25
Byù í yùq mû htoq lhum mù, târâ hpyit wàp má hkyang ê shit kô é hkûn, târâ agyì pé gi, mara a bò sû lé a bo é dông hpyit byi luî, mara bò sû lé mara byi ra râ nghut lhê. 2 Mara bò sû yùq nhuq bàt é hui zo gíng é nghut jáng, haû târâ agyì hpó gi, yhâng é hí má haú yùq lé gòp byên to nhâng mù, yhâng é mara eq gíng shoq bàt nhâng ra râ nghut lhê; 3 nghut kôlhang, myi xê dàm lai shoq gi, ge bàt nhâng râ a nghut. Mara bò sû lé hau htoq myô bàt é nghut jáng, núngmòq é gu-mang Isira-elaq hpó gi, núngmòq é myòq hí má mun a bo byùq dùt râ nghut lhê.4 Gùq nâng nyi é no lé nhuttsung ge tsung byi râ a nghut.
5 Yhûm ralhum má za chôm nyi é gu-mang nhiktâng wuì mâ é rayùq yùq, yùqzo a dàp é za shi ló byùq é nghut jáng, shi chuî tô é chuimó myhí haú lé góbâng èq ge gùq râ a nghut. Chuimó myhí hau é yhâng rhat shèq, yhang lé gùq mù, yhâng é matú wùn wàq byi gíng é wò lé wùn wàq ra râ nghut lhê. 6 Haû sânghi hku é yùqzo gi, shi ló byùq bê nghut é yhang gu yhang mâng é hkûngxoq dùt râ nghut lhê; haû jáng shèq, shi ló byùq bê nghut é yhang gu yhang mâng é myìng gi, Isira-elaq a-myû mai a htûm byùq râ nghut lhê.
7 Nghut kôle, haú yùq gi, yhâng rhat lé a kâm gùq é nghut jáng, chuimó myhí haû gi, wà hkum má nyi tô é sûwún wui chyáng ê mù, “Ngá yhûmsîng hpô é yhang gu gi, yhang mâng é myìng lé Isira-elaq a-myû má a kâm xoq byi naù nghut ri. Yhang gi, ngò, yhâng rhat é matú wùn wàq byi gíng é wò lé a wùn wàq byi nghut ri.” ga ge taí râ nghut lhê. 8 Haû jáng, yhâng é wà sûwún wuî gi, yhang lé ji yù mù, nyo wú râ nghut lhê. Yhang gi, “Yhang lé ngò a kâm gùq yù naù.” ga ru he nyi ashî nghut jáng, 9 yhang mâng é chuimó myhí haû gi, sûwún wui é hí má, yhâng chyáng huî ê mù, yhâng é hkyî-tsung ralhum hkyut yû byi luî, yhâng é myòqdong má sôkan byé gyun mù, “Yhûmsing yhang mâng é yhûmhtu lé a xoq byí nau é sû lé gi, shí dông kut akô nghut ri.” ga yhang lé taí râ nghut lhê. 10 Haú hkûn mai, Isira-elaq é a-myû má yhâng é yhûmhtu lé gi, hkyî-tsung hkyut yhûmhtu ga myhîng nyì bekó râ nghut lhê.
11 Yùqgè í yùq htîm lhûm nyì mù, rayùq é yhang myi gi, lé lô luî, yhang lâng lé hkyi yù râ matú, yhang lâng lé htîm nyì su é yùqgè hking má lang byî é nghut jáng, 12 myiwe myhí hau é lòq lé zân hpyit pyám byi ra râ nghut lhê. Yhang lé shogyo myìt ge shit râ a nghut.
13 Núngmòq é e-tap má, laî é jàngshi eq sôm é jàngshi nghu é, a wuí é jàngshi ge kat chûng râ a nghut. 14 Núngmòq é yhûm má, kô é bùng eq tiq é bùng nghu é, a wuí é bùng ge tô to râ a nghut. 15 Núngmòq é Garai Gasang nghut é, haû Yhûmsîng Garai mai núngmòq lé byî é mau má, núngmòq chyungxe wó hing nyì kó sháng gàq, tengmán é jàngshi eq tengmán é bùng lé chûng ra râ nghut lhê. 16 Hkâsu mù gâ le, núngmòq é Garai Gasang nghut é, haû Yhûmsîng Garai gi, haû sû é a teng a mán é hkyô kut é sû yùq hkangmó lé chaq pyâm é nghut ri.
17 Núngmòq Egutuq ming mai htoq lô mù, hkyôwuì má nghut nyi é hkûn, núngmòq lé Amalek byu pé hkâsu kut é hkyô lé myìtbun keq. 18 Núngmòq wum yôm mù, ngú byùq bum é hkûn, yhángmòq gi, núngmòq é hkyôwuì má lé hui kômù, wum nyhóm luî, htâng gyó tô é bang bànshoq lé htîm akô nghut ri. Yhángmòq gi, Garai Gasang lé gyùq hkúnggâ é myìt a bò kó nghut ri. 19 Haû mù luî, núngmòq é Garai Gasang nghut é, haû Yhûmsîng Garai mai, silî wunlî maumyî dông núngmòq lé byî é mau má, núngmòq é lhînghkyùq mâ é gye pé bànshoq é lòq mai, núngmòq é Garai Gasang nghut é, haû Yhûmsîng Garaî èq núngmòq lé bánno nhang é hkûn, núngmòq gi, Amalek é myìng lé, mauhkûng ô mai bùt sut hpyuq pyám byi ra râ nghut lhê. Haú lé hkâ tô-myhí kó!