Byù Sat Ju A Sê É Matú Hkô Htaí Hkungga
21
Núngmòq é Garai Gasang nghut é, haû Yhûmsîng Garai mai núngmòq sing yù râ matú byî é maumyî mâ é rawò wò má byù màng lé myàng luî, byù sat ju lé a sê é nghut jáng, 2 núngmòq é sûwún wuî eq târâ agyi pé htoq ê mù, màng hau é awui ayàm mâ é wà mó pé hkâhé wê bum é lé ê kê wú râ nghut lhê. 3 Haû mù, màng haû eq je chyâng é wà mâ é sûwún wuî gi, hai mú le a nhang wú é eq kyaú le a kê wú shî é no-pyá radu lé yù mù, 4 yò le a wó saí, kyó le a wó hkyô é, wuì zo làng yui é langhkaû má she gyó ê mù, no-pyá haú lé langhkaû haú má lìngzing bàt hkyui byi ra râ nghut lhê. 5 Haû Lewiq byù hkyangjông pé gi, hí shut htoq ra kôrâ nghut lhê; hkâsu mù gâ le, yhángmòq gi, núngmòq é Garai Gasang nghut é, haû Yhûmsîng Garaî èq, Yhâng é múzó wùn wàq râ matú le, Yhûmsîng Garai é myìng mai shimân dang taí râ matú le, dangnyhin nyhîn lhûm é eq nhuq bàt lhûm é mû bànshoq lé hpyit byi râ matú le, hkyin yù huî é bang nghut akô. 6 Haú hkûn, màng haû eq je chyâng é wà mâ é sûwún wuî bànshoq gi, langhkaû haú má lìngzing bàt hkyuî pyám byi bê no-pyâ é htoq má yhángmòq é lòq chi luî, 7 “Ngá-mòq lòq gi, byù shí yùq é sui a lhoqhtoq é nghut lhê; ngá-mòq é myòq gi, shî dùt é hkyô lé a myang é nghut lhê. 8 Yhûmsîng Garai ê, Nàng hkyi xe yu é, Náng é byù Isira-elaq a-myû wui é matú hkô htaí hkungga shî lé hàp yù byi laq; mara a bò sû lé sat é yubàk mara lé, Náng é byu pê chyáng hkâhûn.” ga taî pyô kôrâ nghut lhê. Haú dông kut jáng, byù sat é yubàk mara mai wó lùt râ nghut lhê. 9 Haú hkûn, núngmòq gi, haû Yhûmsîng Garaî é hí má díngmán é hkyô kut bekô nghut mù, mara a bò su é sui lé lhoqshun pyám byî é mara lé, núngmòq chyáng mai wó huî sêng pyám kôrâ nghut lhê.Shúm Byû Myiwe Lé Hâng Yu É Hkyô
10 Núngmòq é gye pé lé majan ê zan râ matú núngmòq ê mù, núngmòq é Garai Gasang nghut é, haû Yhûmsîng Garai mai yhángmòq lé núngmòq é lòq má àp byi luî, yhángmòq lé núngmòq wó chyup yu é hkûn, 11 núngmòq wó chyup yu é shúm byû wuì má yúng é myiwe lé myàng luî, wú záng mù, yhûmsing yhang myi kut nau é nghut jáng, 12 yhang lé náng é yhûm má shuî lò luî, xâm wùq pyám nhâng mù, lòqsing nyham nhâng luî, 13 wó chyup yu é hkûn wùt é mèbu lé hkyut pyám nhâng ra râ nghut lhê. Yhang gi, náng é yhûm má nyì mù, yhâng nu eq yhâng wâ é matú lha-mó rahkyap yhang yón ngau é htâng má shèq, nàng gi, yhâng chyáng ge wàng mù, yhâng é yhûmsîng hpó dùt luî, yhang gi, náng é yhûmsîng myhí dùt râ nghut lhê. 14 Htâng má, nàng, yhang lé a nguì lô é nghut jáng, yhang ô nau é shut ê nhâng àq. Nàng gi, yhâng é xânghpoq nge wó hkyô lhoqhpoî pyám byi bê nghut mù, yhang lé ge ung zo râ le a nghut é htoq agó, jùn dông le ge kut lo râ a nghut.
Zo-mún Ayá
15 Rayùq yùq myiwe í yùq wó mù, rayùq lé chyitdàp luî, rayùq lé a chyitdàp kôlhang, í yùq é zoshâng hku é hkûn, zo-mún yùq gi, yhang a chyitdàp sû yùq é yhang zo nghut jáng, 16 yùqgè haû gi, yhang zô nhik lé yhâng é silî wunlî gàm byî é buìnyì má, yhang a chyitdàp su chyáng mâ é zo-mún lé lhoqnyhum pyám mù, yhang chyitdàp su é yhang zo lé zo-mún ayá ge byi râ a nghut. 17 Yhang gi, yhang a chyitdàp su é yhang zo lé zo-mún ayá yín yû mù, yhang wó é bànshoq mâ é silî wunlî gàmbùm í tú byi ra râ nghut lhê. Hkâsu mù gâ le, haú yùq shèq, îwâ é sânghî wum-o nghut luî, zo-mún ayá gi, yhâng é nghut ri.
Gumlau Toq É Zoshâng
18 Rayùq yùq, myìt htan é eq gumlau toq é, yhâng nu yhâng wâ é jì-no a gyô é yhang zo wó mù, yhang lé mhoqshit kôlhang, mó mhoq mó sângdang a gyô é yùqzo wó é nghut jáng, 19 yhâng nu eq yhâng wa gi, yhang lé zuî she chûng mù, yhûmsing é wà hkum má nyi tô é sûwún wui chyáng shuî lé luî, 20 sûwún wuî lé, “Ngá-nhik é yhang zo shî gi, myìt htan é eq gumlau toq é sû nghut ri. Yhang gi, ngá-nhik é jì-no gyo râ a nghut. Yhang gi, zo myoq shuq myòq nòq sû nghut ri.” ga taí kôrâ nghut lhê. 21 Haú hkûn, haú wâ mâ é yùqgè wuì bànshoq gi, yhang lé lùqgòk èq dú sat pyám râ nghut lhê. Haú dông, núngmòq gi, haû agè ashop hkyô lé núngmòq chyáng mai huî sêng pyám ra râ nghut lhê. Isira-elaq a-myû bànshoq bang gi, haú hkyô lé wó gyo luî, gyùq byùq kôrâ nghut lhê.
Târâ A-myû Myû
22 Rayùq yùq, shî gíng é mara bò luî, sat pyâm é hui mù, yhâng é gùngsôm lé sik zîng má lhâng tô é nghut jáng, 23 gùngsôm haú lé sik zîng má ra-myin mau ge lhâng to râ a nghut. Sik zîng má lhâng to huî é sû gi, Garai Gasâng èq nhîng pyâm é hui sû nghut é yánmai, haú nyí má yhang myhup râ dùt lhê. Núngmòq gi, núngmòq é Garai Gasang nghut é, haû Yhûmsîng Garai mai núngmòq lé silî wunlî dông byî é mau lé agòt a-û ge kut râ a nghut.