Gótû Hparà Pé Lé Noq É Hkyô
13
Myìqhtoi htoî é, a nghut jáng, yhupmòq myàng byî é byù, núngmòq chyáng htoq lô luî, núngmòq lé, maúhpo alhô agàn eq maúhpo múzó taî pyô mù, 2 maúhpo alhô agàn haû eq maúhpo múzó haû dìk byùq luî, myìqhtoi hpó gi, “Sâ, núngmòq a sê é gótû hparà pê htâng ngá-nhúng cháng mù, yhángmòq lé noq sháng.” ga taî é nghut jáng, 3 núngmòq gi, myìqhtoi hpó, a nghut jáng, yhupmòq mòq byi su é dang pé lé ge gyo râ a nghut. Haû gi, núngmòq é Garai Gasang nghut é, haû Yhûmsîng Garai mai, Yhang lé núngmòq é i-myìt nhiklhum bànshoq eq i-myìt sô lhum gón èq chyitdàp a chyitdàp é lé sé râ matú chyam wú é ru nghut lhê. 4 Núngmòq gi, núngmòq é Garai Gasang nghut é, haû Yhûmsîng Garaî é htâng cháng râ nghut luî, Yhang lé za hkúngga hpautap ra râ nghut lhê. Yhâng é hkunmó pé lé cháng luî, Yhâng é jì-no gyo mù, Yhang lé za dójaú lùmjíng nyì keq. 5 Myìqhtoi hpó, a nghut jáng, yhupmòq mòq byi sû haû gi, núngmòq lé Egutuq ming mai shuî htoq lo é eq jun mau mai hkyi xe yu é, núngmòq é Garai Gasang nghut é, haû Yhûmsîng Garai lé gumlau toq dang taí kômù, núngmòq é Garai Gasang nghut é, haû Yhûmsîng Garai mai núngmòq cháng râ matú núngmòq lé hkunmó hkyô tô é pé mai, núngmòq lé hkyô shuî nghoq shi-kùt kô é yánmai, sat pyâm é hui ra kôrâ nghut lhê. Haû jáng, núngmòq gi, núngmòq chyáng mai agè ashop hkyô lé huî sêng pyám ra kôrâ nghut lhê.6 Nunggu nungmang sîng nghut nghut, náng é yùqzo byìzô pé nghut nghut, nàng chyitdàp é yhûmsîng myhí nghut nghut, náng é choq tui luzúm hpó nghut nghut mai, “Sâ, ngá-nhúng gi, gótû hparà pé lé ê noq sháng.” ga núngmòq lé haq mhoq hpyoq lo é nghut jáng, (Hparà haú pé gi, núngmòq le, núngmòq é îchyí îwâ pé lháng a sê é, 7 núngmòq é awui ayàm chyâng é wê é, maumyî rahtâng mai góhtâng jé shoq nyi é byu pê é hparà pé nghut ri.) 8 yhángmòq htâng ge cháng râ le a nghut; yhángmòq é dang ge gyo râ le a nghut; yhángmòq lé shogyo myìt ge tûn shit râ le a nghut; yhángmòq lé a ge hung tô é htoq agó, ge nghop to râ le a nghut. 9 Núngmòq gi, gè gè yhang, yhángmòq lé sat pyám ra râ nghut lhê; núngmòq é lòq hí yhángmòq chyáng jé luî shèq, góbang bànshoq é lòq dum jé mù, sat pyám ra râ nghut lhê. 10 Yhángmòq gi, jùn dut nyi é Egutuq ming mai núngmòq lé shuî htoq lo é, núngmòq é Garai Gasang nghut é, haû Yhûmsîng Garaî chyáng mai núngmòq lé hkyô shuî nghoq râ matú shi-kùt bekô nghut é yánmai, lùqgòk èq dú sat pyâm é hui ra râ nghut lhê. 11 Haú hkûn, Isira-elaq byù bànshoq bang wó gyo mù, gyùq byùq kôrâ nghut luî, núngmòq chyáng mâ é ó yùq le, haú sû é agè ashop hkyô lé dum kut râ a nghut lo.
12 Núngmòq nyì râ matú, núngmòq é Garai Gasang nghut é, haû Yhûmsîng Garai mai núngmòq lé byî é wà pé mâ é rawà wà má, 13 wuîhke hkyô lhoqhtoq é byù núngmòq chyáng mai htoq lô luî, wà haû mâ é byu pé lé, “Sâ, núngmòq le a sê é gótû hparà pé lé ê noq sháng.” ga hkyô shuî nghoq kô é lé, núngmòq wó gyo kôjáng, 14 núngmòq gi, rago za jíhkúm nùqgùq myî gôn wú ra râ nghut lhê. Haú hkyô gi, teng luî, núngmòq chyáng haû sû é achaq achyut hkyô dùt htoq bê nghut jáng, 15 núngmòq gi, teng za, wà haú má nyi é bang bànshoq lé sham èq sat pyám ra râ nghut lhê. Núngmòq gi, wà haú mâ é byù eq shigu gaunyhaú lhúnglháng lé chyuí yhang lhoqhtûm pyám ra râ nghut lhê. 16 Núngmòq gi, haú wâ mâ é wó lú yu é zè bànshoq lé wà haú mâ é byù zîng é jowò má bum zang to mù, wà haû eq rahá zè haú pé bànshoq lé, núngmòq é Garai Gasang nghut é, haû Yhûmsîng Garaî é matú, myi nyhé hkungga ralhum dông chyuí nyhê pyám ra râ nghut lhê. Wà haû gi, ahtum abyùq htên byòq byùq râ nghut mù, hkâ-nhám le dum xuq râ a nghut lo; 17 mara byi râ nghut é zè haî le, núngmòq é lòq má ge myàng râ a nghut. Haû jáng, haû Yhûmsîng Garai gi, nhikjum yo bui byùq mù, núngmòq lé shogyo nhikmyin hkyô shit luî, jeju byi râ nghut lhê. Yhang gi, núngmòq é îchyí îwâ pé lé dakâm danghtum htûm tô é eq rajung za, núngmòq lé byù du myoluq jebe nhâng râ nghut lhê. 18 Hkâsu mù gâ le, núngmòq gi, hkû-nyí ngò núngmòq lé byî tô é Yhâng é hkunmó bànshoq lé cháng mù, Yhâng é myòq hí má ge é hkyô kut nyi é dông, núngmòq é Garai Gasang nghut é, haû Yhûmsîng Garaî é jì-no gyo bekô nghut ri.