32
Haû gi, “Mauhkûng ê, gyo aq; ngò dang nyô râ nghut lhê;myìdàm htoq ê, ngá é nhut mâ é dang pé lé tâm gyo aq.
2 Ngò mhoqshit é hkyô gi, maucham su gyó luî,
ngá é dang pé gi, nghân su gyó mù,
mhan nú má wo gyûn é maupyá su le,
mhan-haq hpoqnòq htoq má wo gyûn é mau mó su le nghut nyi ri.
3 Ngò gi, haû Yhûmsîng Garaî é myìng lé taî pyô râ nghut lhê.
Ngá-nhûng é Garai Gasâng é kô làm hkyô lé hkya-on kúngtôn keq ô!
4 Yhang gi, Lungmó Zîng nghut ri; Yhâng é múzó gi, gúmjùp mù,
Yhâng é hkyô pé bànshoq gi, díngmán ri.
Ra a bò gúmjùp é Garai Gasang,
i-myìt díng hkyô eq tengmán hkyô gi, Yhâng é nghut ri.
5 Yhángmòq gi, htên byòq byùq luî, Yhâng é zodù wuì a nghut;
mara hûn jang jòq mù, myìt goí myìt kup é a-myû yhángmòq nghut ri.
6 Ngha é eq hpàqchyî a bo é byu pé ê,
haû Yhûmsîng Garai lé haú dông taû kut akô lhú?
Yhang gi, núngmòq lé hpân Sû, núngmòq îwa nghut lhê, a nghut kó lhú?
Yhang gi, núngmòq lé hpân mù, núngmòq lé wùn wàq to Sû nghut lhê, a nghut kó lhú?
7 A-nham lhê é buìnyì pé lé, myìtbun keq;
laî ló bê pyàt bán pé lé, myìt tû wú keq.
Núngmòq é yhâng wa lé myî wú keq, yhang, núngmòq lé taî kyo râ nghut lhê;
núngmòq é sûwún wuî lé myî wú keq, yhángmòq, núngmòq lé taî sân kyo râ nghut lhê.
8 Haû Myhang Htáng Sû gi, yhángmòq é silî wunlî maumyî, byù myû wuì lé gàm byi mù,
xângzo byù bànshoq lé gam hkoq é hkûn,
Isira-elaq é yhang zô pê é byù du má cháng luî,
byu pê é maukyo tô tô byî ri.
9 Hkâsu mù gâ le, haû Yhûmsîng Garaî é gàmbùm gi, Yhâng é byu pé nghut mù,
Yakup gi, Yhâng é silî wunlî nghut ri.
10 Haû Yhûmsîng Garai gi, chamchyuîyuì haî le a yùq é,
yòsô zè pé mying garû é yòso má yhángmòq lé myang ho yu é nghut ri.
Haû Yhûmsîng Garai gi, yhángmòq lé magûm byi mù, wú gôn yù luî,
Yhâng é myòqjí lé chun é su, yhángmòq lé wú zúng yu ri.
11 Yhang gi, zùn radu, yhâng é sut lé lhoqduî mù,
zùn nú zô htoq má dâng lhîng luî,
yhángmòq lé chyup yû râ matú, yhâng é dùng pyô mù,
yhángmòq lé dùng í dung é ahtoq má kê chung é su nghut ri.
12 Haû Yhûmsîng Garai za yhángmòq lé shuî-û é nghut mù,
maigan hparà a lòm nghut ri.
13 Yhang gi, myhang é jowò má yhángmòq lé ji nhâng mù,
yò pé mâ é shi yhángmòq lé tsô ri.
Yhang gi, yhángmòq lé lungmó zîng mâ é byo-î shuq nhâng mù,
paihpoi luq mâ é xû lé zó nhang ri.
14 Hau htoq agó, no-naú chyîn eq sau bainám pê é naú lé le,
sau zô pé eq bainám pê é xû htung lé le,
Bashan mâ é je réng é saulo pé lé le,
je yúng é súngsô cham lé le, byi tsô ri.
Sui su ne é tsibyiq wing lé le, núngmòq shuq râ nghut lhê.
15 Yeshuruna gi, xu myum lò mù, wó pik gó ri;
yhángmòq gi, sui sho byíng mù, gùnghkyâng ko luî, taú taú za dùt kôrâ nghut lhê;
haû mù, yhángmòq gi, yhángmòq lé hpan é Garai Gasang lé tô pyám kôluî,
Hkyi yù Sû nghut é, haû Lungmó Zîng lé he-ngìk pyâm akô nghut ri.
16 Yhángmòq gi, maigan hparà pé dông mai Yhang lé manôn nhâng luî,
yhángmòq é achaq achyut é hparà lhô pé dông mai Yhang lé nhikjum yó nhang akô nghut ri.
17 Yhángmòq gi, Garai Gasang le a nghut é nàt pé lé sôdûn akô nghut ri;
hparà haú pé gi, yhángmòq le a sê é hparà,
ahkuî za htoq shit é hparà,
yhángmòq é îchyí îwâ pé a gyùq é hparà pé nghut ri.
18 Núngmòq gi, núngmòq é îwa nghut é Lungmó Zîng lé tô pyám bekô nghut mù,
núngmòq lé hku kat é Garai Gasang lé tô-myhî pyám bekô nghut ri.
19 Haû Yhûmsîng Garai gi, haú lé myàng mù,
Yhâng é yùqzo byìzô pê é yánmai, nhikjum yo luî, yhángmòq lé he-ngìk pyám bê nghut ri.
20 Yhang taî é gi, ‘Yhángmòq chyáng mai, Ngò, Ngá é myòqdong haq pyám mù,
yhángmòq é jihtûm lé wú wú râ nghut lhê;
hkâsu mù gâ le, yhángmòq gi, myìt goí é a-myû nghut mù,
a jujúm é zodù wuì nghut bum akô.
21 Yhángmòq gi, Garai a nghut é èq Ngo lé manôn nhâng kôluî,
yhángmòq é a-kyû a bo é hparà pê èq Ngo lé nhikjum yó nhang akô nghut ri.
Haû mù, Ngò gi, byù myû ra-myû a nghut é bâng èq, yhángmòq lé manôn nhâng luî,
sê gyô é u-nuq a bo é a-myu èq, yhángmòq lé nhikjum yo nhâng râ nghut lhê.
22 Hkâsu mù gâ le, Ngá é nhikmó-yo hkyo èq myi tuq kat râ nghut luî,
nìk dik é mosumhkung jé shoq nyé gyó ló râ nghut lhê.
Haû gi, myìdàm htoq eq haú mâ é kyôshi myuishi lé myhui pyám mù,
bùm pê é a-pûn awang lháng nyé gyó pyám râ nghut lhê.
23 Ngò gi, yhángmòq é ahtoq má wuîhke jamjau hpuzo hkyô pé bùm byi mù,
yhángmòq lé ê htîm é má Ngá é myoshi pé chung pyám râ nghut lhê.
24 Ngò gi, yhángmòq chyáng mùtmó gyó nhâng mù,
nyé no é ihkyùp eq shi ló jung wúm hpu zo nhâng râ nghut é htoq agó,
tân jung yòsô zè pê é kóng eq
hpuílhup yô má dô yê é dùq htân lhângmui é dùq pé lé, yhángmòq lé htim nhâng râ nghut lhê.
25 Wà hkyô pé má gi, sham èq yhángmòq lé zo a dàp nhâng shoq lhoqhtûm pyám râ nghut mù,
yhángmòq é yhúmhkaû pé má gi, gyùq chiq hpô èq ùp râ nghut lhê.
Zo-myi zorâm wuì le,
nyheqnú pé eq uhpyû daúdam bang le, htûm ló byùq kôrâ nghut lhê.
26 Ngò gi, yhángmòq lé hkat pyo pyám mù,
yhángmòq é myìng lé xângzo byu pê chyáng mai bùt sut pyám râ nghû taî wú bê nghut lhê;
27 nghut kôlhang, Ngò gi, gyè jùm pé mai, sê gyô shut luî,
“Ngá-mòq é lòq èq ûngmyuq hkyô wó é nghut lhê;
haû Yhûmsîng Garai gi, shí hkyô má haî lháng a kut é nghut lhê.” ga nghutbun dang taí kôrâ lé myìt chiq ri.’ gâ ri.
28 Yhángmòq gi, ngha byùq é a-myû nghut mù,
yhángmòq chyáng i-myìt hpàqchyî a bò kó nghut ri.
29 Yhángmòq gi, hpàqchyî byéng-yá wó mù, shí hkyô lé sê gyo kó sháng gàq;
yhángmòq é jihtûm haî nghut râ lé sê myìt tú kó sháng gàq ô!
30 Yhángmòq é Lungmó Zîng za yhángmòq lé ung byî é a nghut jáng,
haû Yhûmsîng Garai za yhángmòq lé àp byî é a nghut jáng,
rayùq èq za rahkyîng yùq lé hkâsu ge wó châng hkat râ lhú?
í yùq èq za byù ra-mun lé hkâsu ge wó hpâng nhâng râ lhú?
31 Hkâsu mù gâ le, ngá-nhûng é gye pé lháng,
yhángmòq é lungmó zîng gi, ngá-nhûng é Lungmó Zîng su a wó dùt ga taî akô nghut ri.
32 Yhángmòq é tsibyiq nuî gi, Sodom wa é tsibyiq nuî nghut mù,
Gomora wà mâ é yò pé má yùq lám é jung nghut ri.
Yhángmòq é tsibyiq shi gi, dùq bo é ashi nghut mù,
yhángmòq é tsibyiq paû gi, hkô bum ri.
33 Yhángmòq é tsibyiq wing gi, lhângmuì mó é dùq le,
dùq htân lhângmui é dùq le nghut ri.
34 ‘Shí hkyô lé Ngò yhûm to mù,
Ngá é sùtdò má dizìk htûng tap to bê a nghut lhí?
35 Lató hpuq râ gi, Ngò ru nghut lhê; Ngò lató hpuq râ.
Ahkyíng jé jáng, yhángmòq é hkyî nâng chot râ nghut lhê;
ihkyùp mó hui zo râ yhángmòq é buìnyì chyáng bê nghut mù,
yhángmòq htûm byùq râ hkyô gi, yhángmòq chyáng hân za jé râ nghut lhê.’ ga Yhûmsîng Garai taî ri.
36 Haû Yhûmsîng Garai gi, yhángmòq wum nyhôm byùq é hkyô eq,
jùn nghu é, jùn mai lùt bê nghu é a nyì lô é hkyô lé, myàng jáng,
Yhâng é byu pé lé târâ jéyáng byi mù,
Yhâng é duìnhâng zoshâng wuì lé shogyo nhikmyîn yù râ nghut lhê.
37-38 Haú hkûn, Yhang gi, ‘Ahkuî, yhángmòq é shuq jung hkunggâ é tsibyiq wing shuq é eq,
yhángmòq é hkungga pé mâ é xû zô é hparà,
haû yhángmòq nghêhkau nyi é lungmó zîng nghut é,
yhángmòq é hparà pé gi, hká má kó lhú?
Núngmòq lé toq garúm yû nhâng keq!
Núngmòq lé nghêhkaû jang byi nhâng keq!
39 Ahkuî, wú keq; Ngò za Garai nghut lhê!
Ngò mai lai luî gótû Garai a nyì.
Ngò gi, shî nhang é eq chyungxe duì nhang é nghut lhê;
Ngò gi, dàm tap mù, yâ gè byî é nghut lhê;
Ngá é lòq mai ó yùq lé lé wó hkyi xe htoq ló râ a nghut.
40 Ngò, mauhkûng shut Ngá é lòq tu toq mù, dakâm dang taî é gi,
“Ngò, ahtum abyùq rû dui nyi é eq rajung za,
41 Ngò, Ngá é dùq wìk é shâm lé suî htoq chûng mù,
Ngá é lòq má târâ jéyáng hkyô myhik zing chung é hkûn,
Ngò gi, Ngá é gye pé lé lató hpuq luî,
Ngò lé a naù a wôm é bang lé dàm byi râ nghut lhê.
42 Ngò gi, Ngá é sham èq sho lé myui nyi é u,
Ngá é myoshi pé lé, gyèzau wui é ushuq pê é sui lé le,
shúm zûng bang eq sat hui bâng é sui lé le,
shuq wùt nhâng râ nghut lhê.” nghu é nghut lhê.’ ga taî râ nghut lhê.
43 Byù myû wuì ê, Yhâng é byu pé eq rahá gabú byam chyu keq;
hkâsu mù gâ le, Yhang gi, Yhâng é duìnhâng zoshâng wui é suî é matú lató hpuq luî,
Yhâng é gye pé lé dam byi mù,
Yhâng é maumyî eq Yhâng é byu pê é matú, mara hkô htaí hkungga kut râ nghut lhê.” gâ é nghut ri.
44 Mosheq gi, Nun é yhang zo Yoshuq eq rahá lé mù, shiwa byu pé wó gyô tô é má mahkôn shi é dang pé bànshoq lé taî ri. 45 Mosheq gi, Isira-elaq byù bànshoq bang lé dang shí pé ban taî é hkûn, 46 yhángmòq lé, “Hkû-nyí ngò núngmòq lé taî tô é sàksé dang shî bànshoq lé, núngmòq é myìt ûnghkaû má kat to keq; haú jáng, núngmòq gi, târâ shî mâ é dang bànshoq lé rago wó châng nyì râ matú, núngmòq é zodù wuì lé hkunmó wó hkyó kôrâ nghut lhê. 47 Dang shí pé gi, núngmòq é matú taî kûn é dang za a nghut, núngmòq é chyungxe shèq ru nghut lhê. Núngmòq gi, Yodan làng gû dàp luî, núngmòq sing yù râ nghut é mau má, dang shí pé dông mai chyungxe i-pyàt hîng kôrâ nghut lhê.” ga taî ri.
Nebo Bùm Má Mosheq Shi Byùq É Hkyô
48 Haú nyí má yhang, haû Yhûmsîng Garai gi, Mosheq lé, 49 “Yerihko tû-tap nghut é Moba pá mâ é Abarim bùm hîng mâ é Nebo Bùm má dòq ló mù, Isira-elaq byu pé sing yù râ matú Ngò byî é Hkanan mau lé wú yû àq. 50 Nàng gi, Hora Bùm má nungmang Arun shî mù, yhâng é byu pê chyáng ló nyi byùq é su, nàng dòq ló é bùm haû má shî mù, náng é byu pê chyáng ló nyi byùq râ nghut lhê. 51 Hkâsu mù gâ le, haû gi, Zin Yòso mâ é Kadesha Meriba wuì yàm má, Isira-elaq byu pê é hí má Ngo lé núngnhik a jujúm shit kô é yánmai le, Isira-elaq byu pê chyáng Ngá é chyoiyúng hkyô lé a zuî ging kô é yánmai le nghut lhê. 52 Haû mù, nàng gi, we we mai za mau haú lé myàng râ nghut lhê; nàng gi, Isira-elaq byu pé lé Ngò byî é mau má wó wâng râ a nghut.” ga taî ri.