Majan Zan Râ Hkyô
20
Núngmòq gi, núngmòq é gye pé lé majan zan râ matú htoq e é hkûn, myang pé eq gyè myanglhêng lé le, núngmòq é gyèzô pê htoq yhángmòq é gyèzô pé myô é lé le, myàng kôjáng, yhángmòq lé hkâgyùq kó; hkâsu mù gâ le, núngmòq lé Egutuq ming mai shuî htoq lo é Sû, núngmòq é Garai Gasang nghut é, haû Yhûmsîng Garai gi, núngmòq eq rahá nghut nyî râ nghut lhê. 2 Núngmòq, majan pá má wang ê râ hkûn, hkyangjong hpó lé lô mù, gyèzô pé lé dang nyô râ nghut lhê. 3 Yhang dáng nyo é má, “Isira-elaq a-myû wuì ê, gyo keq; hkû-nyí, núngmòq gi, núngmòq é gye pé lé majan ê zan râ za nghut bê. Myìt wum le hkâgyui kó; gyùq le hkâgyùq kó; yhángmòq é yánmai a gyùq nán é htoq agó, hkâgyùq ngha bùm kó. 4 Hkâsu mù gâ le, núngmòq é Garai Gasang nghut é, haû Yhûmsîng Garai gi, núngmòq lé ûngmyuq hkyô byi râ ga, núngmòq é gye pé lé majan bo zan râ matú, núngmòq eq rahá bo ê Sû nghut lhê.” ga taí râ nghut lhê.5 Gyèzaû pé le, haû gyèzô pé lé, “Yhûm sik saí luî, yhûm a wàng shî é ó yùq bo akô lhú? Haú yùq gi, yhûm shut taû ló sháng gàq; haû a nghut jáng, majan má shi byùq luî, yhûm haú má góyùq wang nyi byùq râ lé chiq râ ri. 6 Tsibyiq hkyâm saí luî, ashi a hpyoq zo shî é ó yùq bo akô lhú? Haú yùq gi, yhûm shut taû ló sháng gàq; haû a nghut jáng, majan má shi byùq luî, ashi haú lé góyùq zô pyám râ lé chiq râ ri. 7 Myiwe dûng to mù, a hâng yù shî é ó yùq bo akô lhú? Haú yùq gi, yhûm shut taû ló sháng gàq; haû a nghut jáng, majan má shi byùq luî, myiwe haú lé góyùq yu pyám byi râ lé chiq râ ri.” ga taí kôrâ nghut lhê. 8 Hau htoq agó, gyèzau haú bang gi, “Gyùq luî, myìt wum gyuî é ó bo akô lhú? Haú yùq gi, yhûm shut taû ló sháng gàq; haû a nghut jáng, yhâng é yánmai, luzúm wuî le myìt htûm byùq kôrâ lé chiq râ ri.” ga le xoq taí kôrâ nghut lhê. 9 Haû zaugun wuì gi, gyèzô pé lé dang ban nyo é hkûn, gyèzô pé lé shuî u râ gyèzaû pé hkyin masàt to râ nghut lhê.
10 Núngmòq, rawà wà lé ê htim râ matú yán e ló kô é hkûn, haú wâ mâ é byu pé lé nguì ngón hkyô yù râ dang hí taí ra râ nghut lhê. 11 Nguì ngón hkyô yù dang haú lé haú wâ mâ é bang lhom hàp yù mù, yhángmòq é hkum pé lé lhom hpóng byi kô é nghut jáng, haú wâ mâ é byù bànshoq bang gi, núngmòq é a-ô má nyì mù, núngmòq é matú mú zui ji saí byi kôrâ nghut lhê. 12 Nguì ngón hkyô yù râ dang haú lé yhángmòq lhom he-ngìk pyám mù, núngmòq eq majan hpóng râ nghut jáng gi, wà haú lé núngmòq lhom hkyuq pyám ra râ nghut lhê. 13 Núngmòq é Garai Gasang nghut é, haû Yhûmsîng Garai mai núngmòq é lòq má wà haú lé àp byî é hkûn, wà haú mâ é yùqgè wuì bànshoq lé sham èq sat pyám ra râ nghut lhê. 14 Myiwe zoshâng wuì, shigu gaunyhaú eq haú wâ má jòq é zè bànshoq lé núngmòq é matú ge yù râ nghut lhê; núngmòq é Garai Gasang nghut é, haû Yhûmsîng Garaî èq, núngmòq é gye pê chyáng mai núngmòq lé byî é wó yu é zè pé lé, núngmòq ge chûng râ nghut lhê. 15 Núngmòq eq chyâng lhûm é a-myû a nghut é, núngmòq eq wê gang é wà mó pé bànshoq lé, haú dông chyat núngmòq kut ra râ nghut lhê.
16 Nghut kôle, núngmòq é Garai Gasang nghut é, haû Yhûmsîng Garai mai núngmòq lé silî wunlî dông byî é a-myû wui é wà mó pé má, kângsoq dui é lhúnglháng lé ge nyhi tô râ a nghut. 17 Núngmòq é Garai Gasang nghut é, haû Yhûmsîng Garai mai núngmòq lé hkunmó hkyô tô é eq rajung za, Hiti byù, Amori byù, Hkanan byù, Perizi byù, Hiwi byù eq Yebusi byu pé lhúnglháng lé chyut lhoqhtûm pyám ra râ nghut lhê. 18 Haû a nghut jáng, yhángmòq é hparà pé lé noq é hkûn kut é achaq achyut é zè bànshoq lé núngmòq cháng râ matú, yhángmòq mai núngmòq lé mhoq byi kôrâ nghut mù, núngmòq gi, núngmòq é Garai Gasang nghut é, haû Yhûmsîng Garai lé mara kut shut kôrâ nghut lhê.
19 Wà rawà wà lé htîm zân yù râ matú myáng myáng lhom hkyuq tô é nghut jáng, núngmòq gi, sikgâm pé lé ge htuq pyám râ a nghut; hkâsu mù gâ le, haú pê é ashi lé núngmòq ge zô é nghut mù, haú pé lé wazûng èq ge htuq pyám râ a nghut. Byù lé shèq lhom hkyuq tô é ru nghut le, sikgâm pé le lóm é dông dùt byùq râ lhí? 20 Nghut kôle, núngmòq wú sê é ashi a ge zô é agàm pé lé gi, núngmòq htuq yû luî, núngmòq htîm sat nyi é wà lé wó ung yu é hkûn jé shoq, awui ayàm má wàp kyám râ matú ge chûng râ nghut lhê.