Ebala Bùm Mâ É Hkungga Gyàp
27
Mosheq eq Isira-elaq a-myu é sûwún wuî gi, shiwa byu pé lé shî su ga hkunmó hkyô akô; “Hkû-nyí ngò núngmòq lé byî é hkunmó shí pé bànshoq lé châng kut nyî keq. 2 Núngmòq gi, Yodan làng gû dàp luî, núngmòq é Garai Gasang nghut é, haû Yhûmsîng Garai mai núngmòq lé byî é mau má wang ló kô é hkûn, lùqgòk mó pé lé tu shap mù, chuhuí bùt hpyu to keq. 3 Núngmòq é îchyí îwâ pê é Garai Gasang, haû Yhûmsîng Garai mai núngmòq lé danghtum htûm tô é eq rajung za, núngmòq é Garai Gasang nghut é, haû Yhûmsîng Garai mai núngmòq lé byî tô é, no-naú eq byo-î yui é mau má wó dàp jé wang ló kô é hkûn, târâ shî mâ é dang pé bànshoq lé, haú pé má kâ tap to keq. 4 Núngmòq Yodan làng wó gû dàp é hkûn, hkû-nyí ngò núngmòq lé hkunmó hkyô é eq rajung za, lùqgòk haú pé lé Ebala Bùm má tu shap to mù, chuhuí bùt hpyu to ra râ nghut lhê. 5 Haú má, núngmòq é Garai Gasang nghut é, haû Yhûmsîng Garaî é matú lùqgòk pê èq hkungga gyàp ralhum saí keq. Lùqgòk haú pé má jòqtoq zê haî le ge chûng râ a nghut. 6 Luq lhum luq líng pê èq, núngmòq é Garai Gasang nghut é, haû Yhûmsîng Garaî é matú hkungga gyàp saí mù, núngmòq é Garai Gasang nghut é, haû Yhûmsîng Garaî é matú hau é ahtoq má myi nyhé hkungga nhông byi ra râ nghut lhê. 7 Haú má zùmhkaû hkungga pé le nhông byi mù, haú pé lé zo shuq luî, núngmòq é Garai Gasang nghut é, haû Yhûmsîng Garaî é hí má gabú byam chyu ra kôrâ nghut lhê. 8 Núngmòq tu shap tô é lùqgòk mó haú pé má, târâ shí pé mâ é dang pé bànshoq lé san za de de yhang kâ tap to ra râ nghut lhê.” gâ akô.Ebala Bùm Mai Nhîng É Hkyô Pé
9 Hau htâng, Mosheq eq Lewiq byù hkyangjông pé gi, Isira-elaq byù bànshoq bang lé, “Isira-elaq a-myû ê, zim za kut luî, gyo keq! Núngmòq gi, ahkuî, núngmòq é Garai Gasang nghut é, haû Yhûmsîng Garaî é byu pé dùt bekô nghut ri. 10 Haû mù, núngmòq é Garai Gasang nghut é, haû Yhûmsîng Garaî é jì-no gyo luî, hkû-nyí ngò núngmòq lé byî é Yhâng é gótû hkunmó pé eq târâ wàng hkunmó pé lé châng kut nyî keq.” ga taî akô nghut ri.
11 Haú nyí má yhang, Mosheq gi, shiwa byu pé lé hkunmó hkyô ri.
12 Haû gi, “Núngmòq Yodan làng gû dàp é hkûn, shiwa byu pé lé shimân byi râ matú Gerizim Bùm má yàp râ a-myû up pé gi, Sime-on up, Lewiq up, Yudaq up, Yisahka up, Yosep eq Ben-yamin up pé nghut lhê. 13 Nhing dang taí râ matú Ebala Bùm má yàp râ a-myû up pé gi, Rubin up, Gat up, Asheri up, Zebulun up, Dan up eq Naphtali up pé nghut lhê.” gâ é nghut ri.
14 Haú hkûn, Lewiq byu pé gi, Isira-elaq byù bànshoq bang lé, htê mó lhoqmyhâng mù,
15 “Haû lòqmú bo é èq, Yhûmsîng Garai chaq é zè nghut é, hparà hpôlhô zòng kyûng saî yù, a nghut jáng, nyhê yui yù luî, gaû é jowò má tsung tô é sû ó yùq le, nhîng pyâm é huî nyi ri.” ga taî kôrâ nghut lhê.
Haú hkûn, shiwa byu pé bànshoq bang gi, “Amen!” ga taí kôrâ nghut lhê.
16 Yhángmòq gi, “Yhâng nu yhâng wa lé a hkúnggâ é sû ó yùq le, nhîng pyâm é huî nyi ri.” ga dum taí kôrâ nghut lhê.
Haú hkûn, shiwa byu pé bànshoq bang gi, “Amen!” ga taí kôrâ nghut lhê.
17 Yhángmòq gi, “Yhángmòq é chyáng nâm mâ é su é maukyo lùq zìng lé huî htòt é sû ó yùq le, nhîng pyâm é huî nyi ri.” ga dum taí kôrâ nghut lhê.
Haú hkûn, shiwa byu pé bànshoq bang gi, “Amen!” ga taí kôrâ nghut lhê.
18 Yhángmòq gi, “Myòqjìt sû lé hkyô shuî nghoq é sû ó yùq le, nhîng pyâm é huî nyi ri.” ga dum taí kôrâ nghut lhê.
Haú hkûn, shiwa byu pé bànshoq bang gi, “Amen!” ga taí kôrâ nghut lhê.
19 Yhángmòq gi, “Gótû a-myû, chuimó chuízô pé lé târâ ràp-rá hkyô a kut byi sû ó yùq le, nhîng pyâm é huî nyi ri.” ga dum taí kôrâ nghut lhê.
Haú hkûn, shiwa byu pé bànshoq bang gi, “Amen!” ga taí kôrâ nghut lhê.
20 Yhángmòq gi, “Yhâng wâ é yhupgyàp lé a hkúngga kut luî, yhâng wâ é yhang myi eq nyì zô lhûm é sû ó yùq le, nhîng pyâm é huî nyi ri.” ga dum taí kôrâ nghut lhê.
Haú hkûn, shiwa byu pé bànshoq bang gi, “Amen!” ga taí kôrâ nghut lhê.
21 Yhángmòq gi, “Shigu gaunyhaú hkâ eq nghut kôle, gùngsho zùm yàp é sû ó yùq le, nhîng pyâm é huî nyi ri.” ga dum taí kôrâ nghut lhê.
Haú hkûn, shiwa byu pé bànshoq bang gi, “Amen!” ga taí kôrâ nghut lhê.
22 Yhángmòq gi, “Yhâng wâ é byìzo, a nghut jáng, yhâng nû é byìzo nghut é, yhang gu yhâng nhá eq nyì zô lhûm é sû ó yùq le, nhîng pyâm é huî nyi ri.” ga dum taí kôrâ nghut lhê.
Haú hkûn, shiwa byu pé bànshoq bang gi, “Amen!” ga taí kôrâ nghut lhê.
23 Yhángmòq gi, “Yhâng aûmó eq nyi zô lhûm é sû ó yùq le, nhîng pyâm é huî nyi ri.” ga dum taí kôrâ nghut lhê.
Haú hkûn, shiwa byu pé bànshoq bang gi, “Amen!” ga taí kôrâ nghut lhê.
24 Yhángmòq gi, “Yhángmòq é chyáng nâm mâ é sû lé tsik za haq sat pyâm é sû ó yùq le, nhîng pyâm é huî nyi ri.” ga dum taí kôrâ nghut lhê.
Haú hkûn, shiwa byu pé bànshoq bang gi, “Amen!” ga taí kôrâ nghut lhê.
25 Yhángmòq gi, “Mara a bò sû lé sat râ matú lòqhkaû lang zè hàp yu é sû ó yùq le, nhîng pyâm é huî nyi ri.” ga dum taí kôrâ nghut lhê.
Haú hkûn, shiwa byu pé bànshoq bang gi, “Amen!” ga taí kôrâ nghut lhê.
26 Yhángmòq gi, “Târâ shî mâ é dang pé lé a châng kut é sû ó yùq le, nhîng pyâm é huî nyi ri.” ga dum taí kôrâ nghut lhê.
Haú hkûn, shiwa byu pé bànshoq bang gi, “Amen!” ga taí kôrâ nghut lhê.