Rawò Má Za Noqkuq Râ Dùt É Hkyô
12
Núngmòq sing yù râ matú, núngmòq é îchyí îwâ pê é Garai Gasang nghut é, haû Yhûmsîng Garai mai núngmòq lé byî to bê nghut é mau má núngmòq chyungxe rû dui nyì nyì, rago châng nyì ra râ nghut é târâ wàng hkunmó pé eq târâ pé gi, a-ô mâ é eq rajung za nghut lhê. 2 Núngmòq hkat pyám râ nghut é a-myû wuì, yhángmòq é hparà pé lé noqkuq jang nghu é, myhang é bùm htoq mâ é jowò pé, kong pé mâ é jowò pé eq hkyâm làm é sikgâm ô mâ é jowò pé lhúnglháng lé chyuí za lhoqhtên pyám ra râ nghut lhê. 3 Yhángmòq é kaúgyàp pé lé lhoqhkyop pyám byi mù, yhángmòq é chyoiyúng lùqzìng pé lé bàt hpyi pyám byi luî, yhángmòq é Ashera hparà zìng pé lé myi má nyhê hkyô pyám ra râ nghut lhê; yhángmòq kyûng tô é hparà lhô pé lé htuq lhêng pyám mù, jowò haú pé mai yhángmòq myìng lé lhoqhpyoq pyám byi keq.4 Núngmòq gi, yhángmòq kut é hkyô dông cháng mù, núngmòq é Garai Gasang nghut é, haû Yhûmsîng Garai lé ge noqkuq râ a nghut. 5 Nghut kôlhang, núngmòq gi, núngmòq é Garai Gasang nghut é, haû Yhûmsîng Garai mai núngmòq a-myû up bànshoq mâ é, Yhâng é Myìng jòq nyì râ matú hkyin yù râ jowò nghu é, Yhâng é nyì jowò lé hô mù, jowò haú shut ê ra kôrâ nghut lhê. 6 Núngmòq é myi nyhé hkungga pé eq shigu hkungga pé, núngmòq é xê gàmbùm mâ é ragàmbùm pé eq wàq toq hkungga pé, byi râ ga danghtum htûm tô é pé eq byi naû hkungga pé, núngmòq é no, sau bainám hpúng pé mâ é sânghi shuî é pé lé, haú jowò má yu ê ra râ nghut lhê. 7 Haú má, núngmòq eq núngmòq é yhûmbyù wuì gi, núngmòq é Garai Gasang nghut é, haû Yhûmsîng Garaî é hí má zoshuq zo mù, núngmòq é Garai Gasang nghut é, haû Yhûmsîng Garai mai núngmòq lé shimân byi bê nghut luî, núngmòq zui saî é hkyîshi lòqshi jung hkangmó má gabú byam chyû nyì kôrâ nghut lhê.
8 Núngmòq yùq hkangmó gi, hkû-nyí shî má ngá-nhúng su, yhûmsîng wú htuk é dông ge kut râ a nghut; 9 hkâsu mù gâ le, núngmòq gi, núngmòq é Garai Gasang nghut é, haû Yhûmsîng Garai mai núngmòq lé byî tô é bánnô é jowò eq silî wunlî mau má a jé shi kô é nghut lhê. 10 Nghut kôlhang, núngmòq gi, Yodan làng gû dàp mù, silî wunlî dông, núngmòq é Garai Gasang nghut é, haû Yhûmsîng Garai mai núngmòq lé byî tô é mau má ló nyî kôrâ nghut mù, Yhang gi, núngmòq nguì nguì ngón ngón wó nyî kôrâ matú, núngmòq é awui ayàm mâ é núngmòq é gye pé bànshoq mai núngmòq lé bánno nhâng râ nghut lhê. 11 Haú hkûn, núngmòq é Garai Gasang nghut é, haû Yhûmsîng Garai mai Yhâng Mying é matú, Yhang nyì râ jang ga hkyin yù râ nghut é jowò shut, ngò, núngmòq lé hkunmó hkyô tô é eq rajung za, núngmòq é myi nyhé hkungga pé eq shigu hkungga pé, núngmòq é xê gàmbùm mâ é ragàmbùm pé eq wàq toq hkungga pé, haû Yhûmsîng Garai lé danghtum htûm tô é je ge é zè pé lé, yu ê ra râ nghut lhê. 12 Haú hkûn, núngmòq le, núngmòq é yùqzo byìzô pé le, núngmòq é duìnhâng zoshâng yùqgè myiwe wuì le, núngmòq chyáng nyi é, gàmbùm a wó kô é htoq agó silî wunlî maumyî le a wó é Lewiq byu pé le, núngmòq é Garai Gasang nghut é, haû Yhûmsîng Garaî é hí má gabú byam chyû nyì keq. 13 Yhûmsîng wú myìt ngui é jowò pé má núngmòq é myi nyhé hkungga a nhông byi râ matú sidìq nyì keq. 14 Núngmòq a-myû up pé mai haû Yhûmsîng Garai hkyin yu é up mâ é jowò má za hkungga pé nhông byi mù, ngò, núngmòq lé hkunmó hkyô tô é lhúnglháng lé haú má cháng ra râ nghut lhê.
15 Nghut kôle, núngmòq é Garai Gasang nghut é, haû Yhûmsîng Garai mai núngmòq lé shimân byî é eq rajung za, núngmòq nyi é jowò hkangmó má, htûngli dông sansêng é bang nghut nghut, a sansêng é bang nghut nghut, xat eq chochî lé sat zô é su, shigu gaunyhaû pé lé zô nau é myhó ge sat zo kôrâ nghut lhê. 16 Nghut kôlhang, sui lé gi, ge zo ra a nghut; wuì lé hut pyâm é su haú lé myigùng má hut pyám ra kôrâ nghut lhê. 17 Núngmòq gi, núngmòq é kyôshi myuishi, tsibyiq wing asik eq tsanlun xû pê é xê gàmbùm mâ é ragàmbùm lé le, no, sau bainám hpúng mâ é sânghi shuî é pé lé le, byi râ ga danghtum htûm tô é chyûnghuq pé lé le, núngmòq é byi naù hkungga pé eq wàq toq hkungga pé lé le, yhûmsîng nyi é jowò má ge zo kôrâ a nghut. 18 Núngmòq é Garai Gasang hkyin yu é jowò má kúm gi, núngmòq le, núngmòq é yùqzo byìzô pé le, núngmòq é duìnhâng zoshâng yùqgè myiwe wuì le, núngmòq chyáng nyi é Lewiq byu pé le, núngmòq é Garai Gasang nghut é, haû Yhûmsîng Garaî é hí má haú pé lé zo ra kôrâ nghut lhê. Núngmòq é lòq èq zui saî é bànshoq é matú, núngmòq é Garai Gasang nghut é, haû Yhûmsîng Garaî é hí má gabú byam chyu ra kôrâ nghut lhê. 19 Núngmòq é maumyî má, núngmòq chyungxe rû dui nyì nyì, Lewiq byu pé lé a tô pyám râ matú sidìq nyì keq.
20 Núngmòq é Garai Gasang nghut é, haû Yhûmsîng Garai mai, Yhang danghtum htûm tô é eq rajung za, núngmòq é maumyî lé lhoqlâm byî é hkûn, núngmòq gi, sho zo naû luî, “Ngò sho zô nau ri.” ga taí jáng, núngmòq zô nau é myhó ge zo kôrâ nghut lhê. 21 Núngmòq é Garai Gasang nghut é, haû Yhûmsîng Garai mai Yhâng é Myìng tô to râ matú hkyin é jowò gi, núngmòq eq wê é nghut jáng, ngò núngmòq lé hkunmó hkyô tô é eq rajung za, haû Yhûmsîng Garai mai núngmòq lé byî tô é no, sau bainám hpúng mâ é shigu gaunyhaú pé le sat mù, zô nau é myhó núngmòq nyi é jowò má ge zo kôrâ nghut lhê. 22 Htûngli dông sansêng é bang nghut nghut, a sansêng é bang nghut nghut, xat eq chochî lé sat zô é su ge zo kôrâ nghut lhê. 23 Nghut kôlhang, sui a zô lhóm râ matú sidìq keq; haî mù gâ le, sui gi, kângsoq nghut lhê; haû mù, núngmòq gi, sho zô é hkûn kângsoq lé ge zô lhóm râ a nghut. 24 Núngmòq gi, sui lé ge zo ra a nghut; wuì lé hut pyâm é su haú lé myigùng má hut pyám ra kôrâ nghut lhê. 25 Núngmòq gi, haû Yhûmsîng Garaî é myòq hí má jô é têng é hkyô kut kôrâ nghut mù, núngmòq le, núngmòq htâng má nyi lé lô râ núngmòq é zodù wuì le nyì ngón yùqyò kó sháng gàq, sui lé hkâzo kó.
26 Nghut kôlhang, núngmòq gi, núngmòq é chyoiyúng zè pé eq byi râ ga danghtum htûm tô é chyûnghuq lé yu chûng mù, haû Yhûmsîng Garai hkyin yù râ nghut é jowò má ê luî, 27 núngmòq é myi nyhé hkungga pé lé, sho eq sui rahá kut mù, núngmòq é Garai Gasang nghut é, haû Yhûmsîng Garaî é hkungga gyàp má ê nhông byi keq. Núngmòq é hkungga pé mâ é sui lé gi, núngmòq é Garai Gasang nghut é, haû Yhûmsîng Garaî é hkungga gyàp nàm má hut hkyô pyám ra kôrâ nghut mù, sho lé kúm gi, núngmòq ge zo kôrâ nghut lhê. 28 Núngmòq é Garai Gasang nghut é, haû Yhûmsîng Garaî é myòq hí má ge é eq jô é têng é hkyô lé núngmòq kut kôrâ nghut é yánmai, núngmòq le, núngmòq é htâng má nyi lé lô râ núngmòq é zodù wuì le, myang nyì ngón yùqyò kó sháng gàq, ngò núngmòq lé byî tô é cháng ra târâ bànshoq lé jì-no gyô nyì râ matú rago sidìq nyì keq.
29 Núngmòq é Garai Gasang nghut é, haû Yhûmsîng Garai gi, núngmòq ló wang sing yù râ nghut é mau mâ é a-myû wuì lé, núngmòq é hí mai huî sêng pyám râ nghut mù, núngmòq gi, yhángmòq lé wó hkat pyám luî, yhángmòq é maumyî má nyi bùm kô é hkûn, 30 núngmòq hí mai yhángmòq lé lhoqhtûm pyâm é htâng má, “A-myû shí bang gi, yhángmòq é hparà pé lé hkâsu kut noq bum akô làq? Ngá-mòq le, yhángmòq kut é su kut râ nghut lhê.” nghû yhángmòq é hparà pé lé myî é dông a myí byùq râ matú sidìq nyì keq. 31 Núngmòq gi, núngmòq é Garai Gasang nghut é, haû Yhûmsîng Garai lé noqkuq é hkûn, yhángmòq kut é dông ge kut kôrâ a nghut; haî mù gâ le, yhángmòq é hparà pé lé yhángmòq noq kô é hkûn, haû Yhûmsîng Garai a ngui é, achaq achyut zè jung hkangmó bànshoq kut akô nghut ri. Yhángmòq gi, yhángmòq é hparà pê é matú, yhángmòq é yùqzo byìzô pé lé lháng hkungga dông myi má nyhê akô nghut ri.
32 Ngò, núngmòq lé hkyô tô é hkunmó bànshoq lé châng kut nyî keq; haú má, jàt le hkâjàt kat kó, yòm le hkâ lhoqyom pyám kó.