Jì-no Gyo Luî Shimân Jeju Wó É Hkyô
28
Núngmòq gi, núngmòq é Garai Gasang nghut é, haû Yhûmsîng Garaî é jì-no bànshoq gyo mù, hkû-nyí ngò núngmòq lé byî é Yhâng é hkunmó pé bànshoq lé rago cháng kô é nghut jáng, núngmòq é Garai Gasang nghut é, haû Yhûmsîng Garai gi, núngmòq lé, myìdàm htoq mâ é byù myû bànshoq htoq má shigyaú wàq toq râ nghut lhê. 2 Núngmòq gi, núngmòq é Garai Gasang nghut é, haû Yhûmsîng Garaî é jì-no gyo kô é nghut jáng, a-ô mâ é jeju pé bànshoq núngmòq chyáng jé râ nghut lhê;3 núngmòq gi, wà hkaû má shimân jeju wó kôrâ nghut lhê; yò pé hkyâm pé má le shimân jeju wó kôrâ nghut lhê.
4 Núngmòq zo myo myhû hkyô má le, núngmòq é maumyî mâ é kyôshi myuishi má le, núngmòq é shigu gaunyhaú myô htâm hkyô má le, no hpúng sau hpúng mâ é no nú sau nú pé má le, shimân jeju wó râ nghut lhê.
5 Núngmòq é lán htúngká eq núngmòq é mùk dûn nhaí lànghkang má le, shimân jeju wó râ nghut lhê.
6 Núngmòq wang lo é hkûn, shimân jeju wó râ nghut lhê; núngmòq htoq ló é hkûn le, shimân jeju wó râ nghut lhê.
7 Haû Yhûmsîng Garai gi, núngmòq lé gumlau toq é gye pé lé, núngmòq é hí má sûm pyám nhâng râ nghut lhê. Yhángmòq gi, núngmòq chyáng hkyô rahkat mai wang lo bùm kôlhang, hkyô nyhit hkat mai hpang ló byùq kôrâ nghut lhê.
8 Haû Yhûmsîng Garai gi, núngmòq é chyî pé má le, núngmòq é lòq èq zui saî é hkyô hkangmó má le, shimân jeju hkyó byi râ nghut lhê. Núngmòq é Garai Gasang nghut é, haû Yhûmsîng Garai gi, núngmòq lé Yhang byî tô é maumyî má, núngmòq lé shimân byi râ nghut lhê.
9 Núngmòq é Garai Gasang nghut é, haû Yhûmsîng Garaî é hkunmó pé lé núngmòq châng kut luî, Yhâng é jì-no gyô nyì kô é nghut jáng, haû Yhûmsîng Garai gi, núngmòq lé dakâm danghtum htûm tô é eq rajung za, núngmòq lé Yhâng é chyoiyúng a-myû dùt nhâng râ nghut lhê. 10 Haú hkûn, myìdàm htoq mâ é byù bànshoq bang gi, núngmòq lé, haû Yhûmsîng Garaî é mying èq yhang myhîng tô é bang nghut é lé myàng kômù, núngmòq lé gyùq hoq hkúngga kôrâ nghut lhê. 11 Haû Yhûmsîng Garai gi, núngmòq lé byi râ matú, núngmòq é îchyí îwâ pé lé dâkam tô é mau má, núngmòq lé, zo myo myhu é jeju, shigu gaunyhaú myô htam é jeju, kyôshi myuishi myô htam é jeju pé, agùn agó lhoqpyíng byi râ nghut lhê.
12 Haû Yhûmsîng Garai gi, núngmòq é mau má yhâng é yàm-yòq jé hkangmó mau wô nhâng râ matú, Yhâng é agùn agó bo é sùtdò nghut é mauhkûng hpóng luî, núngmòq é lòq èq zui saî é múzó bànshoq má shimân byi râ nghut lhê. Núngmòq gi, byù myû myo myo lé chyi byi râ nghut kôlhang, ô chyáng mai le chyî yù ra râ a nghut. 13 Haû Yhûmsîng Garai gi, núngmòq lé sho-myi a dùt nhang é za, ushuq dùt nhâng râ nghut lhê. Núngmòq gi, hkû-nyí ngò núngmòq lé byî é, núngmòq é Garai Gasang nghut é, haû Yhûmsîng Garaî é hkunmó pé lé rago tâm gyo mù, haú pé lé rago châng é nghut jáng, hkâ-nhám le a-ô má a nghut é za, ahtoq má chyat nyì râ nghut lhê. 14 Hkû-nyí ngò núngmòq lé byî é hkunmó pé mai le, lòqyò lòqpai shut a jau ló byùq é htoq agó, gótû hparà pê é htâng le a cháng, haú pé lé le a dójaú, kut keq.
Jì-no A Gyo Luî Nhîng Pyám Huî É Hkyô
15 Nghut kôlhang, núngmòq gi, núngmòq é Garai Gasang nghut é, haû Yhûmsîng Garaî é jì-no a gyo kô é htoq agó, hkû-nyí ngò núngmòq lé byî é Yhâng é gótû hkunmó pé bànshoq eq târâ wàng hkunmó pé lé rago a cháng kô é nghut jáng, a-ô mâ é nhinghkun pé bànshoq núngmòq chyáng jé zùq râ nghut lhê.
16 Núngmòq gi, wà hkaû má nhîng pyâm é hui kôrâ nghut lhê; yò pé hkyâm pé má le nhîng pyâm é hui kôrâ nghut lhê.
17 Núngmòq é lán htúngká eq núngmòq é mùk dûn nhaí lànghkang gi, nhîng pyâm é hui râ nghut lhê.
18 Núngmòq zo myo myhû hkyô le, núngmòq é maumyî mâ é kyôshi myuishi le, núngmòq é no hpúng sau hpúng mâ é no nú sau nú pé le, nhîng pyâm é hui râ nghut lhê.
19 Núngmòq wang lo é hkûn nhîng pyâm é hui râ nghut lhê; núngmòq htoq ló é hkûn le nhîng pyâm é hui râ nghut lhê.
20 Haû Yhûmsîng Garai gi, Yhang lé núngmòq kâng pyâm tô é, núngmòq é agè ashop hkyo é yánmai, núngmòq htên byòq luî, hân za htûm byùq é hkûn jé shoq, núngmòq é lòq èq zui saî é múzó hkangmó lé tân nhik-yo mù, nhîng pyâm é hkyô eq a-myhîn aso nhúngnhâng é hkyô lé núngmòq chyáng jé nhâng râ nghut lhê. 21 Haû Yhûmsîng Garai gi, núngmòq wang sing yu nyì râ nghut é mau mai núngmòq lé wó lhoqhtûm pyám shoq, núngmòq lé nòlì nòjàng wúm tap byi râ nghut lhê. 22 Haû Yhûmsîng Garai gi, núngmòq chyáng, yhó le gyí kyuq ló jung nòlì, nyé no jung nòlì, wâm hkê-nhô nòlì, buì nyé hking é, kyuq huî byùq é, gùqji zô é eq mhungzúng zuî sat é wúm pé lé jé nhâng râ nghut lhê. Núngmòq htûm ló byùq shoq wúm haú pé lé jé nhâng râ nghut lhê. 23 Núngmòq é u htoq mâ é mauhkûng gi, gyi dùt byùq mù, núngmòq é a-ô mâ é myìdàm htoq gi, jòqtoq su htan byùq râ nghut lhê. 24 Haû Yhûmsîng Garai gi, núngmòq é mau má wo é mau lé, hpuílhup eq hpuílhaû dùt nhâng mù, núngmòq htûm byùq shoq mauhkûng mai núngmòq chyáng gyó jé nhâng râ nghut lhê.
25 Haû Yhûmsîng Garai gi, núngmòq é gye pê é hí má núngmòq lé sum nhâng râ nghut lhê. Núngmòq gi, yhángmòq chyáng hkyô rahkat mai za lé lô kôrâ nghut kôlhang, yhángmòq chyáng mai hkyô nyhit hkat dông hpâng kôrâ nghut lhê. Haû mù, núngmòq gi, myìdàm htoq mâ é mîngdán bànshoq bâng é matú gyùq dàn hpo a-myû dùt râ nghut lhê. 26 Núngmòq é màng pé gi, nghoq pé bànshoq eq yòsô zè pê é matú zoshuq dùt râ nghut lhê; haú pé lé hkat pyám râ byù nyi râ a nghut. 27 Haû Yhûmsîng Garai gi, núngmòq a wó yâ ge yù lo râ nghut é, Egutuq ming má yùq é byìng mó èq le, maubyîng pé, hkê-nho dik é yàpjèq nòlì pé eq achîn chîn achap chap dùt é èq le, núngmòq lé hpu zo nhâng râ nghut lhê. 28 Haû Yhûmsîng Garai gi, núngmòq lé, nâ byùq é hkyô, myòqjìt byùq é hkyô eq i-myìt nhúngnhâng byùq é hkyo èq hpu zo nhâng râ nghut lhê. 29 Myòqjìt sû rayùq mauchut hkaû má sop sô wún é su, núngmòq gi, nyí mó káng lé sop so kôrâ nghut lhê. Núngmòq gi, zui saî é múzó hkangmó má a wó ûngmyuq kôrâ nghut é htoq agó, nyí nyí buì buì zìk zo zìk shuq é eq lú zo lú shuq é hui zo kôrâ nghut lhê. Ó yùq le, núngmòq lé wó hkyi yù râ a nghut.
30 Núngmòq gi, myiwe dûng to kôrâ nghut kôlhang, góyùq èq yu pyám rhoi pyám byi râ nghut lhê; núngmòq gi, yhûm saí râ nghut kôlhang, haú má myang nyì kôrâ a nghut. Núngmòq gi, tsibyiq hkyâm saí râ nghut kôlhang, núngmòq yhang ashi myang hpyoq zo kôrâ a nghut. 31 Núngmòq é no lé, núngmòq é hí má sat râ nghut kôlhang, núngmòq haî le myàng zo kôrâ a nghut. Núngmòq é loze lé, núngmòq chyáng mai zìk lú yu ló kó luî, dum tau byi kôrâ a nghut. Núngmòq é sau lé, núngmòq é gye pê é lòq má byî pyám râ nghut kôlhang, haú lé ó yùq le hkyi htoq yû râ a nghut. 32 Núngmòq é yùqzo byìzô pé gi, gótû a-myû lé àp byî pyâm é hui kôrâ nghut mù, núngmòq gi, nyí nyí buì buì yhángmòq lé láng wú nyî râ nghut luî, myòq wum nyhôm ló byùq kôrâ nghut lhê; hkyi htoq yû râ lòqyìn wum le bo kôrâ a nghut. 33 Núngmòq é maumyî mai, núngmòq zui saî htoq é kyôshi myuishi lé, núngmòq a sê é a-myu èq zô pyám byi râ nghut lhê; núngmòq gi, ayang zìk zo zìk shuq huî é mai lai luî, haî le wó kôrâ a nghut. 34 Núngmòq gi, núngmòq byu myang é hpu zô é hkyô pê é yánmai, wû byùq kôrâ nghut lhê. 35 Haû Yhûmsîng Garai gi, núngmòq é hkyîhput eq tangbaú pé má le, hkyîwa mai ují lagùng byo jé ló shoq le, a wó lhoqge yù râ nghut é, hkê-nho dik é byìng pé yùq nhang é dong, núngmòq lé hpu zo nhâng râ nghut lhê.
36 Haû Yhûmsîng Garai gi, núngmòq lé le, núngmòq lé ùp râ matú núngmòq hkyin tô é hkóhkâm lé le, núngmòq eq núngmòq é îchyí îwâ pé le a sê é a-myû chyáng shuî jé ê râ nghut lhê. Haú má, núngmòq gi, sik hparà eq lùqgòk hparà nghut é, gótû hparà pé lé noqkuq kôrâ nghut lhê. 37 Núngmòq gi, haû Yhûmsîng Garai mai núngmòq lé shuî jé râ nghut é mau mâ é a-myû wuì bànshoq chyáng, gyùq maúhpo, gya dang taî kún hpo eq wuìzuì kut hpo dùt byùq kôrâ nghut lhê.
38 Núngmòq gi, yò má kyôshi myo myo hkyó kôrâ nghut kôlhang, dinggám pê èq haú lé zô pyám byi râ nghut é yánmai, ra-tsuí za myang shû yù kôrâ nghut lhê. 39 Núngmòq gi, tsibyiq hkyâm saí mù, hô tô bùm kôrâ nghut kôlhang, bau pê èq zô pyám byi râ nghut é yánmai, tsibyiq shi myang shû yù kôrâ a nghut é htoq agó, tsibyiq wing le myàng shuq kôrâ a nghut. 40 Núngmòq gi, núngmòq é ra-mau gón má tsanlun gàm wó kôrâ nghut kôlhang, yòq gyó byùq râ nghut é yánmai, xû myang chûng kôrâ a nghut. 41 Núngmòq gi, yùqzo byìzo wó râ nghut kôlhang, yhángmòq shúm zung byùq kôrâ nghut é yánmai, núngmòq rahá myang nyi to kôrâ a nghut. 42 Núngmòq é maumyî mâ é sikgâm pé eq kyôshi myuishi bànshoq lé dinggám jum èq hkê pyám râ nghut lhê.
43 Núngmòq chyáng má nyi é gótû a-myû byu pé gi, je lé je kô myhang lò mù, núngmòq ahtoq má nyì kôrâ nghut lhê; nghut kôlhang, núngmòq gi, je lé je nyhum gyó ló byùq kôrâ nghut lhê. 44 Yhángmòq gi, núngmòq lé wó chyi byi râ nghut lhê; nghut kôlhang, núngmòq gi, yhángmòq lé wó chyi byi kôrâ a nghut. Yhángmòq gi, ushuq dùt kôrâ nghut lhê; nghut kôlhang, núngmòq gi, sho-myi dùt kôrâ nghut lhê.
45 Nhinghkun shí pé bànshoq gi, núngmòq chyáng zùq râ nghut lhê. Núngmòq gi, núngmòq é Garai Gasang nghut é, haû Yhûmsîng Garaî é jì-no a gyo kô é eq, Yhang núngmòq lé byî é târâ wàng hkunmó pé eq gótû hkunmó pé lé a cháng kut kô é yánmai, haú pé gi, núngmòq htûm byùq shoq, núngmòq chyáng châng hkyit jé râ nghut lhê. 46 Haú pé gi, núngmòq eq núngmòq é awùt ashîn pê é matú, maúhpo alhô agàn eq maúhpo múzó ahtum abyùq dùt nyì râ nghut lhê. 47 Núngmòq gi, núngmòq nyì ngón yùqyò kô é hkûn, núngmòq é Garai Gasang nghut é, haû Yhûmsîng Garai lé, myìt nguì myìt ngón é eq gabú myìt mai a dójaú kô é yánmai, 48 núngmòq lé htuqhtíng râ matú, haû Yhûmsîng Garai mai nhang kat é gye pé lé, zò-mut wuìshit é, achîn de dùt é eq asho awui dùt é mai dójaú kôrâ nghut lhê. Haú yùq gi, núngmòq lé wó lhoqhtûm pyám shoq, núngmòq é lìngzing má jòqtoq kyaú hut râ nghut lhê.
49 Haû Yhûmsîng Garai gi, zùn htîm gyó lo é su dùt é a-myû ra-myû lé, myìdàm htoq ló htâng é mau we mai, núngmòq lé lé htim râ matú nhâng kat râ nghut lhê; a-myû hau é dang lé núngmòq sê gyo kôrâ a nghut; 50 a-myû haû gi, byù wuî é myòqdong dàp mù, mangzo lé le a hkúngga, zoshâng lé le shogyo myìt a bò nghut ri. 51 Yhángmòq gi, núngmòq htên byòq byùq shoq, núngmòq é shigu gaunyhaú zô pé eq núngmòq é maumyî mâ é kyôshi myuishi lé myhui pyám kôrâ nghut lhê. Yhángmòq gi, núngmòq htûm byùq shoq, núngmòq é gùqzò lé le, tsibyiq wing asik eq tsanlun xû lé le, núngmòq é no hpúng mâ é no zo eq núngmòq é sau hpúng mâ é sau zo lé le, núngmòq é matú myhit to byi râ a nghut. 52 Yhángmòq gi, núngmòq lùmhkau nyi é, myhang é gingtíng wàhkûm pé lêng gyòp é hkûn jé shoq, núngmòq é ra-mau gón mâ é wà pé bànshoq lé le lóm to râ nghut lhê. Yhángmòq gi, núngmòq é Garai Gasang nghut é, haû Yhûmsîng Garai mai núngmòq lé byî tô é mau ra-mau gón mâ é wà pé bànshoq lé lóm to râ nghut lhê.
53 Núngmòq é gye pé mai núngmòq lé lóm to luî, núngmòq hpu zô nyì kô é hkûn, núngmòq gi, núngmòq é Garai Gasang nghut é, haû Yhûmsîng Garai mai núngmòq lé byî tô é, núngmòq é ûnghkaû mâ é kyôshi myuishi nghut é yùqzo byìzô pê é sho lé zo kôrâ nghut lhê. 54 Núngmòq chyáng mâ é nú nhám luî nûm é yùqgè lháng gi, yhûmsing é gu-mang hpó lé le, yhang chyit é yhâng é yhûmsîng myhí lé le, nyi myìt tô é yhang zô pé lé le, shogyo myìt a bò lo mù, 55 yhang zô nyi é, yhang zô pê é sho haî lé le, haú bang mâ é rayùq lé lháng byi râ a nghut. Haû gi, núngmòq é wà pé bànshoq lé núngmòq é gye pê èq lóm to mù, núngmòq hpu zô nyi é hkûn, wó myìt tô é sho dut râ nghut lhê. 56-57 Núngmòq é wà pé bànshoq lé núngmòq é gye pê èq lóm to mù, núngmòq hpu zô nyi é hkûn, núngmòq chyáng mâ é gyai yhang nú nhám luî nûm é nghut mù, nú nhám luî nûm é yánmai hkyîwâ èq myigùng má lháng a wám nâng é myiwe myhí lháng gi, zoshuq a jòq é yánmai, yhang hku hkyô kat é nyheqnú eq nyìchang lé lháng yhang baú tsik za haq zo mù, yhang chyit é yhâng yhûmsîng hpó eq yhâng é yùqzo byìzô pé lé lháng a kâm byi tsô é manôn myìt bo byùq râ nghut lhê.
58 Núngmòq gi, núngmòq é Garai Gasang nghut é, haû Yhûmsîng Garai nghu é, hpungwup bo é eq gyùq chiq hpo nghut é myìng lé gyùq hkúngga râ matú, laiká bùk shí má kâ tô é târâ shî mâ é dang pé bànshoq lé rago a cháng kô é nghut jáng, 59 haû Yhûmsîng Garai gi, gyùq chiq hpo mó wúm nghut é wúm soq htân luî myáng myáng jòq nyi é wúm ihkyùp pé eq gyai yhang htan é eq yhó le no kyuq lo jung nòlì nòjàng pé lé, núngmòq eq núngmòq é awùt ashîn pê chyáng jé nhâng râ nghut lhê. 60 Hau htoq agó, Yhang gi, núngmòq gyùq chiq é Egutuq ming mâ é nòlì nòjàng bànshoq lé núngmòq chyáng jé nhâng râ nghut mù, nòlì haú pé gi, núngmòq chyáng dàp râ nghut lhê. 61 Haû Yhûmsîng Garai gi, núngmòq htûm byùq é hkûn jé shoq, târâ laiká bùk shî má a kâ tô é wúm ihkyùp eq nòlì nòjàng jung hkangmó lé le, núngmòq chyáng jé nhâng râ nghut lhê. 62 Núngmòq gi, núngmòq é Garai Gasang nghut é, haû Yhûmsîng Garaî é jì-no a gyo kô é yánmai, mauhkûng mâ é kyî pé su ajùm ayò myô é nghut kôlhang, byù du ra-tsuí za myìt to râ nghut lhê. 63 Núngmòq lé wó lô sùt lò nhâng mù, byù du myô jàt lò râ lé, haû Yhûmsîng Garai myìt nguì ô nau é su, núngmòq lé lhoqhten lhoqhpyoq mù, lhoqhtûm pyám râ lé le, Yhang myìt nguì ô nau nyi ri. Núngmòq gi, núngmòq wang sing nyì râ nghut é mau mai a-myìt hpûn pyâm é hui kôrâ nghut lhê.
64 Haú hkûn, haû Yhûmsîng Garai gi, núngmòq lé, myìdàm htoq rahtâng mai góhtâng jé shoq, byù myû wuì bànshoq chyáng lhoqpyo hâng kat râ nghut lhê. Haú má, núngmòq gi, núngmòq le, núngmòq é îchyí îwâ pé le a sê é, sik hparà pé eq lùqgòk hparà pé nghut é, gótû hparà pé lé noq kôrâ nghut lhê. 65 Byù myû haú bâng chyáng núngmòq nyì ngón yùqyò hkyô wó râ a nghut é htoq agó, hkyî nang jang le wó râ a nghut. Haú má, haû Yhûmsîng Garai gi, núngmòq lé, myìt myo myìt chiq é, myìt myòqbyù hkyô htên é eq myìt htum mó gyó é hui nhâng râ nghut lhê. 66 Núngmòq gi, chyungxe sûm ló nyi é lé myìt myô nyì kômù, chyungxe wó byûn a wó byûn râ lé, nyí myín gyùq chiq nyî kôrâ nghut lhê. 67 Núngmòq chyáng gyùq chiq myìt byíng tô é eq núngmòq é myòq èq byu myang é hkyô pê é yánmai, núngmòq gi, nàpkyó lé nghut jáng, “Buì hân gyum le gè râ wá!” ga taí, myín lé nghut jáng, “Myòq hân myang le gè râ wá!” ga taí kôrâ nghut lhê. 68 Haû Yhûmsîng Garai gi, shí hkyô mai núngmòq hkâ-nhám le dum so râ a nghut ga taî pyám bê hkyô mai, núngmòq lé Egutuq ming shut wuìsanghpo mai dum taû nhang kat râ nghut lhê. Haú má, núngmòq gi, yhûmsing gùng lé jùn myhí jùn hpó dông núngmòq é gye pé lé ung byi kôlhang, ó yùq le núngmòq lé wui yù râ a nghut.