Hkyangjông Pé Eq Lewiq Byu Pê É Matú Hkungga Pé
18
Lewiq byù hkyangjông pé eq Lewiq up gón gi, gótû Isira-elaq byu pé su, gàmbùm a wó é htoq agó, silî wunlî maumyî le a wó kô é nghut mù, haû Yhûmsîng Garai lé nhông byî é myi nyhé hkungga lé za zo kôrâ nghut lhê; hkâsu mù gâ le, haû gi, yhángmòq é silî wunlî nghut ri. 2 Yhángmòq gi, yhángmòq é gu-mang Isira-elaq byu pê chyáng silî wunlî a wó kó nghut ri; haû Yhûmsîng Garai gi, yhángmòq lé danghtum htûm tô é eq rajung za, yhángmòq é silî wunlî nghut ri.3 Shiwa byu pé mai nhông byî é nohtó nghut nghut, sau nghut nghut mâ é, hkyangjông pé lé byi râ gàmbùm jòq lhê; haû gi, hî hkyîsân í sân, ulhum sho eq sing-û pé nghut ri. 4 Núngmòq gi, sânghi shû yu é kyôshi myuishi lé le, tsibyiq wing asik, tsanlun xû eq sânghi wùq yu é saumaú lé le byi ra kôrâ nghut lhê; 5 hkâsu mù gâ le, haû Yhûmsîng Garaî é myìng lang luî, hkâ-nhám le wó dójaú nyî râ matú, núngmòq é Garai Gasang nghut é, haû Yhûmsîng Garai gi, núngmòq é a-myû up bànshoq mai, yhángmòq lé le, yhángmòq é awùt ashîn pé lé le, hkyin htoq yû bê nghut ri.
6 Isira-elaq ming gón mâ é wà pé mâ é rawà wà má nyi é Lewiq byù rayùq yùq, hkúngga hpautap myìt mai haû Yhûmsîng Garai hkyin yù râ nghut é jowò má jé ê jáng, 7 haû Yhûmsîng Garaî é hí, haú jowò má dójaú nyi é yhâng é gu-mang Lewiq byù bànshoq bang su, yhâng é Garai Gasang nghut é, haû Yhûmsîng Garaî é myìng mai múzó ge wùn wàq râ nghut lhê. 8 Yhang gi, yhâng é i-kun zè ûng é ngùn wó yû kôle, yhâng é gu-mang wuì eq rajung za gàmbùm myang hkam yù ra râ nghut lhê.
A Ge Châng É Htûngli Pé
9 Núngmòq é Garai Gasang nghut é, haû Yhûmsîng Garai mai núngmòq lé byî é maumyî má wang jé ló kô é hkûn, haú má nyi é a-myû wui é achaq achyut é hkyô lé hkâ-mhoq yû kó. 10 Núngmòq chyáng má, yhûmsing é yùqzo byìzo lé myi nyhê nhong é sû, bùt hpyit hkyô eq myòqheq hpàqchyî kut é sû, lichyúm hpuq kyo sû, mhántán lòklèq kut é sû, 11 byù mhuí mhántán sé sû, sôbyô dàt ji é sû, bùt hpyit sû, shi byùq bê sû eq dang ge nyo é sû, rayùq lháng ge nyì nhâng râ a nghut. 12 Hkâsu mù gâ le, haú hkyô pé kut é sû ó yùq nghut kôlhang, haû Yhûmsîng Garaî é hí má achaq achyut nghut ri; haû achaq achyut é hkyô shí pé kut kô é yánmai, núngmòq é Garai Gasang nghut é, haû Yhûmsîng Garai gi, núngmòq é hí mai a-myû haú bang lé hkat htoq pyám râ nghut lhê. 13 Núngmòq gi, núngmòq é Garai Gasang nghut é, haû Yhûmsîng Garaî é hí má mara hûn jang a jòq é bang dùt ra râ nghut lhê.
Myìqhtoi Rayùq Htoq Lô Râ Hkyô
14 Núngmòq sing yu pyám râ nghut é a-myû wuì gi, bùt hpyit hkyô eq myòqheq hpàqchyî kut su é dang lé gyô akô nghut ri. Nghut kôlhang, núngmòq é matú gi, núngmòq é Garai Gasang nghut é, haû Yhûmsîng Garai mai núngmòq haû su kut râ ahkáng a byî to nghut ri. 15 Núngmòq é Garai Gasang nghut é, haû Yhûmsîng Garai gi, ngò sû é myìqhtoi rayùq lé, núngmòq é matú, núngmòq é gu-mang wuì Isira-elaq byu pê chyáng mai nyi htoq lô nhâng râ nghut lhê. Haú yùq é dang lé núngmòq gyo ra râ nghut lhê. 16 Haû gi, Horep bùm má zùp zîng é buìnyì lé, núngmòq mai, “Ngá-nhúng a shi byùq râ matú, myidûm mó shî lé ngá-nhúng a wú lo kut râ nghut é htoq agó, ngá-nhûng é Garai Gasang nghut é, haû Yhûmsîng Garaî é htê lé a gyo lo kut sháng.” ga, núngmòq é Garai Gasang nghut é, haû Yhûmsîng Garai lé núngmòq dûng tôngbán kô é eq rajung za nghut ri.
17 Haú hkûn, haû Yhûmsîng Garai gi, ngo lé, “Yhángmòq taî é gi, htuk ri. 18 Ngò gi, nàng sû é myìqhtoi rayùq lé, yhángmòq é matú, yhángmòq é gu-mang wuì Isira-elaq byu pê chyáng mai htoq lô nhâng mù, yhâng é nhut má Ngá é dang pé kat byi râ nghut lhê. Yhang gi, Ngò mai yhang lé hkunmó hkyô é bànshoq, yhángmòq lé taî kyo râ nghut lhê. 19 Ngò gi, Ngá é myìng lang luî, myìqhtoi hpó haû taî é Ngá é dang pé lé a gyo sû ó yùq lé le, mara hûn râ nghut lhê. 20 Nghut kôlhang, Ngò hkunmó a hkyô tô é lé, Ngá é myìng lang luî, a gyùq a kyûm taî htoq é myìqhtoi le, gótû hparà pê é myìng lang luî, taî é myìqhtoi le, sat pyâm é hui ra râ nghut lhê.” gâ ri.
21 Núngmòq gi, yhûmsîng gùng yhûmsîng, “Haû Yhûmsîng Garai taî é dang nghut a nghut é lé, ngá-mòq hkâsu kut ge gam hkoq râ lhú?” ga taí kôrâ nghut lhê. 22 Myìqhtoi hpó mai, haû Yhûmsîng Garaî é myìng lang luî, taî pyo é dang pé a dìk lo, a têng byùq lo dùt é nghut jáng, danglù haû gi, Yhûmsîng Garai taî é a nghut. Myìqhtoi hpó haû a gyùq a kyûm taí kôle, núngmòq hkâgyùq dàn kó.