Sansêng É Eq A Sansêng É Zoshuq
14
Núngmòq gi, núngmòq é Garai Gasang nghut é, haû Yhûmsîng Garaî é yhang zô pé nghut akô. Haû mù, shi byùq bê su é matú, yhûmsing gùng lé hkâyâm cheq kó; núngmòq é ngelang mâ é xâm lé le hkâwùq pyám kó. 2 Hkâsu mù gâ le, núngmòq gi, núngmòq é Garai Gasang nghut é, haû Yhûmsîng Garaî é matú chyoiyúng é byù myû nghut lhê. Haû Yhûmsîng Garai gi, núngmòq lé, Yhang sing é a-myû kut râ ga, myìdàm htoq mâ é byù bànshoq mai hkyin htoq yû bê nghut ri.3 Achaq achyut é zè haî le hkâzo kó. 4 Núngmòq ge zô é gaunyhaú pé gi, no, sau, bainám, 5 xat, zau-nyi, xat tot, yo, yo hkyuî hîng, chochî, sau lám pé nghut lhê. 6 Hkôdòq gòq luî, shung nhe zô é gaunyhaú bànshoq lé núngmòq ge zo râ nghut lhê. 7 Nghut kôle, shung nhê é, a nghut jáng, hkôdòq gòq é mâ é, núngmòq a ge zô é gi, gola-uk, htanglhó eq luq bùm má nyi jung wùng pé nghut lhê. Haú pé gi, shung nhe zo kôlhang, hkôdòq a gòq é nghut mù, núngmòq é matú htûngli dông a sanséng nghut ri. 8 Wàq le a sanséng nghut ri; haû gi, hkôdòq gòq kôlhang, shung nhê é hkyô a jòq nghut ri. Núngmòq gi, haú pê é sho lé ge zo râ a nghut é htoq agó, haú pê é màng lé le ge záng râ a nghut.
9 Wuì má nyi é kângsoq bo é dui jung bànshoq mâ é, dùng dap é eq a-kyap dàp é haî lé le, núngmòq ge zo râ nghut lhê. 10 Nghut kôlhang, dùng a dàp é eq a-kyap a dàp é haî lé le núngmòq ge zo râ a nghut; haû gi, núngmòq é matú a sanséng nghut ri.
11 Sansêng é nghoq haî lé le núngmòq ge zo râ nghut lhê. 12 Nghut kôlhang, núngmòq a ge zô pé gi, zùnbung, langda, langda nòq, 13 zùn, zùn noq, gótû zùn a-myû bànshoq, 14 nghoqnòq a-myû bànshoq, 15 nochyông hkungbup, no tot hkungbup, wuìnghoq hpyû, zùnkyang a-myû bànshoq, 16 hkungbup zo, hkungbup mó, dudu didí, 17 yòsô hkungbup, wuì langda, wuìnghoq nòq, 18 hkyî kyang nghoq, wuì zùn bànshoq, sik kyung nghoq eq hpôhí pé nghut lhê.
19 Dùng dap mù, dô yê é jung bànshoq gi, núngmòq é matú a sansêng é nghut mù, haú pé lé hkâzo kó. 20 Nghut kôlhang, dùng dap mù, sansêng é jung bànshoq lé, núngmòq ge zo râ nghut lhê.
21 Yhang baú shi tô é, hai é sho lé le hkâzo kó. Núngmòq é wà má lé nyi é byù bíng hpó zo râ matú, yhang lé haû ge byî lhê; haû a nghut jáng, gótû byù bíng ó lé le, ê ge ung byî pyâm lhê. Núngmòq kúm gi, núngmòq é Garai Gasang nghut é, haû Yhûmsîng Garaî é matú, chyoiyúng é byù myû nghut lhê.
Bainám zo lé, yhâng nû é naú wing eq rahá ge chyoq râ a nghut.
Xê Gàmbùm Mâ É Ragàmbùm
22 Núngmòq é yò pé mâ é, zàn wuì wó shû yù é gùqzò muilhum lé, xê gàmbùm mâ é ragàmbùm hkyak gótû kut tô to ra râ nghut lhê. 23 Núngmòq é Garai Gasang nghut é, haû Yhûmsîng Garai mai, Yhâng é Mying é matú nyì jowò dông hkyin to râ nghut é jang, Yhâng é hí má, núngmòq é gùqzò muilhum, tsibyiq wing asik, tsanlun xû, núngmòq é no hpúng eq sau bainám hpúng pé mâ é sânghi shuî é xê gàmbùm mâ é ragàmbùm lé zo ra râ nghut lhê; haû jáng, núngmòq gi, núngmòq é Garai Gasang nghut é, haû Yhûmsîng Garai lé ayang gyùq hkúnggâ é hkyô wó mhoq yû kôrâ nghut lhê. 24 Nghut kôlhang, núngmòq é Garai Gasang nghut é, haû Yhûmsîng Garai mai núngmòq lé shimân byî é hkûn, Yhâng Mying é matú hkyin yu é jowò lûm wê é yánmai, ê râ hkyô wê é eq zè haú pê é xê gàmbùm mâ é ragàmbùm lé a wó yu e é nghut jáng, 25 núngmòq é xê gàmbùm mâ é ragàmbùm lé ngùnhtung htaí mù, ngùnhtung haú lé yu chûng luî, núngmòq é Garai Gasang nghut é, haû Yhûmsîng Garai hkyin yù râ nghut é jowò má ê keq. 26 Haú hkûn, zô nau é eq rajung za, no, sau, tsibyiq wing, a nghut jáng, tsan tô é shuq jung pé lé ngùnhtung hau èq wui yù àq. Haû mù, núngmòq le, núngmòq é yhûmbyù wuì le, núngmòq é Garai Gasang nghut é, haû Yhûmsîng Garaî é hí má zo mù, gabú byam chyû nyì kôrâ nghut lhê. 27 Núngmòq chyáng nyi é Lewiq byu pé lé le, núngmòq ge tô-myhí râ a nghut; hkâsu mù gâ le, yhángmòq gi, gàmbùm a wó kô é htoq agó, silî wunlî maumyî le a wó kô é nghut ri.
28 Sum zân byíng hkangmó, núngmòq wó é xê gàmbùm mâ é ragàmbùm bànshoq lé, núngmòq wà pé má tsîng to ra râ nghut lhê. 29 Haû hkûn, gàmbùm a wó é htoq agó, silî wunlî maumyî le a wó é Lewiq byu pé le, núngmòq chyáng lé nyi é byù bíng pé le, chuimó chuízô pé le, lé luî, gyi gyi dau dau lé wó zo kôrâ nghut lhê; haû jáng, núngmòq é Garai Gasang nghut é, haû Yhûmsîng Garai gi, núngmòq lòq èq zui saî é múzó bànshoq má shimân byi râ nghut lhê.