Târâ Yhâng nu Raxê
5
Mosheq gi, Isira-elaq byù bànshoq lé ji tsîng yù mù, yhángmòq lé shî su ga taî ri; Isira-elaq byu pé ê, hkû-nyí ngò núngmòq gyô tô é má taî pyo é târâ wàng hkunmó pé eq târâ pé lé gyo keq; haú pé lé mhoq yû mù, rago châng nyì keq. 2 Ngá-nhûng é Garai Gasang nghut é, haû Yhûmsîng Garai gi, Horep bùm má ngá-nhúng eq dangshikaq to bê nghut ri. 3 Haû Yhûmsîng Garai gi, ngá-nhûng é îchyí îwâ pé eq dangshikaq haû lé tô é a nghut; hkû-nyí shî má chyungxe dui nyi é ngá-nhúng bànshoq bang eq shèq tô tô é ru nghut lhê. 4 Haû Yhûmsîng Garai gi, bùm má myi hkaû mai núngmòq lé myòqdong hkyúm dáng nyo é nghut ri. 5 (Haú hkûn, ngò gi, núngmòq myi lé gyùq luî, bùm má a dòq ê kô é yánmai, haû Yhûmsîng Garai eq núngmòq é gyoro má yàp mù, núngmòq lé, Yhûmsîng Garaî é dang taî pyo é nghut lhê.)Yhang taî é gi, 6 “Ngò gi, núngmòq jùn dut nyi é Egutuq ming mai núngmòq lé shuî htoq lo é Sû, núngmòq é Garai Gasang nghut é, haû Yhûmsîng Garai nghut lhê.
7 Nàng gi, Ngò mai lai luîa, gótû hparà pé lé hkâ-noq.
8 Nàng gi, mauhkûng ahtoq tsáng má nyi é nghut nghut, mauhkûng ô myigùng tsáng má nyi é nghut nghut, myigùng a-o tsáng wuì hkaû má nyi é nghut nghut, hai é azòng lé le, náng é matú hparà lhô hkâsaí. 9 Nàng gi, haú pé lé hkâ-paî gòp, hkâ noqkuq. Hkâsu mù gâ le, náng é Garai Gasang nghut é, haû Yhûmsîng Garai Ngò gi, manôn sê é Garai Gasang nghut mù, Ngo lé a naù a wom kut é îchyí îwâ pê é yubàk mara dam lé, yhángmòq é shubyi shuké sum myi bán jé shoq byi râ nghut lhê. 10 Nghut kôlhang, Ngo lé chyitdàp luî, Ngá é hkunmó pé lé châng é bang lé gi, pyàt bán hkyîng mun jé shoq chyitdàp myìt shit râ nghut lhê.
11 Nàng gi, náng é Garai Gasang nghut é, haû Yhûmsîng Garaî é myìng lé akôm má hkâlang. Hkâsu mù gâ le, haû Yhûmsîng Garai gi, Yhâng é myìng lé akôm má lang sû lé, mara a byî é kut râ a nghut.
12 Náng é Garai Gasang nghut é, haû Yhûmsîng Garai mai nang lé hkunmó hkyô é eq rajung za, Bánno Buìnyì lé lhoqchyoi lhoqyúng mù, châng nyì àq. 13 Hkyuq nyí gû gi, nàng mú zui mù, náng é múzó bànshoq lé zui saí ra râ nghut lhê. 14 Nghut kôlhang, nyhit nyí nyí gi, náng é Garai Gasang nghut é, haû Yhûmsîng Garaî é matú kut é Bánno Buìnyì nghut ri. Haú nyí má gi, nàng le, náng é byìzo yùqzô pé le, náng é duìnhâng zoshâng yùqgè myiwe wuì le, náng é no le, náng é loze le, náng é shigu gaunyhaú hkâ le, náng é wà pé má lé bíng nyi é byù bíng pé le, hai mú ge zui râ a nghut. Haú hkûn, nàng bánnô é su, náng é duìnhâng zoshâng yùqgè myiwe wuì le myang bánno kôrâ nghut lhê. 15 Egutuq ming má núngmòq jùn dut wú é hkyô lé le, náng é Garai Gasang nghut é, haû Yhûmsîng Garai mai wúm bo é lòq eq lhâm tô é lòqbú èq núngmòq lé haû mai shuî htoq lo é hkyô lé le, myìtbûn nyì àq. Haû mù, náng é Garai Gasang nghut é, haû Yhûmsîng Garai gi, Bánno Buìnyì lé châng nyì râ matú nang lé hkunmó hkyô tô é nghut lhê.
16 Náng é Garai Gasang nghut é, haû Yhûmsîng Garai mai nang lé byî tô é mau má, nàng chyungxe hîng mù, nyì ngón yùqyò sháng gàq, náng é Garai Gasang nghut é, haû Yhûmsîng Garai mai nang lé hkunmó hkyô tô é eq rajung za, náng nu náng wa lé hkúngga hpautap àq.
17 Nàng gi, byù hkâsat.
18 Nàng gi, su-myi sulàng hkâlú.
19 Nàng gi, zè hkâhkau.
20 Nàng gi, náng é yhûmkyochâng é hkyô lé, a têng é sàksé hkâhkám.
21 Nàng gi, náng é yhûmkyochâng é yhûmsîng myhí lé myòqnòq é myìt hkâbô. Nàng gi, náng é yhûmkyochâng é yhûm eq maumyî lé le, yhâng é duìnhâng zoshâng yùqgè myiwe wuì lé le, yhâng é no eq loze pé lé le, yhang eq sêng é haí jung lé le, ô nau é myìt ge bò râ a nghut.” gâ ri.
22 Dang shí pé gi, bùm haú má, tîng tîng nòq é, mhut htup é eq myi duq é mai, haú má zîng tô é núngmòq byù hpúng gón lé htê mó èq Yhûmsîng Garai taî pyo kyô é hkunmó pé nghut lhê; Yhang gi, haú má haî le a kat jàt nghut ri. Yhang gi, dang haú pé lé lùqlong í long má kâ tap mù, ngo lé àp byî ri.
23 Haû bùm má myi duq nyi é u, mauchut hkaû mai htoq lo é htê lé núngmòq wó gyo kôjáng, núngmòq mâ é a-myû up ushuq pé eq núngmòq é sûwún wuî bànshoq gi, ngá chyáng lé lô kômù, 24 “Ngá-nhûng é Garai Gasang nghut é, haû Yhûmsîng Garai gi, ngá-mòq lé Yhâng é hpungwup shingkang eq Yhâng é kô làm hkyô lé shit bê nghut mù, ngá-mòq gi, myi mai htoq lo é Yhâng é htê lé wó gyo bê nghut lhê. Garai Gasang, byù eq dáng nyo é nghut kôle, byù haú yùq chyungxe wó dui nyi é hkyô lé, hkû-nyí ngá-mòq myàng bê nghut lhê. 25 Nghut kôlhang, myi mó shî gi, ngá-mòq lé nyé jôm pyám râ nghut lhê mù, ahkuî, ngá-mòq gi, haî mù shi byùq râ lhú? Ngá-mòq gi, ngá-mòq é Garai Gasang nghut é, haû Yhûmsîng Garaî é htê lé ru wó gyô nyi é nghut jáng, shi byùq râ nghut lhê. 26 Hkâsu mù gâ le, myi mai nyo htoq lo é, rû dui nyi é Garai Gasâng é htê lé, ngá-mòq su wó gyo luî, chyungxe wó dui nyi é xângzo byù nyi ri lhú? 27 Huî ê mù, ngá-mòq é Garai Gasang nghut é, haû Yhûmsîng Garai taî é dang bànshoq lé ê gyô yù àq. Haû mù, ngá-mòq é Garai Gasang nghut é, haû Yhûmsîng Garai mai nang lé taî kyô é haî le, ngá-mòq lé taî kyo aq. Ngá-mòq gi, gyô yù mù, cháng râ nghut lhê.” ga taî akô nghut ri.
28 Haû su ga núngmòq ngo lé taî é lé, haû Yhûmsîng Garai wó gyo byi bê nghut mù, haû Yhûmsîng Garai gi, ngo lé, “Byù shí bang nang lé taî é dang Ngò wó gyo bê nghut lhê. Yhángmòq taî é dang bànshoq ge é chyat nghut ri. 29 Yhángmòq le, yhángmòq é zodù wuì le, ahtum abyùq wó nyì ngón yùqyo nyì kôrâ matú, Ngo lé gyùq hkúngga mù, Ngá é hkunmó pé bànshoq lé ayang châng nyì râ i-myìt nhiklhum bo nyì kó sháng gàq! 30 Yhángmòq é zúm pé má taû ló râ matú, yhángmòq lé ló taí aq. 31 Nghut kôlhang, nàng gi, ló sing yù râ matú yhángmòq lé Ngò byî tô é maumyî má ló châng kut nyî kôrâ matú, nàng, yhángmòq lé mhoq byi ra râ nghut é hkunmó pé, târâ wàng hkunmó pé eq târâ pé bànshoq lé, Ngò, nang lé wó byi sháng gàq, shî má Ngò eq rahá nyi to aq.” ga taî ri.
32 Haû mù, núngmòq é Garai Gasang nghut é, haû Yhûmsîng Garai mai núngmòq lé hkunmó hkyô tô é eq rajung za rago châng kut nyî keq; haû mai lòqyò lòqpai hkâjau byùq kó. 33 Núngmòq sing yù râ nghut é maumyî má myang nyì mù, nyì ngón yùqyò luî, chyungxe wó hîng kó sháng gàq, núngmòq é Garai Gasang nghut é, haû Yhûmsîng Garai mai núngmòq lé hkunmó hkyô tô é bànshoq lé jì-no gyô nyì keq.