Yerihko Wà Mó Htên Byòq Byùq É Hkyô
6
Ahkuî, Yerihko wà mó hkum gi, Isira-elaq byu pê é yánmai, tíng tíng myhî pyâm tô bekô nghut mù, ó yùq lé htoq htoq wàng wàng a wó kut lo kó nghut ri.2 Haú hkûn, Yhûmsîng Garai gi, Yoshuq lé, “Wú aq, Yerihko wà mó lé le, haú mâ é hkóhkâm eq wum-o bo é sarhê pé lé le, Ngò, náng lòq má àp byî to bê nghut lhê. 3 Haû mù, wà mó haû lé, gyèzô pé bànshoq bang eq rahá kut, hkyuq nyí jé shoq ra-nyí radàm lhînghkyùq sô lhîng keq. 4 Hkyangjong nyhit yùq gi, sàksé dò hí má, bainám hkyui èq saî é tut nyhit lhum wàq so ra râ nghut lhê. Nyhit nyí nghu é nyí má gi, hkyangjông pé tut mùt mù, wà mó haú lé nyhit lhîng chôm sô lhîng ra kôrâ nghut lhê. 5 Bainám hkyui èq saî é tut mùt myhîng nyi é htê lé wó gyo kôjáng, haû shiwa byù bànshoq bang gi, htê mó èq chôm garu ra kôrâ nghut lhê; haú hkûn, wàhkûm gi, byòq htên byùq râ nghut mù, yùq hkangmó gi, yhûmsîng hîhu tô é wà mó hkaû shut nyâng za wang ló ra kôrâ nghut lhê.” ga taî ri.
6 Haû mù, Nun é yhang zo Yoshuq gi, hkyangjông pé lé ji yù mù, yhángmòq lé, “Haû Yhûmsîng Garaî é dangshikaq sàksé dò lé wàq mù, sàksé dò hau é hí má, hkyangjong nyhit yùq lé tut nyhit lhum wàq nhâng keq.” ga taî ri. 7 Hau htâng, yhang gi, shiwa byu pé lé, “Ê mù, wà mó lhînghkyùq ê sô lhing keq; haû shâm lhâm chûng é bang gi, Yhûmsîng Garaî é sàksé dò hí má, so byi kó sháng gàq.” ga hkunmó hkyô ri.
8 Shiwa byu pé lé Yoshuq dang ban taî é htâng, haû Yhûmsîng Garaî é hí má tut nyhit lhum wàq é hkyangjông pé nyhit yùq gi, tut mùt uchyang hí shut e ló akô; Yhûmsîng Garaî é dangshikaq sàksé dò le, yhángmòq é htâng má cháng e ló bê nghut ri. 9 Shâm lhâm chung é bang gi, tut mùt é hkyangjông pê é hí má sô akô; gótû gyèzô pé ra-am gi, hkyangjông pé tut mùt e ló nyî kô é hkûn, haû sàksé dò é htâng má châng sô bum akô nghut ri. 10 Nghut kôlhang, Yoshuq gi, shiwa byu pé lé, “Hkâ garu kó; núngmòq é htê hkâ lhoqhtoq kó; garu keq nghû ngò taî é buìnyì a jé jé gi, dang rahkun lháng hkâtaí kó. Ngò taí jáng shèq garu keq.” ga hkunmó hkyô ri. 11 Haû mù, yhang gi, Yhûmsîng Garaî é sàksé dò lé, wà mó ralhîng hkyùq shoq wàq lhing nhang ri; hau htâng, yhángmòq gi, wàp shut taû ló kôluî, haú myín haú má nô yu akô nghut ri.
12 Yoshuq gi, htang nàpkyó noq le toq luî, hkyangjông pé gi, Yhûmsîng Garaî é sàksé dò lé yu wàq akô nghut ri. 13 Tut nyhit lhum wàq é hkyangjong nyhit yùq gi, Yhûmsîng Garaî é sàksé dò é hí má tut mùt uchyang e ló akô; shâm lhâm chung é bang gi, yhángmòq é hí shut e ló mù, tut xoq xoq mying nyi é u lé, gótû gyèzô pé ra-am gi, Yhûmsîng Garaî é sàksé dò htâng má châng sô bùm akô nghut ri. 14 Haû mù, í nyí nghû râ nyí má le, yhángmòq gi, wà mó lé hkyuq shoq radàm sô lhîng mù, wàp shut dum taû ló akô. Yhángmòq gi, hkyuq nyí yhang, haú su xoq kut akô nghut ri.
15 Nyhit nyí nghû râ nyí má, yhángmòq gi, nàpsûn myòq myàng zó lé toq mù, hí lhê su yhang, haû wà mó lé nyhit dâm hkyuq shoq sô lhing akô. Haú nyí má za, wà mó lé nyhit dâm hkyuq shoq sô lhing akô nghut ri. 16 Nyhit dâm sô hkyuq é u má, hkyangjông pé gi, tut mùt kat kôjáng, Yoshuq gi, shiwa byu pé lé, “Garû kat keq! Haû Yhûmsîng Garai gi, wà mó shî lé, núngmòq é lòq má àp byi bê nghut lhê. 17 Wà mó eq haú mâ é jòq mîjòq, nyì mî-nyî lhúnglháng lé, Yhûmsîng Garaî lé nhông byî é dông lhoqhtên pyám râ nghut lhê. Shiwa myhí Rahap eq yhâng é yhûm má lúng tô é bànshoq bang lé za, chyungxe lhoqlhut to keq; hkâsu mù gâ le, yhang gi, ngá-nhúng nhang kat é jówú su nhik lé lhom haq yu é yánmai nghut lhê. 18 Nghut kôlhang, núngmòq gi, haû lhoqhtên pyám râ nghu é zè rajung jung lé yù jáng, htên byòq hkyô núngmòq chyáng jé râ nghut é yánmai, zè haú pé lé a yù kut keq. Haû a nghut jáng, núngmòq gi, núngmòq chyáng za a nghut, Isira-elaq wàp má le, htên byòq hkyô eq wuîhke jamjau hkyô hui nhâng râ nghut lhê. 19 Haû hîng eq ngùn, gyi zê eq jòqtoq zè pé bànshoq gi, Yhûmsîng Garaî é matú chyoiyúng é nghut mù, Yhâng é sùtdò má kat to ra râ nghut lhê.” ga hkunmó hkyô ri.
20 Hkyangjông pé tut mùt kat jáng, shiwa byu pé gi, garû bum akô. Tut htê lé shiwa byu pé wó gyo luî, yhángmòq, htê mó èq garû kat kô é hkûn, haû wà mó lé wam tô é wàhkûm gi, byòq htên byùq bê nghut ri. Haû mù, yùq hkangmó gi, nyâng za wà mó hkaû shut wang ló kômù, wà mó haú lé sing yù bekô nghut ri. 21 Yhángmòq gi, haû wà mó má nyi é myiwe yùqgè, tiq zo ko zo, sau bainám eq no myang lhúnglháng lé, yhángmòq é sham èq haî lháng a myhit to loshoq sat pyám bekô nghut ri.
22 Yoshuq gi, haú mau má jó ê wú lò su nhik lé, “Núngnhik gi, haû shiwa myhî yhûm má ê mù, yhang lé núngnhik dâkam tô é eq rajung za, yhang lé le, yhâng é yhûm má nyi tô é bang bànshoq lé le, ê shuî htoq lò keq.” ga taî ri. 23 Haû mù, jó ê wú é zorâm haû í yùq gi, Rahap é yhûm má wang ê luî, yhang lé le, yhâng nu yhâng wa lé le, yhang gu yhang mâng pé lé le, yhâng chyáng nyi tô é bang bànshoq lé le, yhâng é yhûmbyù wuì bànshoq lé le shuî htoq yù mù, Isira-elaq wàp shinggan mâ é jowò ralhum má nyhi tô akô nghut ri.
24 Hau htâng, yhángmòq gi, wà mó eq haú má jòq mîjòq nyi mî-nyì lé nyhê hkyô pyâm akô. Nghut kôlhang, yhángmòq gi, hîng, ngùn, gyi zê eq jòqtoq zè pé lé yù mù, Yhûmsîng Garaî é yhûm mâ é sùtdò má kat tô akô nghut ri. 25 Nghut kôlhang, shiwa myhí Rahap gi, Yerihko wà mó lé jówú râ matú, Yoshuq nhang kat é jówú su nhik lé, lhom haq yu é yánmai, Yoshuq gi, yhang eq yhâng yhûmbyù wuì lé le, yhâng yhûm má nyi tô é bang bànshoq lé le, chyungxe lhut byi bê nghut mù, yhang gi, hkû-nyí jé shoq, Isira-elaq byu pê chyáng bo nyi nyi ri.
26 Haú u lé, Yoshuq gi, “Yerihko wà mó shi lé dum xuq é sû gi, haû Yhûmsîng Garaî é hí má, nhîng pyâm é hui zo sháng gàq;
Yhang, wà mó é a-pûn awang xuq é hkûn,
yhang zo zo-mún shi byùq sháng gàq,
yhang, wà mó hkum tsuq é hkûn,
yhang zo zohtáng shi byùq sháng gàq.” ga dakâm dang taî ri.
27 Haû mù, Yhûmsîng Garai gi, Yoshuq eq rahá nghut nyi é yánmai, Yoshuq é hkyô gi, ra-mau gón hû ló bê nghut ri.