YOSHUQ
Laiká
(Joshua)
Yhûmsîng Garai, Yoshuq Lé Hkyô É Hkunmó
1
Yhûmsîng Garai gi, Yhâng é duìnhâng zoshâng Mosheq shi byùq é htâng má, Mosheq lé htuqbáng sû, Nun é yhang zo Yoshuq lé, 2 “Ngá é duìnhâng zoshâng Mosheq gi, shi byùq bê nghut ri. Haû mù luî, Ngò, Isira-elaq byu pé lé byî tô é mau shut wang ló râ matú, nàng eq byù shí bang bànshoq gi, Yodan làng gû dàp râ rì rì hen to keq. 3 Mosheq lé Ngò danghtum htûm tô é eq rajung za, núngmòq ló jé nâng é jowò hkangmó lé, núngmòq lé Ngò byi râ nghut lhê. 4 Núngmòq é maukyo gi, maupyî yòso mai mautsûng Lebanon bum jé shoq nghut mù, buìhtoq hkyam Uhprat Wuìlàng mó mai Hiti mau gón eq, buìwàng hkyam shut Medihteri-an Wuimau jé shoq nghut râ nghut lhê. 5 Nàng rû dui nyi é u má, ó yùq le, nang lé wó ûng râ a nghut. Ngò gi, Mosheq eq rahá nyi é su, nàng eq le rahá nyì râ nghut lhê. Ngò gi, nang lé baú hkâ-nhám le tô pyám kâng pyâm to râ a nghut. 6 Wum-o lhoqkíng luî, myìt wum lhoqhtan to aq. Hkâsu mù gâ le, nàng gi, byù shí bang lé hkyô-u shê mù, yhángmòq é îchyí îwâ pé lé byi râ nghû Ngò dâkam tô é mîngdán lé, shuî sîng nhâng râ sû nghut lhê.7 Haû mù, wum-o lhoqkíng luî, gyai yhang myìt wum lhoqhtan to aq. Ngá é duìnhâng zoshâng Mosheq, nang lé byî tô é târâ bànshoq lé rago cháng aq. Nàng kut é múzó hkangmó wó ûngmyuq râ matú, târâ haû mai lòqyò lòqpai shut hkâsô nghoq. 8 Haû târâ laiká bùk mâ é dang pé lé, náng nhut mai hkâ lhoqkâng pyám. Nàng gi, haû kâ tô é târâ bànshoq lé rago wó châng nyì râ matú, nyí wuî myìn wuì myìt lhîng hkyùq wú nyî àq. Haû jáng, nàng gi, hkyô hkangmó má kô myhang lò mù, ûngmyuq hkyô wó râ nghut lhê. 9 Nang lé, Ngò hkunmó hkyô to bê a nghut lhí? Wum-o lhoqkíng luî, myìt wum lhoqhtan to aq. Hkâgyùq kyûm, myìt wum hkâgyui. Hkâsu mù gâ le, náng é Garai Gasang nghut é, haû Yhûmsîng Garai gi, nàng e ló é hkyô hkat hkangmó má, nàng eq rahá nghut nyî râ nghut lhê.” ga taî ri.
Shiwa Byu Pé Lé Yoshuq Hkyô É Hkunmó
10 Haú hkûn, Yoshuq, shiwa byu pê é agyì sûwún wuî lé ji yù mù, hkunmó hkyô é gi, 11 “Rawàp gón shut ê mù, byu pé lé, ‘Núngmòq é Garai Gasang nghut é, haû Yhûmsîng Garai mai, núngmòq sîng râ matú byî tô é maumyî lé, núngmòq ê wó sing yù râ matú, ahkuî mai sum nyí buìnyì má, Yodan làng gû dàp râ nghut é yánmai, râ é zoshuq hen lajâng to keq.’ nghû ê taí keq.” gâ ri.
12 Nghut kôlhang, Rubin up, Gat up eq Manase koq rahkyam lé yhang taî é gi, 13 “‘Núngmòq é Garai Gasang nghut é, haû Yhûmsîng Garai gi, núngmòq lé, bánno hkyô byî nyi é htoq agó, maumyî shí lé le byi bê nghut ri.’ ga, haû Yhûmsîng Garaî é duìnhâng zoshâng Mosheq mai, núngmòq lé hkyô tô é hkunmó lé, myìtbûn nyì keq. 14 Núngmòq é yhûmsîng myhí pé, zoshâng wuì eq gaunyhaú pé gi, Mosheq mai núngmòq lé byî tô é Yodan làng buìhtoq hkyam mâ é maumyî má nyi to kó sháng gàq. Nghut kôlhang, núngmòq mâ é gyè wó zàn é wàqngân wuì lhúnglháng gi, gyèhking wùt chûng mù, núngmòq é gu-mang wuì eq rahá hí gû dàp luî, 15 haû Yhûmsîng Garai mai núngmòq lé kut byî é su, yhángmòq lé le bánno nhâng mù, yhángmòq lé, núngmòq é Garai Gasang nghut é, haû Yhûmsîng Garai byî tô é maumyî lé wó sing yu é hkûn jé shoq, yhángmòq lé garúm yû râ dùt lhê. Hau htâng, núngmòq gi, wó taû ló mù, Yhûmsîng Garaî é duìnhâng zoshâng Mosheq mai, núngmòq lé byî tô é Yodan làng buìhtoq hkyam shut hu é maumyî lé sing yù râ nghut lhê.” gâ ri.
16 Hau htâng, yhángmòq gi, Yoshuq lé, “Ngá-mòq gi, nàng hkyô é hkunmó lé cháng mù, nàng nhang é jowò hkangmó shut ê râ nghut lhê. 17 Ngá-mòq gi, hkyô hkangmó má Mosheq é jì-no gyô é su, náng é jì-no lé le gyo râ nghut lhê. Náng é Garai Gasang nghut é, haû Yhûmsîng Garai gi, Mosheq eq rahá nyi é su, nàng eq le rahá za nyi nyì sháng gàq. 18 Náng é dang lé htuqhtîng luî, nàng hkyô é hkunmó hkangmó lé a châng kut é sû ó yùq nghut kôle, sat pyâm é hui râ nghut lhê. Haû mù, wum-o lhoqkíng luî, myìt wum lhoqhtan to aq!” ga tû taî akô nghut ri.