Garai Gasang Buì Lé Nó Nhang É Hkyô
10
Ahkuî, Yerusalem hkóhkâm Adoni Zedek gi, Yoshuq, Yerihko wà mó eq haû mâ é hkóhkâm lé kut é su, Ai wà mó lé le sing yù mù, bànshoq lhoqhtên pyâm é hkyô lé le, Isira-elaq byu pê é chyáng nâm má nyi é Gibe-on byu pé eq, yhángmòq, nguì ngón dangshikaq mhak to bekô nghut é hkyô lé le, wó gyo bê nghut ri. 2 Haû mù, yhang eq yhâng é byu pé gi, gyai yhang gyùq dan bùm bekô nghut ri. Hkâsu mù gâ le, Gibe-on wà mó haû gi, wà chyûng mó pé su ahkyàk é wà mó ralhum nghut mù, Ai wà mó htoq kô é wà mó nghut luî, wà mó haú mâ é wàqngân wuì bànshoq gi, gyè zan kûng é sarhê pé nghut kô é yánmai nghut ri. 3 Haû mù, Yerusalem hkóhkâm Adoni Zedek gi, Hebron hkóhkâm Hoham, Yarimut hkóhkâm Piram, Lahkisha hkóhkâm Yahpi-a eq Egilon hkóhkâm Debira pê chyáng, lagyo lé, 4 “Gibe-on wà mó gi, Yoshuq eq Isira-elaq byu pê chyáng nguì ngón dangshikaq tô yù bekô nghut é yánmai, Gibe-on wà mó lé ngò ê htim râ nghut lhê; ngo lé, lé garúm kó laq.” ga ê taí nhang ri.5 Hau htâng, Amori hkóhkâm nghut é, Yerusalem hkóhkâm, Hebron hkóhkâm, Yarimut hkóhkâm, Lahkisha hkóhkâm eq Egilon hkóhkâm pé ngo yuq gi, gyèwum chôm tsîng yù kôluî, yhángmòq é gyèzô pé bànshoq eq rahá dòq e ló kômù, Gibe-on wà mó hí má wàp ê xuq kôluî, wà mó haú lé htim bekô nghut ri.
6 Haú mù, Gibe-on byu pé gi, Giligala mâ é wàp má nyi é Yoshuq chyáng, “Náng é jùn pé ngá-mòq lé, hkâtô pyâm to; ngá-mòq chyáng hân lé lô mù, ngá-mòq lé lé hkyi yù laq! Ngá-mòq lé garúm yû laq, hkâsu mù gâ le, bum mau mâ é Amori hkóhkam pé bànshoq gi, gyèwum chôm tsîng yù kômù, ngá-mòq lé htim nyì bekô nghut ri.” ga dáng pying kat akô nghut ri.
7 Haû mù, Yoshuq gi, gyèwap gón eq gyè zan kûng dik é sarhê pé le mù, Giligala mai dòq e ló bê nghut ri. 8 Yhûmsîng Garai gi, Yoshuq lé “Yhángmòq lé hkâgyùq; Ngò, yhángmòq lé náng é lòq má àp byî to bê nghut lhê. Ó yùq le, nang lé lhom wó htuqhtíng râ a nghut.” ga taî ri.
9 Yoshuq gi, yhâng é gyè jùm eq rahá, Giligala mai ra-myin mau sô dòq ló mù, byò dàn htik gyè pé lé ê htim bê nghut ri. 10 Yhûmsîng Garai gi, gyè haú bang lé, Isira-elaq byu pê é hí má, nhúngnhâng byùq nhâng mù, Gibe-on nàm má, Isira-elaq byu pé lé ûngmyuq hkyô mó wó nhâng bê nghut ri. Yhángmòq gi, Bet Horon hkêdòq cháng mù, châng hkat kôluî, Azeka eq Makeda wà mó jé shoq, rahkyô htáng châng hkat sat bekô nghut ri. 11 Haû mù, yhángmòq gi, Isira-elaq byu pê é hí mai hpâng kômù, Bet Horon mai Azeka wà mó shut gyó ló kô é hkûn, haû Yhûmsîng Garai gi, mauhkûng mai lìkwò cham mó pé lé, yhángmòq ahtoq má wo gyun nhang ri. Isira-elaq byu pé sham èq sat é htoq má, lìkwò bàt mù shi é gyè zô pé gi, je myô ri.
12 Hau Yhûmsîng Garai mai, Isira-elaq byu pê é lòq má, Amori byu pé lé àp byî é buìnyì lé, Yoshuq gi, Isira-elaq byu pê hí má, Yhûmsîng Garai lé,
“Buì ê, Gibe-on wà mó htoq má láng byi shilaq;
lha-mó ê, Aiyalon langhkaû má tsô byi shilaq.” ga taî ri.
13 Haû mù, Isira-elaq a-myû wuì mai, gyè pé lé wó zân ung pyâm é jé shoq,
buì gi, láng byî nyì mù, lha-mó gi, tsô byî nyì bê nghut ri.
Haú hkyô eq séng luî, Yashara laiká bùk má kâ to bê a nghut lhí?
Buì gi, ra-nyí kô yhang a wang byùq é za, mauhkûng htoq má nô tô ri. 14 Haû Yhûmsîng Garai mai, haú nyí su kut byù rayùq é dang lé gyo byî é buìnyì gi, hí lé le, htâng nhung má le a jòq é nghut lhê. Gè gè yhang, haû Yhûmsîng Garai gi, Isira-elaq byu pê é matú, majan bo zan byi bê nghut ri myhî-nhung!
15 Hau htâng, Yoshuq gi, Isira-elaq gyè pé bànshoq eq rahá, Giligala mâ é wàp má dum taû lò bê nghut ri.
Amori Hkóhkâm Ngo Yuq Lé Sat Pyâm É Hkyô
16 Ahkuî, haû hkóhkâm ngo yuq gi, wó hpang lùt kômù, Makeda lùqhkyûng hkaû má ló hpang haq nyi tô akô nghut ri. 17 Yoshuq gi, haû hkóhkâm ngo yuq Makeda lùqhkyûng hkaû má haq nyi tô é lé myàng bekô gâ é hkyô lé wó gyo jáng, 18 “Haû lùqhkyûng hkun má lùqmó cham pé lhêng xaû to mù, byù ra-am lé zúng nhang to keq. 19 Núngmòq kúm gi, haû má hkâhkyîng nân nyì kó! Núngmòq é gyè pê htâng cháng luî, nùnghtáng dông yhángmòq lé htîm sat pyám keq. Yhángmòq lé wà mó shut hkâwâng nhâng kó. Núngmòq é Garai Gasang, haû Yhûmsîng Garai gi, yhángmòq lé núngmòq é lòq má àp byî to bê nghut ri.” ga hkunmó hkyô ri.
20 Haû mù, Yoshuq eq Isira-elaq byu pé gi, gyè pé lé sat kyop pyám bekô. Nghut kôle, myìt gyó tô é ra-am gi, gingtîng é yhángmòq é wà mó hkaû shut hpang hkau wang ló bekô nghut ri. 21 Hau htâng, Isira-elaq gyèzô pé lhúnglhâng bang gi, Makeda mâ é wàp má nyi tô é Yoshuq chyáng ngón za dum taû jé lò bekô. Haû mù, rayùq lháng, Isira-elaq byu pé lé htuqhtîng é dang a wám taí lo kó nghut ri.
22 Yoshuq gi, “Lùqhkyûng hkun ê hpóng mù, haû hkóhkâm ngo yuq lé, ngá chyáng ê shuî htoq lò keq.” ga taî ri. 23 Haû mù, yhángmòq gi, hkóhkam ngo yuq nghut é Yerusalem hkóhkâm, Hebron hkóhkâm, Yarimut hkóhkâm, Lahkisha hkóhkâm eq Egilon hkóhkam pé lé lùqhkyûng mai ê shuî htoq lò bekô nghut ri. 24 Yhángmòq gi, hkóhkâm haú bang lé, Yoshuq chyáng shuî jé lé kôjáng, Yoshuq gi, Isira-elaq byu pé bànshoq bang lé ji yù mù, yhang eq rahá majan toq lé lo é gyèzaû pé lé, “Shí má lé lô mù, hkóhkâm shí bâng é lìngzing má lé nang keq.” ga taî ri. Haû mù, yhángmòq gi, lé lô kômù, hkóhkâm haú bâng é lìngzing má hkyi èq nang bekô nghut ri.
25 Haû mù, Yoshuq gi, haú bang lé, “Haû Yhûmsîng Garai gi, núngmòq zân e ló râ gyè pé bànshoq lé îsu kut râ nghut é yánmai, hkâgyùq kó; myìt wum hkâgyui kó; wum-o lhoqkíng luî, myìt wum lhoqhtan to keq.” ga taî ri. 26 Hau htâng, Yoshuq gi, hkóhkâm haú bang lé sat pyám mù, sikgâm ngo gâm má tuî lhâng tô ri. Màng haú pé lé, myínhtâng jé shoq sikgâm má jâng tuî lhâng tô akô nghut ri.
27 Myínhtâng buì gyùm jáng, Yoshuq hkunmó hkyô é eq rajung za, yhángmòq gi, màng haú pé lé, sikgâm mai hpyi hkyô yù kômù, yhángmòq haq lúng laî lo é lùqhkyûng hkaû shut dú hâng kat kôluî, lùqhkyûng hkun má lùqgòk mó pê èq xaû to bekô nghut ri. Haû gi, hkû-nyí jé shoq jòq tô ashî.
Maupyî Mâ É Wà Mó Pé Lé Zân Ung Yu É Hkyô
28 Haú nyí yhang, Yoshuq gi, Makeda wà mó lé zân ung yù mù, rayùq lháng a myìt to loshoq, wà mó haú má nyi é yùq hkangmó lé le, wà mó hau é hkóhkâm lé le, chyut yhang sham èq sat htûm pyám bê nghut ri. Yhang gi, Yerihko wà mó mâ é hkóhkâm lé kut é su, Makeda wà mó mâ é hkóhkâm lé le kut bê nghut ri.
29 Hau htâng, Yoshuq gi, yhang eq rahá nghut nyi é Isira-elaq byu pé bànshoq bang le mù, Makeda mai Lipna wà mó shut htoq e ló kômù, wà mó haú lé ê htim bekô nghut ri. 30 Haû Yhûmsîng Garai le, wà mó haû eq hau é hkóhkâm lé, Isira-elaq byu pê é lòq má àp byî to bê nghut mù luî, Yoshuq gi, rayùq lháng a myìt to loshoq, wà mó haú má nyi é yùq hkangmó lé, chyut yhang sham èq sat htûm pyám bê nghut ri. Yhang gi, Yerihko wà mó mâ é hkóhkâm lé kut é su, haú mâ é hkóhkâm lé le kut bê nghut ri.
31 Hau htâng, Yoshuq gi, yhang eq rahá nghut nyi é Isira-elaq byu pé bànshoq bang le mù, Lipna mai Lahkisha wà mó shut htoq e ló kôluî, jowò ê yû kômù, wà mó haú lé htim bekô nghut ri. 32 Haû Yhûmsîng Garai gi, Lahkisha wà mó lé, Isira-elaq byu pê é lòq má àp byî to bê nghut mù, Yoshuq gi, htang nyí yhang, wà mó haú lé wó sing yù bê nghut ri. Yhang gi, wà mó haú má nyi é byù yùq hkangmó lé, Lipna wà mó lé kut é su, sham èq sat htûm pyám bê nghut ri. 33 Haú u lé, Gezera hkóhkâm Horam gi, Lahkisha wà mó lé garúm râ ga dòq lé ri; nghut kôlhang, Yoshuq gi, hkóhkâm haû eq yhâng é gyèzô pé lé, rayùq lháng a myìt to loshoq lhom sat pyám bê nghut ri.
34 Hau htâng, Yoshuq gi, yhang eq rahá nghut nyi é Isira-elaq byu pé bànshoq bang le mù, Lahkisha mai Egilon wà mó shut htoq e ló kômù, jowò ê yû kôluî, wà mó haú lé htim bekô nghut ri. 35 Haú nyí yhang, yhángmòq gi, wà mó haú lé zân ung yù kômù, yhángmòq Lahkisha wà mó lé kut kô é su, wà mó haú má nyi é yùq hkangmó lé, chyut yhang sham èq sat htûm pyám bekô nghut ri.
36 Hau htâng, Yoshuq gi, yhang eq rahá nghut nyi é Isira-elaq byu pé bànshoq bang le mù, Egilon mai Hebron wà mó shut dòq e ló kôluî, wà mó haú lé htim bekô nghut ri. 37 Yhángmòq gi, wà mó haú lé zân ung yù kômù, rayùq lháng a myìt to loshoq, wà mó hau é hkóhkâm lé le, wà mó haû eq sêng é wà pé má nyi é yùq hkangmó lé le, sham èq sat pyám bekô. Yhángmòq Egilon wà mó lé kut kô é su, wà mó haú má nyi é yùq hkangmó lé, chyut yhang lhoqhtûm pyám bekô nghut ri.
38 Hau htâng, Yoshuq gi, yhang eq rahá nghut nyi é Isira-elaq byu pé bànshoq bang le mù, dum taû lhîng kôluî, Debira wà mó lé htim bekô nghut ri. 39 Yhángmòq gi, wà mó haû eq haú mâ é hkóhkâm lé le, wà mó eq sêng é wà pé lé le, zân ung yù kômù, rayùq lháng a myìt to loshoq, haú pé má nyi é yùq hkangmó lé, chyut yhang sham èq sat htûm pyám bekô nghut ri. Yhángmòq gi, Hebron wà mó, Lipna wà mó eq hau é hkóhkâm lé kut é su, Debira wà mó eq hau é hkóhkâm lé kut bekô nghut ri.
40 Haû mù, Yoshuq gi, ra-mau gón mâ é, bum mau eq Maupyî Mau shut mâ é mau bang lé le, buìwàng hkyam bùmhkyî pá pé eq langhkaû pé mâ é bang lé le, haú mâ é hkóhkâm pé bànshoq lé le, ung pyám bê nghut ri. Yhang gi, Isira-elaq é Garai Gasang, haû Yhûmsîng Garai hkunmó hkyô é eq rajung za, duì mîduî rayùq lháng a myìt to loshoq, chyut yhang sat kyop pyám bê nghut ri. 41 Yoshuq gi, Kadesha Barine-a mai Gaza jé shoq le, Goshen ra-mau gón mai Gibe-on jé shoq le, zân yù bê nghut ri. 42 Isira-elaq byu pê é Garai Gasang, haû Yhûmsîng Garai gi, Isira-elaq byu pê é hkyam shut, bo zan byî é yánmai, Yoshuq gi, radá dâm haû hkóhkâm pé bànshoq eq yhángmòq é maumyî pé lé, wó sing yu pyám bê nghut ri.
43 Hau htâng, Yoshuq gi, Isira-elaq byu pé bànshoq bang eq rahá, Giligala wàp shut dum taû lò bekô nghut ri.