Chyîn Hkyut Pyám Byî É Zànwut
15
Nyhit zân ló htáng hkangmó, chyîn hkyut pyám byi ra râ nghut lhê. 2 Chyîn hkyut é hkyô lé shí dông kut râ lhê; Isira-elaq gu-mang lé zè chyi byî é chyîn yhûmsîng ó yùq nghut kôle, chyîn haú lé hkyut pyám byi râ dùt lhê. Chyîn hkyut byi râ matú taî pyo é haû Yhûmsîng Garaî é ahkyíng nghut é yánmai, yhûmsing é byù ó yùq chyáng mai le, chyîn a ge bùt yù râ nghut lhê. 3 Gó-ming byu pé dàp é chyîn lé kúm ge bùt yù râ nghut lhê; nghut kôlhang, núngmòq é Isira-elaq gu-mang hpó dàp tô é chyîn lé gi, hkyut pyám byi ra râ nghut lhê. 4-5 Nghut kôlhang, núngmòq é Garai Gasang nghut é, haû Yhûmsîng Garaî é jì-no lé za hkyak gyo luî, hkû-nyí ngò núngmòq lé byî tô é hkunmó shí pé bànshoq lé, núngmòq rago cháng kô é nghut jáng, núngmòq sing yù râ matú, núngmòq é Garai Gasang nghut é, haû Yhûmsîng Garai mai núngmòq é silî wunlî maumyî dông byî é maumyî má, Yhang, núngmòq lé gyai yhang shimân byi râ nghut mù, núngmòq chyáng asho awui dùt é byù wó nyî râ a nghut. 6 Hkâsu mù gâ le, núngmòq é Garai Gasang nghut é, haû Yhûmsîng Garai gi, Yhang danghtum htûm tô é eq rajung za núngmòq lé shimân byi râ nghut mù, núngmòq gi, byù myû myo myo lé chyi byi râ nghut luî, a-myû hká mai le núngmòq nghô yù râ a nghut. Núngmòq gi, byù myû myo myo lé ùp râ nghut lhê; nghut kôlhang, a-myû hkâ le núngmòq lé ùp râ a nghut.7 Núngmòq é Garai Gasang nghut é, haû Yhûmsîng Garai mai núngmòq lé byî é mau mâ é wà rawà wà má, núngmòq é gu-mang Isira-elaq byu pé mâ é rayùq yùq asho awui dùt é nghut jáng, núngmòq é shogyo myìt lé hkâ lhoqhtan to kó, núngmòq é lòqtsup lé le hkâ lhoqgîng to kó. 8 Núngmòq é lòqtsup hpyî luî, yhángmòq râ tô é lé chyi byi ngho byi kut keq. 9 Núngmòq má agè ashop é myìt bò luî, “Nyhit zân byíng mù, chyîn hkyut pyám byi râ zànwut chyáng bê nghut ri.” ga bun mù, núngmòq é gu-mang Isira-elaq byu pé mâ é asho awuî é sû lé, ashop é myìt mai haî le a byi a kut râ matú sidìq nyì keq. Haû a nghut jáng, haú yùq mai Yhûmsîng Garai lé wùt dûng ngaù jáng, núngmòq gi, mara wò yù ra kôrâ nghut lhê. 10 Ha bûn é myìt a bo é za, gyai byí nau é myìt èq byi keq; haû jáng, jeju haû kut é yánmai, núngmòq é Garai Gasang nghut é, haû Yhûmsîng Garai gi, núngmòq é múzó bànshoq eq núngmòq é lòq èq zui saî é jung hkangmó má shimân byi râ nghut lhê. 11 Núngmòq é mau má asho awuî é bang ayang nyì râ nghut lhê. Haû mù, ngò gi, núngmòq é mau mâ é, asho awui dùt é eq myung é, núngmòq é gu-mang Isira-elaq byu pê é matú lòqtsup hpyî keq nghû hkunmó hkyô é nghut lhê.
Jùn Lé Lhoqlhut Kat É Hkyô
12 Núngmòq é gu-mang wuì mâ é Hebre yùqgè nghut nghut, myiwe nghut nghut, yhâng gùng lé núngmòq chyáng ung byî pyám mù, núngmòq lé hkyuq zân dójaú bê nghut jáng, nyhit zan zàn má gi, yhang lé lhoqlhut kat ra râ nghut lhê. 13 Yhang lé lhoqlhut kat é hkûn, lòq kôm a pûn kat é za, 14 núngmòq é sau hpúng, núngmòq é chyârâng eq núngmòq é tsibyiq wing pyik jàk mai, gíng é myhó byî kat ra râ nghut lhê. Núngmòq é Garai Gasang nghut é, haû Yhûmsîng Garai mai núngmòq lé shimân byî é eq rajung za, yhángmòq lé byî kat ra râ nghut lhê. 15 Egutuq ming má núngmòq jùn dut nyi é eq, Núngmòq é Garai Gasang nghut é, haû Yhûmsîng Garai mai núngmòq lé hkyi xe yu é hkyô lé myìtbûn nyì keq. Hau é yánmai, hkû-nyí ngò núngmòq lé hkunmó shî byî é nghut lhê.
16 Nghut kôlhang, núngmòq é duìnhâng zoshâng gi, núngmòq eq núngmòq é yhûmbyù wuì lé chyitdàp luî, núngmòq eq nyì ngón bûn é yánmai, “Ngò, núngmòq chyáng mai a kâm htoq ló byùq naù.” ga taî é nghut jáng, 17 núngmòq gi, dun yù mù, yhâng é noshi lé hkum má tân to luî htaû ròt ra râ nghut lhê; haû jáng, yhang gi, i-pyàt htum shoq núngmòq é duìnhâng zoshâng dùt râ nghut lhê. Duìnhâng zoshâng myhí lé le haû eq rajung za kut ra râ nghut lhê.
18 Núngmòq é duìnhâng zoshâng lé pûn htoq kat râ matú wòlai dông hkâ-myìt yù kó; hkâsu mù gâ le, yhang gi, hkyuq zân yhang, núngmòq é matú mú zui byi luî, langchyáng í yùq é ahpau myhó zui byi bê nghut ri. Haû htoq agó, núngmòq é Garai Gasang nghut é, haû Yhûmsîng Garai gi, núngmòq zui saî é bànshoq má shimân byi bê nghut ri.
Sânghi Shuî É Shigu Gaunyhaú Pé
19 Núngmòq é no hpúng eq sau bainám hpúng mâ é sânghi shuî é alo zo hkangmó lé, núngmòq é Garai Gasang nghut é, haû Yhûmsîng Garaî é matú gótû kut lhoq chyoiyúng to keq. Sânghi shuî é nojûng zo lé duì ge nhâng râ a nghut; sânghi shuî é sau lé sho-maú ge wùq byi râ a nghut. 20 Núngmòq é Garai Gasang nghut é, haû Yhûmsîng Garai hkyin yù râ nghut é jowò má, núngmòq eq núngmòq é yhûmbyù wuì gi, zàn wuì Yhâng é hí má haú pé lé chôm zo ra kôrâ nghut lhê. 21 Shigu gaunyhaú mâ é, hkyî htên myòqjìt é, a nghut jáng, nòlì mó rajung jung záng é nghut jáng, núngmòq é Garai Gasang nghut é, haû Yhûmsîng Garai lé ge nhông byi râ a nghut. 22 Núngmòq gi, haú lé núngmòq é wà má zo ra kôrâ nghut lhê. Haû xat eq zau-nyi sho lé zô é su, htûngli dông a sanséng bang eq sansêng é bang, haú lé ge zo kôrâ nghut lhê. 23 Nghut kôlhang, sui lé gi, ge zo râ a nghut; wuì lé hut pyâm é su haú lé myigùng má hut pyám ra kôrâ nghut lhê.