Mautsûng Mâ É Hkóhkâm Pé Lé Zân Ung Yu É Hkyô
11
Hazora hkóhkâm Yabin gi, haú hkyô lé wó gyo jáng, Madon hkóhkâm Yobap chyáng le, Shimron eq Ahkashap mâ é hkóhkam pê chyáng le, 2 mautsûng bum mau mâ é hkóhkam pê chyáng le, Hkineret wa é maupyî shut mâ é Araba langhkaû má nyi é hkóhkam pê chyáng le, buìwàng hkyam shut mâ é bùmhkyî pá pé eq Nahpot Dora mau mâ é hkóhkam pê chyáng le, dang kyô kat ri. 3 Hau htoq agó, yhang gi, buìhtoq buìwàng shut mâ é Hkanan byu pê chyáng le, bum mau má nyi é, Amori byù, Hiti byù, Perizi byù eq Yebusi byu pê chyáng le, Mizipa mau mâ é Herimon bùm ô má nyi é Hiwi byu pê chyáng le, dang kyô kat ashî nghut ri. 4 Hkóhkâm haú bang gi, wuimau yàm mâ é se-muî su myô é yhángmòq é gyè hpúng bànshoq eq le, myang hpûng gyè myanglhêng myo myo eq le, htoq lé lo akô. 5 Hkóhkâm haú bang bànshoq gi, chôm zing kômù, Isira-elaq byu pé lé htim râ matú, Merom wuìlàng yàm má gyèwap xuq to bekô nghut ri.6 Haú hkûn, Yhûmsîng Garai gi, Yoshuq lé, “Yhángmòq lé hkâgyùq. Hkâsu mù gâ le, nàpmá shí u lé, Ngò, Isira-elaq byu pê é lòq má, haú bang lé shî gû àp byi râ nghut lhê. Nàng gi, yhángmòq é myang hkyî pé lé bàt hkyui byi mù, gyè myanglhêng pé lé nyhê hkyô pyám byi râ nghut lhê.” ga taî ri.
7 Haû mù, Yoshuq eq yhâng é gyèzô pé lhúnglhâng bang gi, Merom wuìlàng yàm shut yán dòq ló kômù, yhángmòq lé dàn lòq tung ê htim bekô nghut ri. 8 Haû Yhûmsîng Garai gi, Isira-elaq byu pê é lòq má haú bang lé àp byi bê nghut ri. Isira-elaq byu pé gi, haú bang lé zân pyo kat luî, Sidon wà mó eq Misirehpot Ma-im wà mó jé shoq le, buìhtoq hkyam shut Mizipa langhkaû jé shoq le, châng hkat luî, rayùq lháng a lùt loshoq sat kyop pyám bekô nghut ri. 9 Yoshuq gi, haû Yhûmsîng Garai shit kyô tô é eq rajung za, haú bang lé kut bê nghut ri. Yhang gi, yhángmòq é myang hkyî pé lé bàt hkyui luî, gyè myanglhêng pé lé le nyhê hkyô pyám bê nghut ri.
10 Hau htâng, Yoshuq gi, dum taû lò mù, Hazora wà mó lé zân ung yù luî, hau é hkóhkâm lé sham èq sat pyâm ri. (Haú u lé, Hazora wà mó gi, mîngdán haú pé bànshoq é achyûng nghut ri.) 11 Yhángmòq gi, wà mó haú má nyi é byù yùq hkangmó lé sham èq sat pyâm ri. Rayùq lé lháng chyungxe a duì nhang to lô é za, chyut sat htûm pyám kôluî, Hazora wà mó lé le, nyhê pyám bekô nghut ri.
12 Yoshuq gi, haû hkóhkâm zung é wà mó bànshoq eq yhángmòq é hkóhkâm pé lé zân ung yù mù, haû Yhûmsîng Garaî é duìnhâng zoshâng Mosheq mai hkunmó hkyô tô é eq rajung za, yhángmòq lé chyut yhang sat htûm pyám bê nghut ri. 13 Nghut kôlhang, Isira-elaq byu pé gi, Yoshuq nyhê pyâm é Hazora wà mó mai lai luî, wing bûm má xuq tô é wà mó ralhum lé lháng a nyhê hkyô pyám kó nghut ri. 14 Isira-elaq byu pé gi, wà mó haú pé mâ é gaunyhaú eq wó yu lo é zè pé bànshoq lé, yhángmòq é matú sing yu pyâm akô. Nghut kôlhang, byu pé lé gi, duì mîduî rayùq lé lháng chyungxe a duì nhang to lô é za, chyut yhang sham èq sat htûm pyám bekô nghut ri. 15 Haû Yhûmsîng Garai gi, Yhâng é duìnhâng zoshâng Mosheq lé hkunmó hkyô tô é eq rajung za, Mosheq gi, Yoshuq lé hkunmó dum hkyó bê nghut luî, Yoshuq gi, cháng kut bê nghut ri. Yoshuq gi, haû Yhûmsîng Garai mai Mosheq lé hkyô tô é hkunmó bànshoq lé, a châng kut é rahkun lháng a bò nghut ri.
16 Haû mù, Yoshuq gi, ra-mau gón lé zân ung yù bê. Haú pé gi, bum mau eq Maupyî Mau bànshoq le, Goshen ra-mau gón le, buìwàng hkyam bùmhkyî pá pé le, Araba eq Isira-elaq byu pê é bùm eq bùmhkyî pá pé le, 17 Se-ira shut dòq ló é Halak bùm mai, Herimon bùmhkyî nàm mâ é, Lebanon langhkaû má jòq é Balaq Gat jé shoq nghut ri. Yhang gi, haû mâ é hkóhkam pé bànshoq lé chyup yû mù, sat kyop pyám bê nghut ri. 18 Yoshuq gi, hkóhkâm haú bang bànshoq lé, myáng myáng majan zân ri. 19 Gibe-on wà mó má nyi é Hiwi byu pé mai lai luî, Isira-elaq byu pé eq nguì ngón dangshikaq tô tô é wà mó ralhum lháng a jòq; dangshikaq a tô tô é wà mó pé bànshoq lé gi, majan zan luî chyat wó sing yù kô é nghut ri. 20 Hkâsu mù gâ le, haû Yhûmsîng Garai mai, Mosheq lé hkunmó hkyô tô é eq rajung za, byù haú bang lé ra-tsuí lháng a shogyô é za, bànshoq lé chyut yhang wó sat htûm pyám sháng gàq ga, haû Yhûmsîng Garai gi, Isira-elaq byu pé lé lhom wám htuqhtíng râ matú haú bâng é i‑myìt lé lhoqhtan to byî é yánmai nghut ri.
21 Haú u lé, Yoshuq gi, Anak byu pé lé, Hebron wà mó má le, Debira eq Anap wà mó má le, Yudaq bum mau bànshoq má le, Isira-elaq bum mau bànshoq má le, châng sat htûm pyâm ri. Yoshuq gi, Anak byu pé eq yhángmòq é wà mó pé lé chyut yhang lhoqhtûm pyám bê nghut ri. 22 Anak byu pé gi, Isira-elaq byu pê é mau hkaû má rayùq lháng a nyi myìt to lo kó nghut ri; Gaza, Gahta eq Ashidot wà mó pé má za rû nyi myìt tô alo kô nghut ri.
23 Haû mù, Yoshuq gi, haû Yhûmsîng Garai mai Mosheq lé shit kyô tô é eq rajung za, ra-mau gón lé wó zân ung yu bê nghut ri. Yhang gi, maumyî haû lé silî wunlî ralhum dông, Isira-elaq byu pê é a-myû koq má cháng luî, tsing gàm byi bê nghut ri. Hau htâng, ra-mau gón má majan zîm byùq bê nghut ri.