Yodan Làng Laî Byìt É Hkyô
3
Yoshuq gi, htang nàpsûn noq le toq mù, Isira-elaq byu pé bànshoq bang eq rahá, Shitim jowò mai htoq luî, Yodan làng yàm má ê jé kômù, wuìlàng a laî byìt shi-má, haú jowò má wàp xuq luî, nyi bum akô nghut ri. 2 Sum nyí laî é htâng má, nhik bô sûwún wuî gi, rawàp gón má ê mù, 3 shiwa byu pé lé pyîng kô é gi, “Núngmòq é Garai Gasang nghut é, haû Yhûmsîng Garaî é dangshikaq sàksé dò eq haû lé wàq é Lewiq byù nghut é hkyangjông pé lé, núngmòq myàng jáng, núngmòq gi, yhûmsing é jowò mai htoq mù, hau é htâng má châng râ nghut lhê. 4 Haú hkûn, hká shut e ló râ hkyô lé núngmòq wó sé kôrâ nghut lhê; haî mù gâ le, núngmòq gi, hí lé, haú hkyô a sô wú shi kó nghut ri. Núngmòq châng sô é hkûn, sàksé dò eq déng rawuí gû kô wê gâng é mai so keq; haû eq hkâchyâng htèp kó.” gâ ri.5 Yoshuq gi, shiwa byu pé lé, “Yhûmsing gùng yhûmsîng lhoqchyoi lhoqyúng to keq; hkâsu mù gâ le, nàpmá gi, núngmòq chyáng, haû Yhûmsîng Garai maúhpo múzó pé kut shit râ nghut lhê.” ga taî ri.
6 Hau htang nyí, Yoshuq gi, hkyangjông pé lé, “Dangshikaq sàksé dò wàq mù, shiwa byu pê é hí má gû e ló keq.” ga taî ri. Haû mù, yhángmòq gi, dangshikaq sàksé dò lé wàq chûng luî, shiwa byu pê é hí má e ló bekô nghut ri.
7 Haû Yhûmsîng Garai gi, Yoshuq lé, “Ngò gi, Mosheq eq rahá nyi nyi é su, nàng eq le Ngò rahá nyi nyi é hkyô lé, Isira-elaq a-myû lhúnglhâng bang wó sé kó sháng gàq, hkû-nyí, Ngò, nang lé, yhángmòq é hí má shigyaú wàq toq hî râ nghut lhê. 8 Haû dangshikaq sàksé dò wàq é hkyangjông pé lé, ‘Yodan làng yàm má ê jé jáng, wuìlàng hkaû má wang ê mù, ê yàp to keq.’ nghû taí aq.” ga taî ri.
9 Hau htâng, Yoshuq gi, Isira-elaq byu pé lé, “Shî má lé lô mù, núngmòq é Garai Gasang nghut é, haû Yhûmsîng Garaî é dang pé lé gyô yù keq. 10 Haû rû dui nyi é Garai Gasang gi, núngmòq é hí mai, Hkanan byù, Hiti byù, Hiwi byù, Perizi byù, Girigashi byù, Amori byù eq Yebusi byu pé lé, teng za kôn htoq pyám byi râ nghut mù, núngmòq gi, Yhang, núngmòq eq rahá nghut nyi é hkyô lé wó sé kôrâ nghut lhê. 11 Wú keq, myìdàm htoq bànshoq lé sing é Yhûmsing é dangshikaq sàksé dò gi, núngmòq é hí má Yodan làng hkaû shut gû wang ló râ nghut lhê. 12 Haû mù luî, Isira-elaq a-myû wuì mâ é ra-up rayùq kut, byù raxe í yùq hkyin htoq to keq. 13 Myìdàm htoq bànshoq lé sing é Yhûmsîng, haû Yhûmsîng Garaî é sàksé dò lé wàq é hkyangjông pê é hkyî gi, Yodan wuìlàng má záng nhâng kat eq razùp má yhang, haû yui nyi é wuìmùn mâ é wuì gi, tik byìt byùq mù, díng bum zang ló râ nghut lhê.” gâ ri.
14 Haû mù, shiwa byu pé gi, Yodan làng gû dàp râ matú, yhángmòq é zúm pé mai htoq lo é hkûn, dangshikaq sàksé dò wàq é hkyangjông pé gi, yhángmòq é hí má ê ló bekô. 15 Kyo shu yòq bànshoq má Yodan làng wuì jê nyì kôlhang, sàksé dò wàq é hkyangjông pé gi, Yodan làng má jé mù, yhángmòq é hkyî wuì yàm má ê záng nhâng kat é hkûn, 16 wuìmùn mai yui gyó nyi é wuì gi, hkyîng byùq bê. Wuì haû gi, gyai wê é Zarehtan nàm mâ é Adam wà jé shoq díng bum zang to bê nghut ri. Xo Nhông nghut é Araba wuimau shut yui gyó ló é wuì gi, tik byìt byùq bê nghut ri. Haû mù, shiwa byu pé gi, tû-tap mâ é Yerihko wà mó shut laî byìt dàp ló bekô nghut ri. 17 Haû Yhûmsîng Garaî é dangshikaq sàksé dò lé wàq é hkyangjông pé gi, Isira-elaq byu pé bànshoq bang kyuq huî é myigùng mai ban laî dàp bê nghut mù, Isira-elaq a-myû gón wó laî dàp ló kô é hkûn jé shoq, Yodan làng agùng kyuq huî é myì htoq má, tíng tíng yàp tô akô nghut ri.