Shiwa Hpúng Mai Lhoqhtoq Pyâm É Hkyô
23
Yùqgè hking lé shân pyâm é, a nghut jáng, hpyit pyám bê sû ó yùq le, haû Yhûmsîng Garaî é shiwa hpúng má ge lòm râ a nghut.2 Dèzo ó yùq le, haû Yhûmsîng Garaî é shiwa hpúng má ge lòm râ a nghut; yhâng é awùt ashín pé le, pyàt bán raxê bán lháng ge lòm râ a nghut.
3 Ammon byù eq Moba byù le, yhángmòq é awùt ashín pé ó yùq le, haû Yhûmsîng Garaî é shiwa hpúng má ge lòm râ a nghut; pyàt bán raxê bán lháng ge lòm kôrâ a nghut. 4 Hkâsu mù gâ le, yhángmòq gi, núngmòq Egutuq ming mai htoq lo é hkûn, núngmòq é hkyôwuì má, mùk eq ûchyam chûng mù a lé te yù kô é yánmai le, núngmòq lé nhing nhâng râ matú, Aram Naharima ming, Pehtora wà mâ é Be-ori é yhang zo Balam lé nghô yù kô é yánmai le nghut ri. 5 Nghut kôle, núngmòq é Garai Gasang nghut é, haû Yhûmsîng Garai gi, Balam é dang lé a gyo byî é za, núngmòq é matú haû nhîng é dang lé shimân dang taû dùt nhâng bê nghut ri; haî mù gâ le, núngmòq é Garai Gasang nghut é, haû Yhûmsîng Garai, núngmòq lé chyitdàp é yánmai nghut ri. 6 Haû mù, núngmòq chyungxe rû dui nyì nyì gi, yhángmòq é nguì ngón hkyô eq wó lô sùt lò hkyô lé ge htuqbáng byi kôrâ a nghut.
7 Edom byu pé lé gi, a naù a wom hkâkut kó; hkâsu mù gâ le, yhángmòq gi, núngmòq é gu-mang nghut lhê. Egutuq ming bang lé a naù a wom hkâkut kó; hkâsu mù gâ lé, núngmòq gi, yhángmòq é ming má byù bíng kut wú bekô nghut ri. 8 Yhángmòq é pyàt bán sum bán mâ é zoshâng wuì gi, haû Yhûmsîng Garaî é shiwa hpúng má ge wàng kôrâ nghut lhê.
Wàp Hkaû Má A Sansêng É Hkyô
9 Núngmòq é gye pé lé ê htim râ matú htoq ê kô é hkûn, a sansêng é hkyô hkangmó lé koi pyám keq. 10 Núngmòq chyáng mâ é rayùq yùq, myín lé shaúwing htoq mù, a sansêng byùq é nghut jáng, yhang gi, wàp shinggan má ê nyî ra râ nghut lhê. 11 Nghut kôlhang, yhang gi, buì gyum ló jáng, gùng chî pyám mù, buì wàng jáng wàp má ge taû ló râ nghut lhê.
12 Wàp shinggan má le, nghê htoq pyám jang tô to ra râ nghut lhê. 13 Núngmòq é gyèzè má myì kyung râ kyûzo le bo lhôm chûng luî, núngmòq nghê htoq é hkûn, dong du luî, apat lé nghop pyám ra râ nghut lhê. 14 Hkâsu mù gâ le, núngmòq é Garai Gasang nghut é, haû Yhûmsîng Garai gi, núngmòq lé mâgum yù mù, núngmòq é gye pé lé núngmòq é lòq má àp byi râ ga, núngmòq é wàp má sô wún ri. Núngmòq é wàp gi, chyoiyúng ra râ nghut lhê; haû a nghut jáng, Yhang gi, núngmòq chyáng a sansêng é hkyô lé myàng mù, núngmòq chyáng mai koi pyám râ nghut lhê.
Gótû Târâ Pé
15 Hpang htoq lo é jùn rayùq, núngmòq chyáng lé hpang hkau nyi é nghut jáng, yhâng é jùnsîng lé ge taû àp byi râ a nghut. 16 Núngmòq chyáng mâ é, yhang nyì nau é jang má nghut nghut, yhang hkyin yu é wà rawà wà má nghut nghut, nyì nhang to keq. Yhang lé hkâzìk zo kó.
17 Isira-elaq byu pé mâ é myiwe nghut nghut, yùqgè nghut nghut, hparà yhûm mâ é shiwa myhí shiwa hpó ge kut râ a nghut. 18 Núngmòq gi, dakâm dang hkyut râ ahpau byi râ matú, núngmòq é Garai Gasang nghut é, haû Yhûmsîng Garaî é yhûm má, shiwa myhí hpau ngùn lé le, shiwa hpó hpau ngùn lé le, ge yu lé râ a nghut; hkâsu mù gâ le, núngmòq é Garai Gasang nghut é, haû Yhûmsîng Garai gi, haû í lhûm é lé chaq ri.
19 Núngmòq é gu-mang Isira-elaq byù lé, ngùnhpún kat é hkyô, zoshuq hpún kat é hkyô eq haî má le a-myàt yù râ hpún kat é hkyô ge kut râ a nghut. 20 Gótû a-myû wui chyáng mai kúm gi, a-myàt ge dûng yù râ nghut lhê; nghut kôlhang, núngmòq wang sing yù râ nghut é maumyî má núngmòq kut é hkyô hkangmó má, núngmòq é Garai Gasang nghut é, haû Yhûmsîng Garai mai núngmòq lé wó shimân byi sháng gàq, núngmòq é gu-mang Isira-elaq byù chyáng mai hkâdûng yù kó.
21 Núngmòq é Garai Gasang nghut é, haû Yhûmsîng Garai lé byi râ dông dâkam tô é nghut jáng, hân a byi ge kut râ a nghut; hkâsu mù gâ le, núngmòq é Garai Gasang nghut é, haû Yhûmsîng Garai gi, núngmòq lé haû hkyak dung râ nghut lhê; núngmòq a byi jáng mara bò râ nghut lhê. 22 Nghut kôlhang, núngmòq a dâkam tô é nghut jáng gi, mara bò râ a nghut. 23 Núngmòq gi, núngmòq é Garai Gasang nghut é, haû Yhûmsîng Garai lé kâm é dông yhûmsing é nhut mai dâkam to bekô nghut é yánmai, núngmòq é nhut mai taî htoq é eq rajung za hkyak kut ra râ nghut lhê.
24 Núngmòq é chyáng nâm mâ é su é tsibyiq hkyâm má wang é nghut jáng, núngmòq wó zô é myhó ge zo râ nghut lhê; nghut kôlhang, núngmòq é lán má gi, hkâkat wun chûng kó. 25 Núngmòq é chyáng nâm mâ é su é yò má wang é nghut jáng, gùqshi lé lòq èq ge lâng shap yû zô lhê; nghut kôlhang, zaiyik èq gi, ge yâm yù râ a nghut.