TÂRÂ LHOQPUN LAIKÁ
Laiká
(Deuteronomy)
Horep Bùm Mai Htòt Nhang É Hkunmó
1
A-ô mâ é gi, Paran wà eq Tohpela, Laban, Hazerot, Dizahap wà pê é gyoro, Suhpa jowo é tû-tap Araba pá nghut é, Yodan làng buìhtoq hkyam mâ é yòso má, Isira-elaq byù bànshoq bang lé Mosheq taî é dang pé nghut lhê. 2 (Horep bùm mai, Se-ira Bùm hkyô dông Kadesha Barine-a jé shoq dòq ló le, raxe ra-nyí sô é hkyôwuì nghut ri.)3 Mosheq gi, haû Yhûmsîng Garai mai Isira-elaq byu pé eq séng luî yhang lé hkunmó hkyô é bànshoq lé, myi xê zan zàn, lha-mó raxe rahkyap lhôxân nyí má yhángmòq lé taî htoq kyô ri. 4 Haû gi, yhang, Heshibon má ùp é Amori hkóhkâm Sihon eq Ediri má nyi tô é Ashatarot má ùp é Bashan hkóhkâm Oga lé sat pyâm é htâng má taî é nghut ri.
5 Yodan làng buìhtoq hkyam Moba mau má, Mosheq gi, târâ eq séng luî taî sân kyô hi ri. Haú pé gi, a-ô mâ é pé nghut lhê.
6 Ngá-nhûng é Garai Gasang nghut é, haû Yhûmsîng Garai mai Horep bùma má ngá-nhúng lé, “Núngmòq gi, bùm shî má nyi é myáng bekô nghut ri. 7 Xuq tô é wàp hpyoq chûng mù, Amori byu pê é bum mau eq hau é awui ayàm má nyi é byù bànshoq bâng é nyì jowò nghut é, Araba pá, bum mau pé, buìwàng hkyam bùmhkyî pá pé, Maupyî Mau eq wuimau yàm cháng e ló luî, Hkanan mau jé shoq le, Lebanon mai Uhprat Wuìlàng mó jé shoq le e ló keq. 8 Ngò gi, núngmòq lé maumyî haû byî to bê nghut lhê. Núngmòq é îchyí îwa Abraham, Isak eq Yakup lé le, yhángmòq é htâng mâ é awùt ashîn pé lé le, byi râ ga haû Yhûmsîng Garai dâkam tô é maumyî má wang ló mù, ló sing yù keq.” ga taî ri.
Ushuq Pé Hkyin Htoq Yu É Hkyô
9 Haú hkûn, ngò gi, núngmòq lé, “Ngò baú za núngmòq lé wú gon râ gi, wò mó yhang dùt byùq ri. 10 Núngmòq é Garai Gasang nghut é, haû Yhûmsîng Garai gi, núngmòq lé byù du lhoqmyo byi bê nghut ri; hkû-nyí, núngmòq gi, mauhkûng mâ é kyî pé su myo bekô nghut ri. 11 Núngmòq é îchyí îwâ pê é Garai Gasang nghut é, haû Yhûmsîng Garai gi, núngmòq lé ahkui lhê é htoq hkyîng mun tú lhoqmyo byi mù, Yhang danghtum htûm tô é eq rajung za núngmòq lé shimân byi sháng gàq! 12 Nghut kôlhang, núngmòq é wuîhke jamjau hkyô pé, núngmòq é wòlai pé eq núngmòq taî htîng lhûm é hkyô pé bànshoq lé, ngò baú hkâsu ung wùn wàq râ lhú? 13 Núngmòq a-myû up hkangmó mâ é myìt hpàqchyî bo é eq sê gyô é u-nuq bò mù, hkúngga hpautap gíng é byù ra-am hkyin htoq keq; ngò, haú bang lé, núngmòq é ushuq kut râ wò byî to râ nghut lhê.” nghû taî é nghut lhê.
14 Núngmòq gi, “Nàng taî é eq rajung za kut le ge ri.” ga tû taí kô é nghut lhê.
15 Haû mù, ngò gi, núngmòq up hkangmó mâ é myìt hpàqchyî bo é eq hkúngga hpautap gíng é byu pé lé hkyin yù mù, núngmòq é zaugun sûwún wuî kut râ matú, rahkyîng ùp zau pé, rashô ùp zau pé, ngo xê ùp zau pé eq raxê ùp zau pé nghut é ayá byî tô é nghut lhê. 16 Haú hkûn, ngò gi, núngmòq é târâ agyi pé lé, “Núngmòq gi, núngmòq é byu pê chyáng htoq é mû lé, gyo byi luî, Isira-elaq byù í yùq é gyoro mâ é mû lé nghut nghut, Isira-elaq byù rayùq eq núngmòq chyáng lé bo nyi é byù bíng rayùq é gyoro mâ é mû lé nghut nghut, târa é dông hpyit byi keq. 17 Mû hpyit jéyáng é hkûn, myòqdong hkâhkyîn kó; tiq sû ko sû lé rajung za gyo byi keq. Ó yùq lé le hkâgyùq kó; hkâsu mù gâ le, târâ jéyáng é hkyô gi, Garai Gasang eq shèq sêng é ru nghut lhê. Núngmòq lûm hpyit wuî é mû lé kúm gi, ngá chyáng lhaî hâng kat keq; ngò haú lé gyo râ nghut lhê.” nghû taî é nghut lhê. 18 Ngò gi, núngmòq kut râ hkyô jung hkangmó lé le, haú hkûn yhang, lé taî kyo bê nghut lhê.
Jó Wú Bang Lé Nhang Kat É Hkyô
19 Hau htâng, ngá-nhúng gi, ngá-nhûng é Garai Gasang nghut é, haû Yhûmsîng Garai mai ngá-nhúng lé hkunmó hkyô é eq rajung za, Horep bùm mai htoq luî, Amori byu pê é bum mau shut e ló mù, núngmòq myàng bê nghut é, lam é htoq agó gyùq chiq râ dùt é yòso bànshoq mai laî byìt luî, Kadesha Barine-a má jé é nghut lhê. 20 Haú hkûn, ngò gi, núngmòq lé, “Ngá-nhûng é Garai Gasang nghut é, haû Yhûmsîng Garai ngá-nhúng lé byî tô é Amori byu pê é bum mau má núngmòq jé bekô nghut ri. 21 Wú keq; núngmòq é Garai Gasang nghut é, haû Yhûmsîng Garai gi, núngmòq lé maumyî haû byî to bê nghut ri. Núngmòq é îchyí îwâ pê é Garai Gasang nghut é, haû Yhûmsîng Garai mai núngmòq lé taî kyô é eq rajung za, dòq ê mù, maumyî haú lé ê sing yù keq. Hkâgyùq kó; myìt wum hkâgyui kó.” nghû taî é nghut lhê.
22 Haú hkûn, núngmòq bànshoq bang gi, ngá chyáng lé lô kômù, “Ngá-nhúng gi, maumyî haú lé jó ê wú mù, ngá-nhúng e ló râ hkyô eq ngá-nhúng ê jé râ wà pé eq sêng é hkyô hkyang lo shit râ matú, ngá-nhûng é hí má byù nhang kat sháng.” ga taî akô nghut ri.
23 Ngò gi, haú hkyô lé gyô htuk luî, ra-up mai rayùq yùq kut, byù raxe í yùq lé hkyin yù bê nghut lhê. 24 Haú bang gi, htoq ló mù, bum mau shut dòq ê luî, Eshihkola Langhkaû jé shoq ê wú pyâm to bekô nghut ri. 25 Haú bang gi, haú mau mâ é shi hpyoq wàq chûng mù, ngá-nhûng chyáng wàq jé lô kôluî, “Ngá-nhûng é Garai Gasang nghut é, haû Yhûmsîng Garai mai ngá-nhúng lé byî tô é maumyî gi, mau gê yhang nghut ri.” ga hkyáng lo shit akô nghut ri.
Yhûmsîng Garai Lé Gumlau Toq É Hkyô
26 Nghut kôlhang, núngmòq gi, a kâm dòq ê kó kut mù, núngmòq é Garai Gasang nghut é, haû Yhûmsîng Garaî é hkunmó lé gumlau toq akô nghut ri. 27 Núngmòq é zúm pé má, núngmòq pùt é dang taí kô é gi, “Haû Yhûmsîng Garai gi, ngá-nhúng lé a naù a wôm é yánmai, ngá-nhúng lé lhoqhtên pyám sháng gàq ga, Amori byu pê é lòq má ngá-nhúng lé àp byî pyám râ matú, Egutuq ming mai ngá-nhúng lé shuî htoq lo é nghut ri. 28 Ngá-nhúng hká ge ló râ lhú? Ngá-nhûng é gu-mang wuì le, ‘Haú mâ é byu pé gi, ngá-nhûng htoq wum bô luî, kô myhang akô nghut ri; yhángmòq é wà mó pé le, lam é htoq agó, wàhkûm pé mauhkûng lháng htûng ri. Anak byu pé lé lháng ngá-mòq haú má myang ri.’ ga taî é dông ngá-nhûng é i-myìt wum lhoqshun pyám byi bekô nghut ri.” gâ akô.
29 Haú hkûn, ngò gi, núngmòq lé, “Hkâgyùq chiq kó; yhángmòq lé hkâgyùq kó. 30-31 Núngmòq é Garai Gasang nghut é, haû Yhûmsîng Garai gi, núngmòq é myòq hí má yhang, Egutuq ming eq yòso má núngmòq é matú kut byî é su, núngmòq é hí má e ló byi mù, núngmòq é matú gyè bo zan râ nghut lhê. Haú hkûn, núngmòq gi, îwa rayùq mai yhang zo lé mâgum yu é sû, núngmòq é Garai Gasang nghut é, haû Yhûmsîng Garai mai núngmòq lé rahkyô htáng shí jowò jé shoq mâgum lo é hkyô lé, haú má myàng bekô nghut ri.” nghû taî é nghut lhê.
32 Nghut kôlhang, núngmòq gi, haú hkyô má, núngmòq é Garai Gasang nghut é, haû Yhûmsîng Garai lé a lùmhkaû kó nghut ri; 33 Yhang gi, núngmòq wàp xuq râ jowò hô byi râ eq núngmòq e ló râ hkyô tûn shit râ matú, núngmòq é hkyôwuì má, núngmòq é hí shut, myín lé myi zîng má, nyí lé mhuthtui má kut luî bo e ló byî é Sû nghut ri.
34 Haû Yhûmsîng Garai gi, núngmòq taî é dang lé wó gyo luî, nhikjum yo mù, 35-36 “Núngmòq é îchyí îwâ pé lé Ngò byi râ nghû dâkam tô é maumyî gè haú lé, Yehpuna é yhang zo Hkalep mai lai luî, shî agè ashop é i-pyàt mâ é bang rayùq le myàng râ a nghut. Hkalep gi, maumyî haú lé myàng râ nghut mù, yhang, haû Yhûmsîng Garaî é myìt lé, i-myìt nhiklhum bànshoq èq châng é yánmai, Ngò gi, yhang lé le, yhâng é awùt ashîn pé lé le, yhang nâng é maumyî byî râ nghut lhê.” ga dakâm dang taî ri.
37 Haû Yhûmsîng Garai gi, ngo lé le, núngmòq é yánmai nhikjum yo luî, “Nàng le haú mau má wó wâng râ a nghut. 38 Nghut kôlhang, nang lé htuqbáng sû, Nun é yhang zo Yoshuq gi, haú mau má wó wâng râ nghut lhê. Yhang gi, Isira-elaq byu pé lé haú mau shuî sing yù râ nghut é yánmai, yhang lé myìt wum byi aq. 39 Shúm byû dùt é hui râ ga núngmòq taî é zonú wuî eq ge é a ge é lé a sé shî é núngmòq é zoshâng wuì gi, haú mau má myang wàng kôrâ nghut lhê. Ngò gi, maumyî haû yhángmòq lé byi râ nghut mù, yhángmòq gi, maumyî haú lé sing yù kôrâ nghut lhê. 40 Nghut kôlhang, núngmòq gi, lhing tau mù, Nhông Nè shut hkyang é hkyô cháng luî, yòso shut sô e ló keq.” ga taî ri.
41 Haú hkûn, núngmòq gi, “Haû Yhûmsîng Garai lé ngá-mòq mara kut shut bê. Ngá-mòq é Garai Gasang nghut é, haû Yhûmsîng Garai mai ngá-mòq lé hkunmó hkyô é eq rajung za, ngá-mòq dòq ê mù, majan ê zan râ nghut lhê.” ga tû taî kômù, yùq hkangmó ó le ô é shâm lhâm chûng mù, bum mau shut dòq ê râ matú myìt toq bûm kô é nghut lhê.
42 Nghut kôlhang, haû Yhûmsîng Garai gi, “Yhángmòq lé, ‘Núngmòq eq rahá Ngò a bo cháng râ nghut é yánmai, hkâdòq ê kó, majan hkâ-é zan kó. Núngmòq é gye pê é lòq má sûm byùq kôrâ nghut lhê.’ nghû taî kyo aq.” ga ngo lé taî ri.
43 Haû eq rajung za núngmòq lé ngò taî kyo bê nghut lhê; nghut kôlhang, núngmòq a gyo kó. Núngmòq gi, haû Yhûmsîng Garaî é hkunmó lé gumlau toq kômù, nghutbûn é myìt mai haû bum mau shut yán dòq e akô nghut ri. 44 Bùm haú pé má nyi é Amori byu pé gi, núngmòq lé lé htim kômù, byo jûm htîm é su núngmòq lé châng hkat kôluî, Se-ira bùm mai Horama jé shoq châng sat akô nghut ri. 45 Haû mù, núngmòq gi, taû lò luî, haû Yhûmsîng Garaî é hí má lo wùt ngau akô nghut ri; nghut kôlhang, Yhang gi, núngmòq é ngaù htê lé a gyo byî é eq núngmòq é dang lé a wó gyo byi nghut ri. 46 Haû mù, núngmòq gi, Kadesha má buìnyì myáng myáng nyi pyám bekô nghut ri.