Yòso Má Yông Lhing Wún É Hkyô
2
Hau htâng, ngá-nhúng gi, haû Yhûmsîng Garai mai ngo lé shit kyô é eq rajung za, lhing tau mù, Nhông Nè shut hkyang é hkyô cháng luî, yòso shut e ló bê nghut lhê. Haû mù, ngá-nhúng gi, Se-ira bum mau má buìnyì myáng myáng yông lhing wún é nghut lhê.2 Haú hkûn, haû Yhûmsîng Garai gi, ngo lé, 3 “Núngmòq gi, bum mau shî má yông lhing wún é lûm myáng bê nghut mù, mautsûng shut dòq e ló keq. 4 Haû shiwa byu pé lé îsu nghû hkunmó hkyó aq; ‘Núngmòq gi, Se-ira bum mau shî má nyi é núngmòq é yhang gu yhang mang Eso é awùt ashîn pê é maumyî mai laî ló kôrâ nghut mù, yhángmòq gi, núngmòq lé lhom gyùq kôrâ nghut lhê. Haû mù, núngmòq rago sidìq keq. 5 Yhángmòq lé majan hkâ-é hpóng kó; hkâsu mù gâ le, Ngò gi, Eso lé Se-ira bum mau byî to bê nghut é yánmai, yhángmòq é maumyî hkâ lé le, núngmòq lé byi râ a nghut é htoq agó, núngmòq é hkyî nang jang lháng byi râ a nghut. 6 Núngmòq gi, yhángmòq chyáng mai, zoshuq eq ûchyam lé ngùn byi mù wuì zo wuì shuq ra kôrâ nghut lhê.’ nghû àq.” ga taî ri.
7 Núngmòq é Garai Gasang nghut é, haû Yhûmsîng Garai gi, núngmòq é lòq èq zui saî é múzó bànshoq má shimân byi bê nghut ri. Yhang gi, yòso mó shî má núngmòq lé wú zúng bê nghut ri. Núngmòq é Garai Gasang nghut é, haû Yhûmsîng Garai gi, shî myi xê zàn gyoro má núngmòq eq rahá nghut nyî mù, núngmòq gi, haî lháng a langhpyùt kô é nghut lhê.
8 Haû mù, ngá-nhúng gi, Se-ira bùm má nyi é ngá-nhûng é gu-mang Eso é awùt ashîn pê é ayàm mai laî ló luî, Elat eq Ezi-on Gebera wà mai lo é Araba hkyô lé koi pyám mù, Moba yòso hkyô shut lhing ló luî, sô e ló é nghut lhê.
9 Haú hkûn, haû Yhûmsîng Garai gi, ngo lé, “Moba byu pé lé jèq hkâ-é hô kó; yhángmòq lé majan hkâ-é hpóng kó; hkâsu mù gâ le, Ngò gi, Lot é awùt ashîn pé lé Ara wà sîng nhang to bê nghut é yánmai, núngmòq lé, yhángmòq é maumyî hkâ le byi râ a nghut.” ga taî ri.
10 (Hí hkûn lé, Anak byu pé su kô myhâng wum bô luî, byù du gyai myô é Emim byu pé gi, haú mau má nyi é nghut lhê. 11 Yhángmòq le, Anak byu pé su, Rehpim byu pé ga bang nghut akô; nghut kôlhang, Moba byu pé gi, yhángmòq lé Emim byu pé ga wùt akô nghut ri. 12 Hori byu pé gi, hí hkûn Se-ira bùm má nyì kô é nghut lhê; nghut kôlhang, Eso é awùt ashín pé gi, yhángmòq lé hkat htoq pyâm é nghut ri. Isira-elaq byu pé sing yù râ matú, yhángmòq lé haû Yhûmsîng Garai byî é maumyî lé yhángmòq kut kô é su, Eso é awùt ashín pé gi, Hori byu pé lé sat kyop pyám kômù, yhángmòq é jowò má nyi byùq akô nghut ri.)
13 Hau htâng, Yhûmsîng Garai gi, “Ahkuî toq mù, Zeret Langhkaû laî byìt keq.” ga taî ri. Haû mù, ngá-mòq gi, langhkaû haú lé laî byìt bê nghut lhê.
14 Ngá-nhúng, Kadesha Barine-a mai htoq lô mù, Zeret Langhkaû laî byìt é hkûn nghut jáng súm xe shit zân myáng bê nghut ri. Haú gyoro hkaû má, haú i-pyàt mâ é gyè wó zan bang bànshoq gi, haû Yhûmsîng Garai mai yhángmòq lé dâkam tô é eq rajung za, xuq tô é wàp má shi htûm byùq bekô nghut ri. 15 Haû Yhûmsîng Garaî é lòq gi, wàp haú mai yhángmòq bànshoq bang lé lhoqhtûm pyâm é jé shoq, yhángmòq lé htîm nyi é nghut ri.
16 Ahkuî, haû gyè wó zân é byù shí bang bànshoq, shiwa byù hpúng mai shi byùq é hkûn, 17 haû Yhûmsîng Garai gi, ngo lé, 18 “Hkû-nyí, núngmòq gi, Moba maukyo mâ é Ara wà mai laî ló ra râ nghut lhê. 19 Núngmòq gi, Ammon byu pé nyi é jang má jé ló kôjáng, yhángmòq lé jèq hkâhô kó, majan le hkâhpóng kó; hkâsu mù gâ le, Ngò gi, Ammon byu pê é maumyî haú lé, núngmòq lé sîng nhâng râ a nghut. Ngò gi, Lot é awùt ashîn pé lé maumyî haû sîng nhang to bê nghut lhê.” ga taî ri.
20 (Maumyî haú lé, Rehpim byu pé nyi laî é maumyî ga le myìt bum akô; nghut kôlhang, Ammon byu pé gi, yhángmòq lé Zamzumim byu pé ga wùt akô nghut ri. 21 Yhángmòq gi, Anak byu pé su kô myhâng luî, wum bo é eq byù du gyai myô é byu pé nghut akô. Haû Yhûmsîng Garai gi, yhángmòq lé, Ammon byu pê é hí má sat kyop pyâm é nghut mù, Ammon byu pé gi, yhángmòq lé hkat htoq pyám mù, yhángmòq é jowò lé wó sing yù kôluî, haú má nyì kô é nghut ri. 22 Haû Yhûmsîng Garai gi, Se-ira má nyi é Eso é awùt ashîn pê é hí má Hori byu pé lé sat kyop pyâm é hkûn, yhángmòq é matú le haû eq rajung za kut byî ri. Yhángmòq gi, Hori byu pé lé hkat htoq pyám mù, hkû-nyí jé shoq haú bâng é jowò má nyi nyi akô nghut ri. 23 Haû eq rajung za, Hkaptora mai htoq lo é Hkaptora byu pé gi, Gaza wà jé shoq jòq é wà pé má nyi é Awim byu pé lé sat kyop pyám mù, yhángmòq é jowò má nyi nyi akô nghut ri.)
Heshibon Hkóhkâm Sihon Lé Ung Pyâm É Hkyô
24 Hau htoq agó, Mosheq gi, “Ahkuî toq e ló mù, Arinon Langhkung laî byìt ê keq. Ngò gi, Amori byù Heshibon hkóhkâm Sihon eq yhâng é mau lé núngmòq é lòq má àp byî to bê nghut lhê. Haú mau lé sing yu hî râ matú, yhang lé majan ê zan keq. 25 Ngò gi, hkû-nyí yhang, mauhkûng ô mâ é a-myû wuì bànshoq lé, núngmòq lé gyùq kyûm gyùq nghâ nhâng râ nghut lhê. Yhángmòq gi, núngmòq é hkyô hkyanglù lé wó gyo kômù, gyùq nán kôluî, núngmòq é yánmai wuîhke mó hpuzo kôrâ nghut lhê.” ga le taî ri.
26 Hau htâng, ngò gi, Kedemot Yòso mai Heshibon hkóhkâm Sihon chyáng lagyô pé nhang kat luî, nguì ngón dang lé, 27 “Náng é mau mai ngá-mòq lé laî ló nhâng àq. Ngá-mòq gi, hkyô mó mai za so luî, lòqyò lòqpai shut a jau wàng râ nghut lhê. 28-29 Ngá-mòq zo râ zoshuq eq shuq râ ûchyam lé ngùn èq ung byi aq. Ngá-mòq gi, Yodan làng gû dàp mù, ngá-mòq é Garai Gasang nghut é, haû Yhûmsîng Garai mai ngá-mòq lé byî tô é mau má wó wang ló é hkûn jé shoq, Se-ira bùm má nyi é Eso é awùt ashín pé eq Ara wà má nyi é Moba byu pé kut byî é su, ngá-mòq lé hkyî hkyô za sô lai nhâng àq.” nghû châng hun kat é nghut lhê. 30 Nghut kôlhang, Heshibon hkóhkâm Sihon gi, ngá-mòq lé lai râ ahkáng a byi nghut ri. Hkâsu mù gâ le, núngmòq é Garai Gasang nghut é, haû Yhûmsîng Garai gi, Yhang ahkuî kut é su, yhang lé núngmòq é lòq má àp byi râ matú, yhâng é i-myìt lé lhoqhtân nhâng mù, yhâng é myìt nhiklhum mai a gyo kut nhang é nghut ri.
31 Haû Yhûmsîng Garai gi, ngo lé, “Wú aq; Ngò gi, Sihon eq yhâng é mau lé náng é lòq má àp byî hî bê nghut lhê. Nàng gi, maumyî haú lé ùp sing hi ló lo àq hkoi.” ga taî ri.
32 Sihon gi, yhâng é gyèzô pé bànshoq eq rahá, Yahazi jowò má majan zan râ ga htoq lé lo é hkûn, 33 ngá-nhûng é Garai Gasang nghut é, haû Yhûmsîng Garai gi, yhang lé ngá-nhûng é lòq má àp byî é nghut mù, ngá-nhúng gi, yhang lé le, yhâng é yhang zo yùqzô pé eq yhâng é gyèzô pé bànshoq lé le, sat pyâm é nghut lhê. 34 Haú u lé, ngá-nhúng gi, yhâng é wà pé bànshoq lé lú sing yù luî, wà pé mâ é yùqgè wuì, myiwe wuì eq zoshâng wuì bànshoq lé, rayùq lháng a myhit to loshoq sat pyâm é nghut lhê. 35 Nghut kôlhang, shigu gaunyhaú eq wó lú sing yu é wà mâ é zè pé lé za, ngá-nhûng é matú hkyom yu lo é nghut lhê. 36 Arinon Langhkaû ayàm mâ é Aro-era eq langhkung má jòq é wà mai, Gile-at jé shoq, ngá-nhúng a ung é wà ralhum lháng a bò nghut ri. Ngá-nhûng é Garai Gasang nghut é, haû Yhûmsîng Garai gi, yhángmòq bànshoq lé ngá-nhûng é lòq má àp byî to bê nghut ri. 37 Nghut kôlhang, ngá-nhûng é Garai Gasang nghut é, haû Yhûmsîng Garaî é hkunmó eq rajung za, Ammon byu pê é mau eq Yabok làng yàm mâ é maumyî hká lé le, bùm pé mâ é wà pé hká lé le, a záng é nghut lhê.