22
Núngmòq é gu-mang Isira-elaq é no, sau bainám hkyô nghoq wún é lé myàng jáng, a wú lhaî pyâm é za, hau é yhûmsîng lé hkyak ló kôn dé byi ra râ nghut lhê. 2 Núngmòq é gu-mang hpó haû núngmòq eq wê gâng é nghut jáng le, hau é yhûmsîng lé núngmòq a sê é nghut jáng le, haú lé yhûm má kôn ló mù, yhángmòq ho htoq lo é hkûn jé shoq zúng to luî, yhángmòq lé àp byî kat àq. 3 Loze lé nghut nghut, mèbu lé nghut nghut, yhángmòq lhoqhpyuq é haî lé nghut nghut, núngmòq myàng jáng haû eq rajung za kut keq. Haú lé hkâwú lhaî pyám kó.4 Núngmòq é gu-mang Isira-elaq é loze, a nghut jáng, no, hkyô má lêng tô é lé núngmòq myàng jáng, haú lé hkâwú lhaî pyám kó; hau é yhûmsîng lé bo tu garúm keq.
5 Myiwe gi, yùqge é mèbu ge wùt râ a nghut; yùqgè le, myiwê é mèbu ge wùt râ a nghut; hkâsu mù gâ le, haû su kut é sû lé, núngmòq é Garai Gasang nghut é, haû Yhûmsîng Garai chaq é nghut lhê.
6 Hkyô yàm mâ é sikgâm má nghut nghut, myigùng má nghut nghut, nghoqsut sut tô é lé myàng mù, nghoq zîng gi, nghoqnú zo up tô é nghut jáng le, nghoq-ú lé hup nyi é nghut jáng le, nghoq zîng haú lé, nghoqnú zô pé eq ge yu pyám râ a nghut. 7 Núngmòq nyì ngón yùqyò mù, chyungxe wó hîng sháng gàq, nghoqnú zô pé lé núngmòq ge yù kôle, nghoq zîng lé hkyak yhang nhang pyám ra râ nghut lhê.
8 Núngmòq é yhûm htoq mai byù byìt gyó luî, núngmòq má byù sat é yui a hui zo kó sháng gàq, núngmòq yhûm sik saî é hkûn, yhûmhkûng lé kyâm lhûng to ra râ nghut lhê.
9 Núngmòq é tsibyiq hkyâm má a-myui í jâ hkâho; hô é nghut jáng, kyôshi haû za a nghut, tsibyiq shi le nyó htên byùq râ nghut lhê.
10 No eq loze lé rahá kyaú hûn mù, yò ge hpuq râ a nghut.
11 Saumaú eq nú nhâm é jihkyîng mèbu lé rahá ge wùt râ a nghut.
12 Núngmòq wùt é buhîng myi chyûn má banbyaú saî tap to ra râ nghut lhê.
Myi Làng Lé Mara Hun É Hkyô
13 Yùqgè rayùq, myiwe yù luî, nyì zô lhûm é htâng má, myiwe haú lé a nguì lo mù, 14 “Ngò gi, myiwe shí yùq lé hâng yù mù, nyì zô lhûm é hkûn, yhang zo-myi gyíng a nghut lô é hkyô byu myàng ri.” ga taî é dông, yhang lé myìng gang wó nhang é htoq agó, yhâng é xânghpoq nge wó hkyô lhoqhpoî pyám byî é nghut jáng, 15 myiwe zo hau é yhâng nu eq yhâng wa gi, myiwe zo haû zo-myi gyíng nghut é sàksé shit râ matú, wà hkum má nyi tô é wà sûwún wui chyáng zo-myi gyíng alhô agàn zè yu ê ra râ nghut lhê. 16 Yhâng wa gi, sûwún wuî lé, “Yùqgè shí yùq lé ngá é byìzo byi tsô é nghut lhê; nghut kôlhang, yhang gi, ngá é byìzo lé a nguì nghut ri. 17 Ahkuî, yhang gi, ‘Náng é byìzo zo-myi gyíng a nghut é lé ngo myàng ri.’ ga yhâng é xânghpoq nge wó hkyô lé taî hpoî pyám byi bê nghut ri. Nghut kôlhang, ngá é byìzo zo-myi gyíng nghut é alhô agàn zè gi, shî nghut lhê.” ga taî râ nghut lhê. Haû mù, yhâng nu eq yhâng wâ nhik gi, wà sûwún wui é hí má mèbu haú lé hpyi hkâng shit kôrâ nghut lhê. 18 Haú hkûn, sûwún wuî haú bang gi, yùqgè haú yùq lé shuî yù mù, nhuq bàt kôluî, 19 ngùnhtung raxe myi rûng kô chup yû mù, myiwe zo hau é yhâng wa lé byi ra râ nghut lhê; hkâsu mù gâ le, yùqgè shî gi, Isira-elaq zo-myi gyíng lé myìng gang tap byî é yánmai nghut ri. Myiwe myhí haû le, yhâng é yhûmsîng myhí za nghut nyî ra râ nghut mù, yùqgè haû chyungxe rû dui nyì nyì ge gang râ a nghut.
20 Nghut kôlhang, myiwe haú lé mara hun é hkyô teng luî, yhang zo-myi gyíng nghut é hkyô sàksé a wó shit é nghut jáng, 21 yhang lé, yhâng wâ yhûm mâ é hkum hí má shuî ê mù, yhâng é wà mâ é yùqgè wuì gi, yhang lé haú má lùqgòk èq dú sat pyám ra râ nghut lhê. Hkâsu mù gâ le, yhang gi, yhâng wâ é yhûm má nyi tô ashî hkûn, shiwa myhí kut é dông Isira-elaq a-myû má ashop é hkyô kut bê nghut ri. Núngmòq gi, haû agè ashop hkyô lé núngmòq chyáng mai huî sêng pyám ra râ nghut lhê.
22 Yùqgè rayùq, góyùq é yhang myi eq gùngsho zùm yàp nyi é lé myang é nghut jáng, yùqgè haú eq myiwe myhí haû gi, sat pyâm é hui ra râ nghut lhê. Núngmòq gi, haû agè ashop hkyô lé Isira-elaq mai huî sêng pyám ra râ nghut lhê.
23 Yùqgè rayùq yùq gi, góyùq èq dûng tô é zo-myi gyíng lé, wà rawà wà má htûng hui mù, gùngsho zùm yàp kô é nghut jáng, 24 núngmòq gi, yháng í yùq lé, haú wâ hkum má shuî ê mù, lùqgòk èq dú sat pyám ra râ nghut lhê; myiwe zo gi, wàhkaû má nghut to luî, a garû é yánmai, yùqgè gi, góyùq é yhang myi lé shut é yánmai, sat pyâm é hui râ é nghut lhê. Núngmòq gi, haû agè ashop hkyô lé núngmòq chyáng mai huî sêng pyám ra râ nghut lhê.
25 Nghut kôlhang, yùqgè rayùq yùq gi, góyùq èq dûng tô é myiwe zo lé pá pé má htûng hui luî, zìk rhoi pyâm é nghut jáng, haû su kut é yùqgè haú yùq za shî ra râ nghut lhê. 26 Myiwe zo haú lé haî ge kut râ a nghut; yhâng chyáng shî gíng é mara a bò nghut ri. Shí hkyô gi, yhâng é chyáng nâm mâ é sû lé toq htim mù sat pyám é amû eq du é nghut lhê; 27 hkâsu mù gâ le, yùqgè haú yùq gi, góyùq èq dûng to é myiwe zo haú lé pá má htûng huî é nghut mù, myiwe zo haû garu kôlhang, ó a hkyi yù nghut ri.
28 Yùqgè rayùq yùq, ó a dûng to shî é zo-myi gyíng lé htûng hui mù, yhang lé zìk rhoi pyâm é hkyô lé, sê pyâm é nghut jáng, 29 yùqgè haú yùq gi, myiwe zo hau é yhâng wa lé ngùnhtung nyhit rûng jaí râ dùt lhê. Yhang gi, myiwe zo hau é xânghpoq nge wó hkyô lé lhoqhpoî pyám byi bê nghut é yánmai, myiwe zo haú lé hâng yù ra râ nghut lhê. Yhang gi, myiwe zo haú lé i-pyàt htum shoq ge lhoqkang râ a nghut.
30 Ó yùq nghut kôle, yhâng wâ é yhang myi lé ge hâng yù râ a nghut; yhâng wâ é yhupgyàp lé a hkúngga ge kut râ a nghut.