Ai Wà Mó Lé Lhoqhtên Pyâm É Hkyô
8
Hau htâng, Yhûmsîng Garai gi, Yoshuq lé, “Hkâgyùq, myìt wum hkâgyui; gyèzô pé lhúnglháng lé shuî chûng mù, Ai wà mó shut gyè toq keq. Hkâsu mù gâ le, Ngò gi, Ai hkóhkâm eq yhâng é byu pé lé le, yhâng é wà mó eq yhâng é maumyî pé lé le, náng é lòq má àp byî to bê nghut lhê. 2 Nàng gi, Yerihko wà mó eq haú mâ é hkóhkâm lé kut é su, Ai wà mó eq haû mâ é hkóhkâm lé le kut ra râ nghut lhê. Nghut kôlhang, shí dá gi, wó tsîng yu é zè pé eq shigu gaunyhaû pé lé gi, ó le ô é matú wó yû kôrâ nghut lhê. Wà mó hau é nùnghtáng shut haq lhom to nhâng àq.” ga taî ri.3 Haû mù, Yoshuq eq gyèzô pé lhúnglhâng bang gi, Ai wà mó lé htim râ matú htoq e ló bekô. Yoshuq gi, gyè zan kûng é sarhê sûm mun lé hkyin yù mù, myín lé yhang, haú bang lé nhang kat bê nghut ri. 4 Yhang, haú bang lé hkunmó hkyô kat é gi, “Rago gyô yù keq; núngmòq gi, wà mó nùnghtáng shut ê haq lhom to keq. Wà mó eq hkâlûm we kó. Bànshoq bang rì rì kut to keq. 5 Ngò eq ngò shuî chung é bang bànshoq gi, wà mó shut chyâng htèp e ló râ nghut lhê. Haú hkûn, Ai wà mó byu pé gi, yhángmòq hí lé kut kô é su, ngá-mòq lé htîm htoq lô kô é hkûn, ngá-mòq gi, hpâng byi râ nghut lhê. 6 Haú hkûn, ‘Yhángmòq gi, hí lhê su, ngá-nhûng chyáng mai dum hpâng bekô.’ ga taí kômù, wà mó eq we we, yhángmòq lé ngá-mòq wó nhân yu é jé shoq, ngá-mòq lé châng hkat kôrâ nghut lhê. Haû mù, ngá-mòq le, yhángmòq chyáng mai hpâng râ nghut lhê. 7 Haú hkûn, núngmòq gi, haq lhom tô é jowò mai htoq mù, wà mó haú lé zân yù ra râ nghut lhê. Núngmòq é Garai Gasang, haû Yhûmsîng Garai gi, núngmòq é lòq má, wà mó haú lé àp byi râ nghut lhê. 8 Núngmòq gi, wà mó lé wó zân ung yù kôjáng, haû Yhûmsîng Garai hkunmó hkyô tô é eq rajung za nyhê pyám keq. Shî gi, núngmòq lé ngò hkunmó hkyô tô é dang nghut bê.” gâ ri.
9 Haû mù, Yoshuq gi, yhángmòq lé nhang kat bê nghut luî, yhángmòq gi, ê haq lhom to râ matú, Ai wà mó é buìwàng hkyam shut mâ é Behtela eq Ai wà mó é gyoro má ê jé mù, lhom to bekô nghut ri. Yoshuq kúm gi, haú myîn lé, shiwa byu pé eq rahá nyi nyi ri.
10 Yoshuq gi, nàpsûn noq le toq mù, yhâng é byu pé lé ji tsîng yù luî, Isira-elaq byu pê é zau sûwún wuî eq rahá, haú bang lé, Ai wà mó shut hkyô-u shuî she e ló bê nghut ri. 11 Yhang eq gyè hpúng gón gi, yán dòq ê kôluî, wà mó yàm má ê jé kôjáng, Ai wà mó eq langhkaû kyo é mautsûng hkyam shut gyèwap ê xuq tô bekô nghut ri. 12 Yoshuq gi, gyèzo ngo hkyîng kô hkyin htoq yû luî, Ai wà mó é buìwàng hkyam shut mâ é Behtela eq Ai wà mó é gyoro má, yhángmòq lé ê haq lhôm nhang to bê nghut ri. 13 Yhángmòq gi, wà mó hau é mautsûng shut xuq tô é wàp mâ é bang bànshoq lé le, buìwàng hkyam shut haq lhom tô é gyèzô pé bànshoq lé le, jowò hkyô to bekô nghut ri. Haú myîn, Yoshuq gi, langhkaû agùng má gyó e ri.
14 Ai hkóhkâm gi, haú lé myàng jáng, yhang eq wà mó mâ é yùqgè wuì lhúnglhâng bang eq rahá, nàpsûn noq le toq kômù, Isira-elaq byu pé lé htim râ matú, Araba hí mâ é, masàt tô é jowò má hân hân htoq e ló bekô nghut ri. Nghut kôlhang, hkóhkâm gi, yhang lé htim râ matú, wà mó nùnghtáng má haq lhom to kô é hkyô lé a sé nghut ri. 15 Yoshuq eq Isira-elaq byu pé bànshoq bang gi, nùngzut zùt hpang mhaú kôluî, yòso shut hpang wang ló byùq bekô nghut ri. 16 Haú bang lé châng hkat râ matú hpùq kat jáng, Ai wà mó mâ é yùqgè wuì bànshoq bang gi, Yoshuq lé châng hkat kô é nghut mù, wà mó mai shuî nhân htoq ló é hui zo bekô nghut ri. 17 Ai wà mó eq Behtela wà mâ é yùqgè wuì gi, Isira-elaq byu pé lé a châng hkat é rayùq lháng a nyi lo kô é nghut mù, wà mó hkum há há hpông hâ tô kôluî, Isira-elaq byu pé lé chôm hkat e ló bekô nghut ri.
18 Haú hkûn, Yhûmsîng Garai gi, Yoshuq lé, “Náng lòq má chung tô é lhâm lé, Ai wà mó shut tûn kat àq. Hkâsu mù gâ le, Ngò, wà mó haú lé náng é lòq má àp byi râ nghut lhê.” ga taî ri. Haû mù, Yoshuq le, yhâng é lhâm lé, Ai wà mó shut tûn kat bê nghut ri. 19 Yhang haû su kut kat eq, haq lhom tô é bang gi, ó le ô é jowò mai hân hân toq mù, wà mó shut din yán wang ló bekô. Yhángmòq gi, wà mó hkaû má wàng mù, wà mó haú lé sing yù luî, hân za myi nyhê kat bekô nghut ri.
20 Ai wà mó byu pé gi, dum taû lhing wú kat le, wà mó nyé é myihkau dùm, mauhkûng shut dòq ló nyi é lé myàng kat kô é htoq agó, yòso shut hpang wang mhaû ló kô é Isira-elaq byu pé mai, yhángmòq lé dum taû htîm lô kô é nghut mù luî, hká shut le a dàt hpâng lo dùt byùq bekô nghut ri. 21 Haû haq lhom tô é gyèzô pé mai wà mó lé wó sing yù bê hkyô eq wà mó mai myihkau dum htoq nyi é lé, Yoshuq eq Isira-elaq byu pé myàng kôjáng, yhángmòq gi, dum lhing tau mù, Ai wà mó byu pé lé htim bekô nghut ri. 22 Haû haq lhom tô é bang le, wà mó mai htoq kômù, chôm htim bekô. Haû mù, Ai wà mó byu pé gi, Isira-elaq byu pê èq, gung gûng má í shut mai nyhâm chap é hui kômù, wó hpang lùt é le, chyungxe wó dui tô é le a bò loshoq sat kyop pyâm é hui bekô nghut ri. 23 Nghut kôle, Isira-elaq byu pé gi, Ai hkóhkâm lé duì gù chyup yû kômù, Yoshuq chyáng shuî ló byî akô nghut ri.
24 Isira-elaq byu pé gi, pá pé má hpang myín bum é eq, yòso má yhángmòq lé châng hkat é Ai wà mó byu pé lhúnglháng lé, sham èq ban sat pyám kô é htâng, wà mó shut dum taû ló kômù, wà mó haú má nyi myìt to láng é bang lé le sat tâng pyám bekô nghut ri. 25 Haú nyí lé, Ai wà mó byù yùqgè myiwe bànshoq ramûn èq í hkyîng shi byùq bê nghut ri. 26 Haú su dùt é gi, Ai wà mó má nyi é byù lhúnglhâng bang lé sat htâng pyâm é hkûn jé shoq, Yoshuq, yhâng é lòq má chung tô é lhâm lé a hkyó kut é yánmai nghut ri. 27 Nghut kôlhang, Isira-elaq byu pé gi, Yoshuq lé Yhûmsîng Garai hkunmó hkyô tô é eq rajung za, wà mó haû mâ é wó tsîng yu é zè pé eq no myang pé lé, ó le ô é matú hkyom yu akô nghut ri.
28 Haû mù, Yoshuq gi, Ai wà mó lé nyhê hkyô pyám luî, ahtum abyùq é a-pyâng bùm kut pyâm é nghut mù, hkû-nyí jé shoq chamchyuîyuì dùt to bê nghut ri. 29 Yoshuq gi, Ai hkóhkâm lé, myínhtâng jé shoq sikgâm má tuî lhâng tô ri; Yoshuq sang tô é eq rajung, buì gyum ló jáng, màng haú lé sikgâm mai hpyi hkyô yù luî, wà mó wâng hkúmdong má dú lheq to mù, màng htoq má lùqgòk bùm mó wàq bum tô akô. Lùq bùm haû gi, hkû-nyí jé shoq jòq tô ri.
Ebala Bùm Má Târâ Nghap Kyô É Hkyô
30 Hau htâng, Yoshuq gi, Isira-elaq byu pê é Garai Gasang, haû Yhûmsîng Garaî é matú Ebala bùm htoq má hkungga gyàp ralhum saî tô ri; 31 haû gi, Yhûmsîng Garaî é duìnhâng zoshâng Mosheq mai, Isira-elaq byu pé lé hkunmó hkyô tô é eq rajung za nghut ri. Yhang gi, jòqtoq zè a chung é, lùq cham roq roq èq saî é hkungga gyàp ralhum lé, Mosheq é târâ laiká bùk má kâ tô é eq rajung za saî to bê nghut ri. Haú má, Yhûmsîng Garaî é matú myi nyhé hkungga eq zùmhkaû hkungga lé nhông byî akô nghut ri. 32 Hau htoq agó, Isira-elaq byu pê é myòq hí má, Yoshuq gi, Mosheq kâ tô é târâ lé lùqgòk htoq má htòt kâ tô ri. 33 Hí lé, Isira-elaq byu pé lé shimân dang taí râ hkûn, hkâsu kut râ lé, haû Yhûmsîng Garaî é duìnhâng zoshâng Mosheq shit kyô tô é eq rajung za, Isira-elaq byu pé bànshoq bang le, yhángmòq é nhik bô zaugun sûwún wuî eq târâ agyì wuì le, byù bíng eq a-myû kyîng pé bànshoq le, haû Yhûmsîng Garaî é dangshikaq sàksé dò wàq é hkyangjong Lewiq byu pé eq, dangshikaq sàksé dò é hí má, í hkyam kut yàp mù, rawuí gû gi, Gerizim bùm shut nùnghtáng hû, rawuí gû gi, Ebala bùm shut nùnghtáng hû kut luî, yàp tô bum akô nghut ri.
34 Hau htâng, Yoshuq gi, târâ laiká bùk má kâ tô é eq rajung za, shimân jeju dang eq nhing hkun pé nghut é târâ dang bànshoq lé nghap kyô ri. 35 Yoshuq gi, myiwe wuì le, zoshâng wuì le, yhángmòq chyáng bo nyi é byù bíng pé le mù, zîng tô é Isira-elaq byù lhúnglháng bâng é hí má, Mosheq hkyô tô é hkunmó pé rahkun lháng a myhit to loshoq nghap kyô bê nghut ri.