Hpang Hkaû Râ Wà Mó Pé
19
Núngmòq é Garai Gasang nghut é, haû Yhûmsîng Garai mai núngmòq lé byî é mau má nyi é a-myû wuì lé lhoqhtûm pyám mù, yhángmòq lé núngmòq hkat htoq pyám luî, yhángmòq é wà mó pé eq yhûm pé má núngmòq wang nyì kô é hkûn, 2 núngmòq é Garai Gasang nghut é, haû Yhûmsîng Garai mai núngmòq lé sing yù nhang é mau má, núngmòq é matú wà mó sum wâ san za kut tô to keq. 3 Byù záng sat é sû, haû wà mó sum wâ mâ é rawà wà má ê wó hpang hkaû sháng gàq, silî wunlî maumyî dông, núngmòq é Garai Gasang nghut é, haû Yhûmsîng Garai mai núngmòq lé byî é mau lé sum túm gam hkoq luî, hkyô mó le htông to ra râ nghut lhê.4 Yhâng é chyáng nâm mâ é sû lé a ngui é myìt a bo é za, a bûn nùng má záng sat pyâm luî, yhâng é chyungxe wó lùt shoq haú má hpang ê râ su é hkyô gi, shí dông nghut lhê; 5 dangké, byu rayùq sik ê htuq râ ga yhâng é chyáng nâm mâ é sû eq yòso má ê mù, sik htuq nyi é hkûn, wazung gyùt dâng ló mù, yhâng é chyáng nâm mâ é sû lé záng luî, haú yùq shi byùq é nghut jáng, yhang gi, yhâng é chyungxe wó lùt râ matú, wà mó haú pé mâ é rawà wà má ê ge hpang hkaû râ nghut lhê. 6 Haû a nghut jáng, haú yùq a ngui é myìt a bo é za yhâng é chyáng nâm mâ é sû lé haû su záng kut é nghut luî, yhang shî a gíng kôlhang, sui yui chyîn lató hpuq râ sû gi, nhikmó-yo mù, yhang lé châng hkat luî, hkyô wê é yánmai châng hkyit sat pyám râ nghut lhê. 7 Hau é yánmai shèq, ngò gi, núngmòq lé, wà mó sum wâ san kut tô to keq nghû hkunmó hkyô é ru nghut lhê.
8-9 Núngmòq é Garai Gasang nghut é, haû Yhûmsîng Garai lé chyitdàp mù, hkâ-nhám le Yhâng é jì-no gyo luî, châng sô nyì râ matú, hkû-nyí ngò núngmòq lé hkunmó hkyô é târâ bànshoq lé rago cháng kô é yánmai, núngmòq é Garai Gasang nghut é, haû Yhûmsîng Garai mai núngmòq é îchyí îwâ pé lé danghtum htûm tô é maumyî gón lé núngmòq lé byi mù, yhángmòq lé dakâm danghtum htûm tô é eq rajung za, núngmòq é maumyî lhoqlâm byî é nghut jáng, núngmòq gi, gótû wà mó sum wâ lé le san kut tô jàt to ra shirâ nghut lhê. 10 Haû su kut é gi, núngmòq é silî wunlî dông, núngmòq é Garai Gasang nghut é, haû Yhûmsîng Garai mai núngmòq lé byî é maumyî má, a shî gíng sû a shi byùq râ matú le, núngmòq chyáng byù sat mara a bò râ matú le nghut lhê.
11 Nghut kôlhang, rayùq yùq, a ngui é myìt mai haq gyám luî, yhâng é chyáng nâm mâ é sû lé nhuq bàt sat pyám luî, wà mó haú pé mâ é rawà wà má hpang jé ê kôle, 12 yhâng é wà mâ é nhik bô sûwún wuî gi, byù nhâng mù, yhang lé ê shuî lò nhâng luî, yhang shi byùq râ matú, sui yui chyîn lató hpuq râ su é lòq má àp byi ra râ nghut lhê. 13 Haû sû é byù lé gi, shogyo myìt ge shit râ a nghut. Núngmòq nyì ngón yùqyò kó sháng gàq, mara a bò sû lé sat é yubàk mara lé Isira-elaq a-myû mai huî sêng pyám ra râ nghut lhê.
14 Núngmòq é Garai Gasang nghut é, haû Yhûmsîng Garai mai núngmòq sing yù râ matú byî é mau má, núngmòq myang hàp yu é silî wunlî maumyî má, góhkun lhê bang xuq tô é, núngmòq é chyáng nâm mâ é su é maukyo luq zìng lé ge huî pyám râ a nghut.
Sàksé Kut É Hkyô
15 Byù rayùq yùq kut shut é mara nghut nghut, târâ lu laî pyâm é yubàk nghut nghut lé, sàksé rayùq èq za mara ge hûn râ a nghut. Sàksé í sum yuq é dâng èq shèq mû hpyit ra râ nghut lhê.
16 A tengmán é sàksé rayùq yùq, góyùq é hkyô lé a tengmán é dông mara hun é nghut jáng, 17 mû lhoqhtoq lhum sû haû í yùq gi, haû Yhûmsîng Garaî é hí nghut é, haú u lhê é hkyangjông pé eq târâ agyi pê hí má mû lé hpyit ra râ nghut lhê. 18 Haû târâ agyì pé gi, jíhkúm nùqgùq myî gôn wú ra râ nghut lhê; haú hkûn, sàksé hpó haû mhaû é nghut jáng, góyùq é hkyô lé a tengmán é dông sàksé hkâm é têng é nghut luî, 19 mhaû é sàksé hpó haû, góyùq lé kut râ haq htung é su, yhang lé taû kut byi ra râ nghut lhê; núngmòq gi, haû agè ashop hkyô lé núngmòq chyáng mai huî sêng pyám ra râ nghut lhê. 20 Haú hkûn, myìt gyó tô é shiwa byu pé gi, haú hkyô lé wó gyo luî, gyùq nán bûm mù, hkâ-nhám le haú sû é agè ashop hkyô lé núngmòq chyáng dum lhoqhtoq kôrâ a nghut lo. 21 Haû sû é byù lé gi, shogyo myìt ge shit râ a nghut. Chyungxê é matú chyungxe xap nhâng, myòqjí é matú myòqjí xap nhâng, zui é matú zuì xap nhâng, lòq é matú lòq xap nhâng, hkyi é matú hkyî xap nhâng ra râ nghut lhê.