Yhûmsîng Garaî Chyáng Lhing Taû Lo É Hkûn Nyì Ngón Yùqyò Râ Hkyô
30
Ngò, núngmòq é hí má to byî é shimân jeju shí pé eq nhinghkun shí pé bànshoq, núngmòq chyáng jé mù, núngmòq é Garai Gasang nghut é, haû Yhûmsîng Garai mai núngmòq lé gótû a-myû wui chyáng hkat hâng kat é jowò hkangmó má, haú pé lé núngmòq myìtbun luî, 2 núngmòq le, núngmòq é zodù wuì le, núngmòq é Garai Gasang nghut é, haû Yhûmsîng Garaî chyáng lhing taû lò mù, hkû-nyí ngò núngmòq lé hkunmó hkyô é jung hkangmó eq rajung za, núngmòq é i-myìt nhiklhum bànshoq eq núngmòq é i-myìt sô lhum gón èq Yhâng é jì-no gyo kô é nghut jáng, 3 núngmòq é Garai Gasang nghut é, haû Yhûmsîng Garai gi, núngmòq shúm zung é lé lhoqhtûm pyám byi mù, núngmòq lé shogyo nhikmyîn yù luî, Yhang núngmòq lé hkat pyo hâng kat é a-myû wuì bànshoq mai núngmòq lé dum shuî tsîng yù râ nghut lhê. 4 Mauhkûng ô mâ é ló wê htâng é jowò shut hkat hâng kat é hui bang núngmòq lé lháng, núngmòq é Garai Gasang nghut é, haû Yhûmsîng Garaî gi, haû mai dum shuî tsîng yù mù, shuî taû lò râ nghut lhê. 5 Yhang gi, núngmòq lé, núngmòq é îchyí îwâ pê é mau má shuî lò râ nghut mù, núngmòq gi, haú lé sing yù râ nghut lhê. Yhang gi, núngmòq lé, núngmòq é îchyí îwâ pê htoq má jé kô myhâng, je myoluq jebe nhâng râ nghut lhê. 6 Núngmòq gi, núngmòq é Garai Gasang nghut é, haû Yhûmsîng Garai lé, núngmòq é i-myìt nhiklhum bànshoq eq núngmòq é i-myìt sô lhum gón èq chyitdàp luî, chyungxe wó dui nyì kôrâ matú, Yhang gi, núngmòq é i-myìt eq núngmòq é awùt ashîn pê é i-myìt pé lé ahpyo-kuq hpyit byi râ nghut lhê. 7 Núngmòq é Garai Gasang nghut é, haû Yhûmsîng Garai gi, nhinghkun haú pé bànshoq lé, núngmòq lé a nguì luî, núngmòq lé zing-rî é, núngmòq é gye pê chyáng ke byi râ nghut lhê. 8 Núngmòq gi, haû Yhûmsîng Garaî é jì-no lé dum gyo luî, hkû-nyí ngò núngmòq lé byî é Yhâng é hkunmó pé bànshoq lé cháng kôrâ nghut lhê. 9-10 Haú hkûn, núngmòq é Garai Gasang nghut é, haû Yhûmsîng Garai gi, núngmòq é lòq èq zui saî é múzó bànshoq má le, núngmòq é zo myo myhû hkyô má le, núngmòq é shigu gaunyhaú azo shuî é hkyô má le, núngmòq é maumyî mâ é kyôshi myuishi má le, gyai yhang myoluq jebe nhâng râ nghut lhê. Núngmòq gi, núngmòq é Garai Gasang nghut é, haû Yhûmsîng Garaî é jì-no gyo mù, târâ laiká bùk shî má kâ tô é Yhâng é gótû hkunmó pé eq târâ wàng hkunmó pé lé châng kut mù, núngmòq é i-myìt nhiklhum bànshoq eq núngmòq é i-myìt sô lhum gón èq, núngmòq é Garai Gasang nghut é, haû Yhûmsîng Garaî chyáng lhing lò kô é nghut jáng, haû Yhûmsîng Garai gi, núngmòq é îchyí îwâ pé lé myìt nguì ô nau é su, núngmòq lé radàm dum myìt nguì ô naù mù, myoluq jebe nhâng râ nghut lhê.Chyungxe Duì Hkyô Eq Shî Hkyô Rahkat Hkat Lé Hkyin Yù Râ Hkyô
11 Hkû-nyí ngò núngmòq lé hkunmó hkyô é pé gi, núngmòq é matú gyai cháng wuî é le a nghut, núngmòq eq gyai wê tô é le a nghut. 12 Haû gi, núngmòq mai, ‘Târâ haú lé ngá-mòq wó cháng shoq, ó yùq wá mauhkûng má dòq ló mù, haú lé ló yû luî, ngá-mòq lé lé taî kyo râ lhú?’ ga myi râ dùt shoq, mauhkûng má jòq tô é a nghut. 13 Haû gi, núngmòq mai, ‘Târâ haú lé ngá-mòq wó cháng shoq, ó yùq wá wuìshuq lung-aû gû dàp mù, haú lé ê yû luî, ngá-mòq lé lé taî kyo râ lhú?’ ga myi râ dùt shoq, wuìshuq lung-aû laî é má jòq tô é a nghut. 14 Mungdang haû gi, núngmòq wó cháng râ matú, núngmòq eq achyáng za nghut luî, núngmòq é nhut má le, núngmòq é i-myìt hkaû má le bo nyi ri.
15 Wú keq, hkû-nyí, ngò gi, chyungxe eq nyì ngón yùqyò hkyô, shî hkyô eq htên byòq hkyô lé, núngmòq é hí má tô to bê nghut lhê. 16 Hkâsu mù gâ le, ngò gi, núngmòq é Garai Gasang nghut é, haû Yhûmsîng Garai lé chyitdàp râ matú le, Yhâng é jì-no gyô nyì râ matú le, Yhâng é gótû hkunmó pé, târâ wàng hkunmó eq târâ pé lé châng kut nyî râ matú le, hkû-nyí núngmòq lé hkunmó hkyô é nghut lhê; châng nyì jáng, núngmòq gi, chyungxe wó dui nyì mù, myoluq jebe kôrâ nghut luî, núngmòq é Garai Gasang nghut é, haû Yhûmsîng Garai gi, núngmòq wang sing yù râ nghut é mau má, núngmòq lé shimân byi râ nghut lhê.
17 Nghut kôlhang, núngmòq gi, myìt lhing ló byùq mù, jì-no a gyo luî, shuî nghoq ló byùq é hui mù, gótû hparà pé lé noq paî gòp é nghut jáng, 18 núngmòq gi, gè gè yhang lhoqhtûm pyâm é hui râ nghut lhê nghû, ngò, hkû-nyí yhang núngmòq lé taî pûn tô lhê. Núngmòq gi, Yodan làng gû dàp mù, ló wang sing yù râ nghut é mau má chyungxe a hîng kôrâ nghut lhê.
19 Chyungxe duì hkyô eq shî hkyô, shimân jeju pé eq nhinghkun pé lé, ngò núngmòq é hí má tô to bê nghut é lé, sàksé dông hkû-nyí ngò mau dó myì dó tô lhê. Haû mù, núngmòq le, núngmòq é zodù wuì le chyungxe wó dui nyì râ matú, chyungxe duì hkyô lé hkyin yù keq; 20 haú hkûn, núngmòq gi, núngmòq é Garai Gasang nghut é, haû Yhûmsîng Garai lé wó chyitdàp mù, Yhâng é htê lé gyo luî, Yhang lé wó zuî gîng to râ nghut lhê. Hkâsu mù gâ le, haû Yhûmsîng Garai gi, núngmòq é chyungxe nghut mù, núngmòq é îchyí îwa Abraham, Isak eq Yakup pé lé byi râ ga dâkam tô é mau má zànwut myáng myáng nyì nhâng râ nghut lhê.” ga taî ri.