Gótû A-myû Wuì Lé Hkat Htoq Pyâm É Hkyô
7
Núngmòq é Garai Gasang nghut é, haû Yhûmsîng Garai gi, núngmòq sing yù râ nghut é mau má núngmòq lé shuî jé wang ló mù, núngmòq htoq wum je bò je kô é a-myû nyhit myû nghut é, Hiti byù, Girigashi byù, Amori byù, Hkanan byù, Perizi byù, Hiwi byù eq Yebusi byu pé lé hkat htoq pyám byî é hkûn, 2 núngmòq é Garai Gasang nghut é, haû Yhûmsîng Garai gi, yhángmòq lé núngmòq é lòq má àp byi bê nghut jáng, núngmòq gi, yhángmòq lé chyut sat pyám ra râ nghut lhê. Núngmòq gi, yhángmòq eq myìt hui hkyô ge yù râ a nghut é htoq agó, shogyo nhikmyin myìt le ge shit râ a nghut. 3 Yhángmòq eq myi byi myi yû ge kut râ a nghut; núngmòq é byìzô pé lé yhángmòq é yùqzô pê chyáng ge byi tso râ a nghut é htoq agó, yhángmòq é byìzô pé lé le, núngmòq é yhang zo yùqzô pé lé ge yù byi râ a nghut; 4 Hkâsu mù gâ le, yhángmòq gi, núngmòq é zodù wuì lé, Ngá htâng châng nyi é mai hkyô shuî nghoq mù, gótû hparà lé shuî noq ló byùq kôrâ nghut lhê; haú hkûn, haû Yhûmsîng Garai gi, núngmòq lé nhikmó-yo mù, radá dâm lhoqhtûm pyám râ nghut lhê. 5 Haû mù, yhángmòq lé shí dông kut keq; yhángmòq é hkungga gyàp pé lé hpyoq hpyi pyám mù, yhángmòq é chyoiyúng lùqzìng pé lé bàt mhun pyám byi luî, yhángmòq é Ashera hparà zìng pé lé zân lhêng pyám byi luî, yhángmòq é hparà lhô pé lé, myî èq nyhê hkyô pyám byi keq. 6 Hkâsu mù gâ le, núngmòq gi, núngmòq é Garai Gasang nghut é, haû Yhûmsîng Garaî é matú chyoiyúng é byù myû nghut ri. Núngmòq é Garai Gasang nghut é, haû Yhûmsîng Garai gi, núngmòq lé, Yhâng é làksan byù myû dùt râ matú, myìdàm htoq mâ é byù bànshoq bâng chyáng mai hkyin yù bê nghut ri.7 Haû Yhûmsîng Garai gi, núngmòq lé, gótû byù myû htoq núngmòq je myo luî, chyitdàp mù, hkyin yu é a nghut; hkâsu mù gâ le, núngmòq gi, gótû byù myû bànshoq htoq má je shaû é bang ru nghut lhê. 8 Nghut kôlhang, haû gi, Yhûmsîng Garai mai núngmòq lé chyitdàp luî le, núngmòq é îchyí îwâ pé lé dakâm danghtum htûm tô é lé lhoqdìk nau é yánmai le, núngmòq jùn dut nyi é, Egutuq ming mâ é hkóhkâm Hpara-uq é lòq mai, Yhâng é wum mó bo é lòq èq núngmòq lé hkyi xe htoq yû mù, shuî htoq lo é ru nghut lhê. 9 Haû mù, núngmòq é Garai Gasang nghut é, haû Yhûmsîng Garai gi, Garai Gasang nghut é lé sé aq; Yhang gi, jujúm é Garai Gasang nghut mù, Yhang lé chyitdàp luî, Yhâng é hkunmó pé lé châng kut é bang lé, pyàt bán hkyîng mun jé shoq Yhâng é chyitdàp dangshikaq lé lhoqdìk é nghut ri. 10 Nghut kôlhang,
Yhang lé a ngui é bang lé gi, yhángmòq é myòq hí má yhang, htên byòq hkyô jé nhang ri;
Yhang gi, Yhang lé a ngui é bang lé, ahkyíng a lhoqmyáng é za, yhángmòq é myòq hí má yhang dam byî ri.
11 Haû mù, Ngò, hkû-nyí núngmòq lé byî é hkunmó pé, târâ wàng hkunmó pé eq târâ pé lé rago châng nyì keq.
12 Núngmòq gi, târâ shí pé lé rago tâm gyo mù, rago châng nyì kô é nghut jáng, núngmòq é Garai Gasang nghut é, haû Yhûmsîng Garai gi, núngmòq é îchyí îwâ pé lé dâkam tô é eq rajung za, Yhâng é chyitdàp dangshikaq lé núngmòq chyáng lhoqdìk râ nghut lhê. 13 Yhang gi, núngmòq lé chyitdàp mù, núngmòq lé shimân byi luî, núngmòq lé byù du lhoqmyô jàt byi râ nghut lhê; Yhang gi, núngmòq lé byi râ ga núngmòq é îchyí îwâ pé lé dâkam tô é maumyî má, núngmòq zo myo myhû hkyô má le, núngmòq é maumyî mâ é kyôshi myuishi nghut é, gùqzò, tsibyiq wing asik eq tsanlun xû má le, núngmòq é shigu gaunyhaú nghut é no myàng, sau bainám hpúng pé má le, shimân byi râ nghut lhê. 14 Núngmòq gi, gótû byù myû bànshoq htoq má shimân byî é je myo hui kôrâ nghut mù, núngmòq chyáng mâ é myiwe yùqgè wuì baùdung dung râ a nghut é htoq agó, núngmòq é shigu gaunyhaû pé le, azo a shuî é radu lháng nyì râ a nghut. 15 Haû Yhûmsîng Garai gi, núngmòq lé, nòlì nòjàng jung hkangmó mai mâgum yù râ nghut mù, núngmòq myang é Egutuq ming mâ é gyùq jung wúm lé, núngmòq chyáng dàp nhâng râ a nghut; núngmòq lé a ngui é bànshoq bâng chyáng shèq wúm haû dàp nhâng râ nghut lhê. 16 Núngmòq gi, núngmòq é Garai Gasang nghut é, haû Yhûmsîng Garai mai núngmòq lé àp byi bê nghut é byù myû bànshoq lé lhoqhtûm pyám ra râ nghut lhê. Yhángmòq lé shogyô é myìt hkâbô kó; yhángmòq é hparà pé lé hkâbo noq kó; haû gi, núngmòq é matú lhaí dùt râ nghut lhê.
17 Núngmòq gi, núngmòq gùng núngmòq, “Byù myû shí bang gi, ngá-mòq htoq wum je bo akô; ngá-mòq, yhángmòq lé hkâsu wó hkat htoq râ lhú?” ga taí râ âbe. 18 Nghut kôlhang, yhángmòq lé hkâgyùq; núngmòq é Garai Gasang nghut é, haû Yhûmsîng Garai mai Hpara-uq eq Egutuq byù bànshoq bang lé kut é hkyô myìtbun aq. 19 Núngmòq é Garai Gasang nghut é, haû Yhûmsîng Garai mai nang lé shuî htoq lo é hkûn, Yhang tûn shit é, chyam lìk wú é hkyô pé, maúhpo alhô agàn pé, maúhpo múzó pé, Yhâng é wum bo é lòq eq lhâm tô é lòqbú pé lé, núngmòq myòq èq yhang myàng bê nghut lhê. Núngmòq é Garai Gasang nghut é, haû Yhûmsîng Garai gi, ahkuî, núngmòq gyùq nyi é byù myû bànshoq bang lé haú dông kut râ nghut lhê. 20 Hau htoq agó, Náng é Garai Gasang nghut é, haû Yhûmsîng Garai gi, nyi myìt gyó to mù, núngmòq chyáng mai hpang haq byùq é bang htûm byùq shoq, yhángmòq chyáng tûmó byo nhang kat râ nghut lhê. 21 Núngmòq chyáng nyi tô é, núngmòq é Garai Gasang nghut é, haû Yhûmsîng Garai gi, kô hkìk é htoq agó, gyùq chiq hpo Garai Gasang nghut lhê mù, yhángmòq é yánmai nàng gyùq chiq nó a ra. 22 Núngmòq é Garai Gasang nghut é, haû Yhûmsîng Garai gi, yhángmòq lé, núngmòq é hí mai yhó yhó le hkat htoq pyám râ nghut lhê; núngmòq é lhînghkyùq má yòsô tân jung zè pé myô lò râ lé chiq é yánmai, núngmòq gi, yhángmòq lé radá dâm wó lhoqhtûm pyám kôrâ a nghut. 23 Nghut kôlhang, núngmòq é Garai Gasang nghut é, haû Yhûmsîng Garai gi, yhángmòq lé núngmòq é lòq má àp byi luî, yhángmòq htûm byùq shoq, yhángmòq lé myhîn so san dùt nhâng râ nghut lhê. 24 Yhang gi, yhángmòq é hkóhkam pé lé lháng núngmòq é lòq má àp byi râ nghut mù, núngmòq gi, yhángmòq é myìng lé mauhkûng ô mai bùt sut pyám byi râ nghut lhê. Rayùq lháng, núngmòq lé wó toq htuqhtíng râ a nghut; núngmòq gi, yhángmòq lé lhoqhtûm pyám râ nghut lhê. 25 Núngmòq gi, yhángmòq é hparà pê é alhô pé lé myî èq nyhê hkyô pyám ra râ nghut lhê. Haú pé má dàp é hîng ngùn lé hkâ myòqnòq; haú pé lé hkâyû; yù jáng, haú pé gi, núngmòq é matú lhaí dùt râ nghut lhê; haú pé lé, núngmòq é Garai Gasang nghut é, haû Yhûmsîng Garai chaq ri. 26 Achaq achyut é zè haú pé lé, núngmòq é yhûm má hkâyu háng; yu háng jáng, núngmòq le, zè haû su lhoqhtên pyâm é hui gíng sû dùt râ nghut lhê. Haú sû é zè pé lé, núngmòq hkyak chaq pyám luî, koi pyám ra râ nghut lhê; haû gi, lhoqhtên pyám gíng é zè nghut ri.