Yoshuq 5

Giligala Má Ahpyo-kuq Hpyit É Hkyô

Yodan làng é buìwàng hkyam má nyi é Amori hkóhkam pé bànshoq bang eq wuimau yàm má nyi é Hkanan hkóhkam pé bànshoq bang gi, Isira-elaq byu pé, Yodan làng lé wó laî byìt é hkûn jé shoq, yhángmòq é hí má, haû Yhûmsîng Garai Yodan làng lé lhoqkyuq huî pyám byî é hkyô lé wó gyo kôjáng, yhángmòq é myìt wum gyuî gyòp byùq kômù, Isira-elaq byu pé lé hui râ myìt wum a bo byùq lo kó nghut ri. 2 Haú hkûn, Yhûmsîng Garai gi, Yoshuq lé, “Paihpoi luq shâmhto pé saî yù mù, Isira-elaq byu pé lé, ahpyo-kuq radàm dum hpyit byi aq.” ga taî ri. 3 Haû mù, Yoshuq gi, paihpoi luq shâmhto pé saî yù mù, ahpyo-kuq hpyit kong nghu é jowò má, Isira-elaq byu pé lé ahpyo-kuq hpyit byi bê nghut ri.

4 Yoshuq gi, yhángmòq lé haî mù ahpyo-kuq hpyit byî é lhú gâ le, Egutuq ming mai htoq lo é sarhê pé bànshoq gi, Egutuq ming mai htoq lo é htâng, yòso mâ é hkyôwuì má shi byùq bùm kô é nghut ri. 5 Egutuq mai htoq lo é bang bànshoq gi, ahpyo-kuq hpyit é hkam yù bê bang nghut ri. Nghut kôlhang, Egutuq ming mai gyung sô htoq lo é hkyô má hku lé lo é bang bànshoq gi, ahpyo-kuq a hpyit shi kó nghut ri. 6 Isira-elaq byu pé gi, Egutuq ming mai htoq lo é gyè zan gé é wàqngân wuì lhúnglhâng bang, Yhûmsîng Garaî é dang lé a gyo kômù, shi htûm byùq é hkûn jé shoq, haû yòso má myi xê zàn yhang htòt lhing wún akô nghut ri. Hkâsu mù gâ le, no-naú eq byo-î yui é maumyî, ngá-nhúng lé byi râ ga, yhángmòq é îchyí îwâ pé lé dâkam tô é maumyî haú lé, yhángmòq wó myâng râ a nghut ga, haû Yhûmsîng Garai dâkam tô é yánmai nghut ri. 7 Haû mù, Yoshuq gi, yhángmòq é zodù wuì lé, yhángmòq é gùnglik dông kut yû mù, hkyôwuì má haú bang ahpyo-kuq a hpyit shi kô é nghut mù luî, hau bang lé ahpyo-kuq hpyit byî ri. 8 A-myû gón mâ é yùqgè zo wuî bànshoq bang ahpyo-kuq hpyit é ban hkam yu é htâng, yhángmòq é dàmhkô ge byùq shoq, haû wàp má nyi nyi akô nghut ri.

9 Hau htâng, Yhûmsîng Garai gi, Yoshuq lé, “Hkû-nyí, Ngò, núngmòq chyáng mai, Egutuq ming má nyi hkun lhê é hoq hpu hkyô lé tu lhêng pyám byi bê.” ga taî ri. Haû mù, jowò haú lé, hkû-nyí jé shoq Giligala gâ nyi akô nghut ri.

10 Isira-elaq byu pé gi, Yerihko pá mâ é Giligala jowò má wàp xuq nyî kô é hkûn, lhôhkyap hau é raxe myi nyí nyí, myínhtâng zó lé, Lhoqlhai Poî kut akô nghut ri. 11 Lhoqlhai Poî ban é htang nyí má yhang, yhángmòq gi, haú mau mai htoq é, múnchi a bo é mùk eq gùqshin pé lé zo bekô nghut ri. 12 Haú mau mâ é zoshuq zô é htang nyí mai gi, mannaq mùk a gyó byùq lo nghut ri. Isira-elaq byu pé gi, mannaq mùk a myàng zo lo kó; nghut kôlhang, yhángmòq gi, haú zàn má Hkanan mau mai htoq é zoshuq pé myàng zo bekô nghut ri.

Yoshuq Eq Shâm Chung É Byù Rayùq

13 Ahkuî, Yoshuq gi, Yerihko wà mó nàm má nyi nyi é u lé, yhang tu wú kat le, yhâng é myòq hí má, lòq má shâm chûng tô é byù rayùq yàp tô é lé, myàng kat luî, haú yùq chyáng ê mù, “Nàng gi, ngá-mòq é matú nghut lhê lhú? Haû a nghut jáng, ngá-mòq é gye pê é matú nghut lhê lhú?” ga ê myî ri.

14 Haú yùq gi, “Hkâ le a nghut; haû Yhûmsîng Garaî é gyè hpûng é gyèzau kut râ matú, ahkuî ngò lé lo é ru nghut lhê.” ga tû taî ri. Haú hkûn, Yoshuq gi, hkúnggâ é i‑myìt mai, myigùng htoq má ngóm gòp luî, “Ngá é Yhûmsîng ê, náng é duìnhâng zoshâng lé, haî taí nau ri lhú?” ga yhang lé myî ri.

15 Yhûmsîng Garaî é gyè hpûng é gyèzau gi, “Náng é hkyî-tsung hkyut aq; hkâsu mù gâ le, nàng yàp tô é jowò haû gi, chyoiyúng é jowò nghut lhê.” ga taî ri. Haû mù, Yoshuq gi, haû su gâ é eq rajung za kut bê nghut ri.