Lhoqlhai Poî
16
Abi lhôhkyapa lé xûm to luî, núngmòq é Garai Gasang nghut é, haû Yhûmsîng Garaî é Lhoqlhai Poî lé châng kut nyî keq; hkâsu mù gâ le, Yhang gi, núngmòq lé, Abi lhôhkyap má, myín lé Egutuq ming mai shuî htoq lo é nghut lhê. 2 Haû Yhûmsîng Garai mai, Yhâng é Mying é matú nyì jowò dông hkyin to râ nghut é jang má, núngmòq é Garai Gasang nghut é, haû Yhûmsîng Garaî é matú Lhoqlhai Poî dông, núngmòq é sau bainám hpúng eq no hpúng mâ é shigu gaunyhaú lé hkungga nhông byi keq. 3 Poî haú má múnchi bo é mùk lé núngmòq ge zô lhóm râ a nghut; núngmòq chyungxe dui nyi é buìnyì pé bànshoq má, Egutuq ming mai núngmòq htoq lo é ahkyíng lé wó myìtbûn nyî shoq, nyhit nyí yhang, no hpu zo nghu é múnchi a bo é mùk lé zo ra kôrâ nghut lhê; hkâsu mù gâ le, núngmòq gi, Egutuq ming mai ahân ahkyut htoq lô kô é nghut lhê. 4 Nyhit nyí yhang, núngmòq é mau gón má múnchi ge myàng râ a nghut. Sânghî nyí myínhtâng nhông byî é hkungga sho lé, htang nàpkyó jé shoq ge tô to râ a nghut.5 Núngmòq gi, núngmòq é Garai Gasang nghut é, haû Yhûmsîng Garai mai núngmòq lé byî é wà hkangmó má Lhoqlhai Poî hkungga ge nhông byi râ a nghut; 6 Yhâng é Mying é matú nyì jowò dông hkyin to râ nghut é jang má za ge nhông byî é nghut lhê. Haú jowò má, Egutuq ming mai núngmòq htoq lo é ahkyíng, myínhtâng buì wàng zó má Lhoqlhai Poî hkungga nhông byi ra râ nghut lhê. 7 Haú lé nyhîn nyhoq mù, núngmòq é Garai Gasang nghut é, haû Yhûmsîng Garai mai hkyin yù râ nghut é jowò má zo ra râ nghut lhê. Htang nàpkyó shèq núngmòq é zúm pé shut ge taû ló râ nghut lhê. 8 Hkyuq nyí yhang, múnchi a bo é mùk zo luî, nyhit nyí nyí má, núngmòq é Garai Gasang nghut é, haû Yhûmsîng Garaî é matú chyoiyúng zùphpong hpong luî, mú a ge zui râ nghut lhê.
Nyhit Bàt Poî
9 Núngmòq gùqzò muilhum yâm hi é ahkyíng mai nyhit bàt byíng shoq nghap to keq. 10 Buìnyì byíng jáng, núngmòq é Garai Gasang nghut é, haû Yhûmsîng Garai mai núngmòq lé byî é shimân jeju má châng é byi naû hkungga lé yu lé byi mù, núngmòq é Garai Gasang nghut é, haû Yhûmsîng Garaî é matú Nyhit bàt Poî kut râ dùt lhê. 11 Haú hkûn, núngmòq le, núngmòq é yùqzo byìzô pé le, núngmòq é duìnhâng zoshâng yùqgè myiwe wuì le, núngmòq é wà pé má nyi é Lewiq byu pé le, núngmòq chyáng bo nyi tô é gó-mîng byù bíng pé eq chuimó chuízô pé le, núngmòq é Garai Gasang nghut é, haû Yhûmsîng Garai mai Yhâng é Mying é matú nyì jowò dông hkyin to râ nghut é jang, Yhâng é hí má gabú byam chyû nyi bùm râ nghut lhê. 12 Egutuq ming má núngmòq jùn dùt wú é lé myìtbun mù, târâ wàng hkunmó shí pé lé rago châng nyì keq.
Zúm Poî
13 Núngmòq é chyârâng mâ é gùqzò muilhum eq tsibyiq wing pyik jàk mâ é tsibyiq wing pé lé ban shû yù jáng, nyhit nyí yhang, Zúm Poî kut ra râ nghut lhê. 14 Haú hkûn, poî haú má, núngmòq le, núngmòq é yùqzo byìzô pé le, núngmòq é duìnhâng zoshâng yùqgè myiwe wuì le, núngmòq é wà pé má nyi é Lewiq byu pé, gó-mîng byù bíng pé eq chuimó chuízô pé le, gabú byam chyû nyi bùm râ nghut lhê. 15 Haû Yhûmsîng Garai hkyin yù râ nghut é jowò má, nyhit nyí yhang, núngmòq é Garai Gasang nghut é, haû Yhûmsîng Garaî é matú poî kut ra kôrâ nghut lhê. Hkâsu mù gâ le, núngmòq é Garai Gasang nghut é, haû Yhûmsîng Garai gi, núngmòq kyô shû é bànshoq eq núngmòq é lòq èq zui saî é múzó bànshoq má le shimân byi râ nghut mù, núngmòq gi, nhik dìk shoq myang gabú kôrâ nghut lhê.
16 Razàn má sum dá nghut é, Múnchi a bo é Mùk Zo Poî, Nyhit bàt Poî eq Zúm Poî u má, núngmòq chyáng mâ é yùqgè wuì bànshoq gi, núngmòq é Garai Gasang nghut é, haû Yhûmsîng Garai mai hkyin yù râ nghut é jowò, Yhâng é hí má lé htoq shit ra râ nghut lhê. Haú hkûn, ó yùq le, haû Yhûmsîng Garaî é hí má lòqkôm lé ge htoq shit râ a nghut. 17 Yùq hkangmó gi, núngmòq é Garai Gasang nghut é, haû Yhûmsîng Garai mai shimân byi bê é eq rajung za, chyûnghuq yu lé ra râ nghut lhê.
Târâ Agyì Pé
18 Núngmòq é Garai Gasang nghut é, haû Yhûmsîng Garai mai núngmòq lé byî é wà hkangmó má, núngmòq é a-myû up má cháng luî, târâ agyì pé eq zaugun sûwún wuî hkyin to ra râ nghut lhê; haú bang gi, shiwa byu pé lé díngmán é dông târâ jéyáng kôrâ nghut lhê. 19 Târâ ràp-rá hkyô lé hkâ lhoqhtên pyám; byu é myòqdong ge hkyîn râ a nghut. Lòqhkaû lang zè lé núngmòq ge hàp yù râ a nghut; hkâsu mù gâ le, lòqhkaû lang zè gi, hpàqchyî bò bang lé myòq lhoqchit pyám byi mù, díngmán bâng é dang lé lhoqlhik pyám byî é nghut lhê. 20 Núngmòq gi, chyungxe wó dui nyì mù, núngmòq é Garai Gasang nghut é, haû Yhûmsîng Garai mai núngmòq lé byî é mau lé wó sing yù kó sháng gàq, târâ ràp-rá é dông za châng kut nyî keq.
21 Núngmòq é Garai Gasang nghut é, haû Yhûmsîng Garaî é matú núngmòq saî é hkungga gyàp nàm má, hkâsû é Ashera hparà sik zîng le ge saí râ a nghut. 22 Haû htoq agó, hkâsû é chyoiyúng lùqzìng lé le hkâ-tsûng kó; hkâsu mù gâ le, núngmòq é Garai Gasang nghut é, haû Yhûmsîng Garai gi, haú pé lé a nguì nghut ri.