Yhûmsîng Garai Lé Chyitdàp Râ Hkyô
6
1-2 Núngmòq le, núngmòq é zodù wuì eq yhángmòq é htâng mâ é zodù wuì le, chyungxe dui nyi é u, núngmòq é Garai Gasang nghut é, haû Yhûmsîng Garai lé gyùq hkúngga luî, ngò, núngmòq lé byî tô é târâ wàng hkunmó pé eq hkunmó pé bànshoq lé wó châng nyì mù, núngmòq é chyungxe wó hing nyì sháng gàq, núngmòq Yodan làng gû dàp luî sing yù râ nghut é maumyî má núngmòq châng nyì râ matú, núngmòq lé mhoq byi sháng gàq, núngmòq é Garai Gasang nghut é, haû Yhûmsîng Garai mai ngo lé shit kyô tô é hkunmó pé, târâ wàng hkunmó pé eq târâ pé gi, a-ô mâ é eq rajung za nghut lhê. 3 Isira-elaq byu pé ê, núngmòq é îchyí îwâ pê é Garai Gasang nghut sû, haû Yhûmsîng Garai mai núngmòq lé danghtum htûm tô é eq rajung za, byo-î no-naú yui é mau má núngmòq nyì ngón yùqyò mù myoluq jebe lò sháng gàq, gyô yù luî, rago châng nyì keq.4 Isira-elaq byu pé ê, gyo keq; ngá-nhûng é Yhûmsîng Garai Gasang za, Yhûmsîng Garai nghut lhê. 5 Náng é Garai Gasang nghut é, haû Yhûmsîng Garai lé náng é i-myìt nhiklhum bànshoq, náng é i-myìt sô lhum gón, náng é wum-o bànshoq èq, chyitdàp râ lhê. 6 Hkû-nyí, ngò, nang lé byî é hkunmó pé bànshoq lé, náng é i-myìt nhiklhum hkaû má kat to ra râ nghut lhê. 7 Náng é zodù wuì lé haú pé mhoq byî nyì ra râ nghut lhê. Yhûm má zung to luî le, hkyô má sô nyi u le, lèq tô u le, toq lo u le, haú pé lé taî kyô nyì ra râ nghut lhê. 8 Haú pé lé, alhô agàn dông náng é lòq má tuî tap to mù, masàt laiká dông náng é ngelang má tap chung to aq. 9 Haú pé lé, náng é yhûm hkum mâ é dúnlhum pé eq wâng hkum pé má kâ tap to aq.
10 Náng é Garai Gasang nghut é, haû Yhûmsîng Garai mai, nang lé byi râ ga náng é îchyí îwâ pé nghut é Abraham, Isak eq Yakup lé dâkam tô é mau dâm làm má, nang lé shuî jé mù, nàng a xuq tô é sùtzè byíng é wà mó pé, 11 nàng a wó kat é zè gè jung hkangmó byíng tô é yhûm pé, nàng a dû tô é wuìhtúng pé, nàng a hô tô é tsibyiq hkyâm pé eq tsanlun hkyâm pé lé, nang lé byi luî, nàng gyi gyi dau dau myàng zô é hkûn, 12 nàng jùn dut nyi é Egutuq ming mai nang lé shuî htoq lo é haû Yhûmsîng Garai lé a tô-myhí râ matú sidìq nyì àq.
13 Náng é Garai Gasang nghut sû, haû Yhûmsîng Garai lé gyùq hkúngga mù, Yhang lé za dójaú luî, Yhâng é myìng za lang mù, dakâm ra râ nghut lhê. 14 Núngmòq é awui ayàm má nyi é a-myû wui é hparà nghut é, gótû hparà pê é htâng hkâcháng kó; 15 haû a nghut jáng, núngmòq chyáng nyi tô é, náng é Garai Gasang nghut é, haû Yhûmsîng Garai gi, manôn sê é Garai Gasang nghut mù, nang lé nhikjum yo luî, myìdàm htoq mai nang lé lhoqhtûm pyám râ nghut lhê. 16 Núngmòq gi, Masa jowò má kut kô é su, núngmòq é Garai Gasang nghut é, haû Yhûmsîng Garai lé hkâchyam wú kó. 17 Núngmòq é Garai Gasang nghut é, haû Yhûmsîng Garaî é hkunmó pé, sângdang pé eq târâ wàng hkunmó pé lé hkyak yhang châng nyì àq. 18-19 Nàng wó nyì ngón yùqyò mù, haû Yhûmsîng Garai taî tô é eq rajung za, náng é gye pé bànshoq lé náng é hí mai hkat pyám byi mù, náng é îchyí îwâ pé lé haû Yhûmsîng Garai dâkam tô é jeju maumyî lé wó wang sing yù sháng gàq, haû Yhûmsîng Garaî é hí má tengmán é eq gè réng é hkyô pé lé kut àq.
20 Htângnùng má, náng é zodù wuì mai nang lé, “Ngá-nhûng é Garai Gasang nghut é, haû Yhûmsîng Garai mai nang lé hkunmó hkyô tô é sângdang pé, târâ wàng hkunmó pé eq târâ pé gâ é gi, haí jung lichyúm lhú?” ga myi jáng, 21 yhángmòq lé, “Ngá-mòq gi, Egutuq ming mâ é Hpara-uq é jùn nghut nyî kôlhang, haû Yhûmsîng Garai gi, Yhâng é wúm bo é lòq èq ngá-mòq lé Egutuq ming mai shuî htoq lo é nghut lhê. 22 Haû Yhûmsîng Garai gi, kô hkìk luî gyùq chiq hpo nghut é alhô agàn pé eq maúhpo múzó pé lé, Egutuq ming gón má le, Hpara-uq eq yhâng é yhûmbyù wui chyáng le, ngá-mòq é hí má kut shit ri. 23 Nghut kôlhang, Yhang gi, ngá-mòq lé haû mai shuî htoq lô mù, ngá-nhûng é îchyí îwâ pé lé dakâm danghtum htûm tô é maumyî má ngá-mòq lé shuî jé wâng mù, maumyî haû ngá-mòq lé byî ri. 24 Haû mù, hkû-nyí ngá-nhúng nghut nyi é su, ngá-nhúng gi, chyungxe wó dui nyì mù, hkâ-nhám le wó nyì ngón yùqyo nyì râ matú, ngá-nhûng é Garai Gasang nghut é, haû Yhûmsîng Garai lé gyùq hkúngga mù, târâ wàng hkunmó shí pé bànshoq lé châng nyì râ lé, haû Yhûmsîng Garai mai ngá-mòq lé hkunmó hkyô tô é nghut lhê. 25 Haû mù, ngá-nhûng é Garai Gasang nghut é, haû Yhûmsîng Garai mai ngá-mòq lé hkunmó hkyô tô é eq rajung za, târâ shí pé bànshoq lé Yhâng é hí má ngá-nhúng rago châng é nghut jáng, haû gi, ngá-nhûng é díngmán hkyô dùt râ nghut lhê.” nghû taî kyo keq.