2 SAMU-ELAQ
Laiká
(2 Samuel)
Sholuq Shi Byùq Bê Lé Dawiq Wó Gyô É Hkyô
1
Sholuq shi byùq é htâng má, Dawiq gi, Amalek byu pé lé châng hkat sat é mai taû lò mù, Ziklak wà má í nyí lo nyi nyi ri. 2 Súm nyí nyí má, byù rayùq gi, yhâng é mèbu lé lâng cheq pyám mù, ulhum má hpuílhup kyâ gyûn chûng luî, Sholuq é gyèwap mai lé jé ri. Yhang gi, Dawiq chyáng jé jáng, myigùng htoq má ngóm gòp hkúngga byî ri.3 Dawiq gi, yhang lé, “Nàng hká mai lé lo é lhú?” ga myi jáng, haú yùq gi, “Isira-elaq gyèwap mai hpang lé lo é nghut lhê.” ga tû taî ri.
4 Dawiq gi, “Haî dut é lhú? Ngo lé taî kyô wú aq.” ga dum myî ri.
Haû jáng, haú yùq gi, “Isira-elaq byu pé gi, majan pá mai hpang bum akô; yhángmòq mâ é myo myo gi, shi lèq byùq bekô nghut ri. Sholuq eq yhang zo Yonahtan le shi byùq bekô nghut ri.” ga tû taî ri.
5 Dawiq gi, yhâng chyáng hkyáng lo shit é zorâm zo haú yùq lé, “Sholuq eq yhang zo Yonahtan shi byùq é hkyô lé, nàng hkâsu kut wó sê yu é lhú?” ga myî ri.
6 Zorâm zo haû gi, “Ngò, Gilabo-a bùm má ê jé nyi záng tô é u dùt é hkyô nghut ri. Sholuq gi, yhâng é lhâm má nghe tô é hkûn, gyèlhêng pé eq myangji jî é sarhê pé gi, yhâng é htâng má zùq zùq châng hkat akô nghut ri. 7 Yhang gi, htâng shut lhing wú kat é hkûn, ngo lé myàng mù wùt kat ri. Haû jáng, ngò gi, ‘Ngò haî kut byi râ lhú?’ nghû tû taî é nghut lhê.
8 Haû jáng, yhang gi, ngo lé, ‘Nàng ó yùq nghut lhê lhú?’ ga myî kat ri.
Ngò gi, ‘Amalek byù nghut lhê.’ nghû tû taî é nghut lhê.
9 Haú hkûn, Sholuq gi, ngo lé, ‘Ngá nâm má yàp mù, ngo lé sat pyám aq! Ngò gi, shî nò no nyì kôlhang, a shî nhô dùt nyi ri.’ ga taî ri.
10 Haû mù, yhang gi, lêng ló byùq é htâng má chyungxe wó lùt râ a nghut lô é lé, ngò sê é yánmai, ngò gi, yhâng nàm má yàp mù, yhang lé sat pyâm é nghut lhê. Hau htâng, ngò gi, yhâng é hkóhkâm jánmaú lé le, yhâng é lòq mâ é hting lé le, hkyut yù mù, nàng yhûmsîng chyáng haú pé lé yu lé lô bê nghut lhê.” ga taî ri.
11 Haú hkûn, Dawiq eq yhâng é byù bànshoq gi, gyô yón kuq kômù, yhûmsing é mèbu lé lâng cheq pyâm akô nghut ri. 12 Yhángmòq gi, Sholuq eq yhang zo Yonahtan é matú le, Yhûmsîng Garaî é byu pê é matú le, Isira-elaq byù myu é matú le, sham èq sat pyâm é hui bekô nghut é yánmai, myínhtâng jé shoq, yón mù ngaùhkyûng ngaùyang kut uchyang zoshuq tûm akô nghut ri.
13 Dawiq gi, yhâng chyáng hkyang lé shit é zorâm zo haú lé, “Nàng, hká mai lé lo é bê lhú?” ga dum myi jáng, “Ngò gi, byù bíng nghut é, Amalek byù rayùq é yhang zo nghut lhê.” ga, yhang tû taî ri.
14 Haú hkûn, Dawiq gi, yhang lé, “Haû Yhûmsîng Garaî é namngón xû bùt hui sû lé sat râ matú, náng é lòq hkâsu wám tu é lhú?” ga myî ri.
15 Hau htâng, Dawiq gi, yhâng é byu pé mâ é rayùq lé wùt yù mù, “Yhang lé ê sat pyám aq!” ga taî ri. Haû mù, haú yùq gi, yhang lé ê sat pyám bê nghut ri. 16 Dawiq gi, haú yùq lé, “Náng é sui gi, náng u htoq má nghut nyî sháng gàq. ‘Ngò gi, Yhûmsîng Garaî é namngón xû bùt hui sû lé sat pyám bê.’ ga nàng taî é hkûn, náng é nhut mai yhang, nang lé mara hun é sàksé shit bê nghut ri.” ga taî ri.
Sholuq Eq Yonahtan É Matú Dawiq Ngaùhkyang Sang É Hkyô
17 Dawiq gi, Sholuq eq yhang zo Yonahtan é matú, shî su ga ngaùhkyang sang ri. 18 Yhang gi, Yudaq byu pé lé, Lai gâ é ngaùhkyang haû mhoq byi râ matú hkunmó hkyô ri. (Haú hkyô lé, Yashara é Laiká bùk má kâ xûm tô ri.) Ngaùhkyang haû gi,
19 “Isira-elaq ê, náng é xânghpoq nge wó sû gi, náng é myhang é bùm htoq pé má sat pyâm é hui bu-nhung!
Wum-o a-tsam mó bo é sarhê pé le, lêng gyòp byùq bu-nhung!
20 Hpilisiti byìzô pé wó gabú kó âbe,
ahpyo-kuq a hpyit bâng é byìzô pé wó gabú byam chyu kó âbe,
hkyanglù haú lé, Gat wà má le,
Ashikelon wà mâ é hkyô pé má le, hkâtaî pyô kó.
21 Gilabo-a bum pé ê,
núngmòq chyáng, nghân le a gyó, mau le a wò dùt sháng gàq;
yò pé gi, gùqzò hkungga byi râ kyôshi myuishi a lhoqhtoq byi sháng gàq.
Hkâsu mù gâ le, jowò haú má, wum-o a-tsam mó bo é sarhê pê é gòlong lé rhoî jihkyoî kut pyâm é hui mù,
Sholuq é gòlong gi, xû but é a hui lo nghut ri.
22 Sat pyám hui bâng é sui mai le,
wum-o a-tsam mó bo é sarhê pê é gùngsho mai le,
Yonahtan é myoshi gi, a taû htoq lo wú é nghut mù,
Sholuq é shâm gi, nhik a shi é za a taû she htoq yu wú é nghut lhê.
23 Sholuq eq Yonahtan gi,
chyungxe dui nyi u chyit tui kâng tuî é hui mù,
shî jáng le agang alàn kó nghut ri.
Yhánghpe gi, zùnbung pê htoq je yàng mù,
hkanghkyî pê htoq wum je bo akô nghut ri.
24 Isira-elaq é byìzo pé ê,
Sholuq é matú ngaû keq;
yhang gi, núngmòq lé, ne yúng nú nhâm é bu hut byi luî,
núngmòq é mèbu pé má hîng zè mhón byi bê sû nghut ri.
25 Wum-o a-tsam mó bo é sarhê pé gi, majan má lêng gyòp byùq bu-nhung!
Yonahtan gi, náng é kong htoq pé má sat pyâm é hui bu-nhung!
26 Ngá mang Yonahtan ê, ngò gi, náng é matú myìt myo ûng wôm nyi lhê;
nàng gi, ngò gyai chyit kang é sû nghut lhê.
Náng é chyit myìt gi, ngá é ahtoq má maúhpo dông yhang nghut mù,
myiwe wui é chyit myìt htoq lháng je kô nyi ri.
27 Wum-o a-tsam mó bo é sarhê pé gi, lêng gyòp byùq bu-nhung!
Majan gyèzè pé gi, htên gyòp byùq bu-nhung!” gâ é nghut ri.