A-myû Up Pé Lé Mosheq Shimân Byî É Hkyô
33
A-ô mâ é gi, Garai Gasâng é byù Mosheq mai, yhang a shî shi-má, Isira-elaq byu pé lé shimân byî to hkô é dang pé nghut ri. 2 Yhang taî é gi,“Haû Yhûmsîng Garai gi, Sinaq Bùm mai gyó lô mù,
Se-ira Bùm mai yhángmòq lé dùq bang byî ri;
Yhang gi, Paran Bùm mai hpungwup shingkang lhoqhtoq shit ri.
Yhang gi, chyoiyúng bang mun mun sen sen eq lé lo ri;
Yhâng é lòqyo lòq mai, yhángmòq é matú târâ myi dùq nyi ri.
3 Gè gè yhang, byù myû haú lé Yhang chyitdàp ri;
chyoiyúng bang bànshoq gi, Yhâng é lòq má nghut nyi ri;
yhángmòq bànshoq bang gi, Yhâng é hkyî wang má ngóm gòp mù,
Yhang mhoqshit hkyô lé hàp yu akô nghut ri.
4 Mosheq gi, Yakup é shiwa hpung é matú silî wunlî dông, ngá-mòq lé târâ byî ri.
5 Haû Yhûmsîng Garai gi, shiwa byu pê é ushuq pé eq
Isira-elaq é a-myû up pé zùp zîng tô é hkûn,
Yeshuruna é hkóhkâm nghut nyi ri.
6 Rubin gi, yhâng é byù shau kôlhang,
a shi htûm byùq é za, chyungxe dui nyì sháng gàq.” gâ ri.
7 Yudaq eq séng luî nghut jáng,
“Yhûmsîng Garai ê, Yudaq é wùt ngaù htê lé tâm gyo aq;
yhang lé, yhâng é byu pê chyáng shuî lò àq.
Yhâng é lòq èq yhûmsing é matú hung nyi ri.
Yhâng é gye pé lé nàng bo htuqhtíng byi aq ô!” ga, yhang shimân byî ri.
8 Lewiq eq séng luî nghut jáng,
“Náng é Htu-mim eq Urim gi,
Náng é jujúm duìnhâng zôshang chyáng nghut nyi ri.
Nàng gi, Masa jowò má yhang lé chyam wú bê nghut ri;
Nàng gi, Meriba wuì yàm má yhang eq htuqhtîng lhum bê nghut ri.
9 Yhang gi, yhâng nu yhâng wa lé, yhâng nu yhâng wa su a ngàm,
yhang gu yhang mâng pé lé a yín yù,
yhâng é zodù wuì lé a sé loshoq,
Náng é dang pé lé gyo luî,
Náng é dangshikaq lé châng nyi ri.
10 Yhang gi, Yakup lé Náng é sângdang pé mhoq byi mù,
Isira-elaq lé Náng é târâ pé mhoq kyô ri.
Yhang gi, Náng é hí má namngón jung pé nhông byi mù,
Náng é hkungga gyàp htoq má myi nyhé hkungga du gón gón pé nhông byî ri.
11 Yhûmsîng Garai ê, yhâng é kûng é lòqmú bànshoq má shimân byi mù,
yhâng é lòq èq zui saî é múzó lé lhom hàp yù byi laq.
Yhang lé toq htîm é,
yhâng é gye pé a wó toq lô loshoq hpyidum bàt hkyuî pyám byi aq.” ga, yhang shimân byî ri.
12 Ben-yamin eq séng luî nghut jáng,
“Haû Yhûmsîng Garaî é chyitdàp sû gi, Yhâng chyáng gau shoq nyì sháng gàq;
ra-nyí buìgyùm chap Yhang mâgum nyì râ nghut mù,
haû Yhûmsîng Garaî èq chyitdàp é sû gi, Yhâng é gòqsân htoq má myang nô nyi ri.” ga, yhang shimân byî ri.
13 Yosep eq séng luî nghut jáng,
“Haû Yhûmsîng Garai gi, yhâng é maumyî lé,
ahtoq mauhkûng mâ é hpaudap nghan èq le,
a-ô má jòq é nìk é wui pê èq le, shimân byi sháng gàq;
14 buì gè nyí mâ é shi pé le,
lhô yúng myîn mâ é kyôshi myuishi le,
15 a-nham súm nham lhê é bùm pé mâ é je ge é zè pé le,
ahtum abyùq jòq nyi é kong pé mâ é hpaudap zê pé le,
16 myìdàm htoq mâ é je ge é chyûnghuq pé eq haú mâ é gúmjùp hkyô le,
myi duq nyi é mhanpúng má nyì Su é hí má myòqdong wó é hkyô le, shimân byi sháng gàq.
Haú pé bànshoq gi, yhâng é gu-mang wui chyáng mâ é chyoiyúng é ushuq nghut é,
Yosep é u htoq má jòq nyì sháng gàq.
17 Kô làm hkìkhkâm hkyô má, yhang gi, sânghi shuî é nohtó su nghut ri;
yhâng é hkyuî pé gi, yòsô nô é hkyuî pé su nghut ri.
Yhang gi, gótû a-myû wuì lé, myìdàm htoq htáng shoq mâ é lé lháng,
haú pê èq châng hkat htung râ nghut lhê.
Haû pé gi, Ehprim é mun sen byù nghut mù,
Manase é mun dông byu pé nghut akô.” ga, yhang shimân byî ri.
18 Zebulun eq séng luî nghut jáng,
“Zebulun ê, nàng htoq ló é má gabú byam chyu aq;
Yisahka ê, náng é zúm pé má gabú aq.
19 Yhángmòq gi, a-myû wuì lé bùm má ji tsing mù,
tengmán é hkungga pé lé haú má nhông kôrâ nghut lhê;
yhángmòq gi, wuìshuq lung-aû mâ é agùn agó wó hkyô má le,
se-muî yò hkaû má haq tô é sùtzè pé má le, poî kut kôrâ nghut lhê.” ga, yhang shimân byî ri.
20 Gat eq séng luî nghut jáng,
“Gat é mau lé lhoqlâm byi sû gi, hkungsô wó ri!
Gat gi, hkanghkyi zìng su nyì mù,
wó yu é sho lé lòqsân eq ulhum u-kuq lé lâng cheq pyâm ri.
21 Yhang gi, je ge é maumyî lé yhâng é matú hkyin yù mù,
ushuq é gàmbùm lé yhâng é matú tô tô ri.
Yhang gi, shiwa byù hpûng é ushuq pé eq rahá lé luî,
haû Yhûmsîng Garaî é díngmán hkyô eq,
Isira-elaq eq sêng é Yhâng é târâ jéyáng hkyô pé lé, lhoqdìk ri.” ga, yhang shimân byî ri.
22 Dan eq séng luî nghut jáng,
“Dan gi, hkanghkyi râm zo nghut luî,
Bashan mau mai htîm htoq lô râ nghut lhê.” ga, yhang shimân byî ri.
23 Naphtali eq séng luî nghut jáng,
“Naphtali gi, haû Yhûmsîng Garaî é hí má myòqdong wó dik sû nghut mù,
Yhâng é shimân jeju yhâng chyáng byíng zan tô ri;
yhang gi, buìwàng hkyam eq maupyî hkyam lé sing yù râ nghut lhê.” ga, yhang shimân byî ri.
24 Asheri eq séng luî nghut jáng,
“Asheri gi, gótû yùqzo wui htoq má hkungsô je wó sháng gàq;
yhang gu yhang mâng pé gi, yhang lé myìt ngui bùm kó sháng gàq;
yhang gi, tsanlun xû má hkyî myang nyhun sháng gàq.
25 Náng é hkumkyáng pé gi, jòqtoq eq gyi nghut râ nghut mù,
náng é chyungxe buìnyì pé má, nàng wúm bo nyì râ nghut lhê.
26 Yeshurun é Garai Gasang su dùt é ó a nyì;
Yhang gi, nang lé garúm yû râ matú,
mauhkûng htoq má zùng luî,
Yhâng é hpungwup shingkâng èq mhut htoq má jî ri.
27 Ahtum abyùq é Garai Gasang gi, náng é nghêhkaû jang nghut mù,
pyàt pyàt zaí zaí é lòqbú gi, nang lé bún tô ri;
Yhang gi, ‘Yhángmòq lé lhoqhtên pyám keq!’ ga taí luî,
náng é hí mai, náng é gye pé lé hkat htoq pyám râ nghut lhê.
28 Haû mù, Isira-elaq gi, nguì ngón yùqyo nyì râ nghut lhê;
Yakup gi, gùqzò muilhum eq tsibyiq wing asik byíng tô é mau má,
gau shoq myang nyì râ nghut lhê;
haú má mauhkûng mai nghân zoq gyó râ nghut lhê.
29 Isira-elaq ê, nàng gi, hkungsô wó nyi ri!
Haû Yhûmsîng Garai hkyi yu é a-myû ê,
nàng su dùt é ó nyi ri lhú?
Yhang gi, náng é gòlong eq garúm Sû,
náng é hpungwup bo é shâm nghut ri.
Náng é gye pé gi, náng é hí má gyùq kyum byùq kômù,
nàng gi, yhángmòq é myhang é jang pé má wó nang râ nghut lhê.” ga, yhang shimân byî ri.