Yoshuq 4

Masàt Lùqgòk Tô Tô É Hkyô

A-myû gón Yodan làng ban gû dàp kôjáng, haû Yhûmsîng Garai gi, Yoshuq lé, 2 “Shiwa byu pé mai, ra-up mâ é rayùq yùq kut, byù raxe í yùq hkyin htoq yù àq. 3 Haû mù, yhángmòq lé, hkyangjông pé yàp to jang nghut é, Yodan làng agùng mâ é lùqgòk raxe í cham ê wàq lò nhâng luî, hkû-myîn núngmòq wàp ló xuq râ jowò má ló wàq bum to keq nghû taí aq.” ga taî ri.

4 Haû mù, Yoshuq gi, Isira-elaq a-myû up hkangmó mâ é rayùq yùq kut, yhang hkyin tô é byù raxe í yùq lé ji yù luî, 5 yhángmòq lé, “Núngmòq é Garai Gasang nghut é, haû Yhûmsîng Garaî é sàksé dò hí nghut é, Yodan làng agùng má wang ê mù, Isira-elaq a-myû up má cháng luî, yhûmsing é gòqsân mai lùqgòk racham cham ê gùq wàq lò keq. 6 Haû gi, núngmòq chyáng sàksé dùt nyì râ nghut lhê. Htâng nùng má, núngmòq é zodù wuì mai, ‘Lùqgòk shí pê é lichyúm gi, haî nghut lhê lhú?’ ga, núngmòq lé myî lò kôjáng, 7 haû Yhûmsîng Garaî é dangshikaq sàksé dò hí má, yui nyi é Yodan làng byìt byùq é hkyô taî kyo keq. Haû dangshikaq sàksé dò Yodan làng laî byìt é hkûn, Yodan làng mâ é wuì byìt byùq é nghut lhê. Lùqgòk shí pé gi, Isira-elaq byu pé ahtum abyùq myìtbûn nyì râ masàt nghut lhê.” ga taî ri.

8 Haú mù, Isira-elaq byu pé gi, Yoshuq èq yhángmòq lé hkunmó hkyô é eq rajung za kut bekô nghut ri. Yhángmòq gi, Yoshuq lé, Yhûmsîng Garai mai taî é eq rajung za, Isira-elaq a-myû up má cháng luî, Yodan làng agùng mâ é lùqgòk raxe í cham lé ê gùq wàq mù, yhángmòq é wàp xuq tô é jang má wàq ló luî, ló bum to bekô nghut ri. 9 Yoshuq gi, dangshikaq sàksé dò wàq é hkyangjông pé yàp tô é Yodan làng agùng má, lùqgòk raxe í cham lé xuq tô ri. Lùqgòk haú pé gi, hkû-nyí jé shoq haú má jòq tô ashî nghut ri.

10 Shiwa byu pé lé kut nhâng râ matú, haû Yhûmsîng Garai mai Yoshuq lé hkunmó hkyô é gû bànshoq wó kut pyâm é hkûn jé shoq, sàksé dò wàq é hkyangjông pé gi, Yodan làng agùng má yàp tô ashî kô. Haû gi, Mosheq mai Yoshuq lé hkyô tô é hkunmó eq le rajung za nghut ri. Shiwa byu pé kúm gi, hân hân laî byìt ló bekô nghut ri. 11 Shiwa byu pé bànshoq ban laî byìt kôjáng, hkyangjông pé gi, haû Yhûmsîng Garaî é sàksé dò eq rahá, shiwa byu pê é myòq hí mai laî dàp ló akô nghut ri. 12 Rubin up mâ é wàqngân wuì le, Gat up mâ é wàqngân wuì le, Manase koq rahkyam mâ é wàqngân wuì le, Mosheq èq yhángmòq lé shit kyô tô é eq rajung za, gyèhking chûng luî, Isira-elaq byu pê é hí má laî byìt ló bekô nghut ri. 13 Majan zan râ matú gyèhking chung é byù myî mun kô gi, Yhûmsîng Garaî é hí mai, Yerihko pá shut laî e ló akô nghut ri.

14 Haú nyí má, Yhûmsîng Garai gi, Isira-elaq byù lhúnglhâng bâng é hí má, Yoshuq lé shigyaú wàq toq bê nghut ri; haû mù, shiwa byu pé gi, Mosheq lé gyùq hkúngga kô é eq rajung za, Yoshuq lé le, yhâng é i-pyàt htum shoq gyùq hkúnggâ akô nghut ri.

15 Hau htâng, Yhûmsîng Garai gi, Yoshuq lé, 16 “Dangshikaq târâ kat tô é sàksé dò wàq é hkyangjông pé lé, Yodan làng mai htoq lò keq nghû hkunmó hkyó aq.” ga taî ri. 17 Haû mù, Yoshuq gi, hkyangjông pé lé, “Yodan làng mai htoq lò keq.” ga hkunmó hkyô kat ri.

18 Haú mù, Yhûmsîng Garaî é dangshikaq sàksé dò wàq é hkyangjông pé gi, wuìlàng mai htoq lô bekô nghut ri; yhángmòq é hkyî myì htoq má záng nhâng kat eq yhang, Yodan làng mâ é wuì gi, yhâng é jowò má yhang dum yui zing luî, hí lhê é su yhang, wuì yàm ginkúm myùp shoq dum yui nyì bê nghut ri.

19 Sânghî lhôhkyap, raxê nyí nyí má, byù haú bang gi, Yodan làng mai htoq lò kômù, Yerihko buìhtoq hkyam mâ é Giligala gâ é jowò má wàp xuq luî nyi bum akô nghut ri. 20 Hau htâng, Yoshuq gi, Yodan làng mai yhángmòq gùq wàq yu lo é lùqgòk raxe í cham haú lé, Giligala gâ é jowò má xuq to bê nghut ri. 21 Yhang gi, Isira-elaq byu pé lé, “Htâng nùng má, núngmòq é awùt ashín pé mai, ‘Lùqgòk shi pê é lichyúm gi, haî nghut lhê lhú?’ ga yhángmòq é îchyí îwâ pé lé myi kôjáng, 22 ‘Isira-elaq byu pé gi, Yodan làng lé laî byìt é hkûn, kyuq huî é myì htoq mai laî akô nghut ri.’ nghû yhángmòq lé núngmòq taî kyo keq. 23 Hkâsu mù gâ le, núngmòq é Garai Gasang nghut é, haû Yhûmsîng Garai gi, Nhông Nè lé ngá-nhúng ban laî byìt é hkûn jé shoq, ngá-nhûng é hí má haû Nhông Nè lé lhoqkyuq huî pyám byî é su, núngmòq é Garai Gasang nghut é, haû Yhûmsîng Garai gi, Yodan làng lé núngmòq ban laî byìt é hkûn jé shoq, núngmòq é hí má Yodan làng lé lhoqkyuq huî pyám byî é nghut ri. 24 Yhang haû su kut é hkyô gi, haû Yhûmsîng Garaî é lòq hpungwup a-tsam mó bo é hkyô lé, myìdàm htoq mâ é byù lhúnglhâng bang wó sé sháng gàq ga le, núngmòq é Garai Gasang nghut é, haû Yhûmsîng Garai lé, núngmòq hkâ-nhám le wó gyùq hkúnggâ nyì kó sháng gàq ga le kut é nghut ri.” ga taî ri.