<<    <     Yoshuq     9     >    >> 
Gibe-on Byu Pé Hpàqchyî Dâ É Hkyô
9
Ahkuî, Yodan làng buìwàng hkyam shut mâ é, bum mau pá mau, Medihteri-an Wuimau yàm bànshoq mai Lebanon bùm jé shoq má nyi é, Hiti byù, Amori byù, Hkanan byù, Perizi byù, Hiwi byù eq Yebusi byu pê é hkóhkâm pé bànshoq gi, Isira-elaq byu pê é hkyô lé wó gyô bum akô nghut ri. 2 Yhángmòq gi, Yoshuq eq Isira-elaq byu pé lé majan zan râ matú, chôm zùp zîng bum akô.
3 Nghut kôle, Gibe-on byu pé gi, Yerihko wà mó eq Ai wà mó lé, Yoshuq hkâsu kut laî lo é hkyô lé wó gyo kôjáng, 4 yhang lé ê mhuí râ matú haq da bekô. Yhángmòq gi, jihpya xau pé eq ajèq a-myhâ hpo tô é, tsibyiq kat é sho-kuq htûng pé lé, yhángmòq é loze htoq má hto mù, duìnhâng lagyo dông e ló bekô nghut ri. 5 Haú bang gi, ahpô adau dùt é hkyî-tsung xau tsûng luî, ajèq a-myha é mèbu xau wùt chung akô; yhángmòq é zoshuq mùk bànshoq gi, kyuq hkong byùq mù, mhungzúng zui mâ é nghut ri. 6 Yhángmòq gi, Giligala má wàp xuq luî nyi tô é Yoshuq chyáng ê jé mù, yhang eq Isira-elaq byu pé lé, “Ngá-mòq gi, núngmòq eq nguì ngón dangshikaq to râ matú, mau we mai jé lé lo é nghut lhê.” ga taî akô.
7 Isira-elaq byu pé gi, haû Hiwi byu pé lé, “Núngmòq gi, ngá-mòq é chyáng nâm má nyi é bang nghut lhê âbe; ngá-mòq gi, núngmòq eq hkâsu kut nguì ngón dangshikaq wó to râ lhú?” ga lhom tû taî akô.
8 Yhángmòq gi, “Ngá-mòq gi, náng é jùn pé nghut lhê.” ga Yoshuq lé taî akô. Nghut kôlhang, Yoshuq gi, “Núngmòq gi, ô pé nghut akô lhú? Hkâmai lé é bang nghut akô lhú?” ga myî ri.
9 Haú hkûn, yhángmòq gi, “Náng é Garai Gasang, haû Yhûmsîng Garaî é mying é yánmai, náng é jùn pé ngá-mòq, gyai wê é mau mai lé lo é nghut lhê. Hkâsu mù gâ le, Yhang, Egutuq ming má kut laî lò bê hkyô pé bànshoq lé le, 10 Yodan làng buìhtoq hkyam mâ é, Heshibon má zung é hkóhkâm Sihon eq Ashatarot má zung é Bashan hkóhkâm Oga gâ é, Amori hkóhkâm nhik lé, Yhang hkâsu kut é hkyô pé bànshoq lé le wó gyô é yánmai nghut lhê. 11 Haû mù, ngá-mòq é nhik bô sûwún wuî eq ngá-mòq mau mâ é mingbyû wuì bànshoq bang gi, ngá-mòq lé, ‘Hkyôwuì mâ é matú, zoshuq yu chûng keq; yhángmòq lé ê hui mù, “Ngá-mòq gi, núngmòq é jùn pé nghut lhê; ngá-mòq eq nguì ngón dangshikaq mhak to sháng.” nghû yhángmòq lé ê taí keq.’ ga taî kat akô. 12 Mùk shî, núngmòq lé lé hui râ matú ngá-mòq yhûm mai htoq lo é buìnyì má gi, nye nye za nghut lhê. Nghut kôlhang, wú keq, ahkuî, mùk shí pé gi, kyuq hkong byùq mù, mhungzúng lháng zuî byùq bê nghut ri. 13 Ngá-mòq, tsibyiq wing kat é hkûn, sho-kuq htûng shí pé gi, asik za ru nghut ashî; nghut kôle, wú keq, ahkuî gi, jèq dông byùq bê. Hkyôwuì lûm wê é yánmai, ngá-mòq é mèbu eq hkyî-tsung pé le, ban xaû byùq bê nghut ri.” ga dum taî akô.
14 Haû mù, Isira-elaq byu pé gi, Yhûmsîng Garai lé hkyang a shit wú kô é za, yhángmòq chyáng mâ é zoshuq lé lhom hàp yu akô nghut ri. 15 Hau htâng, Yoshuq gi, yhángmòq lé chyungxe lhoqtui to râ matú, nguì ngón dangshikaq mhak to bê nghut ri; shiwa byu pê é zaugun wuì le, haû lé lhoq gingtîng é dông dakâm bekô nghut ri.
16 Isira-elaq byu pé gi, nguì ngón dangshikaq mhak é htâng sum nyí lai jáng shèq, Gibe-on byu pé, yhángmòq é chyáng nâm má nyi é yhûmkyochâng pé nghut é lé wó sé akô nghut ri. 17 Haû mù, Isira-elaq byu pé gi, htoq e ló luî, sum nyí nghû râ buìnyì má, haú bâng é wà mó nghut é Gibe-on, Hkehpira, Berot eq Kiri-at Yarim wà mó pé má ê jé akô nghut ri. 18 Nghut kôlhang, shiwa byu pê é zaugun sûwún wuî mai, Isira-elaq byu pê é Garai Gasang, haû Yhûmsîng Garaî é myìng lang luî, chyamwaq to bekô nghut é yánmai, Isira-elaq byu pé gi, haú bang lé a htim lo kó nghut ri.
Nghut kôle, shiwa byù bànshoq bang gi, zaugun sûwún wuî lé myíng myo mara hun bùm akô nghut ri. 19 Nghut kôlhang, zaugun sûwún wuî bànshoq bang tû taí kô é gi, “Isira-elaq byu pê é Garai Gasang, haû Yhûmsîng Garaî é myìng lang luî, ngá-mòq chyamwaq to bê nghut é yánmai, ngá-nhúng, yhángmòq lé wó záng htung lo râ a nghut. 20 Ngá-mòq, yhángmòq eq chyamwaq shut to bê nghut é yánmai, ngá-nhûng chyáng mara dàm je lô râ lé myìt chiq ra bê nghut mù, yhángmòq lé chyungxe lhoqtui to râ hkyô za ru joq alô.” gâ ri. 21 Yhángmòq dum xoq taí kô é gi, “Yhángmòq lé chyungxe lhoqtui to sháng; nghut kôlhang, yhángmòq gi, ngá-nhúng bànshoq bâng é matú, wuì hkâm htang hô bang dùt nyì kó sháng gàq.” gâ ri. Haû mù, yhángmòq gi, zaugun sûwún wuî taî é eq rajung za kut bekô nghut ri.
22 Yoshuq gi, Gibe-on byu pé lé ji yù mù, “Núngmòq gi, ngá-mòq é chyáng nâm má za nyi to kôluî nhîng, ‘Ngá-mòq gi, mau we má nyi é bang nghut lhê.’ nghû, haî mù, ngá-mòq lé mhaú kô é lhú? 23 Ahkuî, núngmòq gi, nhing hkun zùq bê bang nghut bekô; haû mù, núngmòq gi, ngá é Garai Gasâng é yhûm má, ayang wuì hkâm htáng ho é jùn pé dùt nyì kôrâ nghut lhê.” ga taî ri.
24 Yhángmòq gi, Yoshuq lé, “Náng é Garai Gasang nghut é, haû Yhûmsîng Garai gi, shí mau ra-mau gón lé núngmòq é lòq má àp byî pyám mù, shí mau má nyi é byù lhúnglháng lé, núngmòq é hí mai sat htûm pyám râ hkyô lé, Yhâng é duìnhâng zoshâng Mosheq lé hkunmó hkyô tô é lé, náng é jùn pé ngá-mòq rago wó gyo bê nghut lhê. Haû mù, ngá-mòq gi, ngá-mòq é chyungxe byìt râ lé gyùq chiq é yánmai, ngá-mòq haû su kut é nghut lhê. 25 Ahkuî, ngá-mòq gi, núngmòq lòqhkaû má nghut nyi bê; nàng myìt wú le, yó é dông ngá-mòq lé kut àq.” ga tû taî akô nghut ri.
26 Haû mù, Yoshuq gi, yhángmòq lé, Isira-elaq byu pê é lòq má shî râ nghut é mai lhoqlhut yû bê nghut ri. 27 Haú nyí, Yoshuq gi, Gibe-on byu pé lé, haû Yhûmsîng Garai hkyin yù râ jowò nghut é, Yhûmsîng Garaî é hkungga gyàp é matú le, shiwa byu pê é matú le, wuì hkâm htang hô bang kut nhâng bê nghut ri. Yhángmòq gi, hkû-nyí jé shoq lháng, haû su kut nyi bum ashi kô nghut ri.