Shehkem Má Dangshikaq Saî Tô É Hkyô
24
Hau htâng, Yoshuq gi, Isira-elaq a-myû up pé bànshoq lé, Shehkem wà mó má zing nhâng mù, Isira-elaq pê é nhik bô sûwún wuî, ushuq kut bang, târâ agyi pé eq zaugun sûwún wuî lé ji yu ri. Haû mù, yhángmòq gi, ó le ó yhang, Garai Gasâng é hí má ê htoq shit bum akô nghut ri.2 Haú hkûn, Yoshuq gi, bànshoq bang lé, “Isira-elaq byu pê é Garai Gasang, haû Yhûmsîng Garai îsu gâ ri; ‘Góhkun lhê é núngmòq é îchyí îwâ pé gi, Uhprat Wuìlàng hé hpoq má nyì mù, gótû hparà pé lé noq kô é nghut lhê. Îchyí îwâ pé haú bang má, Abraham eq Nahora nhiktang é yhâng wa Htera le bo ri. 3 Nghut kôlhang, Ngò gi, núngmòq é îwa Abraham lé, Uhprat Wuìlàng hé hpoq mai ji htoq yû mù, Hkanan mau gón má yhang lé hkyô-u shê byi luî, yhang lé, awùt ashín myo myo byi bê nghut lhê. Yhang lé gi, Isak byi, 4 Isak lé gi, Yakup eq Eso byi, kut é nghut lhê. Ngò gi, Eso lé, Se-ira bum mau masàt byi bê; nghut kôlhang, Yakup eq yhang zô pé gi, Egutuq ming má gyó e akô nghut ri.
5 Hau htâng, Ngò gi, Mosheq eq Arun lé nhang kat mù, Egutuq ming má Ngò kut é eq rajung za, Egutuq byu pé lé hpuzo nhang é htâng, Ngò, núngmòq lé shuî htoq lo é nghut lhê. 6 Ngò, núngmòq é îchyí îwâ pé lé, Egutuq ming mai shuî htoq lô mù, núngmòq, Nhông Ne má lo jé kô é hkûn, Egutuq byu pé gi, gyè myanglhêng le ji, myang ji le ji kut mù, haû Nhông Nè jé shoq châng hkat bum akô nghut ri. 7 Nghut kôlhang, núngmòq é îchyí îwâ pé gi, haû Yhûmsîng Garai lé garúm wùt dûng ngaù kô é nghut mù, Yhang gi, yhángmòq eq Egutuq byu pê é gyoro má mauchut tuq dùt to byí nhang ri. Yhang gi, Egutuq byu pé lé wuì ûm nghop nhâng mù, myùp shi byùq nhang pyâm ri. Núngmòq gi, núngmòq é myòq èq yhang, Egutuq byu pé lé Ngò hkâsu kut é hkyô lé myàng bekô. Hau htâng, núngmòq gi, buìnyì myáng myáng, yòso má nyi lhing wún kô é nghut lhê.
8 Ngò gi, núngmòq lé, Yodan làng buìhtoq hkyam má nyi é Amori byu pê é maumyî má shuî lo é nghut lhê. Yhángmòq gi, núngmòq lé majan lom zan kô é nghut kôlhang, Ngò gi, yhángmòq lé, núngmòq é lòq má àp byi bê nghut lhê. Ngò gi, núngmòq é myòq hí má, yhángmòq lé sat kyop pyám mù, yhángmòq é maumyî lé, núngmòq lé sing yù nhâng bê nghut lhê. 9 Zipora é yhang zo, Moba mau hkóhkâm Balak gi, Isira-elaq byu pé lé majan toq zân é hkûn, núngmòq lé nhing nhâng râ matú, Be-ori é yhang zo Balam lé ji yu ri. 10 Nghut kôlhang, Ngò gi, Balam lé gyo byî é a nghut; haû mù, yhang gi, núngmòq lé shimân dang dum taí taí kut ri; Ngò gi, núngmòq lé, Balak é lòq mai hkyi htoq yû bê nghut lhê.
11 Hau htâng, núngmòq gi, Yodan làng lé laî byìt mù, Yerihko wà mó má lo jé akô. Yerihko wà mó byu pé gi, Amori, Perizi, Hkanan, Hiti, Girigashi, Hiwi eq Yebusi byu pé su, núngmòq lé majan lhom zân akô. Nghut kôlhang, Ngò gi, yhángmòq lé, núngmòq é lòq má àp byi bê nghut lhê. 12 Ngò gi, núngmòq é hí má, tûmó byo nhang kat luî, núngmòq é myòq hí mai, haû Amori byu pê é hkóhkâm í yùq lé hkat htoq pyám byî é nghut lhê. Núngmòq é shâm eq laî èq, haú lé núngmòq wó kut kô é a nghut. 13 Haû mù, Ngò gi, núngmòq lé, núngmòq wum a kat tô é yò eq núngmòq a xuq tô é wà mó pé lé byi bê nghut luî, núngmòq gi, haú má nyì mù, núngmòq a hô tô é tsibyiq hkyâm eq tsanlun hkyâm mâ é ashi pé myàng zô bekô nghut ri.’ gâ ri.
14 Haû mù, haû Yhûmsîng Garai lé gyùq hkúngga luî, jujúm myìt èq Yhang lé dójaú nyî keq. Wuìlàng hé hpoq má le, Egutuq ming má le, núngmòq é îchyí îwâ pé noqkuq é hparà pé lé tô pyâm mù, haû Yhûmsîng Garai lé dójaú nyî keq. 15 Nghut kôlhang, núngmòq é myìt má, haû Yhûmsîng Garai lé dójaú râ su a ga kô é nghut jáng, Wuìlàng hé hpoq má núngmòq é îchyí îwâ pé dójaú é hparà pé lé hkyin yù kôrâ lùq, haû a nghut jáng, ahkuî núngmòq nyi tô é mau mâ é Amori byu pê é hparà pé lé hkyin yù kôrâ lùq, hkû-nyí, núngmòq myìt hpyit yû lo keq. Ngò eq ngá é yhûm byu wuì kúm gi, haû Yhûmsîng Garai lé dójaú râ nghut lhê.” ga taî ri.
16 Haú hkûn, shiwa byu pé gi, “Haû Yhûmsîng Garai lé tô pyám mù, gótû hparà pé lé dójaú é hkyô gi, ngá-mòq eq wê gâng nyì sháng gàq ô! 17 Egutuq ming má jùn kut nyi é ngá-nhûng é îchyí îwâ pé eq ngá-nhúng lé shuî htoq yû mù, ngá-nhûng é myòq hí má yhang, maúhpo alhô agàn mó haú pé lé tûn shit é Sû gi, ngá-nhûng é Garai Gasang, haû Yhûmsîng Garai yhang nghut nyi ri. Yhang gi, ngá-nhúng sô laî lo é a-myû bànshoq bâng chyáng mai le, ngá-nhûng é hkyôwuì htáng shoq má le, ngá-nhúng lé mâgum yù bê nghut ri. 18 Haû Yhûmsîng Garai gi, maumyî shî má nyi é Amori byu pé eq gótû a-myû wuì bànshoq lé, ngá-nhûng é hí mai hkat htoq pyám byi bê nghut ri. Yhang za, ngá-nhûng é Garai Gasang nghut é yánmai, ngá-mòq le, haû Yhûmsîng Garai lé dójaú râ nghut lhê.” ga tû taî akô nghut ri.
19 Yoshuq gi, shiwa byu pé lé, “Núngmòq gi, haû Yhûmsîng Garai lé wó dójaú kôrâ a nghut. Haî mù gâ le, Yhang gi, chyoiyúng é eq manôn sê é Garai Gasang nghut ri. Yhang gi, núngmòq gumlau toq é hkyô eq mara kut shut é hkyô lé, mara hkyut byi râ a nghut. 20 Núngmòq, haû Yhûmsîng Garai lé tô pyám mù, gótû hparà pé lé dójaú kô é nghut jáng, Yhang, núngmòq lé shî myháng jé shoq jeju byî nyì bê nghut kôlhang, Yhang gi, lhîng mù, núngmòq lé wuîhke jamjau mó hui nhâng luî, lhoqhtûm pyám râ nghut lhê.” ga taî ri.
21 Nghut kôlhang, shiwa byu pé gi, Yoshuq lé, “Haû su a nghut! Ngá-mòq gi, haû Yhûmsîng Garai lé dójaú râ nghut lhê.” ga taî akô nghut ri.
22 Haú hkûn, Yoshuq gi, “Haû Yhûmsîng Garai lé dójaú râ matú núngmòq hkyin yù bê hkyô lé gi, núngmòq yhang sàksé nghut nyi akô.” ga taî ri.
Yhángmòq le, “Nghut bê, ngá-mòq yhang sàksé nghut lhê.” ga tû taî akô nghut ri.
23 Yoshuq gi, “Haû nghut jáng, ahkuî, núngmòq chyáng jòq é gótû hparà pé lé dú pyám mù, Isira-elaq byu pê é Garai Gasang, haû Yhûmsîng Garaî chyáng núngmòq é i‑myìt lhing taû lò keq.” ga taî ri.
24 Haú hkûn, shiwa byu pé gi, Yoshuq lé, “Ngá-mòq gi, ngá-mòq é Garai Gasang, haû Yhûmsîng Garai lé dójaú râ nghut lhê. Yhâng é jì-no lé za ngá-mòq gyô nyì râ nghut lhê.” ga taî akô nghut ri.
25 Haú nyí má, Yoshuq gi, shiwa byu pê é matú dangshikaq ralhum tô to mù, Shehkem wà mó má, yhángmòq châng ê râ hkunmó pé eq târâ pé lé hkyô to bê nghut ri. 26 Yoshuq gi, haú hkyô pé bànshoq lé, Garai Gasâng é târâ laiká bùk má kâ xûm to bê nghut ri. Hau htâng, yhang gi, haû Yhûmsîng Garaî é chyoiyúng jowò nàm mâ é shîhke gàm ô má, lùq mó racham tu shap tô bê nghut ri.
27 Haû mù, yhang gi, shiwa byù bànshoq bang lé, “Wú keq! Lùq mó haû gi, ngá-nhûng é matú sàksé dùt nyì râ nghut lhê. Haû Yhûmsîng Garai, ngá-nhúng lé taî é dang bànshoq lé, lùq mó shî wó gyô yù bê nghut mù, núngmòq mai, núngmòq é Garai Gasang lé he-ngìk pyám kô é nghut jáng, lùq mó shî gi, núngmòq lé mara hûn sàksé lùq mó dùt râ nghut lhê.” ga taî ri.
28 Hau htâng, Yoshuq gi, shiwa byu pé lé, ó le ô é silî wunlî maumyî shut ló nhâng bê nghut ri.
Yoshuq Lé Yhûm É Hkyô
29 Múzó haú pé ban é htâng, haû Yhûmsîng Garaî é duìnhâng zoshâng, Nun é yhang zo Yoshuq gi, chyungxe zànwut rasho raxê zàn má shi byùq bê nghut ri. 30 Haû mù, yhángmòq gi, Gasha bùm é mautsûng hkyam shut mâ é, Ehprim bum mau má jòq é, Timnat Sera gâ é, yhâng é silî wunlî maumyî má, yhang lé yhûm pyám bekô nghut ri.
31 Isira-elaq byu pé gi, Yoshuq chyungxe dui nyi é ra-pyàt gón má le, Isira-elaq byu pê é matú, haû Yhûmsîng Garai kut byî é hkyô hkangmó lé bo hkyit sê é, yhâng htâng má nyi lé lo é sûwún wui é i-pyàt gón pé má le, haû Yhûmsîng Garai lé dójaú akô nghut ri.
32 Isira-elaq byu pé, Egutuq ming mai yu lo é Yosep é showui pé lé, Shehkem é yhâng wa Hamora é yhang zô pê chyáng mai, Yakup, ngùn chap rasho èq wui yu é Shehkem wà mó mâ é maumyî ratóng má myhup tô akô. Haû gi, Yosep é awùt ashín pê é silî wunlî dùt lò bê nghut ri.
33 Arun é yhang zo Ele-aza le shi byùq mù, yhang zo Hpinehasa lé gàm byî tô é Ehprim bum mau mâ é, Gibe-a jowò má myhup tô bekô nghut ri.