17
Núngmòq é Garai Gasang nghut é, haû Yhûmsîng Garai lé, rajung jung râ é, a nghut jáng, nòlì mó záng tô é, no nghut nghut, sau nghut nghut, hkâ-nhông byi; hkâsu mù gâ le, haû sû é hkungga gi, Yhâng é matú achaq achyut nghut ri.2 Haû Yhûmsîng Garai mai núngmòq lé byî é wà pé rawà wà mâ é núngmòq chyáng nyi é yùqgè nghut nghut, myiwe nghut nghut, Núngmòq é Garai Gasang nghut é, haû Yhûmsîng Garaî é myòq hí má, Yhâng é dangshikaq lé lhoqhtên pyâm é dông agè ashop é hkyô kut mù, 3 ngá é hkunmó eq shai é dông gótû hparà pé, buì, lha-mó eq mauhkûng mâ é kyî pé lé paî gòp é hkyô lé, 4 núngmòq chyáng hkyang lé shit mù, núngmòq wó sê é nghut jáng, núngmòq gi, haú hkyô lé jíhkúm nùqgùq jep gôn wú ra râ nghut lhê. Isira-elaq a-myû má haû sû é achaq achyut hkyô htoq é têng é nghut jáng, 5 agè ashop kut é yùqgè, a nghut jáng, myiwe haú lé, núngmòq é wà hkum shinggan má shuî htoq ê mù, lùqgòk èq dú sat pyám ra râ nghut lhê. 6 Byù rayùq gi, í yùq sum yuq mai sàksé hkám bê nghut jáng, sat pyâm é hui ra râ nghut lhê; nghut kôlhang, rayùq za sàksé hkâm é nghut jáng, sat pyâm é hui ra râ a nghut. 7 Byù haú yùq lé sat pyám râ nghut jáng, sàksé hkám bâng é lòq èq hí jé luî shèq, gótû shiwa byù bànshoq bâng é lòq èq châng jé ra râ nghut lhê. Núngmòq gi, núngmòq chyáng mai agè ashop hkyô lé huî sêng pyám ra râ nghut lhê.
Wuîhkê É Mû Pé
8 Núngmòq é wà pé má htoq lhûm é mû nghut é, manglàt mû, târâ dangnyhin nyhîn lhum mû eq nhuq bàt lhum mû pé rahkat hkat lûm wuîhke mù, núngmòq a wó hpyit é nghut jáng, núngmòq é Garai Gasang nghut é, haû Yhûmsîng Garai mai hkyîn râ nghut é jowò má yu ê keq. 9 Lewiq byù hkyangjông pé eq haú u lé târâ agyì kut nyî su chyáng ê hui keq; yhángmòq lé ê myi jáng, núngmòq lé mû hpyit râ hkyô lhom shit râ nghut lhê. 10 Núngmòq gi, haû Yhûmsîng Garai mai hkyin yù râ nghut é jowò má yhángmòq mai núngmòq lé lhom hpyit byî é má cháng mù kut ra râ nghut lhê. Yhángmòq mai núngmòq lé lhom shit kyô é hkyô pé bànshoq lé rago châng kut râ dùt lhê. 11 Yhángmòq mai núngmòq lé lhom mhoq kyô é eq rajung za le, yhángmòq lhom hpyit byî é dông le, núngmòq châng kut ra râ nghut lhê. Yhángmòq lhom shit kyô é mai lòqyò lòqpai ge jau ló râ a nghut. 12 Núngmòq é Garai Gasang nghut é, haû Yhûmsîng Garai lé haú má dójaú nyi é hkyangjông pé lé nghut nghut, târâ agyì lé nghut nghut wú tiq he-ngìk pyâm é sû gi, sat pyâm é hui ra râ nghut lhê. Núngmòq gi, agè ashop hkyô lé Isira-elaq a-myû mai huî sêng pyám ra râ nghut lhê. 13 Haú hkûn, shiwa byu pé bànshoq bang gi, haú hkyô lé wó gyo luî, gyùq nán bûm mù, wú tiq he-ngìk pyâm é hkyô a kut lo kôrâ nghut lhê.
Hkóhkâm Hkyîn Râ Eq Sêng É Hkyô
14 Núngmòq é Garai Gasang nghut é, haû Yhûmsîng Garai mai núngmòq lé byî é mau má ló wang sing yù mù, haú má nyi nyi é hkûn, núngmòq gi, “Ngá-nhûng é awui ayàm mâ é a-myû wuì su, ngá-nhúng lé ùp râ hkóhkâm hkyin htoq sháng.” ga taí kôjáng, 15 Núngmòq é Garai Gasang nghut é, haû Yhûmsîng Garai hkyin é sû za, núngmòq lé ùp râ hkóhkâm hkyak dùt râ nghut lhê. Hkóhkâm haû gi, núngmòq é gu-mang Isira-elaq a-myû mâ é byù nghut râ lhê. Isira-elaq byù a nghut é gó-mîng byù lé, núngmòq é hkóhkâm ge kut nhâng râ a nghut. 16 Hau htoq agó, hkóhkâm haû gi, yhâng é matú myang ge lhoqmyo râ a nghut; myang lhoqmyo râ matú shiwa byu pé lé Egutuq ming shut ge tau nhâng râ a nghut; hkâsu mù gâ le, “Núngmòq gi, haú hkyô shut dum ge taû ló râ a nghut.” ga, núngmòq lé haû Yhûmsîng Garai taî ri. 17 Yhang gi, myiwe myo myo ge yù râ a nghut; hkâsu mù gâ le, yhâng é i-myìt hkyô nghoq byùq râ nghut lhê. Yhang gi, ngùn hîng le gyai myo shoq ge hkông râ a nghut.
18 Yhang gi, hkóhkâm tángmyhâng má zung é hkûn, yhâng é matú, haû Lewiq byù hkyangjông pê chyáng jòq é târâ haú pé lé, laiká ding má htòt kâ yù ra râ nghut lhê. 19 Haû gi, yhang eq rahá nghut nyî mù, yhâng é chyungxe i-pyàt bànshoq má, yhang haú lé nghap nyî ra râ nghut lhê. Haû jáng, yhang gi, yhâng é Garai Gasang nghut é, haû Yhûmsîng Garai lé gyùq hkúngga râ hkyô wó mhoq yû mù, târâ shî mâ é dang pé bànshoq eq târâ wàng hkunmó bànshoq pé lé rago cháng mù, 20 yhûmsing gùng lé, yhâng é gu-mang Isira-elaq byu pê é gyaú sû nghû a myìt yu é htoq agó, târâ haú mai lòqyò lòqpai a jau ló râ nghut lhê. Haû su nghut jáng, yhang eq yhâng é awùt ashín pé gi, Isira-elaq ming má myáng myáng wó ùp nyì râ nghut lhê.