Jì-no Gyo Râ Hkunmó Hkyô É Hkyô
4
Ahkuî, Isira-elaq byu pé ê, ngò, núngmòq lé mhoq kyô é târâ wàng hkunmó pé eq târâ pé lé gyo keq. Núngmòq gi, chyungxe hîng mù, núngmòq é îchyí îwâ pê é Garai Gasang nghut é, haû Yhûmsîng Garai mai núngmòq lé byî tô é maumyî lé ló wó sing yù kó sháng gàq, haú pé lé châng kut nyî keq. 2 Ngò, núngmòq lé hkunmó hkyô tô é má dang sik ge jàt kat râ a nghut; haú mâ é haî le ge lhoqyom pyám râ a nghut; núngmòq lé ngò byî tô é, haû núngmòq é Garai Gasang nghut é, Yhûmsîng Garaî é hkunmó pé lé kúm châng nyì keq.3 Balaq Pe-ora é yánmai haû Yhûmsîng Garai kut é hkyô lé, núngmòq é myòq èq yhang myàng bekô nghut ri. Núngmòq é Garai Gasang nghut é, haû Yhûmsîng Garai gi, núngmòq chyáng mâ é Balaq Pe-ora é hkyô cháng bang yùq hkangmó lé lhoqhtûm pyám bê nghut ri; 4 nghut kôlhang, núngmòq é Garai Gasang nghut é, haû Yhûmsîng Garai lé nui dàp nyi é núngmòq bànshoq bang kúm gi, hkû-nyí jé shoq chyungxe dui nyi akô nghut ri.
5 Wú keq, ngò gi, núngmòq wang ló mù, ló sing yù râ mau má núngmòq châng nyì râ târâ wàng hkunmó pé eq târâ pé lé, ngá é Garai Gasang nghut é, haû Yhûmsîng Garai mai ngo lé hkunmó hkyô é eq rajung za mhoq byi bê nghut lhê. 6 Haú pé lé rago châng nyì keq; haû jáng, shî gi, târâ wàng hkunmó haú pé bànshoq lé wó gyô é nghut luî, “Gè gè yhang, byù myû mó shî gi, hpàqchyî eq sê gyô é u-nuq bo é byu pé nghut akô.” ga núngmòq é hkyô taî é bang lé, núngmòq é hpàqchyî byéng-yá eq sê gyô é u-nuq shit râ nghut lhê. 7 Ngá-nhúng kyûdung hkangmó ngá-nhúng eq chyâng nyi é, ngá-nhûng é Garai Gasang nghut é, haû Yhûmsîng Garai su, gótû a-myû mó má, yhángmòq eq chyâng nyi é hparà pé nyi lhê lhú? 8 Hau htoq agó, hkû-nyí ngò núngmòq é hí má tô tô é, díngmán é târâ wàng hkunmó pé eq târâ pé gi, gótû a-myû mó má jòq akô lhú?
9 Haû mù, núngmòq é myòq èq yhang myang é hkyô pé lé a tô-myhî pyâm é za, núngmòq chyungxe rû dui nyì nyì núngmòq é myìt má wó xûm nyì sháng gàq, rago za sidìq nyì luî, yhûmsing gùng yhûmsîng machyâ nyì àq. Haú pé lé, núngmòq é zodù wuì lé le rabán htâng rabán mhoq byî nyì keq. 10 Haû Horep bùm má, núngmòq é Garai Gasang nghut é, haû Yhûmsîng Garaî é hí má nàng yàp tô é hkûn, “Haû shiwa byu pé gi, myìdàm htoq má rû dui nyì nyì, Ngo lé gyùq hkúngga râ hkyô wó mhoq yû mù, yhángmòq é zodù wuì lé wó mhoq byi kó sháng gàq, Ngá é mungdang gyo râ matú, yhángmòq lé Ngá é hí má zing nhâng àq.” ga Yhang mai ngo lé taî é buìnyì lé myìtbun aq. 11 Núngmòq le huî chyâng lé lô mù, haû bùm hkyî má lé yàp tô é nghut lhê; bùm haû gi, mauhkûng htung shoq myi duq nyî mù, mhutdûm nòq tô é eq mauchut tuq dùt tô é nghut ri. 12 Haú hkûn, haû Yhûmsîng Garai gi, myi hkaû mai núngmòq lé dáng nyo ri. Núngmòq gi, danghtê lé wó gyo kôlhang, gùnghkyâng lé a myàng kó nghut ri; haú má danghtê za htoq lo é nghut ri. 13 Yhang gi, núngmòq cháng râ matú Yhang hkunmó hkyô tô é, Yhâng é dangshikaq nghut é Târâ Yhâng nu raxê lé le, núngmòq lé taî htoq kyo mù, haú pé lé lùqlong í long má kâ tap tô ri. 14 Núngmòq Yodan làng gû dàp mù, sing yù râ mau má núngmòq cháng ra râ nghut é târâ wàng hkunmó pé eq târâ pé lé, núngmòq lé mhoq byi râ matú, haú hkûn, Yhûmsîng Garai mai ngo lé shit kyô é nghut lhê.
Hparà Hpôlhô Lé A Noq Râ Hkyô
15 Núngmòq gi, Horep bùm má myihkau mai núngmòq lé Yhûmsîng Garai dáng nyo é buìnyì má, hkâsû é gùnghkyâng lé le a myàng kô é nghut lhê. Haû mù, núngmòq gi, yhûmsing gùng yhûmsîng rago sidìq nyì keq; 16 haú hkûn shèq, núngmòq gi, htên byòq bang a dùt é htoq agó, yhûmsing é matú hparà lhô a saí kôrâ nghut lhê; yùqgè su dùt é, myiwe su dùt é azòng lhô haî le, 17 myìdàm htoq má nyi é gaunyhaú zông haî le, maulat má dâng é nghoq zông haî le, 18 myigùng htoq má dô yê é jung zòng haî le, wuì hkaû má nyi é ngozo a-myû zòng haî le, núngmòq a saí lo râ nghut lhê. 19 Núngmòq gi, mauhkûng shut tu wú mù, núngmòq é Garai Gasang nghut é, haû Yhûmsîng Garai mai mauhkûng ô mâ é byù myû bànshoq bâng é matú gótû san kut to byî é buì, lha-mó eq kyî pé nghu é mauhkûng gùng pé bànshoq lé myàng kô é hkûn, haú pê é hí má paî gòp noqkuq râ matú lâng nghoq yu é hkâhui kó. 20 Núngmòq kúm gi, hkû-nyí kut nyi é su, haû Yhûmsîng Garaî é silî wunlî byù myû dùt râ matú, Egutuq ming mâ é jòqtoq nyé yui nyi é myi bunghkyûng mai Yhâng èq lâng htoq yu é bang nghut akô.
21 Haû Yhûmsîng Garai gi, núngmòq é yánmai, ngo lé nhikjum yo mù, ngò, Yodan làng a gû dàp râ eq, núngmòq é Garai Gasang nghut é, haû Yhûmsîng Garai mai núngmòq é silî wunlî dông núngmòq lé byî tô é maumyî gè má a wang ló râ matú dâkam pyám bê nghut ri. 22 Ngò gi, shí mau má shî râ nghut lhê; ngò gi, Yodan làng gû dàp râ a nghut; nghut kôlhang, núngmòq gi, gû dàp râ za nghut mù, maumyî gè haú lé sing yù kôrâ nghut lhê. 23 Haû mù, núngmòq é Garai Gasang nghut é, haû Yhûmsîng Garai mai núngmòq eq tô tô é dangshikaq lé a tô-myhî pyâm é htoq agó, núngmòq é Garai Gasang nghut é, haû Yhûmsîng Garai mai hkûm tô é haí jung azòng lé nghut kôle, núngmòq é matú hparà lhô a saí râ matú, sidìq nyì keq. 24 Hkâsu mù gâ le, núngmòq é Garai Gasang nghut é, haû Yhûmsîng Garai gi, nyé jôm é myi eq manôn sê é Garai Gasang nghut ri.
25 Núngmòq gi, zodù eq gashû pé wó mù, maumyî haú má nyi myáng lô kô é hkûn, htên byòq lò mù, hparà lhô rajung jung saí luî, núngmòq é Garai Gasang nghut é, haû Yhûmsîng Garaî é myòq hí má agè ashop é hkyô kut mù, Yhang lé nhikjum lhoqyô é nghut jáng, 26 núngmòq Yodan làng gû dàp mù, sing yu é maumyî má hân htûm ló byùq sháng gàq nghû, hkû-nyí, ngò mauhkûng eq myigùng é myìng lang luî, núngmòq lé taî tô lhê. Núngmòq gi, haú má myáng myáng nyì râ a nghut, teng za lhoqhtûm pyâm é hui râ nghut lhê. 27 Haû Yhûmsîng Garai gi, núngmòq lé gótû a-myû wui chyáng lhoqpyo kat râ nghut mù, núngmòq gi, haû Yhûmsîng Garai mai núngmòq lé lhoqpyo kat râ nghut é a-myû wui chyáng ra-tsuí za nyi myìt to râ nghut lhê. 28 Haú má, núngmòq gi, sik eq lùqgòk lé byu èq saî é, a ge wú, a ge gyo, a ge zo, a ge nam é hparà pé lé noq kôrâ nghut lhê. 29 Nghut kôlhang, núngmòq gi, haú mai núngmòq é Garai Gasang nghut é, haû Yhûmsîng Garai lé ho é nghut mù, núngmòq é i-myìt nhiklhum bànshoq eq núngmòq é i-myìt sô lhum gón èq Yhang lé ho é nghut jáng, Yhang lé myang hô kôrâ nghut lhê. 30 Núngmòq gi, htâng hpyang lhê é buìnyì pé má, myìt myo ûng wom mù, shí hkyô pé bànshoq núngmòq chyáng dùt htoq é hkûn, núngmòq é Garai Gasang nghut é, haû Yhûmsîng Garaî chyáng lhing taû lò mù, Yhâng é jì-no gyo kôrâ nghut lhê. 31 Hkâsu mù gâ le, núngmòq é Garai Gasang nghut é, haû Yhûmsîng Garai gi, shogyo nhikmyîn é Garai Gasang nghut lhê; Yhang gi, núngmòq lé, tô pyám râ le a nghut, lhoqhtên pyám râ le a nghut, núngmòq é îchyí îwâ pé lé dâkam é dông tô tô é dangshikaq lé le tô-myhî pyám râ a nghut.
Haû Yhûmsîng Garai Gi, Garai Gasang Nghut É Hkyô
32 Garai Gasang myìdàm htoq má xângzo byù lé hpan tô é buìnyì mai, góhkun lhê é buìnyì pé lé myî gôn wú aq; mau yâm ló htâng é rahkyam mai góhkyam jé shoq myî gôn wú aq. Haú í kô hkìk é múzó dùt htoq wú é lhú? Haû sû é hkyô dùt htoq wú é lé wó gyô wú é lhú? 33 Núngmòq su, myi hkaû mai nyo htoq lo é Garai Gasâng é htê lé wó gyo luî, chyungxe dui nyi é byù, gótû a-myû má nyi ri lhú? 34 Núngmòq é Garai Gasang nghut é, haû Yhûmsîng Garai mai Egutuq ming má núngmòq é myòq hí má núngmòq é matú kut byî é hkyô pé bànshoq su, chyam wú é hkyô pé, làklaí alhô agàn pé, maúhpo múzó pé, majan htoq é, wúm bo é lòq eq lhâm tô é lòqbú, gyùq chiq hpo mó múzó pé eq kut luî, hká hparà gi, byù myû ra-myû mai gótû ra-myû lé, yhâng é matú hkyi htoq yu wú é lhú?
35 Haû Yhûmsîng Garai gi, Garai Gasang nghut é eq Yhang mai lai luî gótû Garai a nyì lô é hkyô lé, núngmòq wó sé sháng gàq ga, núngmòq lé haú hkyô pé tûn shit é nghut lhê. 36 Yhang gi, mauhkûng mai, núngmòq lé mhoq shit râ matú, núngmòq lé Yhâng é htê wó gyo nhâng bê nghut ri; Yhang gi, myìdàm htoq má, núngmòq lé Yhâng é gyúng nyi é myi tûn shit é nghut luî, núngmòq gi, myi mai htoq é Yhâng é danghtê lé wó gyo bekô nghut ri. 37 Yhang gi, núngmòq é îchyí îwâ pé lé chyitdàp mù, yhángmòq é awùt ashîn pé lé hkyin yù bê nghut é yánmai, Yhang yhang, Yhâng é wum-o a-tsam mó èq núngmòq lé Egutuq ming mai shuî htoq lô luî, 38 núngmòq htoq kô hkìk é eq wúm bo é a-myû wuì lé, núngmòq é hí mai hkat htoq pyám byi mù, hkû-nyí nghut nyi é su, yhángmòq é maumyî lé, núngmòq é silî wunlî maumyî dông núngmòq lé byi râ matú, yhángmòq é maumyî má shuî jé wàng bê nghut ri.
39 Haû Yhûmsîng Garai gi, ahtoq mauhkûng má le, a‑ô myìdàm htoq má le, Garai Gasang nghut nyi é lé le, gótû Garai a nyì lô é lé le, sê gyo luî, i-myìt ûnghkaû má xûm to keq. 40 Hkû-nyí, ngò, núngmòq lé byî é Yhâng é târâ wàng hkunmó pé eq hkyô tô é hkunmó lé le châng nyì keq; haû jáng, núngmòq é Garai Gasang nghut é, haû Yhûmsîng Garai mai núngmòq é matú ayang byî tô é mau má chyungxe hîng hîng myang nyì mù, núngmòq le, núngmòq é zodù wuì le, wó nyî ngón yùqyò kôrâ nghut lhê.
Hpang Hkaû Râ Wà Mó Pé
41 Haú pé ban taî é htâng má, Mosheq gi, Yodan làng buìhtoq hkyam shut wà mó sum wâ lé gótû kut masàt tô ri. 42 Wà haú pé gi, rayùq yùq mai, yhâng é chyáng nâm mâ é sû lé a ngui é myìt a bo é za, a bûn nùng má záng sat pyâm é hkûn, yhâng é chyungxe wó lùt râ matú, rawà wà má wó hpang hkaû râ jang nghut lhê. 43 Wà haú pé gi, Rubin up é matú yòso pá dam làm mâ é Bezera wà; Gat up é matú Gile-at mau mâ é Ramot wà; Manase akoq é matú Bashan mau mâ é Golan wà nghut lhê.
Târâ Lé Taî Hpông Kyô É Hkyô
44 A-ô mâ é gi, Isira-elaq byu pé lé Mosheq lhai byî é târâ nghut ri. 45-46 Shí pé gi, Egutuq ming mai yhángmòq htoq lo é hkûn, Heshibon má ùp é Amori hkóhkâm Sihon é maumyî, Yodan làng buìhtoq hkyam mâ é Bet Pe-ora nàm mâ é langhkaû má, Mosheq mai Isira-elaq byu pé lé lhai byî é sângdang pé, târâ wàng hkunmó pé eq târâ pé nghut lhê. Mosheq eq Isira-elaq byu pé gi, Egutuq ming mai htoq lô kô é hkûn, hkóhkâm haú lé sat pyám kômù, 47 yhâng é maumyî lé le, Bashan hkóhkâm Oga é maumyî lé le sing yu akô nghut ri; hkóhkâm haû í yùq gi, Yodan làng buìhtoq hkyam mâ é Amori hkóhkam nhik nghut akô. 48 Maumyî haû gi, Arinon Langhkung yàm mâ é Aro-era mai hî luî, Herimon gâ é Si-on Bùm jé shoq nghut mù, 49 Yodan làng buìhtoq hkyam mâ é Araba pá bànshoq mai Pisiga hkêgyó pê é nàm mâ é Xo Nhông jé shoq nghut ri.