Ruhtaq 4

Ruhtaq Lé Bu-aq Èq Chui Gùq Yu É Hkyô

Haú u lé, Bu-aq gi, wà hkum mâ é byìn hpyé jang má dòq ê mù, ê zung tô ri. Yhang taî htoq é, yhâng htoq je chyâng é wú gon ang sû lé lo é lé myàng jáng, yhang gi, “Ngá gu-mang ê, shî má lé zûng aq.” ga taî ri. Haû mù, haú yùq le ê zung bê nghut ri.

2 Hau htâng, Bu-aq gi, wà sûwún wuî raxê yùq lé le ji yù mù, “Shî má zùng sháng.” ga taí jáng, yhángmòq le bo zung bùm bekô nghut ri. 3 Haú hkûn, Bu-aq gi, yhâng é gu-mang hpó lé, “Moba mau mai dum taû lo é Na-omiq gi, ngá-nhûng é gu-mang Elimelek eq sêng é maumyî ratóng ung râ gâ ri. 4 Haû mù, ngò wó myìt é dông ga jáng, maumyî haû lé, shî má zung to bâng é hí má le, sûwún wui é hí má le, nàng wui yù ang ri. Nàng hkyi xe yù râ nghut jáng, hkyi xe yù àq; haû a nghut jáng, ngò wó sé râ matú ngo lé taí aq. Hkâsu mù gâ le, nàng gi, maumyî haû lé hî hkyi xe yù ang sû nghut lhê; náng htâng má shèq ngò ru âng lhê; haû mai lai luî góbang ó a nyì lo nghut ri.” ga taî ri.

Haû gu-mang hpó gi, “Ngò hkyi xe yù râ.” ga tû taî ri.

5 Hau htâng, Bu-aq gi, “Nghut kôlhang, maumyî haú lé Na-omiq é lòq mai wui yu é buìnyì má gi, haû shi byùq su é muì maumyî má, yhâng é myìng xoq jòq nyì râ matú, yhang shi chuî tô é Moba myiwe Ruhtaq lé le jâng gùq yù râ dùt lhê.” ga taî ri.

6 Haú jáng, gu-mang hpó haû gi, “Haû su nghut jáng, ngò gi, a hkyi xe yù lo, hkâsu mù gâ le, ngá é silî maumyî lhoqhtên pyám râ dùt ri. Nàng yhang rû hkyi xe yù lo aq. Ngò gi, a wó dùt lo nghut ri.” ga tû taî ri.

7 Hí hpyang, Isira-elaq pê é htûngli má gi, hkyi xe yu é hkyô eq htòt àp byî lhûm é hkyô lé lhoq gingtíng râ matú, htòt àp sû gi, hàp yù sû lé yhâng é hkyî-tsung hkyut byî ri. Shî gi, Isira-elaq a-myû má târâ wàng htòt àp lhûm é hkyô nghut ri.

8 Haû mù luî, haû wú gon ang sû gi, Bu-aq lé, “Nàng yhang rû wui yù àq.” ga taí luî, yhâng é hkyî-tsung lé hkyut byî ri.

9 Haû jáng, Bu-aq gi, sûwún wuî eq shiwa byu pé bànshoq bang lé, “Elimelek, Hkili-on eq Malon pê é muìzè bànshoq lé, Na-omiq lòq mai ngò wui yù bê nghut é hkyô lé, hkû-nyí, núngmòq gi, sàksé nghut bê. 10 Hau htoq agó, haû shi byùq bê su é muì maumyî má, yhâng é myìng xoq jòq nyì râ matú, ngò gi, Malon yhang shi chuî tô é, Moba myiwe Ruhtaq lé ngá yhûmsîng myhí kut râ matú wui hpyit yû bê nghut lhê; haû jáng, yhâng é myìng gi, yhâng é gu-mang nhiktâng wui chyáng mai le, wà mâ é myìng jihpán mai le a byùq byùq lo râ nghut lhê. Hkû-nyí, núngmòq gi, hau é sàksé nghut bê.” ga taî ri.

11 Haû jáng, haû wà hkúmdong má nyi tô é shiwa byu pé bànshoq bang eq sûwún wuî gi, “Ngá-mòq gi, sàksé nghut lhê. Haû Yhûmsîng Garai gi, Isira-elaq é awùt ashín lé hkû byî é Rahkela eq Le-a nhik lé su, haû náng yhûm má jé lé lo é myiwe myhí lé dùt nhâng sháng gàq ô. Nàng nghut kôlhang, Ehprahta a-myû má wó lô sut lò mù, náng é myìng gi, Betlehem wà má kô myhâng hû nyì sháng gàq ô! 12 Myiwe myhí zo shí yùq dông mai, haû Yhûmsîng Garai nang lé byi râ nghut é awùt ashîn é yánmai, náng é i-kun gi, Yudaq lé Tamari hkû byî é Perezi é i-kun su nghut nyî sháng gàq ô.” ga shimân dang taí byî akô nghut ri.

Dawiq É Byùxik Shap Kyô É Hkyô

13 Haû mù, Bu-aq gi, Ruhtaq lé chui guq yû mù, Ruhtaq gi, yhâng é yhûmsîng myhí dùt bê nghut ri. Bu-aq gi, yhang eq zùm yàp luî, haû Yhûmsîng Garai gi, yhang lé zogûng wùn nhâng mù, yhang gi, yùqzo rayùq hkû bê nghut ri. 14 Haû mù luî, myiwe luzúm wuî gi, Na-omiq lé, “Hkû-nyí, nang lé wú gon râ sû nyhi to byî é Yhûmsîng Garai gi, hkya-on wàq toq é huî nyî sháng gàq ô! Ahkuî hku lé lô su é myìng gi, Isira-elaq a-myû má kô myhâng hû nyì sháng gàq ô! 15 Yhang gi, nang lé i-pyàt sik byi mù, nàng u hpyû zuì ne é hkûn, nang lé wú gôn lajang râ nghut lhê. Hkâsu mù gâ le, nang lé chyit é, náng dùmó gi, yùqzo haû lé hkû byi bê nghut ri. Náng dùmó haû gi, yùqzo nyhit yùq wó é htoq má lháng náng é matú je ge ri.” ga shimân dang taî akô nghut ri.

16 Hau htâng, Na-omiq gi, zoshâng haû lé bún yû mù, yhâng é tanghkoí má kat luî, yhâng é lòqhkaû má hku baú ri. 17 Yhâng é yhûmkyo hpô-myhí wuî gi, “Na-omiq yùqzo wó bê.” ga taî bum akô. Zoshâng hau lé Obet ga myìng myhíng byî akô. Yhang gi, Dawiq é yhâng wa Yese lé hku ri.

18 A‑ô mâ é gi, Perezi é awùt ashîn pê é byùxik labaû nghut lhê:

Perezi é yhang zo gi, Heziron;

19 Heziron é yhang zo gi, Ram;

Ram é yhang zo gi, Aminadap;

20 Aminadap é yhang zo gi, Nashon;

Nashon é yhang zo gi, Salamun;

21 Salamun é yhang zo gi, Bu-aq;

Bu-aq é yhang zo gi, Obet;

22 Obet é yhang zo gi, Yese;

Yese é yhang zo gi, Dawiq nghut ri.