Nabot É Tsibyiq Hkyâm
21
Haú hkyô dùt é htâng má, mú ralhum dum htoq ri; Yezirela wà byù Nabot gi, yhang eq sêng é tsibyiq hkyâm rahkyâm wó ri; hkyâm haû gi, Yezirela wà má jòq é nghut mù, Samariq hkóhkâm Ahap é hkóhkâm wâng eq chyâng ri. 2 Haû mù, Ahap gi, Nabot lé, “Náng é tsibyiq hkyâm gi, ngá é hkóhkâm wâng eq chyâng é yánmai, hkyâm haú lé ngò mhan-haq hpoqnòq hkyâm kut râ matú, ngo lé byi aq. Hkyâm hau é matú, ngò gi, nang lé je ge é tsibyiq hkyâm htaí byi râ nghut lhê; haû a nghut jáng, nàng ô nau é nghut le gi, hkyâm haû eq gíngdán é haî lé nghut kôle, ngò, nang lé byi râ nghut lhê.” ga taî ri.3 Nghut kôlhang, Nabot gi, “Haû Yhûmsîng Garai gi, ngá é îchyí îwâ pê é silî wunlî maumyî lé, nang lé byi râ matú hkûm zing tô ri.” ga tû taî ri.
4 Haû mù, Ahap gi, Yezirela wà byù Nabot mai, “Ngò gi, ngá é îchyí îwâ pê é silî wunlî maumyî lé, nang lé byi râ a nghut.” ga taî é yánmai, myìt myo myìt chiq é eq nhikjum yo mù, yhûm shut ló bê nghut ri. Yhang gi, yhâng é hpyang má nùnghtáng lhik kut lèq to mù, zang le a zo nhô kut ri.
5 Yhâng yhûmsîng myhí Yezebela wang lé lô mù, yhang lé, “Nàng gi, haî mù myìt myo ûng wôm nyi lhê lhú? Haî mù zang a zo nhô kut lhê lhú?” ga myî ri.
6 Yhang gi, yhâng é yhûmsîng myhí lé, “Ngò, Yezirela wà byù Nabot lé, ‘Náng é tsibyiq hkyâm ngo lé ung byi aq; nàng ô nau é nghut le gi, ngò, hau é malaî gótû tsibyiq hkyâm htaí byi râ nghut lhê.’ nghû taî é nghut lhê; nghut kôlhang, yhang gi, ‘Ngò, nang lé ngá é tsibyiq hkyâm byi râ a nghut.’ ga taî ri; hau é yánmai nghut lhê.” ga tû taî ri.
7 Yhâng é yhûmsîng myhí Yezebela gi, “Nàng gi, Isira-elaq mîngdán lé ùp é hkóhkâm nghut lhê, a nghut lhí? Toq aq, zang zo mù, ngón za nyi to aq. Yezirela wà byù Nabot é tsibyiq hkyâm lé, ngò, náng lé yù byi râ nghut lhê.” ga taî ri.
8 Haû mù, Yezebela gi, Ahap é myìng mai laiká ká mù, yhâng é dizìk lé htûng tap luî, Nabot é wà má yhang eq rahá nyi é sûwún wuî eq xânghpoq nge wó bâng chyáng, laiká haû tsing dé kat ri. 9 Yhang gi, laiká haú pé má,
“Zoshuq túm râ buìnyì ra-nyí lé taî pyô mù, shiwa byu pê chyáng mâ é je réng jowò má, Nabot lé zùng nhâng keq. 10 Hau htoq agó, yhâng é hí má, ashop é byù í yùq lé le zùng nhang to mù, yhángnhik lé, nàng gi, Garai Gasang lé le, hkóhkâm lé le, nhîng pyám sû nghut ri nghû sàksé kut nhâng keq. Hau htâng, yhang lé shuî htoq yû mù, lùqgòk èq dú sat pyám keq.” ga kâ tô ri.
11 Haû mù, Nabot é wà má nyi é sûwún wuî eq xânghpoq nge wó bang gi, Yezebela mai yhángmòq lé kâ hun kat é laiká pé má kâ shit kyô tô é eq rajung za kut bekô nghut ri. 12 Yhángmòq gi, zoshuq tûm é buìnyì lé taî pyô kômù, shiwa byu pê chyáng mâ é je réng é jowò má Nabot lé zùng nhang tô akô nghut ri. 13 Hau htâng, ashop é byù í yùq gi, Nabot é hí má lé zûng kômù, shiwa byu pê é hí má, “Nabot gi, Garai Gasang lé le, hkóhkâm lé le, nhîng ri.” ga mara hun akô nghut ri. Haû mù, yhángmòq gi, Nabot lé wà shinggan shut she htoq ê kômù, lùqgòk èq dú sat pyám bekô nghut ri. 14 Hau htâng, yhángmòq gi, Yezebela chyáng, “Nabot gi, lùqgòk èq dú sat pyâm é hui bê nghut ri.” ga dang kyô kat akô.
15 Yezebela gi, Nabot lé lùqgòk èq dú sat pyám bê gâ é hkyô lé wó gyo eq yhang, Ahap lé, “Toq aq, nang lé a ung byi ga taî é, Yezirela wà byù Nabot é tsibyiq hkyâm lé sing yù àq hkoi. Nabot gi, chyungxe a dui nyì lo, shi byùq bê nghut ri.” ga taî ri. 16 Ahap gi, Nabot shi byùq bê gâ é hkyô lé wó gyo jáng, toq mù, Nabot é tsibyiq hkyâm lé sing yù râ matú gyó ê bê nghut ri.
17 Haú hkûn, haû Yhûmsîng Garaî é mungdang Tishibi byù Eliya chyáng jé é gi, 18 “Samariq wà má ùp nyi é, Isira-elaq hkóhkâm Ahap lé hui râ matú gyó ê àq. Yhang gi, Nabot é tsibyiq hkyâm lé sing yù râ ga gyó ê mù, ahkuî hkyâm haú má nyi tô ri. 19 Nàng gi, yhang lé, ‘Haû Yhûmsîng Garai shî su ga taî ri; nàng gi, byù rayùq lé sat pyám mù, yhâng é sùtzè lé le sing yu pyám byî lhê lhú?’ nghû taí mù, ‘Haû Yhûmsîng Garai shî su ga taî ri; hkuî pé gi, Nabot é sui lé yòq é jang má, náng é sui lé le yòq kôrâ nghut lhê!’ nghû xoq taí aq.” gâ ri.
20 Ahap gi, Eliya lé, “Ngá é gyè ê, nàng, ngo lé myang hô bu-nhung lhî!” ga taî ri.
Eliya gi, “Ngò, nang lé myang hô bê nghut lhê; hkâsu mù gâ le, nàng gi, haû Yhûmsîng Garaî é myòq hí má, agè ashop é hkyô kut râ matú, náng gûng nàng ung zô pyám bê nghut ri. 21 Haû mù, Yhang gi, nang lé, ‘Ngò gi, náng chyáng ihkyùp mó jé nhâng râ nghut lhê. Ngò gi, náng é awùt ashîn pé lé chyut shûm pyám râ nghut mù, Isira-elaq ming mâ é jùn nghut nghut, lùthkyô wó sû nghut nghut, Ahap mâ é yùqzo hkangmó lé chyung hpyit râ nghut lhê. 22 Nàng gi, Ngo lé nhikjum yo nhâng mù, Isira-elaq byu pé lé mara kut shut nhâng bê nghut é yánmai, Ngò gi, náng yhûm lé, Nebat é yhang zo Yerobo-am é yhûm lé su le, Ahiya é yhang zo Basha é yhûm lé su le, kut râ nghut lhê.’ ga taî ri.
23 Hau htoq agó, haû Yhûmsîng Garai gi, Yezebela eq séng luî, ‘Hkuî pé gi, Yezirela wàhkûm nàm má, Yezebela lé zô pyám kôrâ nghut lhê.’ ga taî ri.
24 Hkuî pé gi, Ahap eq sêng é, haû wà hkaû má shi byùq é bang lé zô pyám kôrâ nghut mù, nghoq pé gi, pá pé má shi byùq é bang lé hte zô pyám kôrâ nghut lhê.” ga tû taî ri.
25 (Ahap su, yhâng é yhûmsîng myhí Yezebela wum taî tsuq luî, haû Yhûmsîng Garaî é myòq hí má agè ashop hkyô kut râ matú, yhûmsing gùng lé ung zô pyâm é byù, ó yùq le a nyì nghut ri. 26 Yhang gi, Isira-elaq byu pê é hí mai Yhûmsîng Garaî èq hkat htoq pyâm é Amori byu pé kut é su, ashop dik é dông hparà hpôlhô pê htâng châng nyi ri.)
27 Ahap gi, dang haú pé lé wó gyo jáng, yhâng é mèbu pé lé lâng cheq pyám luî, jimê tû wùt mù, zoshuq tûm ri. Yhang gi, jimê má lèq yâng é htoq agó, yhó le yón sô wún bê nghut ri.
28 Haú hkûn, haû Yhûmsîng Garaî é mungdang Tishibi byù Eliya chyáng jé é gi, 29 “Ahap, Ngá é hí má, yhânggùng yhang i-myìt hkâ-í lhoqnyhûm bê nghut é hkyô lé, nàng byu myang ri lhú? Yhang gi, yhânggùng yhang i-myìt lhoqnyhûm bê nghut é yánmai, Ngò gi, yhâng é i-pyàt má ihkyùp mó shî jé nhâng râ a nghut; nghut kôlhang, yhang zô é i-pyàt má gi, yhâng é yhûmbyù wui htoq má ihkyùp shî jé nhâng râ nghut lhê.” gâ ri.