Sânghi Myhîng É Kyôshi Myuishi Eq Xê Gàmbùm Mâ É Ragàmbùm Pé
26
Núngmòq é Garai Gasang nghut é, haû Yhûmsîng Garai mai, silî wunlî maumyî dông núngmòq lé byî é mau má wang ló mù, núngmòq ló wó sing yù kô é hkûn, 2 Núngmòq é Garai Gasang nghut é, haû Yhûmsîng Garai mai núngmòq lé byî é maumyî mai núngmòq zuî htoq é shi-mún hkangmó lé yù luî, kyáng má kat mù, núngmòq é Garai Gasang nghut é, haû Yhûmsîng Garai mai Yhâng é Mying é matú nyì jowò dông hkyin to râ nghut é jang má ê dé keq. 3 Haû mù, haú u lé hkyangjong wò yu nyì sû lé, “Hkû-nyí, ngò gi, ngá-nhúng lé byi râ matú, haû Yhûmsîng Garai mai ngá-nhûng é îchyí îwa lé dâkam tô é mau má jé lé bê nghut é hkyô lé, náng é Garai Gasang nghut é, haû Yhûmsîng Garaî é hí má yín yu lhê.” nghû taí keq. 4 Haû hkyangjong hpó gi, núngmòq é lòq mai kyáng haú lé yù mù, núngmòq é Garai Gasang nghut é, haû Yhûmsîng Garaî é hkungga gyàp hí má ê tô to râ nghut lhê. 5 Haú hkûn, núngmòq gi, núngmòq é Garai Gasang nghut é, haû Yhûmsîng Garaî é hí má, “Ngá é îchyí îwa gi, htòt yông wún é Aram byù nghut lhê; yhang gi, byù du shau za shuî chûng mù, Egutuq ming má gyó ê luî, haú má ê nyî jáng, wum-o a-tsam mó bo é eq ajùm ayò dùt é byu myû mó dùt bê nghut ri. 6 Nghut kôlhang, Egutuq byu pé gi, yhángmòq lé a ge é dông zìk zo kômù, hpû nyì sho nyì nhâng luî, ahkyik anòq é mú zui nhâng bekô nghut ri. 7 Haú hkûn, ngá-nhúng gi, ngá-nhûng é îchyí îwâ pê é Garai Gasang, haû Yhûmsîng Garai lé wùt dûng ngaù jáng, haû Yhûmsîng Garai gi, ngá-nhûng é htê lé wó gyo byi luî, ngá-nhúng hpû nyì shô nyi é hkyô, zuî hkyik ngú nyi é hkyô eq zìk zo huî é hkyô lé myàng byi bê nghut ri. 8 Haû mù, haû Yhûmsîng Garai gi, wúm bo é lòq eq lhâm tô é lòqbú èq le, gyùq chiq hpo mó èq le, maúhpo alhô agàn pé eq maúhpo múzó pê èq le, ngá-nhúng lé Egutuq ming mai shuî htoq lo é nghut ri. 9 Yhang gi, ngá-nhúng lé shuî htoq lô mù, shî no-naú eq byo-î yui é mau nghut é, shí jowò lé byî to bê nghut ri; 10 haû mù, Yhûmsîng Garai ê, ahkuî, ngò gi, Nàng, ngo lé byî é maumyî mai htoq é sânghi myhîng é kyôshi myuishi pé lé yu lé é nghut lhê.” nghû taî htoq ra râ nghut lhê. Hau htâng, núngmòq é Garai Gasang nghut é, haû Yhûmsîng Garaî é hí má, kyáng lé to mù, Yhang lé paî gòp keq. 11 Hau htâng, núngmòq é Garai Gasang nghut é, haû Yhûmsîng Garai mai núngmòq eq núngmòq é yhûmbyù wuì lé byî é ge é jeju bànshoq má, núngmòq le, Lewiq byu pé le, núngmòq chyáng lé bíng nyi é gótû a-myû wuì le, gabú byam chyu kôrâ nghut lhê.12 Xê gàmbùm mâ é ragàmbùm gùq tsing zànwut nghu é, súm zan zàn má núngmòq chyáng mai wó zuî htoq é bànshoq mâ é xê gàmbùm mâ é ragàmbùm lé ban tsîng yu to jáng, Lewiq byù, gótû a-myû, chuimó chuízô pé, núngmòq é wà pé má gyi gyi dau dau wó myâng zo kó sháng gàq, yhángmòq lé byi ra râ nghut lhê. 13 Haú hkûn, núngmòq é Garai Gasang nghut é, haû Yhûmsîng Garai lé, “Ngò gi, Nàng hkunmó hkyô tô é bànshoq eq rajung za, ngá yhûm mâ é chyoiyúng é gàmbùm lé yu htoq mù, Lewiq byù, gótû a-myû, chuimó chuízô pé lé byi bê nghut lhê. Ngò gi, Náng é hkunmó pé mai a lhing pyâm é htoq agó, haú pé rahkat lé lháng a tô-myhî pyâm é nghut lhê. 14 Ngò gi, iyon yôn nyi é hkûn, chyoiyúng gàmbùm haî lé le a zo kut mù, ngò a sansêng é u, haû mâ é haî lé le a yu htòt kut é htoq agó, shi byùq bê bang lé, haû mâ é haî lé le a nhông byi kut é nghut lhê. Ngò gi, ngá é Garai Gasang nghut é, haû Yhûmsîng Garaî é jì-no gyo bê nghut lhê; ngò gi, Nàng, ngo lé hkunmó hkyô é bànshoq lé cháng bê nghut lhê. 15 Náng é chyoiyúng jowò, haû mauhkûng mai wú hkyô kat mù, Náng é Isira-elaq byu pé lé le, ngá-mòq é îchyí îwâ pé lé dakâm danghtum htûm tô é eq rajung za, ngá-mòq lé byî é, haû no-naú eq byo-î yui é maumyî lé le, shimân byi aq.” nghû taí ra kôrâ nghut lhê.
Yhûmsîng Garaî É Hkunmó Pé Lé Cháng Râ Hkyô
16 Núngmòq é Garai Gasang nghut é, haû Yhûmsîng Garai gi, târâ wàng hkunmó eq târâ shí pé lé cháng râ matú, hkû-nyí núngmòq lé hkunmó hkyô ri. Núngmòq é i-myìt nhiklhum bànshoq eq núngmòq é i-myìt sô lhum gón mai, haú pé lé rago châng nyì keq. 17 Haû Yhûmsîng Garai gi, núngmòq é Garai Gasang nghut lhê ga luî le, Yhâng é jì-no gyo mù, Yhâng é hkyô cháng râ ga luî le, Yhâng é târâ wàng hkunmó pé, gótû hkunmó pé eq târâ pé lé cháng râ ga luî le, Yhâng é dang gyo râ ga luî le, hkû-nyí núngmòq hkam yù taî pyô bekô nghut ri. 18 Haû Yhûmsîng Garai gi, Yhâng é hkunmó bànshoq lé núngmòq cháng kó sháng gàq ga, Yhang danghtum htûm tô é eq rajung za, núngmòq lé, Yhâng èq sing é byu pé nghut lhê ga hkû-nyí taî pyô bê nghut ri. 19 Haû htoq agó, Yhang gi, núngmòq lé, Yháng hpan tô é gótû a-myû wuì bànshoq bâng htoq má, hkya-ôn é hui mù, myìng hu nhâng luî, gyai yhang hkúnggâ é hui nhâng râ ga luî le, Yhang danghtum htûm tô é eq rajung, núngmòq é Garai Gasang nghut é, haû Yhûmsîng Garaî é matú, núngmòq lé chyoiyúng é byù myû dùt râ ga luî le, taî pyô bê nghut ri.