Rahap Eq Jówú Su Nhik
2
Hau htâng, Nun é yhang zo Yoshuq gi, Shitim jowò mai byù í yùq lé jówú râ matú haq nhang kat luî, “Hkanan mau má ê mù, je riyhang, Yerihko wà má jó ê wú lô keq.” ga yhángnhik châng taî ri. Haû mù, yhángnhik gi, htoq e ló luî, Rahap gâ é shiwa myhí rayùq é yhûm má, ê wang bíng akô nghut ri.2 Haû mù, Yerihko hkóhkâm lé, “Isira-elaq byù ra-am, mau shi lé jó wú râ ga, shí wâ má hkû-myîn jé to bekô nghut ri.” ga taî kyô akô. 3 Haû mù, Yerihko hkóhkâm gi, Rahap chyáng, “Náng é yhûm má lé jé nyi tô é byu pé lé shuî nhang htoq kat àq. Haî mù gâ le, haú bang gi, ra-mau gón lé jówú râ matú jé lé é bang nghut akô.” ga ê taí nhang ri.
4 Nghut kôlhang, Rahap gi, haú nhik lé shuî haq lhûng to bê nghut mù, “Haú bang ngá chyáng jé é gi, têng lhê. Nghut kôlhang, yhángmòq hkâmâ é bang nghut é lé ngò a sé. 5 Mauchut lô mù, wà hkum myhi râ yàm jé lô luî, yhángmòq htoq ló byùq bekô nghut ri. Yhángmòq hká shut htoq ló byùq é le ngò a sé. Yhángmòq lé châng hkyit shirâ âbe, hân châng hkat keq.” ga taî ri. 6 Haû su ga kôlhang, yhang gi, haú nhik lé yhûmhkûng htoq shut shuî dòq ló mù, yhûmhkûng htoq má lhap kyuq tô é jigâm bùm hkaû má ló haq lhûng tô bê nghut ri. 7 Haû mù, duìnhâng zoshâng haú bang gi, Yodan làng guhkan hkyô shut jówú bang lé châng hkat e ló bekô. Haú bang htoq ló byùq eq yhang, wà hkum myhî pyám bekô nghut ri.
8 Rahap gi, jówú su nhik a yhup shi-má, yhûmhkûng htoq shut dòq ló mù, 9 yhángnhik lé taî é gi, “Yhûmsîng Garai gi, maumyî shî núngmòq lé byî to bê hkyô lé le, ngá-mòq gi, gyai yhang gyùq nán nyi bùm bê nghut mù, shí mau má nyi é byù lhúnglhâng bang gi, núngmòq lé lûm gyùq chiq bûm kô é yánmai, myìt wum gyuî byùq bùm bê nghut é lé le, ngò sê lhê. 10 Ngá-mòq gi, Egutuq ming mai núngmòq htoq lo é hkûn, Yhûmsîng Garai, Nhông Nè lé hkâsu lhoqkân pyám byî é hkyô lé le, Yodan làng buìhtoq hkyam mâ é Amori hkóhkâm Sihon eq Oga nhik lé, núngmòq hkâsu kut sat kyop pyám kô é hkyô lé le wó gyo bê nghut lhê. 11 Haú hkyô lé ngá-mòq wó gyô é hkûn, ngá-mòq é i‑myìt wúm shun byùq luî, ó yùq le, núngmòq é yánmai myìt wum gyuî byùq bùm bekô nghut ri. Hkâsu mù gâ le, núngmòq é Garai Gasang nghut é, Yhûmsîng Garai gi, ahtoq mauhkûng má le, a‑ô myìdàm htoq má le, Garai Gasang nghut nyi ri.
12 Ahkuî, núngnhik lé ngò jeju kut é eq rajung za, núngnhik le, ngá yhûmbyù wuì lé jeju kut byi râ matú, Yhûmsîng Garaî é myìng lang luî, dâkam to keq. 13 Ngá nu ngá wa, ngá gu ngá mang, ngá gu ngá nhâ pé lé le, yhángmòq eq sêng é buìnùm ji-myi wuì bànshoq lé le, ngá-mòq lé le hkyi yù râ matú, masàt alhô agàn byî to keq.” gâ ri.
14 Haú hkûn, haú nhik gi, Rahap lé, “Ngá-nhik haî kut é hkyô lé, nàng a taî htoq é nghut le gi, Yhûmsîng Garai, ngá-mòq lé mîngdán shi byî é buìnyì má, ngá-mòq gi, núngmòq lé danghtum htûm tô é lé lhoqdìk é dông jeju tau râ nghut lhê. Ngá-nhik é chyungxe gi, núngmòq é chyungxê é matú nghut lhê.” ga danghtum htûm tô akô nghut ri.
15 Rahap nyi é yhûm gi, wà mó mâ é wàhkûm mó má yhang nghut é yánmai, yhang gi, haú nhik lé tui mai hkohot dông hkyô kat ri. 16 Rahap gi, “Núngnhik lé châng hkat ho é bang a myang kó sháng gàq, bum shut dòq ló keq; yhángmòq taû ló byùq é hkûn jé shoq, sum nyí yhang haú má haq nyì mù, núngnhik é hkyôwuì shut xoq e ló keq.” ga yhángnhik lé châng taî kat ri.
17 Haú hkûn, yhángnhik, Rahap lé tû taî kô é gi, “Nàng, ngá-nhik lé dakâm nhang é hkyô, ngá-nhik ahtoq má mara a zùq sháng gàq. Shí dông za kut àq; 18 maumyî shî má ngá-mòq jé wang lo é hkûn, nàng ngá-nhik lé lhoqhkyô kat é hkohot dong má, pán nê tui shî lé tuî lhâng to mù, náng nu náng wa, nunggu nungmâng pé eq náng é yhûmbyù wuì bànshoq lé, náng é yhûm má shuî tsîng to aq. 19 Náng é yhûm mai wà hkyô shut htoq é sû ó yùq nghut kôle, sat huî é nghut jáng, yhang yhang shî ho é sû nghut bê; ngá-nhik chyáng hai mara a bò lo. Nghut kôlhang, nàng eq rahá yhûm hkaû má nyi to é sû rayùq yùq sat huî é nghut jáng, haú yùq é sui yuichyîn gi, ngá-nhik é u htoq má jé sháng gàq. 20 Nghut kôlhang, ngá-nhik kut é múzó lé nàng taî htoq é nghut le gi, nàng èq ngá-nhik lé dakâm nhang tô é dang, ngá-nhik eq haî a séng lo nghut ri.” gâ ri.
21 Haú hkûn, Rahap gi, “Núngnhik taî é eq rajung za nghut sháng gàq.” ga tû taî ri. Haû mù, yhang gi, yhángnhik lé ló nhâng bê nghut mù, yhángnhik gi, htoq ló bekô nghut ri. Hau htâng, Rahap gi, pán nê tui lé hkohot má tuî lhâng to bê nghut ri.
22 Yhángnhik gi, haû mai bum shut dòq ló kômù, châng hkat hô bang rahkyo é ho wú luî, a myàng mù, dum taû ló byùq kô é hkûn jé shoq, bùm haú má sum nyí yhang nyi nyi akô. 23 Haú htâng, yhángnhik gi, bùm mai gyó ló mù, wuìlàng gû dàp luî, Nun é yhang zo Yoshuq chyáng jé ló kômù, yhángnhik htûng huî é hkyô bànshoq lé taî kyô akô nghut ri. 24 Hau htâng, yhángnhik gi, “Maumyî haû bànshoq lé, Yhûmsîng Garai gi, ngá-nhûng é lòq má teng za àp byi bê. Ngá-nhúng lé gyùq kô é yánmai, haû mâ é bang bànshoq gi, myìt wum gyuî byùq bùm bekô nghut ri.” ga Yoshuq lé taî kyô akô nghut ri.