Yoshuq É Shi-kyám Dang
23
Haû Yhûmsîng Garai gi, Isira-elaq byu pé lé, yhángmòq é awui ayàm má nyi é gye pé bànshoq bâng é lòq mai bánno nhang é tsómra myáng é htâng, Yoshuq gi, chyungxe i-pyàt ko luî, mâng ló bê nghut ri. 2 Haû mù, yhang gi, Isira-elaq byu pé mâ é, yhángmòq é nhik bô sûwún wuî, ushuq kut bang, târâ agyi pé eq zaugun sûwún wuî bànshoq lé ji yù mù, yhángmòq lé, “Ngò gi, chyungxe i-pyàt ko bê nghut mù, mang bê nghut lhê; 3 núngmòq é yánmai, byù myû shí bang bànshoq lé, núngmòq é Garai Gasang nghut é, haû Yhûmsîng Garai hkâsu kut byî laî lò bê hkyô pé lé, núngmòq yhang myàng bê nghut lhê. Núngmòq lé majan bo zan byi Sû gi, núngmòq é Garai Gasang nghut é, haû Yhûmsîng Garai yhang nghut ri. 4 Wú keq, ngò gi, Yodan làng eq buìwàng hkyam Medihteri-an Wuimau gyoro má nyi é myìt gyo tô é a-myû wuì eq wó zân ung yù bê bâng é maumyî bànshoq lé, núngmòq a-myû up bâng é matú silî wunlî dông, tsing gàm byi bê nghut lhê. 5 Núngmòq é Garai Gasang, haû Yhûmsîng Garai yhang, haú bang lé, núngmòq e ló é hkyô mai hkat pyám byi râ nghut lhê. Núngmòq é Garai Gasang, haû Yhûmsîng Garai gi, núngmòq lé danghtum htûm tô é eq rajung za, haú bang lé, núngmòq é myòq hí mai chyûn htoq pyám byi mù, núngmòq gi, yhángmòq é maumyî lé wó sing yù kôrâ nghut lhê.6 Haû mù, wum-o lhoqkíng luî, Mosheq é târâ laiká bùk má kâ tô é bànshoq lé, lòqpai lòqyò a jau byùq é za, rago châng nyi keq. 7 Núngmòq chyáng nyi myìt tô é a-myû wuì eq hkâzûm yàp kó; yhángmòq é hparà pê é myìng lé hkâlang hkâ dakâm kó; núngmòq gi, haú pé lé a ge dójaú, a ge paî gòp kôrâ nghut lhê. 8 Núngmòq gi, hkû-nyí jé shoq kut nyî bê é eq rajung za, núngmòq é Garai Gasang nghut é, haû Yhûmsîng Garai lé xoq nghêhkau nyì keq.
9 Haû Yhûmsîng Garai gi, kô myang é eq a-tsam mó bo é a-myû wuì lé, núngmòq é myòq hí mai hkat htoq pyám byi bê nghut mù, hkû-nyí jé shoq, núngmòq é hí má wó yàp é byù rayùq lháng a nyì nghut ri. 10 Núngmòq é Garai Gasang, haû Yhûmsîng Garai gi, danghtum htûm tô é eq rajung za, núngmòq é matú gyè bo zân é yánmai, núngmòq mâ é rayùq gi, gyè rahkyîng yùq lé wó ung pyám râ nghut lhê. 11 Haû mù, rago yhang nyì luî, núngmòq é Garai Gasang nghut é, haû Yhûmsîng Garai lé chyitdàp nyì keq.
12 Nghut kôlhang, núngmòq gi, lhik ló luî, núngmòq chyáng nyi myìt tô é gótû a-myû wuì eq xoq yû mù, yhángmòq eq myi byi myi yû kut luî, zùm yàp nyì kô é nghut jáng, 13 núngmòq é Garai Gasang nghut é, haû Yhûmsîng Garai gi, a-myû haú bang lé, núngmòq é hí mai a hkat htoq pyám byi lo râ nghut mù, núngmòq é Garai Gasang nghut é, haû Yhûmsîng Garai mai núngmòq lé byî tô é maumyî gè haú mai, núngmòq htên byòq pyâm é hkûn jé shoq, yhángmòq gi, núngmòq é matú, lhaí eq dumzo le, núngmòq é nùnghkûng má bàt râ wùmchûm hkat le, núngmòq é myòqjí mâ é zu le, dùt kôrâ nghut é hkyô lé, teng za sê to keq.
14 Ahkuî, ngò kúm gi, myìdàm htoq mâ é byù bànshoq bang so âng é hkyô má so râ za nghut bê. Núngmòq é Garai Gasang, haû Yhûmsîng Garai mai núngmòq lé danghtum htûm tô é jeju dang bànshoq mâ é ralhum lháng a gyó byùq loshoq dik bê nghut é hkyô lé, núngmòq é i‑myìt nhiklhum bànshoq èq chyungxe sô mai sê nyi gù nghut lhê. 15 Nghut kôlhang, núngmòq é Garai Gasang, haû Yhûmsîng Garai danghtum htûm tô é jeju dang hkangmó dik bê nghut é su, núngmòq lé byî to bê maumyî gè haû mai, núngmòq lé lhoqhtên pyâm é hkûn jé shoq, haû Yhûmsîng Garai gi, ashop é hkyô pé bànshoq núngmòq chyáng jé nhâng râ nghut lhê. 16 Núngmòq gi, núngmòq é Garai Gasang, haû Yhûmsîng Garaî mai núngmòq lé hkunmó hkyô to bê nghut é, Yhâng é dangshikaq lé lhoqhpyoq pyám kômù, gótû hparà pé lé ê dójaú luî, paî gòp kô é nghut jáng, haû Yhûmsîng Garaî é nhikmó-yo hkyô gi, núngmòq chyáng jé râ nghut mù, núngmòq gi, Yhang, núngmòq lé byî tô é maumyî gè mai, hân hân htên byòq byùq kôrâ nghut lhê.” ga taî ri.