Bashan Hkóhkâm Oga Lé Ung Pyâm É Hkyô
3
Hau htâng, ngá-mòq lhîng luî, Bashan mau shut ló é hkyô cháng mù dòq ló jáng, Bashan hkóhkâm Oga gi, yhâng é gyèzô pé bànshoq eq rahá, Ediri jowò má ngá-mòq lé majan lhom zan râ ga htoq lé lo ri. 2 Haû Yhûmsîng Garai gi, ngo lé, “Yhang lé hkâgyùq; hkâsu mù gâ le, Ngò gi, yhang lé le, yhâng é gyèzô pé bànshoq eq yhâng é mau lé le, náng é lòq má àp byî to bê nghut lhê. Haû Heshibon má ùp é Amori byu pê é hkóhkâm Sihon lé nàng kut é su, yhang lé kut àq.” ga taî ri.3 Haû mù, ngá-nhûng é Garai Gasang nghut é, haû Yhûmsîng Garai gi, Bashan hkóhkâm Oga eq yhâng é gyèzô pé bànshoq lé le, ngá-nhûng é lòq má àp byi bê nghut luî, ngá-nhúng gi, rayùq lháng a myìt to loshoq yhángmòq lé sat kyop pyám bê nghut lhê. 4 Haú hkûn, ngá-nhúng gi, yhâng é wà pé bànshoq lé wó lú sing yu é nghut lhê. Bashan mau má Oga é mîngdán nghut é Arigoba mau gón hkyuq xê wà lé, ngá-nhúng a wó lú sing yu é wà rawà lháng a jòq é nghut lhê. 5 Wà shí pé bànshoq gi, wàhkûm myhang é eq hkum pé hkum kyáng pé bo é gingtîng é wà pé chyat nghut ri; haû htoq agó, wàhkûm a wam tô é wà pé myo myo le bo ashî nghut ri. 6 Ngá-nhúng gi, Heshibon hkóhkâm Sihon lé kut é su, haû wà hkangmó mâ é yùqgè wuì, myiwe wuì eq zoshâng wuì lhúnglháng lé chyut yhang sat htûm pyám bê nghut lhê. 7 Nghut kôlhang, shigu gaunyhaú bànshoq eq yhángmòq é wà pé mai wó sing yu é zè pé lé gi, ngá-nhûng é matú hkyom yu lo é nghut lhê.
8 Haû mù, haú hkûn, ngá-nhúng gi, Arinon langhkung mai Herimon Bùm jé shoq nghut é, Yodan làng buìhtoq hkyam mâ é Amori hkóhkam nhik é mau lé sing yu é nghut lhê. 9 (Herimon Bùm haú lé, Sidon byu pé gi, Siri-on ga, Amori byu pé gi, Senira ga myhîng akô nghut ri.) 10 Haú dông, ngá-nhúng gi, pá dam làm mâ é wà pé bànshoq, Gile-at mau bànshoq, Bashan mau bànshoq, Bashan mau mâ é Oga é mau eq sêng é Saleka eq Ediri wà jé shoq sing yù bê nghut lhê. 11 (Bashan hkóhkâm Oga gi, Rehpim byu pé mâ é ló htâng é yùq nghut ri. Yhâng é yhupgyàp gi, jòqtoq shup saî tô é nghut luî, hîng hpyang gau dúng, làm hpyang myi dúng bo ri. Haû gi, Ammon byu pê é Raba wà má jòq tô ashî nghut ri.)
Maumyî Gam É Hkyô
12 Haú hkûn, ngá-nhúng wó sing yu é maumyî mâ é, Arinon langhkung nàm mâ é Aro-era é mautsûng mau mai hî luî, Gile-at é bum mau rawuí gû eq haú mâ é wà pé lé, ngò, Rubin up bang eq Gat up bang lé àp byî é nghut lhê. 13 Myìt tô é Gile-at mau eq Oga é mau nghut é Bashan maumyî bànshoq lé gi, Manase koq rahkyam lé àp byî é nghut lhê. (Bashan mâ é Arigoba mau gón lé gi, Rehpim byu pê é maumyî lhaq gâ akô nghut ri. 14 Manase é awùt ashín Ya-ira gi, Arigoba mau gón mai Geshuri byu pé eq Mahkahti byu pê é maukyo jé shoq sing yù mù, yhâng é myìng má cháng luî, myìng myhîng tô ri; haû mù, Bashan lé hkû-nyí jé shoq Hawot Ya-ira gâ nyi akô nghut ri.) 15 Gile-at mau lé gi, ngò, Mahkira lé àp byî é nghut lhê. 16 Nghut kôlhang, ngò gi, Gile-at mau mai Arinon langhkung jé shoq, langhkung hau é agùng lé maukyo dông kut luî, Ammon byu pê é maukyo nghut é Yabok Wuìlàng jé shoq lé, Rubin up bang eq Gat up bang lé àp byî é nghut lhê. 17 Hau é buìwàng hkyam mâ é maukyo gi, Araba pá mâ é Yodan làng nghut mù, Hkineret nhông mai Xo Nhông le gâ é Araba Wuimau jé luî, buìhtoq hkyam mâ é Pisiga hkêdòq pé nghut ri.
18 Haú hkûn, ngò gi, núngmòq lé, “Núngmòq é Garai Gasang nghut é, haû Yhûmsîng Garai gi, núngmòq lé maumyî shî sing yu nhâng bê nghut ri. Nghut kôlhang, núngmòq mâ é majan wó zân é bang bànshoq gi, shâm lhâm chûng mù, gótû Isira-elaq byu pê é hí má gû dàp e ló râ dùt lhê. 19 Nghut kôle, núngmòq é yhûmsîng myhî pé, núngmòq é zodù wuì eq núngmòq é shigu gaunyhaú pé gi, ngò, núngmòq lé byî tô é wà pé má nyi to kó sháng gàq; núngmòq shigu gaunyhaú gyai wó é lé ngò sê lhê. 20 Núngmòq gi, haû Yhûmsîng Garai mai núngmòq lé bánno nhang to bê su, núngmòq é gu-mang wuì Isira-elaq byu pé lé le Yhang bánno nhâng mù, núngmòq é Garai Gasang nghut é, haû Yhûmsîng Garai mai Yodan làng hé hpoq má yhángmòq lé byî tô é maumyî lé, yhángmòq wó sing yu é hkûn jé shoq, yhángmòq lé nyhi to hkó keq. Mú haû bàn jáng shèq, núngmòq yùq hkangmó gi, taû ló mù, ngò, núngmòq lé byî tô é maumyî lé ló sîng zo keq.” nghû hkunmó hkyô é nghut lhê.
Mosheq Yodan Làng A Gû Dap Râ Matú Hkûm Pyám Huî É Hkyô
21 Haú hkûn, ngò gi, Yoshuq lé, “Náng é Garai Gasang nghut é, haû Yhûmsîng Garai mai hkóhkâm haû í yùq lé kut é hkyô bànshoq lé, náng é myòq èq yhang myàng bê nghut lhê. Haû Yhûmsîng Garai gi, nàng e ló é mîngdán bànshoq má le haû eq rajung za kut râ nghut lhê. 22 Yhángmòq lé hkâgyùq kó; núngmòq é Garai Gasang nghut é, haû Yhûmsîng Garai gi, núngmòq é matú majan bo zan râ nghut lhê.” nghû hkunmó hkyô é nghut lhê.
23 Haú hkûn, ngò gi, hau Yhûmsîng Garai lé, 24 “Ahko Ahkáng lhúnglháng wó Sû Yhûmsîng Garai ê, Nàng gi, Náng é duìnhâng zoshâng ngo lé, Náng é kô làm hkyô eq Náng é wúm bo é lòq lé shit hî bê nghut ri. Nàng zui saî é hkyô eq Nàng kut é múzó mó lé, mauhkûng má le, myigùng má le, hkâsû é garai wá wó kut râ lhú? 25 Yodan làng hé hpoq mâ é ge é bum mau pé eq Lebanon bùm lé myàng râ matú, ngo lé dàp ló nhâng laq.” nghû dûng tôngbán é nghut lhê.
26 Nghut kôlhang, haû Yhûmsîng Garai gi, núngmòq é yánmai ngo lé nhikjum yo luî, a gyo byi nghut ri. Haû Yhûmsîng Garai gi, ngo lé, “Gé bê; haú hkyô eq séng luî, Ngo lé hkâtaî myô nyì lo. 27 Pisiga bùm nyuq má dòq ló mù, buìhtoq buìwàng, maupyî mautsûng lé wú aq. Nàng gi, Yodan làng hé hpoq gû dàp râ a nghut é yánmai, maumyî haú lé náng é myòq èq yhang wú aq. 28 Nghut kôlhang, Yoshuq lé wò byi mù, myìt wum byi luî, wum-o lhoqkíng byi aq; hkâsu mù gâ le, yhang gi, shiwa byù shí bang lé shuî gû dàp luî, yhángmòq lé, nàng myàng râ nghut é maumyî sing yù nhâng râ nghut lhê.” ga taî ri. 29 Haû mù, ngá-nhúng gi, Bet Pe-ora tû-tap mâ é langhkaû má nyi tô é nghut lhê.