1 SAMU-ELAQ
Laiká
(1 Samuel)
Samu-elaq Hku Lé Lo É Hkyô
1
Ehprim bùm mau, Ramahtim Zuhpim wà má, Elakana gâ é byù rayùq nyi ri. Haú yùq gi, Ehprim up, Zuhpi akoq mâ é, Tohu i-kun byù, Elihu é yhang shu, Yeroham é yhang zo nghut ri. 2 Yhang gi, Hanaq eq Penina gâ é yhûmsîng myhí í yùq wó ri. Penina gi, zoshâng wó ri; nghut kôlhang, Hanaq gi, zoshâng a wó nghut ri.3 Haú yùq gi, zàn wuì, Wum-o a-tsam dìk shoq bò Sû Yhûmsîng Garai lé noqkuq luî, hkungga nhông byi râ matú, yháng nyi é wà mai, haû Yhûmsîng Garaî é hkyangjông nhik nghut é, Eli é yhang zo Hohpini eq Hpinehasa nhik nyi é Shilo wà mó má dòq ê ê kut ri. 4 Elakana gi, hkungga nhông byi râ buìnyì jé hkangmó, yhâng é yhûmsîng myhí Penina lé le, yhâng é yùqzo byìzô pé bànshoq lé le, sho gàmbùm tsing gàm byi byi kut ri. 5 Nghut kôlhang, yhang gi, Hanaq lé chyit é yánmai, í gâmbùm byî ri. Haû Yhûmsîng Garai gi, Hanaq é zo lúng hkyûng myhî to byî ri. 6 Haû Yhûmsîng Garai mai Hanaq é zo lúng hkyûng myhî to byî é yánmai, yhang lé nhiknòq nyi é Penina gi, yhang lé, nhik nô shoq chun htaû nyi ri. 7 Haú hkyô gi, zàn wuì ru dut nyi é nghut ri; Hanaq gi, haû Yhûmsîng Garai Gasâng é yhûm má dòq ê hkangmó, yhang lé nhiknòq é Penina gi, yhang ngaù luî, zang a zo lo kut shoq chun htau htau kut ri. 8 Yhâng é yhûmsîng hpó Elakana gi, yhang lé, “Hanaq ê, haî mù ngau nyi lhê lhú? Haî mù zang a zo kut nyi lhê lhú? Nàng, haî mù yón kuq nyi lhê lhú? Yùqzo raxê yùq wó é htoq má, ngò gi, náng matú a-kyû je bo lhê a nghut lhí?” ga taî ri.
9 Radàm lé, yhángmòq gi, Shilo wà mó má zoshuq bàn zo kôjáng, Hanaq gi, toq yàp ri. Haú hkûn, hkyangjong Eli gi, haû Yhûmsîng Garaî é noqkuq yhûm mâ é hkúmtot wang mâ é tánghkuq má zung tô ri. 10 Hanaq gi, yón kuq é myìt mai ngaù uchyang haû Yhûmsîng Garai lé kyûdûng nyi ri. 11 Haú u, yhang gi, “Wum-o a-tsam dìk shoq bò Sû Yhûmsîng Garai ê, Nàng gi, Náng é jùn myhí asho awui hpuzô nyi é hkyô lé byu myàng myìtbun byi luî, Náng é jùn myhí lé a tô myhî pyâm é za, yùqzo rayùq byî é nghut jáng, ngò gi, yhâng é i-pyàt gón, haû Yhûmsîng Garai lé àp byi râ nghut mù, yhâng é uxâm gi, hkâ-nhám le wùq râ a nghut.a” ga danghtum htûm tô ri.
12 Hanaq gi, haû Yhûmsîng Garai lé myáng myáng kyûdûng nyi é u lé, Eli gi, yhâng é nhut lé wú tû nyi ri. 13 Hanaq gi, yhâng é i‑myìt hkaû má kyûdûng nyi é nghut mù, nhut lùp nyì kôlhang, htê a htoq nghut ri; haû mù, Eli gi, yhang lé, tsibyiq shuq wùt tô ri ga chyo ri. 14 Haû mù, Eli gi, yhang lé, “Nàng gi, hkâ-myháng jé shoq wùt nyì shirâ lhú? Náng é tsibyiq wing lé koi pyám aq.” ga taî ri.
15 Hanaq gi, “Ngá é yhûmsîng ê, haû su a nghut. Ngò gi, nhiknge nyi é myiwe rayùq ru nghut lhê. Tsibyiq wing lé le, îhpe lé le, ngò a shuq. Haû Yhûmsîng Garai lé, ngá é myìt-ûm hput kyô nyi é ru nghut lhê. 16 Náng é jùn myhí lé, agè ashop é myiwe rayùq dông hkâchyô; gyai yón kuq é eq ngaù byi ngaù nhap htoq mù, ngò kyûdûng nyi é ru nghut lhê.” ga tû taî ri.
17 Haú hkûn, Eli gi, “Ngón za ló àq hkoi! Nàng dûng é eq rajung za, haû Isira-elaq byu pê é Garai Gasang, nang lé byi sháng gàq.” ga tû taî ri.
18 Hanaq le, “Náng é jùn myhí gi, náng é hí má, myòqdong wó nyî sháng gàq ô!” ga yín yu ri. Hau htâng, yhang gi, ló mù, zoshuq zo luî, myòqdong a yúng a dùt lo nghut ri.
19 Yhángmòq gi, htang nàpkyó noq le toq mù, haû Yhûmsîng Garaî lé noqkuq yu é htâng, Rama wà mó mâ é yhángmòq é yhûm má dum taû ló bekô nghut ri. Elakana gi, yhâng é yhûmsîng myhí Hanaq eq zùm yàp luî, haû Yhûmsîng Garai le, Hanaq lé myìtbun byi bê nghut ri. 20 Haû mù, Hanaq gi, zogûng dùt luî, ahkyíng jé jáng yùqzo rayùq hkû bê nghut ri. Yhang gi, “Yùqzo haú lé, ngò, haû Yhûmsîng Garaî chyáng mai dûng yu é nghut lhê.” ga luî, zonú haú lé Samu-elaq ga myìng myhíng byi bê nghut ri.
Samu-elaq Lé Hanaq Ê Àp Byî É Hkyô
21 Elakana gi, yhâng é yhûmbyù wuì bànshoq eq rahá, zàn wuì kut nyi é, haû Yhûmsîng Garai lé hkungga nhông râ matú le, yhang danghtum htûm tô é lé lhoqdìk râ matú le, dòq ló é hkûn, 22 Hanaq gi, a bo châng e é za, yhâng é yhûmsîng hpó lé, “Zoshâng naú kang jáng, ngò, yhang lé shuî lé mù, haû Yhûmsîng Garaî é hí má lé byi râ nghut lhê; haú mai, yhang gi, hkâ-nhám le, haú má jâng nyi to berâ nghut lhê.” ga taî ri.
23 Yhâng yhûmsîng hpó Elakana gi, “Nàng myìt tû wú mù, je ge é dông kut àq. Zoshâng lé naú wó kâng é jé shoq shî má nyi nyì àq; haû Yhûmsîng Garai gi, nàng danghtum htûm tô é lé lhoqdìk byi sháng gàq.” ga taî ri. Haû mù, Hanaq gi, zoshâng lé naú wó kang shoq, yhang lé naú huq mù yhûm má nyi nyi ri.
24 Hanaq gi, zoshâng lé naú kâng é htâng má, sum zân bo é nolo zo radu, súngsô mún rabùng, sho-kuq htûng mai tsibyiq wing rahtûng le kut mù, zoshâng lé shuî chûng luî, Shilo jowò mâ é haû Yhûmsîng Garaî é yhûm má jé e ri. Haú hkûn, zoshâng haû gi, tiq ashî nghut ri. 25 Yhángmòq gi, nolo zo lé sat é htâng má, zoshâng haú lé Eli chyáng shuî e akô. 26 Haú hkûn, Hanaq gi, “Ngá é yhûmsîng ê, nàng rû dui nyi é eq rajung za, ngò gi, hí lé, náng é nâm, jowò shí má yàp mù, haû Yhûmsîng Garai lé kyûdûng é myiwe myhí nghut lhê. 27 Zoshâng shí yùq wó râ matú, ngò kyûdung jáng, dûng é eq rajung za, haû Yhûmsîng Garai gi, ngo lé gyo byi bê nghut ri. 28 Haû mù, ahkuî, ngò, zoshâng shî lé, Yhûmsîng Garai lé àp byî lhê. Yhâng é ra-pyàt gón gi, haû Yhûmsîng Garai lé àp byî to râ nghut lhê.” ga taî ri; haû mù, jowò haú má, haû Yhûmsîng Garai lé noqkuq akô nghut ri.