Târâ Agyì 1

TÂRÂ AGYÌ

Laiká

(Judges)

Myìt Gyó Tô É Hkanan Byu Pé Lé Isira-elaq Byu Pé Majan Zân É Hkyô

Yoshuq shi byùq é htâng má, Isira-elaq byu pé gi, haû Yhûmsîng Garai lé, “Ngá-mòq mâ é ó yùq hí, Hkanan byu pé lé majan ê dòq zan ra râ lhú?” ga myî akô nghut ri.

2 Haû Yhûmsîng Garai gi, “Yudaq up hí dòq ê râ nghut lhê; Ngò, maumyî haú lé yhángmòq é lòq má àp to bê nghut lhê.” ga tû taî ri.

3 Haú hkûn, Yudaq up bang gi, yhángmòq é gu-mang Isira-elaq byù Sime-on up bang lé, “Hkanan byu pé lé majan ê zan râ matú, ngá-mòq eq rahá, ngá-mòq é gàmbùm maumyî má bo dòq lé keq. Hau htâng, núngmòq é gàmbùm maumyî má le ngá-mòq bo cháng râ nghut lhê.” ga taî akô nghut ri. Haû mù, Sime-on up bang gi, yhángmòq eq bo châng dòq ê bekô nghut ri.

4 Yudaq byu pé ê dòq htîm é hkûn, haû Yhûmsîng Garai gi, Hkanan byu pé eq Perizi byu pé lé yhángmòq é lòq má àp byî é nghut mù, yhángmòq gi, Bezek wà má byù ra-mun sat kyop pyám bekô nghut ri. 5 Yhángmòq gi, wà haú má Adoni Bezek lé myàng kômù, yhang lé majan zan kôluî, Hkanan byu pé eq Perizi byu pé lé zân ung pyám bekô nghut ri. 6 Haú hkûn, Adoni Bezek gi, hpang ri; nghut kôlhang, yhángmòq gi, yhang lé châng hkat chyup yû luî, yhâng é lòqmócham eq hkyîmócham pé lé zân hpyit pyám byi bekô nghut ri.

7 Haú hkûn, Adoni Bezek gi, “Ngo èq lòqmócham hkyîmócham zân hpyit pyám byî é hkóhkâm nyhit xê yùq gi, ngá é zanggyap ô mâ é zangcham gùq zô akô; ahkuî, Garai Gasang gi, ngò yhángmòq lé kut é eq rajung za, ngo lé taû hpu zo nhâng bê nghut ri.” ga taî ri. Yhángmòq gi, yhang lé Yerusalem wà mó má shuî lò kô é nghut mù, yhang gi, haú má shi byùq bê nghut ri.

8 Yudaq byu pé gi, Yerusalem wà mó lé le ê htîm ung yù kômù, wà byù wuì lé sham èq sat kyop pyám kôluî, wà lé myî èq nyhê hkyô pyám bekô nghut ri.

9 Hau htâng, Yudaq byu pé gi, bum mau, Maupyî Mau eq buìwàng hkyam bùmhkyî pá pé má nyi é Hkanan byu pé lé majan ê gyó zân akô nghut ri. 10 Hau htâng, yhángmòq gi, Kiri-at Araba ga myhîng laî lo é Hebron wà má nyi é Hkanan byu pé lé majan ê zan kô é nghut mù, Sheshai, Ahiman eq Talamai lé zân ung pyám bekô nghut ri. 11 Haú mai, yhángmòq gi, Kiri-at Sehpera ga myhîng laî lo é Debira wà mó má nyi é byu pé lé majan ê zân akô nghut ri.

12 Haú hkûn, Hkalep gi, “Kiri-at Sehpera wà mó lé ê wó zân ûng sû lé, ngá é byìzo Aksa byi tso râ nghut lhê.” ga taî ri. 13 Haû mù, Hkalep é yhang gu Kenaza é yhang zo Otni-ela gi, wà mó haú lé ê wó zân ûng bê nghut mù, Hkalep gi, yhang lé, yhâng é byìzo Aksa byi tso bê nghut ri.

14 Ra-nyí lé, Aksa gi, Otni-ela chyáng lé mù, yhâng wa lé yò rahkyang dûng yù râ matú taî shi-kùt ri. Yhang gi, yhâng é loze mai gyó é hkûn, Hkalep gi, “Nàng haî o ri lhú?” ga myî ri.

15 Haû jáng, yhang gi, “Ngo lé jeju chyûnghuq rajung byi laq. Nàng gi, ngo lé Maupyî Mau mâ é maumyî lé lháng byi bê nghut é yánmai, wuìbúm pé lé le byi shilaq.” ga tû taî ri. Haû mù, Hkalep gi, yhang lé, ahtoq wuìbúm eq a-ô wuìbúm pé lé byi bê nghut ri.

16 Mosheq é yhâng tsâ é awùt ashín pé nghut é Keni byu pé gi, Yudaq byu pé eq rahá Byùm gàm Wà mai bo dòq ló luî, Arat jowò nàm mâ é, Maupyî Mau mâ é Yudaq é Yòso má nyi é bâng chyáng bo nyi akô nghut ri.

17 Yudaq byu pé gi, yhángmòq é gu-mang Isira-elaq byù Sime-on up bang eq rahá ê mù, Zehpat wà má nyi é Hkanan byu pé lé majan ê chôm zan kôluî, wà haú lé chyut yhang lhoqhtên pyám bekô nghut ri. Haû mù, wà haú lé gi, Horama ga myhîng akô nghut ri. 18 Yudaq byu pé gi, Gaza wà eq haû eq sêng é mau lé le, Ashikelon wà mó eq haû eq sêng é mau lé le, Ekron wà eq haû eq sêng é mau lé le, zân ung yù bekô nghut ri.

19 Haû Yhûmsîng Garai gi, Yudaq byu pé eq rahá nghut nyi ri. Yhángmòq gi, bum mau lé wó sing yù kôlhang, pá mau mâ é bang lé gi, jòqtoq gyèlhêng wó bûm kô é yánmai, a wó hkat htoq pyám kó nghut ri. 20 Mosheq danghtum htûm tô é eq rajung za, Hkalep lé Hebron wà byi kô é nghut mù, yhang gi, Anak é yhang zô pé sum yuq lé wà haú mai hkat htoq tâng pyâm ri. 21 Nghut kôlhang, Ben-yamin up bang gi, Yerusalem wà mó má nyi é Yebusi byu pé lé a wó hkat htoq pyám kó; hkû-nyí jé shoq, Yebusi byu pé gi, Ben-yamin up bang eq rahá nyi nyi akô nghut ri.

22 Yosep up bang gi, Behtela wà lé majan ê dòq zân akô; haû Yhûmsîng Garai gi, yhángmòq eq rahá nyi nyi ri. 23 Yhángmòq gi, Luza le gâ laî lo é Behtela wà lé jó ê wú râ matú byù nhang kat akô nghut ri. 24 Haû jó wú bang gi, wà haû mai byù rayùq htoq lo é lé myàng kômù, yhang lé, “Ngá-mòq lé wà hkaû shut wang ló é hkyô tûn shit àq; haû jáng, ngá-mòq nang lé rago kut râ nghut lhê.” ga taî akô. 25 Haû mù, byù haú yùq gi, yhángmòq lé hkyô shit bê nghut mù, yhángmòq gi, haú wâ mâ é byu pé lé sham èq sat pyám bekô; nghut kôlhang, byù haú yùq eq yhâng é yhûmbyù wuì bànshoq lé gi, lhoqlhut tô akô nghut ri. 26 Byù haú yùq gi, Hiti byu pê é mau má ê mù, haú má wà ê xuq luî, Luza ga myhîng ri. Hkû-nyí jé shoq, wà haú lé, haû su ga myhîng akô nghut ri.

27 Nghut kôlhang, Manase koq bang gi, Bet Shan eq hau é awui ayàm mâ é wà pé, Tanak eq hau é awui ayàm mâ é wà pé, Dora eq hau é awui ayàm mâ é wà pé, Ibalam eq hau é awui ayàm mâ é wà pé, Megido eq hau é awui ayàm mâ é wà pé má nyi é byu pé lé a wó hkat htoq pyám kó nghut ri; hkâsu mù gâ le, Hkanan byu pé gi, haú mau má za nyì kôrâ ga myìt hpyit to kô é yánmai nghut ri. 28 Isira-elaq byu pé wúm htan lò kô é hkûn, Hkanan byu pé lé múzó jizó zìk zui saí nhang akô; nghut kôle, yhángmòq lhúnglháng lé gi, chyut a wó hkat htoq pyám kó nghut ri. 29 Ehprim koq bang le, Gezera wà má nyi é Hkanan byu pé lé a wó hkat htoq pyám kô é nghut mù, Hkanan byu pé gi, haú má yhángmòq chyáng bo nyi nyi akô nghut ri. 30 Zebulun up bang le, Kitron wà eq Nahalola wà má nyi é Hkanan byu pé lé a wó hkat htoq pyám kô é nghut mù, Hkanan byù haú bang gi, yhángmòq chyáng bo nyi tô akô; nghut kôle, Zebulun up bang gi, yhángmòq lé múzó jizó zìk zui saí nhang akô nghut ri. 31 Asheri up bang le, Ahko wà, Sidon wà, Alap wà, Akzip wà, Helaba wà, Ahpek wà eq Rehoba wà pé má nyi é byu pé lé a wó hkat htoq pyám kó nghut ri. 32 Ashera up bang gi, Hkanan byu pé lé a wó hkat htoq pyám kô é yánmai, haú mau mâ é Hkanan byu pê é maumyî pé má bo nyi akô nghut ri. 33 Naphtali up bang le, Bet Shemesha wà eq Bet Anat wà má nyi é bang lé a wó hkat htoq pyám kó nghut ri; nghut kôlhang, Naphtali up bang le, haú mau mâ é Hkanan byu pê é maumyî pé má bo nyi akô nghut mù, Bet Shemesha wà eq Bet Anat wà má nyi é bang gi, yhángmòq é múzó jizó lé zìk zui saí nhang é huî nyi bum akô nghut ri. 34 Amori byu pé gi, Dan up bang lé, bum mau má za nyì nhâng kômù, pá mau má nyì râ matú a gyo kó nghut ri. 35 Amori byu pé gi, Heresa bùm, Aiyalon eq Shalabim jowò pé má nyi shi-kùt tô bum akô; nghut kôlhang, Yosep up bâng é wum-o a-tsam kô jàt lo é hkûn, yhángmòq lé múzó jizó zìk zui saí nhang akô nghut ri. 36 Amori byu pê é maukyo gi, Akrabim bùm hkêshón mai Sela ahtoq gû nghut ri.