Yoshuq, Mosheq É Hkô Htaí Râ Hkyô
31
Hau htâng, Mosheq gi, htoq ê luî, Isira-elaq byù bànshoq bang lé a-ô mâ é dang pé lé taî ri; 2 “Ngò gi, chyungxe zànwut rasho í xê zàn bò bê nghut mù, núngmòq lé wó shuî-u râ a nghut lo. Haû Yhûmsîng Garai le, ‘Nàng gi, Yodan làng shî ge gû dàp râ a nghut.’ ga ngo lé taî ri. 3 Núngmòq é Garai Gasang nghut é, haû Yhûmsîng Garai yhang, núngmòq é hí má gû dàp ló râ nghut lhê. Yhang gi, núngmòq é hí mâ é byù myû shí bang lé lhoqhtûm pyám râ nghut mù, núngmòq gi, haú bâng é maumyî lé myang sing yù kôrâ nghut lhê. Haû Yhûmsîng Garai taî é eq rajung za, Yoshuq gi, núngmòq é hí má gû dàp ló râ nghut lhê. 4 Haû Yhûmsîng Garai gi, Amori byu pê é hkóhkâm Sihon eq Oga nhik eq yhángnhik é maumyî lé lhoqhtên pyâm é su, yhángmòq lé kut râ nghut lhê. 5 Haû Yhûmsîng Garai gi, yhángmòq lé, núngmòq é lòq má àp byi râ nghut mù, núngmòq gi, ngò núngmòq lé hkunmó hkyô tô é eq rajung za yhángmòq lé kut ra kôrâ nghut lhê. 6 Wum-o lhoqkíng luî, myìt wum lhoqhtan to keq. Yhángmòq é yánmai, hkâgyùq kó; hkâgyùq ngha byùq kó; hkâsu mù gâ le, núngmòq é Garai Gasang nghut é, haû Yhûmsîng Garai gi, núngmòq eq rahá bo e ló râ nghut lhê; Yhang gi, núngmòq lé baú hkâ-nhám le tô pyám kâng pyâm to râ a nghut.” gâ ri.7 Hau htâng, Mosheq gi, Yoshuq lé ji yù mù, Isira-elaq byù bànshoq bâng é hí má, yhang lé, “Wum-o lhoqkíng luî, myìt wum lhoqhtan to aq; hkâsu mù gâ le, nàng gi, byù shí bang lé, haû Yhûmsîng Garai mai yhángmòq é îchyí îwâ pé lé byi râ ga dakâm danghtum htûm tô é mau shut shuî wang ló ra râ nghut é htoq agó, maumyî haú lé, yhángmòq é silî wunlî maumyî dông tsing gàm byi ra râ nghut lhê. 8 Haû Yhûmsîng Garai yhang, náng é hí má e ló byi mù, nàng eq rahá nyi nyì râ nghut lhê; Yhang gi, nang lé baú hkâ-nhám le tô pyám kâng pyâm to râ a nghut. Hkâgyùq; myìt wum hkâgyui.” ga taî ri.
Bànshoq Bâng Hí Má Târâ Nghap É Hkyô
9 Haû mù, Mosheq gi, târâ shí pé bànshoq lé ká mù, haû Yhûmsîng Garaî é dangshikaq sàksé dò wàq é Lewiq byù hkyangjông pé eq Isira-elaq é sûwún wuî bànshoq bang lé àp byî ri. 10 Hau htâng, Mosheq gi, yhángmòq lé, “Nyhit zân hkangmó mâ é ló htâng zàn nghut é, chyîn hkyut é zànwut má, zúm poî u lé, 11 núngmòq é Garai Gasang nghut é, haû Yhûmsîng Garai hkyin yù râ nghut é jowò, Yhâng é hí má Isira-elaq bànshoq bang lé htoq shit kô é hkûn, núngmòq gi, yhángmòq wó gyô tô é má târâ shî lé nghap kyo râ dùt lhê. 12 Myiwe yùqgè wuì, zoshâng wuì eq núngmòq é wà pé má lé bíng nyi é bang wó gyô yù luî, núngmòq é Garai Gasang nghut é, haû Yhûmsîng Garai lé gyùq hkúngga hkyô wó mhoq yû mù, târâ shî mâ é dang pé bànshoq lé rago wó cháng kó sháng gàq, yhángmòq lé ji tsîng yù keq. 13 Târâ shî lé a sé shî é yhángmòq é zodù wuì gi, haú lé gyô yù mù, núngmòq Yodan làng gû dàp luî, ló sing yù râ nghut é mau má núngmòq chyungxe rû dui nyì nyì, núngmòq é Garai Gasang nghut é, haû Yhûmsîng Garai lé gyùq hkúnggâ é hkyô mhoq yû ra râ nghut lhê.” ga hkunmó hkyô ri.
Isira-elaq Byu Pé Gumlau Toq Râ Myìqhtoi Dang
14 Haû Yhûmsîng Garai gi, Mosheq lé, “Nàng shi ló râ buìnyì chyáng bê nghut ri. Yoshuq lé wùt yù mù, zùphpong zúm má lé htoq shit keq; haú má, Ngò, yhang lé wò hûn râ nghut lhê.” ga taî ri. Haû mù, Mosheq eq Yoshuq gi, lé lô mù, zùphpong zúm má lé htoq shit bekô nghut ri.
15 Haú hkûn, Yhûmsîng Garai gi, zúm má mhut zîng mai lé htoq shit mù, mhut zîng gi, zúm hkum hí má zùq tô ri. 16 Haû Yhûmsîng Garai gi, Mosheq lé, “Nàng gi, náng é îchyí îwâ pé eq rahá ló nô nyi byùq berâ nghut lhê; shiwa byù shí bang gi, yhángmòq wang ló râ nghut é mau mâ é gótû a-myû wui é hparà pé eq hân za mara shut kôrâ nghut lhê. Yhángmòq gi, Ngo lé tô pyâm to kôluî, yhángmòq eq Ngò tô tô é dangshikaq lé lhoqhpyoq pyám kôrâ nghut lhê. 17 Haú buìnyì má, Ngò gi, yhángmòq lé nhikjum yo mù, yhángmòq lé tô pyâm to râ nghut lhê; Ngò gi, yhángmòq chyáng mai Ngá é myòqdong haq pyám râ nghut mù, yhángmòq gi, lhoqhtên pyâm é hui kôrâ nghut lhê. Ihkyùp pé eq wuîhke jamjau hpuzo hkyô myo myo yhángmòq chyáng jé râ nghut mù, haú buìnyì má, yhángmòq gi, ‘Ngá-nhûng é Garai Gasang gi, ngá-nhúng eq rahá a nghut é yánmai, ihkyùp shí pé ngá-nhûng chyáng jé é a nghut lhí?’ ga myi kôrâ nghut lhê. 18 Ngò gi, yhángmòq gótû hparà pê shut lhing ló mù, kut shut kô é yhángmòq é agè ashop hkyo é yánmai, haú buìnyì má Ngá é myòqdong haq pyám râ nghut lhê.
19 Haû mù, mahkôn shí hkat lé kâ to luî, Isira-elaq byu pé lé mhoq byi aq; mahkôn shî gi, yhángmòq lé Ngò mara hun é sàksé dùt râ matú, yhángmòq hkon nyì kó sháng gàq. 20 Hkâsu mù gâ le, yhángmòq é îchyí îwâ pé lé Ngò dakâm danghtum htûm tô é mau nghut é, no-naú eq byo-î yui é mau má yhángmòq lé Ngò shuî jé é hkûn, yhángmòq gyi gyi dau dau myàng zo mù, xu myum bum é buìnyì má, gótû hparà pê shut lhing ló mù, haú pé lé noq luî, Ngò lé he-ngìk pyám kômù, Ngá é dangshikaq lé lhoqhpyoq pyám kôrâ nghut lhê. 21 Haû mù, ihkyùp pé eq wuîhke jamjau hpuzo hkyô pé myo myo yhángmòq chyáng jé é hkûn, mahkôn shî lé yhángmòq é awùt ashín pé a tô-myhî pyám kôrâ nghut é yánmai, mahkôn shî gi, yhángmòq lé mara hun é sàksé dùt râ nghut lhê. Ngò gi, yhángmòq lé dakâm danghtum htûm tô é mau má a shuî jé shi-má lháng, yhángmòq haî myìt hen tô é hkyô lé sê lhê.” ga taî ri. 22 Haû mù, Mosheq gi, haú nyí má, mahkôn shî lé kâ to mù, Isira-elaq byu pé lé mhoq byî ri.
23 Haû Yhûmsîng Garai gi, Nun é yhang zo Yoshuq lé, “Wum-o lhoqkíng luî, myìt wum lhoqhtan to aq; hkâsu mù gâ le, nàng gi, Isira-elaq byu pé lé, Ngò dakâm danghtum htûm tô é mau má shuî ló râ nghut lhê; Ngò yhang, nàng eq rahá nyi nyì râ nghut lhê.” ga hkunmó hkyô ri.
24 Mosheq gi, târâ shi é dang pé lé awang mai ahpyo hpyot laiká bùk má ban kâ tô é htâng má, 25 haû Yhûmsîng Garaî é dangshikaq sàksé dò wàq é Lewiq byu pé lé, 26 “Târâ laiká bùk shî lé yù mù, núngmòq é Garai Gasang nghut é, haû Yhûmsîng Garaî é dangshikaq sàksé dò nàm má tô to keq. Haû gi, núngmòq lé mara hun é sàksé dông haû má jòq to râ nghut lhê. 27 Hkâsu mù gâ le, núngmòq hkâ-í gumlau toq é hkyô eq myìt htan é hkyô lé, Ngò sê lhê. Ngò chyungxe dui nyì mù, núngmòq eq rahá nyi tô é u lé lháng, haû Yhûmsîng Garai lé núngmòq gumlau toq le gi, ngo shi byùq é htâng má gumlau je yhang toq kôrâ nghut lhê! 28 Núngmòq é a-myû up pé mâ é sûwún wuî bànshoq eq núngmòq é zaugun wuì bànshoq lé ngá é hí má ji tsîng to keq. Ngò, yhángmòq wó gyô tô é má dang shí pé taí mù, mauhkûng eq myigùng lé lang luî, sàksé dông tô to râ nghut lhê. 29 Hkâsu mù gâ le, núngmòq gi, ngò shi byùq é htâng má, gè gè yhang nyì yàp sâmlai htên byòq byùq mù, ngò núngmòq lé hkunmó hkyô tô é mai lhing ló byùq kôrâ nghut é lé, ngò sê lhê. Jé lô râ buìnyì pé má, núngmòq gi, haû Yhûmsîng Garaî é myòq hí má agè ashop é hkyô kut râ nghut mù, núngmòq é lòq èq saî é zè pé dông Yhang lé nhikjum yo nhâng kôrâ nghut é yánmai, núngmòq chyáng ihkyùp jé râ nghut lhê.” ga hkunmó hkyô ri.
Mosheq É Mahkôn Dang
30 Hau htâng, Mosheq gi, Isira-elaq byù hpúng gón wó gyô tô é má, mahkôn shi é dang pé lé awang mai ahpyo hpyot taî kyô ri.