24
Yùqgè rayùq yùq, myiwe yù luî, nyì zô é htâng má, myiwe haú yùq chyáng mara hûn jang jòq mù, a nguì lo dùt é nghut jáng, yhang gi, lhoqkang laiká ká byi luî, yhang lé yhûm mai ge nhang htoq pyâm lhê. 2 Myiwe haû gi, yhâng é yhûm mai htoq lo é htâng má, yùqgè góyùq chyáng dum htòt ló luî, 3 yhâng é yhûmsîng hpó haû le, yhang lé a nguì lo mù, lhoqkang laiká ká byi luî, yhâng é yhûm mai yhang lé dum nhang htoq pyâm é nghut jáng le, yùqgè haû shi byùq é nghut jáng le, 4 yhang gi, htûngli dông agòt a-û dùt byùq bê nghut mù, yhang lé lhoqkâng pyâm é hî yùq yhûmsîng hpó gi, yhang lé dum ge hâng yù râ a nghut lo. Hâng yu é nghut jáng, haû Yhûmsîng Garaî é hí má achaq achyut dùt râ nghut lhê. Núngmòq é Garai Gasang nghut é, haû Yhûmsîng Garai mai núngmòq lé silî wunlî dông byî é maumyî má yubàk mara hkâshe háng kó.5 Yùqgè rayùq yùq, myiwe asik hâng yu tô é nghut jáng, yhang lé, majan shut le ge nhâng râ a nghut; gótû hai wò le ge hûn râ a nghut. Hkâsu mù gâ le, yhang gi, yhûm má ngón za razàn nyì luî, yhang hâng yu tô é yhûmsîng myhí lé gabú hkyô byi ra râ nghut lhê.
6 Luí lé, nàng lhom byam hàp yu tô é zè dông ge yu pyám byi râ a nghut; htoq nghop lùqlong lé lháng ge yu pyám byi râ a nghut. Hkâsu mù gâ le, haû gi, byu rayùq é chyungxe lé byam àp tô é dông nghut byùq ri.
7 Rayùq yùq, yhâng é gu-mang Isira-elaq byù lé hkaû yù mù, jùn dông jùn zô é nghut nghut, ung zô pyâm é nghut nghut kut jáng, byù hkau sû haú yùq lé sat pyám ra râ nghut lhê. Núngmòq gi, haû agè ashop hkyô lé núngmòq chyáng mai huî sêng pyám ra râ nghut lhê.
8 Yàpjèq nòlì eq sêng é hkyô má, haû Lewiq byù hkyangjông pé mai núngmòq lé mhoq kyô é eq rajung za hkyak rago kut ra kôrâ nghut lhê. Ngò, yhángmòq lé hkunmó hkyô tô é eq rajung za rago châng kut ra kôrâ nghut lhê. 9 Núngmòq Egutuq ming mai htoq lô mù, hkyôwuì má nghut nyî kô é hkûn, núngmòq é Garai Gasang nghut é, haû Yhûmsîng Garai mai Miri-am lé hkâsu kut é hkyô lé myìtbun keq.
10 Núngmòq é chyáng nâm mâ é sû lé rajung jung chyi byî é nghut jáng, danghtum htûm tô é zè dông núngmòq lé byî é lé yù râ matú, yhâng é yhûm má ge wàng râ a nghut. 11 Yhûmpán má yàp to luî, núngmòq zè chyi byî é chyáng nâm mâ é sû mai danghtum htûm tô é zè yu htoq lô râ lé láng to râ nghut lhê. 12 Chyáng nâm mâ é sû haú yùq gi, byù myùng nghut é nghut jáng, yhang danghtum htûm tô é zè lé a tau byî é za, maubó shoq ge yu to râ a nghut. 13 Núngmòq é chyáng nâm mâ é sû gi, yhâng é mèbu wùt mù, wó yhup sháng gàq, yhang byam àp tô é yhâng é mèbu lé buì a wàng shi-má tau byi aq. Haú hkûn, yhang gi, núngmòq lé jeju bun luî, haú hkyô gi, núngmòq é Garai Gasang nghut é, haû Yhûmsîng Garaî é myòq hí má díngmán é hkyô dùt râ nghut lhê.
14 Núngmòq é gu-mang Isira-elaq byu pé mâ é nghut nghut, núngmòq chyáng lé bíng nyi é gótû a-myû mâ é nghut nghut, myung é eq asho awui dùt mù, langchyáng lé chyâng é sû lé, ge ûngzo râ a nghut. 15 Nyí wuî, buì a wàng shi-má yhâng é zui hpau lé byi ra râ nghut lhê; hkâsu mù gâ le, yhang gi, myung é nghut luî, yhang wó gíng é ahpau lé za myòqbyu tô é nghut lhê. A byî é nghut jáng, yhang gi, náng é yánmai, haû Yhûmsîng Garai lé wùt dûng ngaù râ nghut mù, nàng gi, mara bò râ nghut lhê.
16 Zoshâng wui é yánmai, mó wuî sat pyâm é hui ra râ a nghut; mó wui é yánmai le, zoshâng wuî sat pyâm é hui ra râ a nghut; yùq hkangmó gi, ó le ô é marâ é yánmai za shî ra râ nghut lhê.
17 Gótû a-myû zo eq chuízô pé lé, târâ ràp-rá hkyô má ge rhoî zo râ a nghut; chuimó myhî é mèbu lé le, byam àp tô é danghtum htûm tô é zè dông ge yu pyám byi râ a nghut. 18 Egutuq ming má núngmòq jùn dut kô é hkyô lé le, núngmòq é Garai Gasang nghut é, haû Yhûmsîng Garai mai núngmòq lé haû mai hkyi xe htoq yu é hkyô lé le, myìtbun keq. Haû nghut é yánmai, ngò gi, núngmòq lé hkunmó shî hkyô é nghut lhê.
19 Núngmòq é yò má kyô shû yu é hkûn, tô-myhî pyâm to bê gùqding lé hkâ-é dum taû yù. Núngmòq é lòq èq zui saî é múzó bànshoq má, núngmòq é Garai Gasang nghut é, haû Yhûmsîng Garai mai núngmòq lé wó shimân byi sháng gàq, gùqding haú lé, gótû a-myû zo eq chuimó chuízô pê é matú tô to byi ra râ nghut lhê. 20 Núngmòq é tsanlun gàm mâ é ashi lé bàt shoq é hkûn, myìt gyó tô é ashi lé dum ge bàt shoq yû râ a nghut; haû lé gi, gótû a-myû zo eq chuimó chuízô pê é matú myhit to byi ra râ nghut lhê. 21 Núngmòq é tsibyiq hkyâm mâ é tsibyiq shi lé hpyoq yu é hkûn, tsibyiq nuî má dum ge taû wú râ a nghut; haû lé gi, gótû a-myû zo eq chuimó chuízô pê é matú myhit to byi ra râ nghut lhê. 22 Egutuq ming má núngmòq jùn dut kô é hkyô lé myìtbun keq; haû nghut é yánmai, ngò gi, núngmòq lé hkunmó shî hkyô é nghut lhê.