Nàng gi, Aram byu pé lé wó lhoqhtên pyám shoq, hkyuî shí pê èq yhángmòq lé htung râ dùt lhê.’ gâ ri.” ga taî ri.
12 Gótû myìqhtoî pé bànshoq le, haû eq rajung za myìqhtoi htoî nyi bum akô nghut ri. Yhángmòq gi, “Ramot Gile-at wà lé htim keq; ûngmyuq hkyô wó keq; hkâsu mù gâ le, haû Yhûmsîng Garai gi, hkóhkam é lòq má wà haú lé àp byi râ nghut lhê.” ga taî bum akô nghut ri.
13 Haú u, Mihkai-a lé ê shui râ matú e ló sû, yhang lé, “Wú aq, gótû myìqhtoî pé gi, rahtê za kut, hkóhkâm ûngmyuq hkyô wó râ matú chyat htoi byî akô nghut ri. Haû mù, nàng le, yhángmòq eq rajung za ge é dông taí byi aq.” ga taî ri.
14 Nghut kôlhang, Mihkai-a gi, “Haû Yhûmsîng Garai rû dui nyi é eq rajung za, ngò gi, haû Yhûmsîng Garai mai ngo lé taî kyô é lé za, yhang lé taî kyo râ nghut lhê.” ga taî ri.
15 Yhang jé jáng, hkóhkâm gi, yhang lé, “Mihkai-a ê, ngá-nhik gi, Ramot Gile-at wà lé htim râ matú, e le gè râ lhú? A nghut jáng, a gè râ lhú?” ga lhom myî ri.
Yhang gi, “Ê htim keq, ûngmyuq hkyô wó keq; hkâsu mù gâ le, haû Yhûmsîng Garai gi, hkóhkam é lòq má wà haú lé àp byi râ nghut lhê.” ga tû taî ri.
16 Hkóhkâm gi, yhang lé, “Haû Yhûmsîng Garaî é myìng mai tengmán dang taî é mai lai luî, nàng, ngo lé gótû haî le hkâtaí nghû, nang lé ngò hkâ-myhó dâm taî pun ra râ lhú?” ga taî ri.
17 Haú hkûn, Mihkai-a gi, “Isira-elaq byu pé bànshoq gi, sau zúng sû a nyi é sau pé su, bùm pé má byo myín bum é lé, ngò myang ri. Haû mù, Yhûmsîng Garai le, ‘Byù shí bang gi, yhûmsîng a wó kó nghut ri. Yùq hkangmó gi, yhûm shut ngón za ló kó sháng gàq.’ ga taî ri.” ga tû taî ri.
18 Isira-elaq hkóhkâm gi, Yehoshahpat lé, “Yhang gi, ngò eq séng luî, hkâ-nhám le ge é hkyô rajung lháng myìqhtoi a htoi byî wú é za, a ge é baú htoi byî ri nghû, nang lé ngò taî kyo bê a nghut lhí?” ga taî ri.
19 Mihkai-a gi, “Haû mù, haû Yhûmsîng Garaî é dang lé gyo aq; haû Yhûmsîng Garai gi, yhâng é hkóhkâm tángmyhâng htoq má zung to mù, yhâng é lòqpai lòqyò lhînghkyùq má mauhkûng bang ajùm ayò bànshoq yàp tô bum é lé, ngò myang ri. 20 Haû Yhûmsîng Garai gi, ‘Ahap, Ramot Gile-at wà lé ê htim mù, yhang haú má ê shi byùq râ matú, yhang lé ó yùq ê lâng nghoq râ lhú?’ ga taí jáng, rayùq gi, shí hkyô ga, gótû rayùq gi, hé hkyô ga taî bum akô nghut ri. 21 Lohtáng má, sô rayùq lé lô mù, haû Yhûmsîng Garaî é hí má yàp to luî, ‘Yhang lé ngò ê lâng nghoq râ nghut lhê.’ ga taî ri.
22 Haû Yhûmsîng Garai gi, ‘Hkâsu kut ê lâng nghoq râ lhú?’ ga myi jáng, yhang gi, ‘Ngò htoq e ló mù, yhâng é myìqhtoî pé bànshoq bâng é nhut má mhaû é sô ê dùt râ nghut lhê.’ ga taî ri.
Haû Yhûmsîng Garai gi, ‘Nàng, yhang lé wó lâng nghoq yû râ nghut lhê. Haú dông ê kut àq.’ ga taî ri.
23 Haû mù, haû Yhûmsîng Garai gi, náng é myìqhtoî pé bànshoq bâng é nhut má mhaû é sô kat byi bê nghut ri. Haû Yhûmsîng Garai gi, náng é matú ihkyùp jé nhâng râ hkunmó hkyó bê nghut ri.” ga xoq taî ri.
24 Haú hkûn, Hkenana é yhang zo Zedeki-a toq ê mù, Mihkai-a é bowâm má pyuq mù, “Haû Yhûmsîng Garaî é sô gi, nang lé wó nyô râ matú, ngá chyáng mai hkâ-nhám htoq ló é lhú?” ga taî ri.
25 Mihkai-a gi, “Nàng, ló haq râ ga ahkaû wàp shut wang ló é buìnyì má, myàng râ nghut lhê.” ga tû taî ri.
26 Isira-elaq hkóhkâm gi, “Mihkai-a lé chyup yû mù, wà zau Amon eq hkóhkam é yhang zo Yo-ashi chyáng shuî ló luî, 27 ‘Hkóhkâm shî su ga taî ri; Ngò ngón za dum taû lo é hkûn jé shoq, shí yùq lé htóng má lhûng to mù, mùk eq wuì za byi keq.’ gâ ri nghû keq.” ga taî ri.
28 Mihkai-a gi, “Nàng ngón za wó dum taû lò râ ru nghut le gi, ngò dông mai haû Yhûmsîng Garai taí berâ a nghut.” ga taî ri. Hau htoq agó, yhang gi, “Shiwa byù bànshoq bang ê, ngá é dang pé lé gyô xûm to keq!” ga xoq taî ri.
Ramot Gile-at Wà Má Ahap Sat Huî É Hkyô
29 Haû mù, Isira-elaq hkóhkâm eq Yudaq hkóhkâm Yehoshahpat gi, Ramot Gile-at wà shut dòq e ló bekô nghut ri. 30 Isira-elaq hkóhkâm gi, Yehoshahpat lé, “Ngò gi, mâyû gyèhking htaî chûng mù, majan pá má wang ê râ nghut lhê; nàng kúm gi, náng é hkóhkâm buhîng wùt chûng aq.” ga taî ri. Haû mù, Isira-elaq hkóhkâm gi, mâyû gyèhking wùt chûng mù, majan pá shut wang e ló bê nghut ri.
31 Haú u, Aram hkóhkâm gi, yhâng é gyèlhêng kon zau súm xe í yùq lé, “Isira-elaq hkóhkâm lé htîm é mai lai luî, tiq é kô é ó yùq lé le majan hkâzan kó.” ga hkunmó hkyô to bê nghut ri. 32 Gyèlhêng zau pé gi, Yehoshahpat lé myàng kôjáng, “Haû gi, Isira-elaq hkóhkâm hkyak nghut bê nghut ri.” ga myìt yù kômù, yhang lé lhing htim bekô nghut ri; nghut kôlhang, Yehoshahpat wùt garû kat jáng, 33 haú yùq gi, Isira-elaq hkóhkâm a nghut é hkyô lé, gyèlhêng zau pé myàng kômù, yhángmòq gi, yhang lé a châng hkat lô é za lhing ló bekô nghut ri.
34 Nghut kôlhang, rayùq sû gi, yhâng é lai lé bìk lhâm kat é nghut mù, Isira-elaq hkóhkam é gyèhking xoq é gyoro má ló bìk záng bê nghut ri. Hkóhkâm gi, yhâng é gyèlhêng kon sû lé, “Ngò dàm dap bê nghut ri; lhêng lhîng mù, ngo lé majan pá mai shuî htoq ló aq.” ga taî ri. 35 Haú nyí ra-nyí buì yhang, majan htan dik byùq mù, hkóhkâm gi, Aram byu pê shut myòqdong hû luî, yhâng é gyèlhêng htoq má nghe yàp tô ri. Yhâng é dàm mâ é sui gi, gyèlhêng htoq má yui gyó nyi é nghut mù, yhang gi, haú myínhtâng shi byùq bê nghut ri. 36 Buì wang ló zó má, “Yùq hkangmó gi, ó le ô é yhûm, ó le ô é mau shut ló keq ô!” ga gyè hpúng gón má wùt garû taî bum akô nghut ri.
37 Haû mù, hkóhkâm shi byùq bê nghut luî, yhâng é màng lé Samariq wà shut wàq ló mù, myhup yhûm pyám bekô nghut ri. 38 Yhángmòq gi, gyèlhêng haú lé, shiwa myhî pé gùng chî é jang nghut é, Samariq wà mâ é wuìhtum má chî é nghut luî, haû Yhûmsîng Garaî é dang eq rajung za, hkuî pé gi, yhâng é sui lé yòq zô pyám bê nghut ri.
39 Ahap ùp é gótû hkyô pé lé le, yhang kut laî lo é hkyô bànshoq lé le, yhang saî é hkóhkâm wâng eq xângzuì mhôn tô é hkyô lé le, yhang xuq gingtîng tô é wà mó pê é hkyô lé le, Isira-elaq hkóhkam pê é mhô-myi shindâm laiká bùk má tsing kâ tô lhê, a nghut lhí? 40 Ahap gi, yhâng é îchyí îwâ pê chyáng ló bo bánnô byùq bê nghut ri. Haû mù, yhang zo Ahazi-a gi, yhâng é hkóhkâm hkô má zùng bê nghut ri.
Yudaq Hkóhkâm Yehoshahpat
41 Isira-elaq hkóhkâm Ahap hkóhkâm kut é myí zan zàn má, Asa é yhang zo Yehoshahpat gi, Yudaq hkóhkâm dùt bê nghut ri. 42 Yehoshahpat gi, hkóhkâm dùt é hkûn chyungxe zànwut súm xe ngo zân bò bê nghut ri; yhang gi, Yerusalem wà mó má í xe ngo zàn ùp ri. Yhâng nu gi, Shilahi é yhang zo byìzo Azuba ga sû nghut ri. 43 Yhang gi, hkyô hkat hkangmó má, yhâng wa Asa é hkyô pé cháng mù, haú mai hkyô a nghoq ló byùq nghut ri. Yhang gi, haû Yhûmsîng Garaî é myòq hí má jo têng é hkyô kut ri. Nghut kôle, myhang é hparà noq jowò pé lé gi, a huî sêng pyâm é nghut mù, shiwa byu pé gi, xoq luî, haú jowò pé má, shigu hkungga pé nhông byi mù, namngón jung nyhê nhông byî nyi akô nghut ri. 44 Yehoshahpat le, Isira-elaq hkóhkâm eq nguì ngón hkyô yu tô é nghut ri.
45 Yehoshahpat ùp é gótû hkyô pé lé le, yhang wó ûngmyuq é hkyô pé eq majan zân é hkyô pé lé le, Yudaq hkóhkam pê é mhô-myi shindâm laiká bùk má tsing kâ tô lhê, a nghut lhí? 46 Yhang gi, yhâng wa Asa é pyàt mai myìt gyó tô é hparà noq jang mâ é shiwa hpô pé lé le, haú mau mai lhoqhtoq pyâm ri. 47 Haú hkûn, Edom mau má hkóhkâm a nyì; mau zau shèq ùp nyi ri.
48 Yehoshahpat gi, Ohpira mau shut hîng ê hto râ ga, wuìloq kut râ Tarishi wuìsanghpo pé tsuq ri; nghut kôlhang, wuìsanghpo haú pé gi, Ezi-on Gebera jowò má htên gyòp byùq mù, a wó ê kô nghut ri. 49 Haú hkûn, Ahap é yhang zo Ahazi-a gi, Yehoshahpat lé, “Ngá duìnhâng zoshâng wuì lé, náng é duìnhâng zoshâng wuì eq rahá wuìsanghpo bo ji nhâng àq.” ga taî é nghut kôlhang, Yehoshahpat gi, lhom he-ngìk pyâm ri.
50 Hau htâng, Yehoshahpat gi, yhâng é îchyí îwâ pê chyáng ló bo bánnô byùq bê nghut mù, yhâng é îchyí îwa Dawiq é wà má, yhángmòq eq rahá myhup yhûm pyâm é hui bê nghut ri. Haû mù, yhang zo Yehoram gi, yhâng é hkóhkâm hkô má zùng bê nghut ri.
Isira-elaq Hkóhkâm Ahazi-a
51 Yudaq hkóhkâm Yehoshahpat hkóhkâm kut é raxe nyhit zan zàn má, Ahap é yhang zo Ahazi-a gi, Samariq wà má Isira-elaq hkóhkâm dùt mù, Isira-elaq mau lé í zân ùp ri. 52 Yhang gi, Yhûmsîng Garaî é myòq hí má agè ashop é hkyô kut ri; hkâsu mù gâ le, yhâng nu yhâng wâ é hkyô pé má le, Isira-elaq byu pé lé mara shuî kut shut sû, Nebat é yhang zo Yerobo-am é hkyô pé má le, châng é yánmai nghut ri. 53 Yhang gi, yhâng wa kut é eq rajung za, Balaq hparà lé noqkuq dójaú mù, Isira-elaq é Garai Gasang, haû Yhûmsîng Garai lé nhikjum lhoqyô ri.