Mosheq Shi Ló Byùq É Hkyô
34
Hau htâng, Mosheq gi, Moba pá mai e ló luî, Yerihko tu tap mâ é Nebo Bùm é Pisiga kong nyuq má dòq ló ri. Haú má, haû Yhûmsîng Garai gi, yhang lé, Gile-at mau mai Dan jé shoq, 2 Naphtali mau gón, Ehprim eq Manase maumyî bànshoq, Yudaq mau bànshoq mai Medihteri-an Wuimau jé shoq, 3 Maupyî Mau, Byùm gàm Wà mó gâ é Yerihko Langhkaû hau é awui ayàm bànshoq mai Zora wà jé shoq, ra-mau gón lé tûn shit ri. 4 Hau htâng, haû Yhûmsîng Garai gi, yhang lé, “Abraham, Isak eq Yakup lé, ‘Ngò, núngmòq é awùt ashîn pé lé maumyî shî byi râ nghut lhê.’ nghû dakâm danghtum htûm tô é mau gi, shî nghut bê. Ngò gi, náng é myòq èq yhang maumyî shî lé myàng nhâng bê nghut lhê; nghut kôlhang, nàng gi, hau má wó gû dàp ló râ a nghut.” ga taî ri.5 Haû mù, haû Yhûmsîng Garaî é duìnhâng zoshâng Mosheq gi, haû Yhûmsîng Garai taî é eq rajung za, Moba mau haú má shi byùq bê nghut ri. 6 Haû Yhûmsîng Garai gi, yhang lé, Bet Pe-ora wà tu tap Moba mau mâ é langhkaû má myhup yhûm pyâm ri; nghut kôlhang, hkû-nyí jé shoq Mosheq é lùp lé ó yùq le a sé kó nghut ri. 7 Mosheq gi, yhang shi ló é hkûn, chyungxe zànwut 120 zàn bò bê nghut ri; nghut kôle, yhâng é myòq wum le a yòm, yhâng é wum-o le a yom byùq nghut ri. 8 Isira-elaq byu pé gi, Mosheq é matú Moba pá má sum xê nyí yhang iyon yôn ngau akô nghut ri; haú hkûn, Mosheq é matú iyon yôn ngau é buìnyì byíng bê nghut ri.
9 Ahkuî, Nun é yhang zo Yoshuq gi, yhang lé Mosheq èq lòq ke byi bê nghut é yánmai, hpàqchyî byéng-yá Sô byíng é sû nghut bê nghut ri. Haû mù, Isira-elaq byu pé gi, yhâng é dang gyo luî, haû Yhûmsîng Garai mai Mosheq lé hkunmó hkyô tô é eq rajung za kut bekô nghut ri.
10 Haú hkûn mai, Isira-elaq byu pé má Mosheq su dùt é myìqhtoi a htoq wú lo nghut ri; yhang gi, haû Yhûmsîng Garai eq myòqdong hkyúm sê lhum sû nghut ri. 11 Yhang gi, haû Yhûmsîng Garaî èq nhâng luî, Egutuq ming má, Hpara-uq eq yhâng é zaugun wuì bànshoq bâng chyáng le, yhâng é ra-ming gón má le, maúhpo alhô agàn haú pé eq maúhpo múzó haú pé bànshoq lé kut shit é sû nghut ri. 12 Hkâsu mù gâ le, Isira-elaq byù bànshoq bâng é myòq hí má, Mosheq kut é gyùq chiq hpo múzó eq yhang tûn shit é hpungwup a-tsam mó lé, ó yùq le a wó kut wú nghut ri.