Yoshuq 7

Ahkan É Yubàk Mara Eq Dàm Byi Huî É Hkyô

Nghut kôlhang, Isira-elaq byu pé gi, lhoqhtên pyám keq gâ é zè eq séng luî, mara kut shut bekô nghut ri. Hkâsu mù gâ le, Yudaq up, Zera koq mâ é, Zapdi é yhang shu, Hkarimi é yhang zo Ahkan gi, haû lhoqhtên pyám keq gâ é zè ra-am lé yu é yánmai, Yhûmsîng Garai gi, Isira-elaq byu pé lé nhikmó-yo bê nghut ri.

2 Ahkuî, Yoshuq gi, byù ra-am lé, “Doq ê mù, maumyî jó ê wú lô keq.” ga taî luî, Behtela buìhtoq hkyâm, Bet Awen nàm mâ é Ai wà mó shut, Yerihko wà mó mai yhángmòq lé nhang kat ri; haû mù, haú bang gi, ê luî, Ai wà mó lé jó ê wú bekô nghut ri.

3 Yhángmòq gi, Yoshuq chyáng dum taû lò mù, yhang lé, “Bànshoq bang, Ai wà mó lé ê zan nó a ra. Byù í sum hkyîng kô lé ê zan nhâng jáng, wó zân ung yù râ nghut lhê; bànshoq bang lé lhoqhkyik nó a ra; hkâsu mù gâ le, wà haú má byu a myo nghut ri.” gâ taî akô nghut ri. 4 Haû mù, byù sum hkyîng kô dòq e ló bekô; nghut kôlhang, yhángmòq gi, Ai wà mó byu pê é hí mai hpang zùt ló bekô nghut ri. 5 Ai wà mó byu pé kúm gi, yhángmòq mâ é 36 yùq kô lé sat pyám byi kômù, Isira-elaq byu pé lé, wà hkúmdong mai lùq bùm yò nghut é Shebarim jé shoq châng hkat kôluî, hkêgyó má yhángmòq lé sat htûm pyám bekô nghut ri; shiwa byu pé gi, wuì su myìt wum shun byùq bekô nghut ri.

6 Haû mù, Yoshuq gi, yhâng é bu lé lâng cheq pyám mù, haû Yhûmsîng Garaî é sàksé dò hí má, myigùng jé shoq myòqdong ngóm gòp luî, myínhtâng jé shoq jâng gòp tô ri. Isira-elaq byu pê é sûwún wuî le, haû eq rajung za kut kômù, yhángmòq é ulhum htoq má hpuílhup kyaq hpyûn akô nghut ri. 7 Hau htâng, Yoshuq gi, “Ahko Ahkáng lhúnglháng wó Sû Yhûmsîng Garai ê, Nàng gi, haî mù, ngá-mòq lé, Amori byu pê é lòq má àp pyám mù, ngá-mòq lé lhoqhtûm pyám râ matú, Yodan làng lé shuî laî byìt é lhú? Ngá-mòq, Yodan làng hé hpoq má, rû nyi tô le gi, je gè berâ nghut lhê wá! 8 Yhûmsîng Garai ê, Isira-elaq byu pé gi, gye pê é hí mai zùt hpang ló byùq bekô nghut é yánmai, ngò haî wó taí lo râ lhú? 9 Hkanan byu pé eq haú mau mâ é byù góbang gi, haú hkyô lé wó gyo kôrâ nghut mù, yhángmòq gi, ngá-mòq é lhînghkyùq má kyâm lhîng to luî, ngá-mòq é myìng lé, myìdàm htoq mai lhoqhpyuq pyám byi kôrâ nghut lhê. Haû jáng, Nàng gi, Náng é myìng mó é matú hkâsu kut lo râ lhú?” ga taî ri.

10 Yhûmsîng Garai gi, Yoshuq lé, “Toq aq! Haî mù myòqdong ngóm gòp nyi lhê lhú? 11 Isira-elaq byu pé gi, mara kut shut bekô; yhángmòq lé cháng keq nghû, Ngò hkunmó hkyô tô é dangshikaq lé, yhángmòq a cháng kut pyám bekô nghut ri. Yhángmòq gi, lhoqhtên pyám keq nghu é zè ra-am lé yu akô; yhángmòq gi, hkaû yù kômù, mhaú kôluî, yhûmsing é sùtzè pé eq rahá kat tô akô nghut ri. 12 Haû mù, Isira-elaq byu pé gi, yhángmòq é gye pé lé a wó htuqhtíng lo kó nghut ri; yhángmòq gi, lhoqhtên pyâm é hui râ bang dùt byùq bekô nghut é yánmai, gye pê é hí mai hpang tau bekô nghut ri. Núngmòq chyáng mâ é lhoqhtên pyâm râ nghut é zè pé lé, núngmòq lhoqhtên pyâm é za a nghut jáng, Ngò, núngmòq eq rahá nyì râ a nghut lo.

13 Toq mù, shiwa byu pé lé lhoqchyoi lhoqyúng aq. Yhángmòq lé, ‘Nàpmá lhê é matú hen lajâng é dông, yhûmsîng gùng yhûmsîng lhoqchyoi lhoqyúng to keq. Hkâsu mù gâ le, Yhûmsîng Garai, haû Isira-elaq byu pê é Garai Gasang taî é gi, Isira-elaq byu pé ê, haû lhoqhtên pyám râ é zè, núngmòq chyáng jòq tô ri. Zè haú pé lé, núngmòq chyáng mai a yu pyám pyám gi, núngmòq é gyè pé lé, núngmòq wó htuqhtîng kôrâ a nghut.

14 Haû mù, nàpmá nàpsûn lé, núngmòq gi, ra-up htâng ra-up, lé htoq shit ra râ nghut lhê. Haû Yhûmsîng Garai hkyin yu é up gi, rakoq htâng rakoq, lé htoq shit ra râ nghut lhê. Haû Yhûmsîng Garai hkyin yu é akoq gi, yhûmhtu ralhûm htâng ralhum, lé htoq shit ra râ nghut lhê. Haû Yhûmsîng Garai hkyin yu é yhûmhtu gi, rayùq htâng rayùq, lé htoq shit ra râ nghut lhê. 15 Haû lhoqhtên pyám râ é zè hkau sû ga hkyîn shosé âng é sû gi, haû Yhûmsîng Garaî é dangshikaq lé lu lai bê nghut mù, Isira-elaq a-myû lé hoq lhoq hpu hkyô kut htoq bê nghut é yánmai, yhang eq yháng sing é bànshoq lé, myî èq nyhê hkyô pyám râ nghut lhê.’ nghû taí aq.” ga taî ri.

16 Yoshuq gi, htang nàpkyó nàpsûn noq le toq mù, Isira-elaq a-myû up pé lé, ra-up htâng ra-up lé, lé lô nhang é hkûn, hkyîn shosé gi, Yudaq up má âng ri. 17 Yudaq a-myû koq pé lé, lé nhang é hkûn, Zera akoq lé hkyin yu ri. Zera akoq mâ é yhûmhtu pé lé, lé nhang é hkûn, hkyîn shosé gi, Zapdi é yhûmhtu má âng ri. 18 Yoshuq gi, Zepdi é yhûmhtu mâ é yhûmbyù wuì rayùq htâng rayùq lé, lé lô nhang é hkûn, Yudaq up, Zera akoq, Zapdi é yhûmhtu mâ é Hkarimi é yhang zo Ahkan chyáng, hkyîn shosé ang bê nghut ri.

19 Hau htâng, Yoshuq gi, Ahkan lé, “Ngá zo ê, Isira-elaq byu pê é Garai Gasang, haû Yhûmsîng Garaî lé hkya-on wàq toq mù, Yhâng é hí má mara yín yù àq. Nàng haî kut bê hkyô lé, a zaú tô é za, ngo lé taî kyo aq.” ga taî ri.

20 Haú hkûn, Ahkan gi, “Haû Yhûmsîng Garai, Isira-elaq byu pê é Garai Gasang lé, ngò mara kut shut é gi, têng lhê. Ngò kut shut é hkyô pé gi, 21 haû wó tsîng yu lo é zè pé mâ é, yúng é Babelon buhîng radung lé le, 27 rûng kô bo é ngùnhtung lé le, 7 rûng kô bo é hîng hkyí lé le, ngò myàng luî, haú pé lé wú myòqnòq mù, yu tô é nghut lhê. Zè haú pé lé, ngá é zúm hkaû myigùng má, ngùn lé je ahte má kat luî, haq myhup tô é nghut lhê.” ga tû taî ri.

22 Haû mù, Yoshuq gi, duìnhâng zoshâng wuì lé nhang kat jáng, haú bang gi, zúm shut din wang ê bekô. Zè haú pé gi, yhâng é zúm hkaû mâ é myigùng má, ngùnhtung lé je ahte má kat luî, haq tô é lé, ê myang ho akô nghut ri. 23 Yhángmòq gi, zè haú pé lé zúm hkaû mai yu htoq lô kômù, Yoshuq eq Isira-elaq byu pé bànshoq bâng chyáng yu lò kôluî, haû Yhûmsîng Garaî é hí má tô to bekô nghut ri.

24 Hau htâng, Yoshuq eq Isira-elaq byu pé bànshoq bang gi, Zera é yhang zo Ahkan lé le, ngùn, buhîng, hîng hkyí pé lé le, yhâng é yùqzo byìzô pé lé le, yhâng é no myang, sau bainám pé lé le, yhâng é zúm eq yhang wó mîwó lé le, Ahkora gâ é langhkaû shut chyup e ló bekô nghut ri. 25 Yoshuq gi, Ahkan lé, “Nàng gi, haî mù, îsû é wuîhke hkyô, ngá-nhûng chyáng shuî hâng yu lhê lhú? Haû Yhûmsîng Garai gi, hkû-nyí, náng chyáng wuîhke jamjau hkyô jé nhâng berâ nghut lhê.” ga taî ri.

Hau htâng, Isira-elaq byu pé bànshoq bang gi, Ahkan lé le, yhâng é yhûmbyù wuì lé le, lùqgòk èq dú sat pyám kômù, yhâng é zè pé eq rahá nyhê hkyô pyám bekô nghut ri. 26 Yhángmòq gi, Ahkan é ahtoq má, lùq bùm mó dùt shoq lùqgòk wàq bum akô; lùq bùm mó haû gi, hkû-nyí jé shoq jòq tô ri. Hau htâng, Yhûmsîng Garaî gi, nhikmó-yô é buî ló byùq bê nghut ri. Haû mù, haú hkûn mai, jowò haú lé Ahkora langhkaû ga hkû-nyí jé shoq myhîng nyi akô nghut ri.