Dangshikaq Lé Dum Saî Lhoqgîng É Hkyô
29
A-ô mâ é pé gi, haû Yhûmsîng Garai mai Horep bùm má Isira-elaq byu pé eq tô tô é dangshikaq mai lai luî, Yhang mai Mosheq lé hkunmó hkyó mù, Moba pá má yhángmòq eq tô to nhang é dangshikaq dang pé nghut lhê.2 Mosheq gi, Isira-elaq byù bànshoq bang lé ji yù mù, yhángmòq lé,
“Egutuq ming má, haû Yhûmsîng Garaî èq, Hpara-uq, yhâng é zaugun sûwún wuî bànshoq eq yhâng é ra-ming gón lé kut é hkyô bànshoq lé, núngmòq é myòq èq yhang myàng bekô nghut lhê. 3 Núngmòq é myòq èq yhang, wuîhke jamjau mó haú pé lé le, maúhpo alhô agàn pé eq maúhpo múzó mó haú pé lé le, myàng bekô nghut kôlhang, 4 haû Yhûmsîng Garai gi, hkû-nyí jé shoq, núngmòq lé, sê gyô é u-nuq, wó myang é myòqjí eq wó gyô é nohkyap a byi shi nghut ri. 5 Nghut kôle, haû Yhûmsîng Garai gi, ‘Ngò, núngmòq lé yòso mai shuî laî lo é shî myi xê zàn gyoro má, núngmòq é mèbu le a jèq byùq, núngmòq é hkyî-tsung le a wôm byùq é nghut lhê. 6 Núngmòq gi, zo râ mùk le a wó, shuq râ tsibyiq wing eq gótû nyhûn tô é î le a wó kô é nghut lhê. Ngò gi, núngmòq é Garai Gasang nghut é, haû Yhûmsîng Garai nghut é hkyô lé, núngmòq wó sé kó sháng gàq nghû, Ngò haú dông kut é nghut lhê.’ ga taî ri.
7 Núngmòq shí jowò má lo jé kô é hkûn, Heshibon hkóhkâm Sihon eq Bashan hkóhkâm Oga gi, ngá-nhúng lé majan lé zan râ ga htoq lé lô kôlhang, ngá-nhúng gi, yhángmòq lé lhom ung pyâm é nghut lhê. 8 Ngá-nhúng gi, yhángmòq é maumyî lé sing yù mù, Rubin up, Gat up eq Manase koq rahkyam lé silî wunlî maumyî dông byî é nghut lhê.
9 Núngmòq kut é hkyô hkangmó má wó ûngmyuq kó sháng gàq, dangshikaq shî mâ é dang pé lé rago châng kut keq. 10-11 Hkû-nyí, núngmòq é ushuq pé, a-myû up é nhik bô wuì, sûwún wuî, zaugun wuì, Isira-elaq byù gótû yùqgè wuì bànshoq, núngmòq é zodù wuì, núngmòq é yhûmsîng myhî pé, núngmòq é wàp má bo nyì mù, núngmòq é htang hô wuì hkam é gótû a-myû wuì bànshoq bang gi, núngmòq é Garai Gasang nghut é, haû Yhûmsîng Garaî é hí má yàp tô bum é nghut lhê. 12 Shî má núngmòq yàp tô é gi, hkû-nyí haû Yhûmsîng Garai mai núngmòq eq tô tô é dakâm dangshikaq nghut é, núngmòq é Garai Gasang nghut é, haû Yhûmsîng Garai eq tô tô é dangshikaq lé yín yû râ matú nghut lhê. 13 Haû gi, Yhang mai núngmòq é îchyí îwa Abraham, Isak eq Yakup lé dâkam tô é eq núngmòq lé danghtum htûm tô é eq rajung za, Yhang, núngmòq é Garai Gasang wó dùt râ matú, hkû-nyí núngmòq lé Yhâng é byu pé kut yû bê nghut ri. 14-15 Ngò dakâm dangshikaq shî tô é gi, ngá-nhûng é Garai Gasang nghut é, haû Yhûmsîng Garaî é hí má, hkû-nyí ngá-mòq eq rahá yàp tô é núngmòq eq baú tô tô é a nghut; hkû-nyí shî má a bo lom tô é bang eq le tô tô é nghut lhê.
16 Egutuq ming má ngá-nhúng hkâsu kut nyi laî lo é hkyô lé le, hkyôwuì shî má gótû a-myû wui chyáng mai hkâsu laî lo é hkyô lé le, núngmòq yhang sê lhê. 17 Yhángmòq chyáng mâ é achaq achyut é azòng pé, sik hparà pé, lùqgòk hparà pé, ngùn hparà pé eq hîng hparà pé lé núngmòq myàng bekô nghut lhê. 18 Haû mù, ngá-nhûng é Garai Gasang nghut é, haû Yhûmsîng Garaî chyáng mai myìt lhing ló byùq mù, gótû a-myû wuì haú bâng é hparà pé lé ê noq é, yùqgè, myiwe, núngmòq chyáng mâ é a-myû up, a nghut jáng, a-myû koq, núngmòq chyáng a nyì râ matú le, haû su hkô é dùq bo é a-ngùt a htoq râ matú le hkyak kut keq.
19 Haû sû é byù gi, shî dâkam é dang pé lé wó gyo jáng, yhâng é matú jeju dông myìt yù mù, ‘Ngò gi, ngò myìt htan é hkyô má xoq kut nyî kôlhang, nguì ngón râ nghut lhê.’ ga myìt râ nghut lhê. Yhángmòq gi, wuì bâm é maumyî má le, kyuq huî é myigùng má le ihkyùp she háng râ nghut lhê. 20 Haû Yhûmsîng Garai gi, haú bang lé hkâ-nhám le mara kâm hkyut byi râ a nghut é htoq agó, Yhâng é nhikmó-yo hkyô eq manôn hkyô gi, yhángmòq lé myi su nyhê hkyó râ nghut lhê. Laiká bùk shî má kâ tô é nhinghkun bànshoq gi, yhángmòq chyáng zùq râ nghut mù, haû Yhûmsîng Garai gi, yhángmòq é myìng lé mauhkûng ô mai bùt sut hpyuq pyám byi râ nghut lhê. 21 Haû Yhûmsîng Garai gi, târâ laiká Bùk shî má kâ tô é dangshikaq nhinghkun bànshoq má cháng luî, haú bang lé ihkyùp hui nhâng râ matú, Isira-elaq a-myû up bànshoq mai gótû kut gam htoq yû râ nghut lhê.
22 Núngmòq é htâng má nyi lé lo é byùxik pé mâ é zodù wuì eq mau we mai lé é byù bíng pé gi, shí mau má jé é wuîhke jamjau hpuzo hkyô pé lé le, haû Yhûmsîng Garai mai shí mau má jé nhang é nòlì nòjàng pé lé le, myàng kôrâ nghut lhê. 23 Ra-mau gón é gi, haû Yhûmsîng Garai nhikmó-yo luî lhoqhtên pyâm é Sodom, Gomora, Adama eq Zeboyim wà pé su, xo myi eq hang myi nyé dùq luî, kyôzo le a hkyó, myòq le a yuq, mhan-haq hpoqnòq le a yùq dùt râ nghut lhê. 24 Haú hkûn, gótû a-myû wuì bànshoq gi, ‘Haû Yhûmsîng Garai gi, shí mau lé haî mù shî su kut lhê laq? Haî mù shî í wá nhik-ûm bùq, nhikmó-yô lhê làq?’ ga myi kôrâ nghut lhê.
25 Haú hkûn, ‘Haû gi, yhángmòq é îchyí îwâ pê é Garai Gasang, haû Yhûmsîng Garai mai yhángmòq lé Egutuq ming mai shuî htoq lo é hkûn, yhángmòq eq tô tô é dangshikaq lé byù shí bang tô pyám kô é yánmai nghut ri. 26 Yhángmòq gi, haû Yhûmsîng Garai le yhángmòq lé a byî tô é, yhángmòq le a sê é hparà pé nghut é, gótû hparà pê chyáng lhing ló kômù, haú pé lé noq paî gòp akô nghut ri. 27 Haû mù, haû Yhûmsîng Garai gi, laiká bùk shî má kâ tô é nhinghkun bànshoq lé shí mau má jé sháng gàq ga, shí mau lé nhikmó-yô é nghut ri. 28 Haû Yhûmsîng Garai gi, Yhang nhik-ûm bùq é eq nhikmó-yô é mai, yhángmòq lé shí mau mai lhoqhtoq pyám luî, ahkui lhê su gó-mau shut hkat hâng pyám bê nghut ri.’ ga tû taí kôrâ nghut lhê.
29 Haû haq yhûm tô é hkyô pé gi, ngá-nhûng é Garai Gasang nghut é, haû Yhûmsîng Garai eq sêng lhê; nghut kôlhang, târâ shî mâ é dang pé bànshoq lé ngá-nhúng wó cháng râ matú, hpông hpyi shit bê é hkyô pé gi, ngá-nhúng eq le, ngá-nhûng é zodù wuì eq le, ahtum abyùq sêng é nghut lhê.