Yudaq Hkóhkâm Kut Râ Matú Dawiq Sô Kat Namngón Xû Bùt Huî É Hkyô
2
Hau htâng, Dawiq gi, Yhûmsîng Garai lé, “Yudaq wà pé mâ é rawà shut, ngò dòq e le gè râ lhú?” ga myî ri.Haû Yhûmsîng Garai gi, “Ê aq.” ga taî ri.
Haû jáng, Dawiq gi, “Ngò, hká wâ shut dòq ê râ lhú?” ga dum myi jáng, haû Yhûmsîng Garai gi, “Hebron wà shut dòq ê àq.” ga tû taî ri.
2 Haû mù, Dawiq gi, yhâng é yhûmsîng myhî nhik nghut é, Yezirela wà byù Ahino-am eq Hkarimela wà byù Nabala shi chuî tô é Abigela le mù, Hebron wà shut dòq ê bê nghut ri. 3 Hau htoq agó, Dawiq gi, yhâng htâng châng é bang eq haú bâng é yhûmbyù wuì lé le shuî chung é nghut luî, yhángmòq gi, Hebron wà eq hau é ayàm mâ é wà pé má nyi bum akô nghut ri. 4 Haú hkûn, Yudaq byu pé gi, Hebron wà má jé lé kôluî, Yudaq up é hkóhkâm kut râ matú, Dawiq lé sô kat namngón xû bùt byî akô nghut ri.
Gile-at mau, Yabesha wà byù wuì mai Sholuq lé myhup yhum bê nghut é hkyô lé, Dawiq wó gyo jáng, 5 yhang gi, Gile-at Yabesha byu pê chyáng lagyô pé lé nhang kat luî, “Núngmòq gi, núngmòq é yhûmsîng Sholuq é màng lé myhup é dông, yhang lé shogyo nhikmyin hkyô tûn shit bekô nghut é yánmai, haû Yhûmsîng Garai gi, núngmòq lé shimân jeju byi sháng gàq. 6 Ahkuî, Yhûmsîng Garai gi, núngmòq lé, shogyo nhikmyin hkyô eq jujúm hkyô tûn shit sháng gàq; núngmòq haú hkyô kut bekô nghut é yánmai, ngò le, núngmòq lé jeju tau râ nghut lhê. 7 Ahkuî, núngmòq gi, wum-o lhoqhtân luî, myìt wum lhoqkíng keq; hkâsu mù gâ le, núngmòq é yhûmsîng Sholuq shi byùq bê nghut ri; Yudaq byu pé gi, yhángmòq é hkóhkâm kut râ matú, ngo lé sô kat namngón xû bùt byi bekô nghut ri.” ga taí nhang kat ri.
Dawiq Eq Sholuq É Yhûm I-kun Majan Htoq É Hkyô
8 Haú u lé, Nera é yhang zo, Sholuq é gyèzau hpó Apna gi, Sholuq é yhang zo Ishaboshet lé shuî yù mù, Mahana-im wà shut shuî e ri. 9 Haû mù, yhang gi, zoshâng haú lé, Gile-at mau, Ashuri mau, Yezirela mau, Ehprim mau, Ben-yamin mau eq Isira-elaq mau gón é hkóhkâm kut nhâng bê nghut ri.
10 Sholuq é yhang zo Ishaboshet gi, Isira-elaq hkóhkâm dùt lo é hkûn, chyungxe zànwut myi xê zàn nghut ri; yhang gi, í zân ùp é nghut ri. Yudaq up bang kúm gi, lhumzui luî Dawiq htâng châng akô nghut ri. 11 Dawiq, Hebron wà má nyì mù, Yudaq up é hkóhkâm kut é zànwut gi, nyhit zan èq lha-mó hkyuq hkyap nghut ri.
Isira-elaq Byu Pé Eq Yudaq Byu Pé Majan Htoq Lhûm É Hkyô
12 Nera é yhang zo Apna gi, Sholuq é yhang zo Ishaboshet é duìnhâng zoshâng wuì eq rahá, Mahana-im wà mai htoq mù, Gibe-on wà shut e ló akô nghut ri. 13 Zerui-a é yhang zo Yo-ap eq Dawiq é byu pé gi, htoq ló kômù, Gibe-on nhông yàm má yhángmòq lé lhom huî akô. Yhángmòq mâ é rahpúng gi, nhông hé hpoq shut, rahpúng gi, shí hpoq shut zung tô bum akô nghut ri.
14 Haú hkûn, Apna gi, Yo-ap lé, “Zorâm wuì ra-am lé toq nhâng mù, ngá-nhûng é hí má htîm lhûm nhang wú sháng.” ga taî ri.
Yo-ap le, “Ge ri; haú dông kut nhâng sháng.” ga taî ri.
15 Haû mù, Sholuq é yhang zo Ishaboshet eq Ben-yamin up mâ é matú byù raxe í yuq, Dawiq é matú byù raxe í yuq, nghap htoq yû mù, toq nhâng bekô nghut ri. 16 Haú hkûn, yùq hkangmó gi, ó le ó htim râ su é ushuq má kyaq zuî lhum luî, nàmcham má shâmhtô èq htaû tsuq lhum mù, yhángmòq bànshoq bang rahá shi hkyaq lèq bùm bekô nghut ri. Haû mù, Gibe-on wà mâ é jowò haú lé, Helakat Hazurima ga myhîng tô akô nghut ri.
17 Haú nyí má, majan gyai yhang htan é nghut mù, Apna eq Isira-elaq byu pé gi, Dawiq é byu pê é hí má sûm byùq bekô nghut ri.
18 Zerui-a é yùqzo Yo-ap, Abishai, Asahela pé sum yuq gi, majan haú má bo lom akô nghut ri. Asahela gi, yòsô xat su yhang, hkyî xé lòq yàng dùt sû nghut ri. 19 Yhang gi, lòqpai lòqyò a lhik é za, Apna htâng tsuq tsuq châng hkat bê nghut ri. 20 Apna gi, nùnghtáng shut lhing wú mù, “Nàng gi, Asahela a nghut lhú?” ga myî kat jáng, yhang gi, “Nghut lhê.” ga tû taî ri.
21 Haú hkûn, Apna gi, yhang lé, “Lòqpai shut, a nghut jáng, lòqyò shut jau ló mù, zorâm zô pé mâ é rayùq lé chyup yù luî, yhâng é gyèhking pé lé lú hkyut yû àq.” ga taî ri. Nghut kôlhang, Asahela gi, yhâng htâng ru châng hkat nyi ashî nghut ri.
22 Apna gi, Asahela lé, “Ngo lé hkâchâng hkat nyî lo! Ngò, haî mù nang lé sat pyám râ lhú? Nungmang Yo-ap lé, ngò hkâsu kut myòqdong tûn shit râ lhú?” ga sidìq dum byî ri.
23 Nghut kôlhang, Asahela gi, châng hkat é a no shi nghut ri; haû mù, Apna gi, yhâng é lhâm hkyi èq Asahela é wamdau shut gun kat é nghut mù, Asahela é nùnghkûng lháng ròt byùq bê nghut ri. Yhang gi, haú jowò má shi lèq ló bê nghut ri. Asahela shi lèq tô é jowò má châng jé é yùq hkangmó gi, ló yàp nô tô bùm bekô nghut ri.
24 Nghut kôlhang, Yo-ap eq Abishai nhik gi, Apna lé châng hkat akô nghut ri. Buì wàng zó má, yhángmòq gi, Gibe-on yòso shut e ló é hkyô mâ é Gi-a langhkaû nàm mâ é Ama kong má jé akô nghut ri. 25 Hau htâng, Ben-yamin up mâ é byu pé gi, Apna é nùnghtáng shut chôm zing kômù, rahpúng za kut luî, kong htoq má yàp tô akô nghut ri.
26 Haú hkûn, Apna gi, Yo-ap lé, “Shâm gi, ahtum abyùq byù sat nyî râ nghut lhê lhú? Haû gi, ló htáng má nhik hko zo nhâng râ za nghut é lé, nàng a sé lhú? Núngmòq é gu-mang Isira-elaq byù lé a châng hkat lo râ matú, hkâ-myháng jé jáng shèq hkunmó hkyó râ lhú?” ga wùt garû taî kat ri.
27 Yo-ap gi, “Garai Gasang za rû dui nyi é eq rajung za taî lhê; nàng haû su ga a wùt taî kat é ru nghut le gi, byù haú bang, nàpsûn jé shoq châng hkat nyî kôrâ nghut lhê.” ga tû taî ri.
28 Haû mù, Yo-ap gi, tut mùt kat jáng, yhâng é gyè hpúng bànshoq gi, Isira-elaq byu pé lé a châng hkat lo kô é htoq agó, majan le a zan lo kô é za yàp tô bùm bekô nghut ri.
29 Apna eq yhâng é byu pé gi, ra-myin mau Araba pá mai yán lai kôluî, Yodan làng laî byìt mù, ra-nàp gón so luî, Mahana-im wà má ló jé akô nghut ri.
30 Haú hkûn, Yo-ap gi, Apna lé a châng hkat lo kut mù, yhâng é gyèzô pé bànshoq lé tsîng kat wú le, Asahela mai lai luî, Dawiq é byù raxe gau yùq byùq byùq é lé wó myang ri. 31 Nghut kôlhang, Dawiq é byu pé gi, Apna eq rahá nghut é Ben-yamin up mâ é byù súm sho hkyuq xê yùq lé wó sat pyâm akô nghut ri. 32 Yhángmòq gi, Asahela é màng lé yu lò mù, Betlehem wà mâ é yhâng wâ é lùp má myhup pyám bekô nghut ri. Hau htâng, Yo-ap eq yhâng é byu pé gi, ra-myin mau sô ló kômù, nàpkyó maubó zó lé Hebron wà má jé akô nghut ri.